ധ്യാനമ് –
മാണിക്യവീണാമുപലാലയംതീം
മദാലസാം മംജുലവാഗ്വിലാസാമ് |
മാഹേംദ്രനീലദ്യുതികോമലാംഗീം
മാതംഗകന്യാം മനസാ സ്മരാമി || ൧ ||
ചതുര്ഭുജേ ചംദ്രകളാവതംസേ
കുചോന്നതേ കുംകുമരാഗ ശോണേ |
പുംഡ്രേക്ഷുപാശാംകുശപുഷ്പബാണ-
-ഹസ്തേ നമസ്തേ ജഗദേകമാതഃ || ൨ ||
മാതാ മരകതശ്യാമാ മാതംഗീ മദശാലിനീ |
കുര്യാത്കടാക്ഷം കള്യാണീ കദംബവനവാസിനീ || ൩ ||
ജയ മാതംഗതനയേ ജയ നീലോത്പലദ്യുതേ |
ജയ സംഗീതരസികേ ജയ ലീലാശുകപ്രിയേ || ൪ ||
ദംഡകമ് –
ജയ ജനനി സുധാ സമുദ്രാംതരുദ്യന് മണിദ്വീപ സംരൂഢ ബില്വാടവീമധ്യകല്പദ്രുമാകല്പ കാദംബകാംതാര വാസപ്രിയേ കൃത്തിവാസഃപ്രിയേ സര്വലോകപ്രിയേ |
സാദരാരബ്ധ സംഗീത സംഭാവനാ സംഭ്രമാലോല നീപസ്രഗാബദ്ധചൂലീ സനാഥത്രികേ സാനുമത്പുത്രികേ | ശേഖരീഭൂത ശീതാംശുരേഖാ മയൂഖാവലീ ബദ്ധ സുസ്നിഗ്ധ നീലാലകശ്രേണിശൃംഗാരിതേ ലോകസംഭാവിതേ | കാമലീലാ ധനുഃസന്നിഭ ഭ്രൂലതാപുഷ്പ സംദോഹ സംദേഹ കൃല്ലോചനേ വാക്സുധാസേചനേ | ചാരു ഗോരോചനാ പംക കേലീ ലലാമാഭിരാമേ സുരാമേ രമേ | പ്രോല്ലസദ്വാലികാ മൌക്തികശ്രേണികാ ചംദ്രികാ മംഡലോദ്ഭാസി ലാവണ്യഗംഡസ്ഥല ന്യസ്തകസ്തൂരികാപത്രരേഖാ സമുദ്ഭൂത സൌരഭ്യ സംഭ്രാംത ഭൃംഗാംഗനാ ഗീതസാംദ്രീഭവന്മംദ്ര തംത്രീസ്വരേ സുസ്വരേ ഭാസ്വരേ | വല്ലകീ വാദന പ്രക്രിയാ ലോല താലീദലാബദ്ധതാടംക ഭൂഷാവിശേഷാന്വിതേ സിദ്ധസമ്മാനിതേ | ദിവ്യ ഹാലാമദോദ്വേല ഹേലാലസച്ചക്ഷുരാംദോലന ശ്രീസമാക്ഷിപ്ത കര്ണൈക നീലോത്പലേ പൂരിതാശേഷ ലോകാഭിവാംഛാ ഫലേ ശ്രീഫലേ | സ്വേദ ബിംദൂല്ലസത്ഫാല ലാവണ്യ നിഷ്യംദ സംദോഹ സംദേഹകൃന്നാസികാ മൌക്തികേ സര്വവിശ്വാത്മികേ കാലികേ | മുഗ്ധ മംദസ്മിതോദാര വക്ത്രസ്ഫുരത്പൂഗ താംബൂലകര്പൂര ഖംഡോത്കരേ ജ്ഞാനമുദ്രാകരേ സര്വസംപത്കരേ പദ്മഭാസ്വത്കരേ | കുംദപുഷ്പദ്യുതി സ്നിഗ്ധ ദംതാവലീ നിര്മലാലോല കല്ലോല സമ്മേലന സ്മേരശോണാധരേ ചാരുവീണാധരേ പക്വബിംബാധരേ |
