|| ఓం శ్రీ గణేశాయ నమః ||
గణపతి స్తుతిః
హరిః॑ ఓం
గ॒ణానాం᳚ త్వా గ॒ణప॑తిం హవామహే క॒విం క॑వీ॒నాము॑ప॒మశ్ర॑వస్తమం |
జ్యే॒ష్ఠ॒రాజం॒ బ్రహ్మ॑ణాం బ్రహ్మణస్పత॒ ఆ నః॑ శృ॒ణ్వన్నూ॒తిభిః॑ సీద॒ సాద॑నం || 2 | 23 | 01 ||
(ఋషిః గృత్సమదః, దేవతా బ్రహ్మణస్పతిః, ఛందః జగతీ, స్వరః నిషాదః)
నిషుసీ᳚ద గణపతే గ॒ణేషు॒ త్వామా᳚హు॒ర్విప్ర॑తమం కవీ॒నాం |
న ఋ॒తే తవత్క్రి॑యతే॒ కిం చ॒నారే మ॒హామ॒ర్కం మ॑ఘవంచి॒త్రమ॑ర్చ || 10 | 112 | 09 ||
(నభఃప్రభేదనో వైరుపః, ఇంద్రః, నిచృత్త్రిష్టుప్, ధైవతః)
ఆ తూ న॑ ఇంద్ర క్షు॒మంతం᳚ చి॒త్రం గ్రా॒భం సం గృ॑భాయ | మ॒హా॒హ॒స్తీ దక్షి॑ణేన || 08 | 81 | 01 ||
(కుసీదీ కాణ్వః, ఇంద్రః, గాయత్రీ, షడ్జః)
ఓం శ్రీ మహాగణపతయే॒ నమః॑ ||
పంచరుద్రం:
అథ పంచరుద్రం ప్రారంభః |
(ప్రథమమండలే త్రిచత్వారింశం సూక్తం 1 | 43
ఋషిః కణ్వో ఘౌరః |
దేవతా 1, 2, 4-6 రుద్రః, 3 మిత్రావరుణౌ; 7-9 సోమః |
ఛందః 1-4, 7, 8 గాయత్రీ, 5 విరాడ్గాయత్రీ, 6 పాదనిచృద్గాయత్రీ, 9 అనుష్టుప్ |
స్వరః 1-8 షడ్జః, 9 గాంధారః ||)
హరిః॑ ఓం
కద్రు॒ద్రాయ॒ ప్రచే᳚తసే మీ॒ళ్హుష్ట॑మాయ॒ తవ్య॑సే | వో॒చేమ॒ శంత॑మం హృ॒దే || 1 | 043 | 01 ||
యథా᳚ నో అది॑తిః॒ కర॒త్పశ్వే॒ నృభ్యో॒ యథా॒ గవే᳚ | యథా᳚ తో॒కాయ॑ రు॒ద్రియం᳚ || 1 | 043 | 02 ||
యథా᳚ నో మి॒త్రో వరు॑ణో॒ యథా᳚ రు॒ద్రశ్చికే᳚తతి | యథా॒ విశ్వే᳚ స॒జోష॑సః || 1 | 043 | 03 ||
గా॒థప॑తిం మే॒ధప॑తిం రు॒ద్రం జలా᳚షభేషజం | తచ్ఛం॒యోః సు॒మ్నమీ᳚మహే || 1 | 043 | 04 ||
యః శు॒క్ర ఇ॑వ॒ సూర్యో॒ హిర᳚ణ్యమివ॒ రోచ॑తే | శ్రేష్ఠో᳚ దే॒వానాం॒ వసుః॑ || 1 | 043 | 05 ||
శం నః॑ కర॒త్యర్వ॑తే సు॒గం మే॒షాయ॑ మే॒ష్యే᳚ | నృభ్యో॒ నారి॑భ్యో॒ గవే᳚ || 1 | 043 | 06 ||
అ॒స్మే సో᳚మ॒ శ్రియ॒మధి॒ ని ధే᳚హి శ॒తస్య॑ నృ॒ణాం | మహి॒ శ్రవ॑స్తువినృ॒మ్ణం || 1 | 043 | 07 ||
