ସ୍କନ୍ଦ ଉଵାଚ |
ୟୋଗୀଶ୍ଵରୋ ମହାସେନଃ କାର୍ତିକେୟୋଽଗ୍ନିନନ୍ଦନଃ |
ସ୍କନ୍ଦଃ କୁମାରଃ ସେନାନୀଃ ସ୍ଵାମୀ ଶଙ୍କରସମ୍ଭଵଃ || ୧ ||
ହେ ସ୍ଵାମିନାଥ କରୁଣାକର ଦୀନବନ୍ଧୋ
ଶ୍ରୀପାର୍ଵତୀଶମୁଖପଙ୍କଜପଦ୍ମବନ୍ଧୋ |
ଶ୍ରୀଶାଦିଦେଵଗଣପୂଜିତପାଦପଦ୍ମ
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୧ ||
ଦେଵାଦିଦେଵସୁତ ଦେଵଗଣାଧିନାଥ [ନୁତ]
ଦେଵେନ୍ଦ୍ରଵନ୍ଦ୍ୟ ମୃଦୁପଙ୍କଜମଞ୍ଜୁପାଦ |
ଦେଵର୍ଷିନାରଦମୁନୀନ୍ଦ୍ରସୁଗୀତକୀର୍ତେ
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୨ ||
ନିତ୍ୟାନ୍ନଦାନନିରତାଖିଲରୋଗହାରିନ୍
ତସ୍ମାତ୍ପ୍ରଦାନପରିପୂରିତଭକ୍ତକାମ | [ଭାଗ୍ୟ]
ଶ୍ରୁତ୍ୟାଗମପ୍ରଣଵଵାଚ୍ୟନିଜସ୍ଵରୂପ
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୩ ||
କ୍ରୌଞ୍ଚାସୁରେନ୍ଦ୍ରପରିଖଣ୍ଡନଶକ୍ତିଶୂଲ-
-ପାଶାଦିଶସ୍ତ୍ରପରିମଣ୍ଡିତଦିଵ୍ୟପାଣେ | [ଚାପାଦି]
ଶ୍ରୀକୁଣ୍ଡଲୀଶଧରତୁଣ୍ଡଶିଖୀନ୍ଦ୍ରଵାହ
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୪ ||
ଦେଵାଦିଦେଵ ରଥମଣ୍ଡଲମଧ୍ୟଵେଦ୍ୟ
ଦେଵେନ୍ଦ୍ରପୀଠନଗରଂ ଦୃଢଚାପହସ୍ତମ୍ |
ଶୂରଂ ନିହତ୍ୟ ସୁରକୋଟିଭିରୀଡ୍ୟମାନ
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୫ ||
ହୀରାଦିରତ୍ନମଣିୟୁକ୍ତକିରୀଟହାର [ହାରାଦି]
କେୟୂରକୁଣ୍ଡଲଲସତ୍କଵଚାଭିରାମମ୍ |
ହେ ଵୀର ତାରକ ଜୟାଽମରବୃନ୍ଦଵନ୍ଦ୍ୟ
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୬ ||
ପଞ୍ଚାକ୍ଷରାଦିମନୁମନ୍ତ୍ରିତଗାଙ୍ଗତୋୟୈଃ
ପଞ୍ଚାମୃତୈଃ ପ୍ରମୁଦିତେନ୍ଦ୍ରମୁଖୈର୍ମୁନୀନ୍ଦ୍ରୈଃ |
ପଟ୍ଟାଭିଷିକ୍ତ ହରିୟୁକ୍ତ ପରାସନାଥ
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୭ ||
ଶ୍ରୀକାର୍ତିକେୟ କରୁଣାମୃତପୂର୍ଣଦୃଷ୍ଟ୍ୟା
କାମାଦିରୋଗକଲୁଷୀକୃତଦୁଷ୍ଟଚିତ୍ତମ୍ |
ସିକ୍ତ୍ଵା ତୁ ମାମଵକଲାଧର କାନ୍ତିକାନ୍ତ୍ୟା
ଵଲ୍ଲୀଶନାଥ ମମ ଦେହି କରାଵଲମ୍ବମ୍ || ୮ ||
ସୁବ୍ରହ୍ମଣ୍ୟାଷ୍ଟକଂ ପୁଣ୍ୟଂ ୟେ ପଠନ୍ତି ଦ୍ଵିଜୋତ୍ତମାଃ |
ତେ ସର୍ଵେ ମୁକ୍ତିମାୟାନ୍ତି ସୁବ୍ରହ୍ମଣ୍ୟ ପ୍ରସାଦତଃ || ୯ ||
ସୁବ୍ରହ୍ମଣ୍ୟାଷ୍ଟକମିଦଂ ପ୍ରାତରୁତ୍ଥାୟ ୟଃ ପଠେତ୍ |
କୋଟିଜନ୍ମକୃତଂ ପାପଂ ତତ୍କ୍ଷଣାଦେଵ ନଶ୍ୟତି || ୧୦ ||
ଇତି ଶ୍ରୀ ସୁବ୍ରହ୍ମଣ୍ୟାଷ୍ଟକମ୍ |