സുലലിത നവയൌവനാരംഭ ചംദ്രോദയോദ്വേല ലാവണ്യ ദുഗ്ധാര്ണവാവിര്ഭവത്കംബുബിബ്ബോക ഭൃത്കംധരേ സത്കലാമംദിരേ മംഥരേ | ദിവ്യരത്നപ്രഭാ ബംധുരച്ഛന്ന ഹാരാദിഭൂഷാ സമുദ്യോതമാനാനവദ്യാംശു ശോഭേ ശുഭേ | രത്നകേയൂര രശ്മിച്ഛടാ പല്ലവപ്രോല്ലസദ്ദോര്ലതാ രാജിതേ യോഗിഭിഃ പൂജിതേ | വിശ്വദിങ്മംഡലവ്യാപി മാണിക്യതേജഃ സ്ഫുരത്കംകണാലംകൃതേ വിഭ്രമാലംകൃതേ സാധകൈഃ സത്കൃതേ | വാസരാരംഭ വേലാ സമുജ്ജൃംഭമാണാരവിംദ പ്രതിദ്വംദ്വിപാണിദ്വയേ സംതതോദ്യദ്ദയേ അദ്വയേ | ദിവ്യ രത്നോര്മികാദീധിതി സ്തോമസംധ്യായമാനാംഗുലീ പല്ലവോദ്യന്നഖേംദു പ്രഭാമംഡലേ സന്നതാഖംഡലേ ചിത്പ്രഭാമംഡലേ പ്രോല്ലസത്കുംഡലേ | താരകാരാജിനീകാശ ഹാരാവലിസ്മേര ചാരുസ്തനാഭോഗ ഭാരാനമന്മധ്യവല്ലീവലിച്ഛേദ വീചീസമുല്ലാസ സംദര്ശിതാകാര സൌംദര്യ രത്നാകരേ വല്ലകീഭൃത്കരേ കിംകര ശ്രീകരേ | ഹേമകുംഭോപമോത്തുംഗ വക്ഷോജ ഭാരാവനമ്രേ ത്രിലോകാവനമ്രേ | ലസദ്വൃത്ത ഗംഭീര നാഭീ സരസ്തീര ശൈവാല ശംകാകര ശ്യാമ രോമാവലീഭൂഷണേ മംജു സംഭാഷണേ | ചാരു ശിംജത്കടീ സൂത്ര നിര്ഭര്ത്സിതാനംഗ ലീലാ ധനുഃ ശിംജിനീഡംബരേ ദിവ്യരത്നാംബരേ |
പദ്മരാഗോല്ലസന്മേഖലാ ഭാസ്വര ശ്രോണി ശോഭാ ജിത സ്വര്ണഭൂഭൃത്തലേ ചംദ്രികാശീതലേ |
വികസിത നവ കിംശുകാതാമ്ര ദിവ്യാംശുകച്ഛന്ന ചാരൂരുശോഭാ പരാഭൂതസിംദൂര ശോണായമാനേംദ്ര മാതംഗ ഹസ്താര്ഗലേ വൈഭവാനര്ഗലേ ശ്യാമലേ | കോമല സ്നിഗ്ധ നീലോപലോത്പാദിതാനംഗ തൂണീര ശംകാകരോദാര ജംഘാലതേ ചാരുലീലാഗതേ | നമ്ര ദിക്പാല സീമംതിനീ കുംതല സ്നിഗ്ധ നീല പ്രഭാ പുംജ സംജാത ദൂര്വാംകുരാശംക സാരംഗ സംയോഗ രിംഖന്നഖേംദൂജ്ജ്വലേ പ്രോജ്ജ്വലേ നിര്മലേ | പ്രഹ്വ ദേവേശ ലക്ഷ്മീശ ഭൂതേശ തോയേശ വാണീശ കീനാശ ദൈത്യേശ യക്ഷേശ വായ്വഗ്നികോടീര മാണിക്യ സംഘൃഷ്ട ബാലാതപോദ്ദാമ ലാക്ഷാരസാരുണ്യ താരുണ്യ ലക്ഷ്മീഗൃഹീതാംഘ്രി പദ്മേ സുപദ്മേ ഉമേ |