మా నః॑ సోమపరి॒బాధో॒ మారా᳚తయో జుహురంత | ఆ న॑ ఇందో॒ వాజే᳚ భజ || 1 | 043 | 08 ||
యాస్తే᳚ ప్ర॒జా అ॒మృత॑స్య॒ పర॑స్మిం॒ధామ᳚న్నృ॒తస్య॑ |
మూ॒ర్ధా నాభా᳚ సోమ వేన ఆ॒భూషం᳚తీః సోమ వేదః || 1 | 043 | 09 ||
(ప్రథమ మండలే చతుర్దశోత్తరశతతం సూక్తం
ఋషిః – కుత్స ఆంగిరసః | దేవతా రుద్రః |
ఛందః 1 జగతీ, 2, 7 నిచృజ్జగతీ, 3, 6, 8, 9 విరాడ్జగతీ,
4, 5, 11 భురిక్త్రిష్టుప్, 10 నిచృత్త్రిష్టుప్ |
స్వరః 1-3, 6-9 నిషాదః, 4, 5, 10, 11 ధైవతః ||)
ఇ॒మా రు॒ద్రాయ॑ త॒వసే᳚ కప॒ర్దినే᳚ క్ష॒యద్వీ᳚రాయ॒ ప్ర భ॑రామహే మ॒తీః |
యథా॒ శమస॑ద్ద్వి॒పదే॒ చతు॑ష్పదే॒ విశ్వం᳚ పు॒ష్టం గ్రామే᳚ అ॒స్మిన్న॑నాతు॒రం || 1 | 114 | 01 ||
మృ॒ళా నో᳚ రుద్రో॒త నో॒ మయ॑స్కృధి క్ష॒యద్వీ᳚రాయ॒ నమ॑సా విధేమ తే |
యచ్ఛం చ॒ యోశ్చ॒ మను॑రాయే॒జే పి॒తా తద॑శ్యామ॒ తవ॑ రుద్ర॒ ప్రణీ᳚తిషు || 1 | 114 | 02 ||
అ॒శ్యామ॑ తే సుమ॒తిం దే᳚వయ॒జ్యయా᳚ క్ష॒యద్వీ᳚రస్య॒ తవ॑ రుద్ర మీఢ్వః |
సు॒మ్నా॒యన్నిద్విశో᳚ అ॒స్మాక॒మా చ॒రారి॑ష్టవీరా జుహవామ తే హ॒విః || 1 | 114 | 03 ||
త్వే॒షం వ॒యం రు॒ద్రం య॑జ్ఞ॒సాధం᳚ వం॒కుం క॒విమవ॑సే॒ ని హ్వ॑యామహే |
ఆ॒రే అ॒స్మద్దైవ్యం॒ హేళో᳚ అస్యతు సుమ॒తిమిద్వ॒యమ॒స్యా వృ॑ణీమహే || 1 | 114 | 04 ||
ది॒వో వ॑రా॒హమ॑రు॒షం క॑ప॒ర్దినం᳚ త్వే॒షం రూ॒పం నమ॑సా॒ ని హ్వ॑యామహే |
హస్తే॒ బిభ్ర॑ద్భేష॒జా వార్యా᳚ణి॒ శర్మ॒ వర్మ॑ చ్ఛ॒ర్దిర॒స్మభ్యం᳚ యంసత్ || 1 | 114 | 05 ||
ఇ॒దం పి॒త్రే మ॒రుతా᳚ముచ్యతే॒ వచః॑ స్వా॒దోః స్వాదీ᳚యో రు॒ద్రాయ॒ వర్ధ॑నం |
రాస్వా᳚ చ నో అమృత మర్త॒భోజ॑నం॒ త్మనే᳚ తో॒కాయ॒ తన॑యాయ మృళ || 1 | 114 | 06 ||
మానో᳚ మ॒హాంత॑ము॒త మానో᳚ అర్భ॒కం మా న॒ ఉక్షం᳚తము॒త మా న॑ ఉక్షి॒తం |
