ನಮಶ್ಚಂದ್ರಾಯ ಸೋಮಾಯೇಂದವೇ ಕುಮುದಬಂಧವೇ |
ವಿಲೋಹಿತಾಯ ಶುಭ್ರಾಯ ಶುಕ್ಲಾಂಬರಧರಾಯ ಚ || ೧ ||
ತ್ವಮೇವ ಸರ್ವಲೋಕಾನಾಮಾಪ್ಯಾಯನಕರಃ ಸದಾ |
ಕ್ಷೀರೋದ್ಭವಾಯ ದೇವಾಯ ನಮಃ ಶಂಕರಶೇಖರ || ೨ ||
ಯುಗಾನಾಂ ಯುಗಕರ್ತಾ ತ್ವಂ ನಿಶಾನಾಥೋ ನಿಶಾಕರಃ |
ಸಂವತ್ಸರಾಣಾಂ ಮಾಸಾನಾಮೃತೂನಾಂ ತು ತಥೈವ ಚ || ೩ ||
ಗ್ರಹಾಣಾಂ ಚ ತ್ವಮೇಕೋಽಸಿ ಸೌಮ್ಯಃ ಸೋಮಕರಃ ಪ್ರಭುಃ |
ಓಷಧೀಪತಯೇ ತುಭ್ಯಂ ರೋಹಿಣೀಪತಯೇ ನಮಃ || ೪ ||
ಇದಂ ತು ಪಠತೇ ಸ್ತೋತ್ರಂ ಪ್ರಾತರುತ್ಥಾಯ ಯೋ ನರಃ |
ದಿವಾ ವಾ ಯದಿ ವಾ ರಾತ್ರೌ ಬದ್ಧಚಿತ್ತೋ ಹಿ ಯೋ ನರಃ || ೫ ||
ನ ಭಯಂ ವಿದ್ಯತೇ ತಸ್ಯ ಕಾರ್ಯಸಿದ್ಧಿರ್ಭವಿಷ್ಯತಿ |
ಅಹೋರಾತ್ರಕೃತಂ ಪಾಪಂ ಪಠನಾದೇವ ನಶ್ಯತಿ || ೬ ||
ದ್ವಿಜರಾಜೋ ಮಹಾಪುಣ್ಯಸ್ತಾರಾಪತಿರ್ವಿಶೇಷತಃ |
ಓಷಧೀನಾಂ ಚ ಯೋ ರಾಜಾ ಸ ಸೋಮಃ ಪ್ರೀಯತಾಂ ಮಮ || ೭ ||
ಇತಿ ಚಂದ್ರ ಸ್ತೋತ್ರಮ್ |