സുരുചിര നവരത്ന പീഠസ്ഥിതേ സുസ്ഥിതേ | രത്നപദ്മാസനേ രത്നസിംഹാസനേ ശംഖപദ്മദ്വയോപാശ്രിതേ | തത്ര വിഘ്നേശ ദുര്ഗാ വടു ക്ഷേത്രപാലൈര്യുതേ | മത്തമാതംഗ കന്യാസമൂഹാന്വിതേ മംജുലാ മേനകാദ്യംഗനാ മാനിതേ ഭൈരവൈരഷ്ടഭിര്വേഷ്ടിതേ | ദേവി വാമാദിഭിഃ ശക്തിഭിഃ സേവിതേ | ധാത്രിലക്ഷ്മ്യാദി ശക്ത്യഷ്ടകൈഃ സംയുതേ | മാതൃകാമംഡലൈര്മംഡിതേ | യക്ഷ ഗംധര്വ സിദ്ധാംഗനാ മംഡലൈരര്ചിതേ | പംചബാണാത്മികേ | പംചബാണേന രത്യാ ച സംഭാവിതേ | പ്രീതിഭാജാ വസംതേന ചാനംദിതേ | ഭക്തിഭാജാം പരം ശ്രേയസേ കല്പസേ | യോഗിനാം മാനസേ ദ്യോതസേ | ഛംദസാമോജസാ ഭ്രാജസേ | ഗീതവിദ്യാ വിനോദാതിതൃഷ്ണേന കൃഷ്ണേന സംപൂജ്യസേ | ഭക്തിമച്ചേതസാ വേധസാ സ്തൂയസേ | വിശ്വഹൃദ്യേന വാദ്യേന വിദ്യാധരൈര്ഗീയസേ |
ശ്രവണഹരണ ദക്ഷിണക്വാണയാ വീണയാ കിന്നരൈര്ഗീയസേ | യക്ഷ ഗംധര്വ സിദ്ധാംഗനാ മംഡലൈരര്ച്യസേ | സര്വസൌഭാഗ്യവാംഛാവതീഭിര്വധൂഭിഃ സുരാണാം സമാരാധ്യസേ | സര്വവിദ്യാവിശേഷാത്മകം ചാടുഗാഥാസമുച്ചാരണം കംഠമൂലോല്ലസദ്വര്ണരാജിത്രയം കോമലശ്യാമലോദാരപക്ഷദ്വയം തുംഡശോഭാതിദൂരീഭവത്കിംശുകം തം ശുകം ലാലയംതീ പരിക്രീഡസേ | പാണിപദ്മദ്വയേനാക്ഷമാലാമപി സ്ഫാടികീം ജ്ഞാനസാരാത്മകം പുസ്തകം ചാംകുശം പാശമാബിഭ്രതീ യേന സംചിംത്യസേ തസ്യ വക്ത്രാംതരാത് ഗദ്യപദ്യാത്മികാ ഭാരതീ നിസ്സരേത് | യേന വാ യാവകാഭാകൃതിര്ഭാവ്യസേ തസ്യ വശ്യാ ഭവംതി സ്ത്രിയഃ പൂരുഷാഃ | യേന വാ ശാതകുംഭദ്യുതിര്ഭാവ്യസേ സോഽപി ലക്ഷ്മീസഹസ്രൈഃ പരിക്രീഡതേ | കിം ന സിദ്ധ്യേദ്വപുഃ ശ്യാമലം കോമലം ചംദ്രചൂഡാന്വിതം താവകം ധ്യായതഃ | തസ്യ ലീലാസരോ വാരിധിഃ, തസ്യ കേലീവനം നംദനം, തസ്യ ഭദ്രാസനം ഭൂതലം, തസ്യ ഗീര്ദേവതാ കിംകരീ, തസ്യ ചാജ്ഞാകരീ ശ്രീഃ സ്വയമ് | സര്വതീര്ഥാത്മികേ, സര്വമംത്രാത്മികേ, സര്വതംത്രാത്മികേ, സര്വയംത്രാത്മികേ, സര്വപീഠാത്മികേ, സര്വതത്ത്വാത്മികേ, സര്വശക്ത്യാത്മികേ, സര്വവിദ്യാത്മികേ, സര്വയോഗാത്മികേ, സര്വനാദാത്മികേ, സര്വശബ്ദാത്മികേ, സര്വവിശ്വാത്മികേ, സര്വദീക്ഷാത്മികേ, സര്വസര്വാത്മികേ, സര്വഗേ, പാഹി മാം പാഹി മാം പാഹി മാം, ദേവി തുഭ്യം നമോ, ദേവി തുഭ്യം നമോ, ദേവി തുഭ്യം നമഃ ||
ഇതി ശ്രീകാളിദാസ കൃത ശ്രീ ശ്യാമലാ ദംഡകമ് |