మానో᳚ వధీః పి॒తరం॒ మోత మా॒తరం॒ మా నః॑ ప్రి॒యాస్త॒న్వో᳚ రుద్ర రీరిషః || 1 | 114 | 07 ||
మా న॑స్తో॒కే తన॑యే॒ మా న॑ ఆ॒యౌ మా నో॒ గోషు॒ మా నో॒ అశ్వే᳚షు రీరిషః |
వీ॒రాన్మా నో᳚ రుద్ర భామి॒తో వ॑ధీర్హ॒విష్మం᳚తః॒ సద॒మిత్త్వా᳚ హవామహే || 1 | 114 | 08 ||
ఉప॑తే॒ స్తోమా᳚న్పశు॒పా ఇ॒వాక॑రం॒ రాస్వా᳚ పితర్మరుతాం సు॒మ్నమ॒స్మే |
భ॒ద్రా హితే᳚ సుమ॒తిర్మృ॑ళ॒యత్త॒మాథా᳚ వ॒యమవ॒ ఇత్తే᳚ వృణీమహే || 1 | 114 | 09 ||
ఆ॒రే తే᳚ గో॒ఘ్నము॒త పూ᳚రుష॒ఘ్నం క్షయ॑ద్వీర సు॒మ్నమ॒స్మే తే᳚ అస్తు |
మృ॒ళా చ॑ నో॒ అధి॑ చ బ్రూహి దే॒వాధా᳚ చ నః॒ శర్మ॑ యచ్ఛ ద్వి॒బర్హాః᳚ || 1 | 114 | 10 ||
అవో᳚చామ॒ నమో᳚ అస్మా అవ॒స్యవః॑ శఋ॒ణోతు॑ నో॒ హవం᳚ రు॒ద్రో మ॒రుత్వా᳚న్ |
తన్నో᳚ మి॒త్రో వరు॑ణో మామహంతా॒మది॑తిః॒ సింధుః॑ పృథి॒వీ ఉ॒త ద్యౌః || 1 | 114 | 11 ||
(ద్వితీయమండలే త్రయస్త్రింశం సూక్తం
ఋషిః గృత్సమదః | దేవతా రుద్రః |
ఛందః 1, 5, 9, 13-15 నిచృత్త్రిష్టుప్, 3, 6, 10, 11, విరాట్త్రిష్టుప్,
4, 8 త్రిష్టుప్, 2, 7 పంక్తిః, 12 భురిక్పంక్తిః |
స్వరః 1, 3-6, 8-11, 13-15 ధైవతః, 2, 7, 12 పంచమః ||)
ఆతే᳚ పితర్మరుతాం సు॒మ్నమే᳚తు॒ మా నః॒ సూర్య॑స్య సం॒దృశో᳚ యుయోథాః |
అ॒భి నో᳚ వీ॒రో అర్వ॑తి క్షమేత॒ ప్ర జా᳚యేమహి రుద్ర ప్ర॒జాభిః॑ || 2 | 033 | 01 ||
త్వాద॑త్తేభీ రుద్ర॒ శంత॑మేభిః శ॒తం హిమా᳚ అశీయ భేష॒జేభిః॑ |
వ్య(1)స్మద్ద్వేషో᳚ విత॒రం వ్యంహో॒ వ్యమీ᳚వాశ్చాతయస్వా॒ విషూ᳚చీః || 2 | 033 | 02 ||
శ్రేష్ఠో᳚ జా॒తస్య॑ రుద్ర శ్రి॒యాసి॑ త॒వస్త॑మస్త॒వసాం᳚ వజ్రబాహో |
పర్షి॑ ణః పా॒రమంహ॑సః స్వ॒స్తి విశ్వా᳚ అ॒భీ᳚తీ॒ రప॑సో యుయోధి || 2 | 033 | 03 ||
మాత్వా᳚ రుద్ర చుక్రుధామా॒ నమో᳚భి॒ర్మా దుష్టు॑తీ వృషభ॒ మా సహూ᳚తీ |
