ప్రలంబితజటాబద్ధం చంద్రరేఖావతంసకమ్ |
నీలగ్రీవం శరచ్చంద్రచంద్రికాభిర్విరాజితమ్ || ౧ ||
గోక్షీరధవళాకారం చంద్రబింబసమాననమ్ |
సుస్మితం సుప్రసన్నం చ స్వాత్మతత్త్వైకసంస్థితమ్ || ౨ ||
గంగాధరం శివం శాంతం లసత్కేయూరమండితమ్ |
సర్వాభరణసంయుక్తం సర్వలక్షణసంయుతమ్ || ౩ ||
వీరాసనే సమాసీనం వేదయజ్ఞోపవీతినమ్ |
భస్మధారాభిరామం తం నాగాభరణభూషితమ్ || ౪ ||
వ్యాఘ్రచర్మాంబరం శుద్ధం యోగపట్టావృతం శుభమ్ |
సర్వేషాం ప్రాణినామాత్మజ్ఞానాపస్మారపృష్ఠతః || ౫ ||
విన్యస్తచరణం సమ్యగ్ జ్ఞానముద్రాధరం హరమ్ |
సర్వవిజ్ఞానరత్నానాం కోశభూతం సుపుస్తకమ్ || ౬ ||
దధానం సర్వతత్త్వాక్షమాలికాం కుండికామపి |
స్వాత్మభూతపరానందపరాశక్త్యర్ధవిగ్రహమ్ || ౭ ||
ధర్మరూపవృషోపేతం ధార్మికైర్వేదపారగైః |
మునిభిః సంవృతం మాయావటమూలాశ్రితం శుభమ్ || ౮ ||
ఈశానం సర్వవిద్యానామీశ్వరేశ్వరమవ్యయమ్ |
ఉత్పత్త్యాదివినిర్ముక్తమోంకారకమలాసనమ్ || ౯ ||
స్వాత్మవిద్యాప్రదానేన సదా సంసారమోచకమ్ |
రుద్రం పరమకారుణ్యాత్సర్వప్రాణిహితే రతమ్ || ౧౦ ||
ఉపాసకానాం సర్వేషామభీష్టసకలప్రదమ్ |
దక్షిణామూర్తిదేవాఖ్యం జగత్సర్గాదికారణమ్ || ౧౧ ||
సమాగత్య మహాభక్త్యా దండవత్పృథివీతలే |
ప్రణమ్య బహుశో దేవం సమారాధ్య యథాబలమ్ || ౧౨ ||
రుద్ర యత్తే ముఖం తేన దక్షిణం పాహి మామితి |
ఉక్త్వా పునః పునర్దేవం పూజయామాస భక్తితః || ౧౩ ||
ఇతి శ్రీస్కాందపురాణే సూతసంహితాయాం ముక్తిఖండే చతుర్థోఽధ్యాయే శ్రీ దక్షిణామూర్తి స్తోత్రమ్ ||