ఉన్నో᳚ వీ॒రాఀ అ॑ర్పయ భేష॒జేభి॑ర్భి॒షక్త॑మం త్వా భి॒షజాం᳚ శఋణోమి || 2 | 033 | 04 ||
హవీ᳚మభి॒ర్హవ॑తే॒ యో హ॒విర్భి॒రవ॒ స్తోమే᳚భీ రు॒ద్రం ది॑షీయ |
ఋ॒దూ॒దరః॑ సు॒హవో॒ మా నో᳚ అ॒స్యై బ॒భ్రుః సు॒శిప్రో᳚ రీరధన్మ॒నాయై᳚ || 2 | 033 | 05 ||
ఉన్మా᳚ మమంద వృష॒భో మ॒రుత్వాం॒త్వక్షీ᳚యసా॒ వయ॑సా॒ నాధ॑మానం |
ఘృణీ᳚వ చ్ఛా॒యామ॑ర॒పా అ॑శీ॒యా వి॑వాసేయం రు॒ద్రస్య॑ సు॒మ్నం || 2 | 033 | 06 ||
క్వ(1) స్య తే᳚ రుద్ర మృళ॒యాకు॒ర్హస్తో॒ యో అస్తి॑ భేష॒జో జలా᳚షః |
అ॒ప॒భ॒ర్తా రప॑సో॒ దైవ్య॑స్యా॒భీ ను మా᳚ వృషభ చక్షమీథాః || 2 | 033 | 07 ||
ప్ర బ॒భ్రవే᳚ వృష॒భాయ॑ శ్వితీ॒చే మ॒హో మ॒హీం సు॑ష్టు॒తిమీ᳚రయామి |
న॒మ॒స్యా క॑ల్మలీ॒కినం॒ నమో᳚భిర్గృణీ॒మసి॑ త్వే॒షం రు॒ద్రస్య॒ నామ॑ || 2 | 033 | 08 ||
స్థి॒రేభి॒రంగైః᳚ పురు॒రూప॑ ఉ॒గ్రో బ॒భ్రుః శు॒క్రేభిః॑ పిపిశే॒ హిర᳚ణ్యైః |
ఈశా᳚నాద॒స్య భువ॑నస్య॒ భూరే॒ర్న వా ఉ॑ యోషద్రు॒ద్రాద॑సు॒ర్యం᳚ || 2 | 033 | 09 ||
అర్హ᳚న్బిభర్షి॒ సాయ॑కాని॒ ధన్వార్హ᳚న్ని॒ష్కం య॑జ॒తం వి॒శ్వరూ᳚పం |
అర్హ᳚న్ని॒దం ద॑యసే॒ విశ్వ॒మభ్వం॒ న వా ఓజీ᳚యో రుద్ర॒ త్వద॑స్తి || 2 | 033 | 10 ||
స్తు॒హి శ్రు॒తం గ॑ర్త॒సదం॒ యువా᳚నం మృ॒గం న భీ॒మము॑పహ॒త్నుము॒గ్రం |
మృ॒ళా జ॑రి॒త్రే రు॑ద్ర॒ స్తవా᳚నో॒ఽన్యం తే᳚ అ॒స్మన్ని వ॑పంతు॒ సేనాః᳚ || 2 | 033 | 11 ||
కు॒మా॒రశ్చి॑త్పి॒తరం॒ వంద॑మానం॒ ప్రతి॑ నానామ రుద్రోప॒యంతం᳚ |
భూరే᳚ర్దా॒తారం॒ సత్ప॑తిం గృణీషే స్తు॒తస్త్వం భే᳚ష॒జా రా᳚స్య॒స్మే || 2 | 033 | 12 ||
యావో᳚ భేష॒జా మ॑రుతః॒ శుచీ᳚ని॒ యా శంత॑మా వృషణో॒ యా మ॑యో॒భు |
యాని॒ మను॒రవృ॑ణీతా పి॒తా న॒స్తా శం చ॒ యోశ్చ॑ రు॒ద్రస్య॑ వశ్మి || 2 | 033 | 13 ||
పరి॑ ణో హే॒తీ రు॒ద్రస్య॑ వృజ్యాః॒ పరి॑ త్వే॒షస్య॑ దుర్మ॒తిర్మ॒హీ గా᳚త్ |
అవ॑ స్థి॒రా మ॒ఘవ॑ద్భ్యస్తనుష్వ॒ మీఢ్వ॑స్తో॒కాయ॒ తన॑యాయ మృళ || 2 | 033 | 14 ||
ఏ॒వా బ॑భ్రో వృషభ చేకితాన॒ యథా᳚ దేవ॒ న హృ॑ణీ॒షే న హంసి॑ |
హ॒వ॒న॒శ్రున్నో᳚ రుద్రే॒హ బో᳚ధి బృ॒హద్వ॑దేమ వి॒దథే᳚ సు॒వీరాః᳚ || 2 | 033 | 15 ||
(షష్ఠమండలే చతుఃసప్తతితమం సూక్తం
ఋషిః భరద్వాజో బార్హస్పత్యః | దేవతా సోమారుద్రౌ |
ఛందః 1, 2, 4 త్రిష్టుప్, 3 నిచృత్త్రిష్టుప్, స్వరః ధైవతః ||)
సోమా᳚రుద్రా ధా॒రయే᳚థామసు॒ర్యం(1) ప్ర వా᳚మి॒ష్టయోఽర॑మశ్నువంతు |
దమే᳚దమే స॒ప్త రత్నా॒ దధా᳚నా॒ శం నో᳚ భూతం ద్వి॒పదే॒ శం చతు॑ష్పదే || 6 | 074 | 01 ||
సోమా᳚రుద్రా॒ వి వృ॑హతం॒ విషూ᳚చీ॒మమీ᳚వా॒ యా నో॒ గయ॑మావి॒వేశ॑ |
ఆ॒రే బా᳚ధేథాం॒ నిరృ॑తిం పరా॒చైర॒స్మే భ॒ద్రా సౌ᳚శ్రవ॒సాని॑ సంతు || 6 | 074 | 02 ||
సోమా᳚రుద్రా యు॒వమే॒తాన్య॒స్మే విశ్వా᳚ త॒నూషు॑ భేష॒జాని॑ ధత్తం |
అవ॑ స్యతం ముం॒చతం॒ యన్నో॒ అస్తి॑ త॒నూషు॑ బ॒ద్ధం కృ॒తమేనో᳚ అ॒స్మత్ || 6 | 074 | 03 ||
తి॒గ్మాయు॑ధౌ తి॒గ్మహే᳚తీ సు॒శేవౌ॒ సోమా᳚రుద్రావి॒హ సు మృ॑ళతం నః |
ప్రనో᳚ ముంచతం॒ వరు॑ణస్య॒ పాశా᳚ద్గోపా॒యతం᳚ నః సుమన॒స్యమా᳚నా || 6 | 074 | 04 ||
(సప్తమమండలే షట్చత్వారింశం సూక్తం
ఋషిః వసిష్ఠః | దేవతా రుద్రః |
ఛందః 1 విరాడ్జగతీ, 2 నిచృత్త్రిష్టుప్, 3 నిచృత్ జగతీ, 4 స్వరాట్పంక్తిః |
స్వరః 1, 3, నిషదః, 2 ధైవతః, 4 పంచమః ||)
ఇ॒మా రు॒ద్రాయ॑ స్థి॒రధ᳚న్వనే॒ గిరః॑ క్షి॒ప్రేష॑వే దే॒వాయ॑ స్వ॒ధావ్నే᳚ |
అషా᳚ళ్హాయ॒ సహ॑మానాయ వే॒ధసే᳚ తి॒గ్మాయు॑ధాయ భరతా శఋ॒ణోతు॑ నః || 7 | 046 | 01 ||
స హి క్షయే᳚ణ॒ క్షమ్య॑స్య॒ జన్మ॑నః॒ సామ్రా᳚జ్యేన ది॒వ్యస్య॒ చేత॑తి |
అవ॒న్నవం᳚తీ॒రుప॑ నో॒ దుర॑శ్చరానమీ॒వో రు॑ద్ర॒ జాసు॑ నో భవ || 7 | 046 | 02 ||
యాతే᳚ ది॒ద్యుదవ॑సృష్టా ది॒వస్పరి॑ క్ష్మ॒యా చర॑తి॒ పరి॒ సా వృ॑ణక్తు నః |
స॒హస్రం᳚ తే స్వపివాత భేష॒జా మా న॑స్తో॒కేషు॒ తన॑యేషు రీరిషః || 7 | 046 | 03 ||
మానో᳚ వధీ రుద్ర॒ మా పరా᳚ దా॒ మా తే᳚ భూమ॒ ప్రసి॑తౌ హీళి॒తస్య॑ |
ఆనో᳚ భజ బ॒ర్హిషి॑ జీవశం॒సే యూ॒యం పా᳚త స్వ॒స్తిభిః॒ సదా᳚ నః || 7 | 046 | 04 ||
Assorted Richas|
అ॒స్మే రు॒ద్రా మే॒హనా॒ పర్వ॑తాసో వృత్ర॒హత్యే॒ భర॑హూతౌ స॒జోషాః᳚ |
యః శంస॑తే స్తువ॒తే ధాయి॑ ప॒జ్ర ఇంద్ర॑జ్యేష్ఠా అ॒స్మాఀ అ॑వంతు దే॒వాః || 8 | 063 | 12 ||
(ప్రగాథః కాణ్వః, దేవాః, త్రిష్టుప్, గాంధారః)
త్వమ॑గ్నే రు॒ద్రో అసు॑రో మ॒హో ది॒వస్త్వం శర్ధో॒ మారు॑తం పృ॒క్ష ఈ᳚శిషే |
త్వం వాతై᳚రరు॒ణైర్యా᳚సి శంగ॒యస్త్వం పూ॒షా వి॑ధ॒తః పా᳚సి॒ ను త్మనా᳚ || 2 | 001 | 06 ||
(ఆంగిరసః శౌనహోత్రో భార్గవో గృత్సమదః, అగ్నిః, భురిక్ త్రిష్టుప్, ధైవతః)
ఆవో॒ రాజా᳚నమధ్వ॒రస్య॑ రు॒ద్రం హోతా᳚రం సత్య॒యజం॒ రోద॑స్యోః |
అ॒గ్నిం పు॒రా త॑నయి॒త్నోర॒చిత్తా॒ద్ధిర᳚ణ్యరూప॒మవ॑సే కృణుధ్వం || 4 | 003 | 01 ||
(వామదేవః, అగ్నిః, నిచృత్త్రిష్టుప్, ధైవతః)
తవ॑ శ్రి॒యే మ॒రుతో᳚ మర్జయంత॒ రుద్ర॒ యత్తే॒ జని॑మ॒ చారు॑ చి॒త్రం |
ప॒దం యద్విష్ణో᳚రుప॒మం ని॒ధాయి॒ తేన॑ పాసి॒ గుహ్యం॒ నామ॒ గోనాం᳚ || 5 | 003 | 03 ||
(వసుశ్రుత ఆత్రేయః, అగ్నిః, నిచృత్త్రిష్టుప్, ధైవతః)
భువ॑నస్య పి॒తరం᳚ గీ॒ర్భిరా॒భీ రు॒ద్రం దివా᳚ వ॒ర్ధయా᳚ రు॒ద్రమ॒క్తౌ |
బృ॒హంత॑మృ॒ష్వమ॒జరం᳚ సుషు॒మ్నమృధ॑గ్ఘువేమ క॒వినే᳚షి॒తాసః॑ || 6 | 049 | 10 || ఋజిశ్వాః, విశ్వే దేవాః, త్రిష్టుప్, ధైవతః)
తము॑ ష్టుహి॒ యః స్వి॒షుః సు॒ధన్వా॒ యో విశ్వ॑స్య॒ క్షయ॑తి భేష॒జస్య॑ |
యక్ష్వా᳚ మ॒హే సౌ᳚మన॒సాయ॑ రు॒ద్రం నమో᳚భిర్దే॒వమసు॑రం దువస్య || 5 | 042 | 11 ||
(అగ్నిః, విశ్వే దేవాః, నిచృత్త్రిష్టుప్, ధైవతః)
అ॒యం మే॒ హస్తో॒ భగ॑వాన॒యం మే॒ భగ॑వత్తరః |
అ॒యం మే᳚ వి॒శ్వభే᳚షజో॒ఽయం శి॒వాభి॑మర్శనః || 10 | 060 | 12 ||
(బంధ్వాదయో గౌపాయనాః, హస్తః, నిచృదనుష్టుప్, గాంధారః)
త్ర్యం᳚బకం యజామహే సు॒గంధిం᳚ పుష్టి॒వర్ధ॑నం |
ఉ॒ర్వా॒రు॒కమి॑వ॒ బంధ॑నాన్మృ॒త్యోర్ము॑క్షీయ॒ మామృతా᳚త్ || 7 | 059 | 12 ||
(వసిష్ఠః, రుద్రః, అనుష్టుప్, గాంధారః)
శాంతి పాఠమంత్రః
హరిః॑ ఓం
ఓం
తత్పురు॑షాయ వి॒ద్మహే॑ మహాదే॒వాయ॑ ధీమహి |
తన్నో॑ రుద్రః ప్రచో॒దయా॑త్ ||
ఈశానస్సర్వ॑విద్యా॒నా॒మీశ్వరః సర్వ॑భూతా॒నాం॒ |
బ్రహ్మాధి॑పతి॒ర్బ్రహ్మ॒ణోఽధి॑పతి॒ర్బహ్మా॑ శి॒వో మే॑ఽస్తు సదాశి॒వోం ||
ఓం
శి॒వో నామా॑సి॒ స్వధి॑తిస్తే పి॒తా నమ॑స్తే అస్తు॒ మా మా॑ హిꣳసీః |
నివ॑ర్తయామ్యాయు॑షే॒ఽన్నాద్యా॑య॒ ప్రజన॑నాయ రా॒యస్పోషా॑య సుప్రజా॒స్త్వాయ॑ సు॒వీర్యా॑య ||
ఓం
విశ్వా॑ని దేవ సవితర్దురి॒తాని॒ పరాసువ |
యద్భ॒ద్రం తన్న॒ ఆసువ ||
ఓం
ద్యౌః శాంతి॑రం॒తరి॑క్ష॒ꣳ శాంతిః॑ పృథి॒వీ శాంతి॒రాపః॒ శాంతి॒రోష॑ధయః॒ శాంతిః॑ |
వన॒స్పత॑యః॒ శాంతి॒ర్విశ్వే॑దే॒వాః శాంతి॒ర్బ్రహ్మ॒ శాంతిః॒ సర్వ॒ꣳ శాంతిః॒ శాంతి॑రే॒వ శాంతిః॒ సా మా॒ శాంతి॑రేధి ||
ఓం
సర్వేషాం వా ఏష వేదానాꣳరసో యత్సామః |
సర్వేషామేవైనమేతద్ వేదానాꣳ రసేనాభిషించతి ||
ఓం
శంభ॑వే॒ నమః॑ | నమ॑స్తే అస్తు భగవన్విశ్వేశ్వ॒రాయ॑ మహాదే॒వాయ॑ త్ర్యంబ॒కాయ॑ త్రిపురాంత॒కాయ॑ త్రికాగ్నికా॒లాయ॑
కాలాగ్నిరు॒ద్రాయ॑ నీలకం॒ఠాయ॑ మృత్యుంజ॒యాయ॑ సర్వేశ్వ॒రాయ॑ సదాశి॒వాయ॑ శ్రీమన్మహాదే॒వాయ॒ నమః॑ ||
ఓం
యదక్షరపదభ్రష్టం మాత్రాహీనం చ యద్భవేత్ |
తత్సర్వం క్షమ్యతాం దేవ ప్రసీద పరమేశ్వర ||
ఓం
శాంతిః॒ శాంతిః॒ శాంతిః॑ ||
అనేన శ్రీ రుద్రాభిషేకకర్మణా శ్రీ భవానీశంకర మహారుద్రాః ప్రీయతాం న మమ |
ఇతి శ్రీఋగ్వేదీయ పంచరుద్రం సమాప్తా |
|| ఓం శ్రీ సాంబ సదాశివార్పణమస్తు ||