ধ্যানম্ –
মাণিক্যৱীণামুপলালযংতীং
মদালসাং মংজুলৱাগ্ৱিলাসাম্ |
মাহেংদ্রনীলদ্যুতিকোমলাংগীং
মাতংগকন্যাং মনসা স্মরামি || ১ ||
চতুর্ভুজে চংদ্রকলাৱতংসে
কুচোন্নতে কুংকুমরাগ শোণে |
পুংড্রেক্ষুপাশাংকুশপুষ্পবাণ-
-হস্তে নমস্তে জগদেকমাতঃ || ২ ||
মাতা মরকতশ্যামা মাতংগী মদশালিনী |
কুর্যাত্কটাক্ষং কল্যাণী কদংবৱনৱাসিনী || ৩ ||
জয মাতংগতনযে জয নীলোত্পলদ্যুতে |
জয সংগীতরসিকে জয লীলাশুকপ্রিযে || ৪ ||
দংডকম্ –
জয জননি সুধা সমুদ্রাংতরুদ্যন্ মণিদ্ৱীপ সংরূঢ বিল্ৱাটৱীমধ্যকল্পদ্রুমাকল্প কাদংবকাংতার ৱাসপ্রিযে কৃত্তিৱাসঃপ্রিযে সর্ৱলোকপ্রিযে |
সাদরারব্ধ সংগীত সংভাৱনা সংভ্রমালোল নীপস্রগাবদ্ধচূলী সনাথত্রিকে সানুমত্পুত্রিকে | শেখরীভূত শীতাংশুরেখা মযূখাৱলী বদ্ধ সুস্নিগ্ধ নীলালকশ্রেণিশৃংগারিতে লোকসংভাৱিতে | কামলীলা ধনুঃসন্নিভ ভ্রূলতাপুষ্প সংদোহ সংদেহ কৃল্লোচনে ৱাক্সুধাসেচনে | চারু গোরোচনা পংক কেলী ললামাভিরামে সুরামে রমে | প্রোল্লসদ্ৱালিকা মৌক্তিকশ্রেণিকা চংদ্রিকা মংডলোদ্ভাসি লাৱণ্যগংডস্থল ন্যস্তকস্তূরিকাপত্ররেখা সমুদ্ভূত সৌরভ্য সংভ্রাংত ভৃংগাংগনা গীতসাংদ্রীভৱন্মংদ্র তংত্রীস্ৱরে সুস্ৱরে ভাস্ৱরে | ৱল্লকী ৱাদন প্রক্রিযা লোল তালীদলাবদ্ধতাটংক ভূষাৱিশেষান্ৱিতে সিদ্ধসম্মানিতে | দিৱ্য হালামদোদ্ৱেল হেলালসচ্চক্ষুরাংদোলন শ্রীসমাক্ষিপ্ত কর্ণৈক নীলোত্পলে পূরিতাশেষ লোকাভিৱাংছা ফলে শ্রীফলে | স্ৱেদ বিংদূল্লসত্ফাল লাৱণ্য নিষ্যংদ সংদোহ সংদেহকৃন্নাসিকা মৌক্তিকে সর্ৱৱিশ্ৱাত্মিকে কালিকে | মুগ্ধ মংদস্মিতোদার ৱক্ত্রস্ফুরত্পূগ তাংবূলকর্পূর খংডোত্করে জ্ঞানমুদ্রাকরে সর্ৱসংপত্করে পদ্মভাস্ৱত্করে | কুংদপুষ্পদ্যুতি স্নিগ্ধ দংতাৱলী নির্মলালোল কল্লোল সম্মেলন স্মেরশোণাধরে চারুৱীণাধরে পক্ৱবিংবাধরে |
সুললিত নৱযৌৱনারংভ চংদ্রোদযোদ্ৱেল লাৱণ্য দুগ্ধার্ণৱাৱির্ভৱত্কংবুবিব্বোক ভৃত্কংধরে সত্কলামংদিরে মংথরে | দিৱ্যরত্নপ্রভা বংধুরচ্ছন্ন হারাদিভূষা সমুদ্যোতমানানৱদ্যাংশু শোভে শুভে | রত্নকেযূর রশ্মিচ্ছটা পল্লৱপ্রোল্লসদ্দোর্লতা রাজিতে যোগিভিঃ পূজিতে | ৱিশ্ৱদিঙ্মংডলৱ্যাপি মাণিক্যতেজঃ স্ফুরত্কংকণালংকৃতে ৱিভ্রমালংকৃতে সাধকৈঃ সত্কৃতে | ৱাসরারংভ ৱেলা সমুজ্জৃংভমাণারৱিংদ প্রতিদ্ৱংদ্ৱিপাণিদ্ৱযে সংততোদ্যদ্দযে অদ্ৱযে | দিৱ্য রত্নোর্মিকাদীধিতি স্তোমসংধ্যাযমানাংগুলী পল্লৱোদ্যন্নখেংদু প্রভামংডলে সন্নতাখংডলে চিত্প্রভামংডলে প্রোল্লসত্কুংডলে | তারকারাজিনীকাশ হারাৱলিস্মের চারুস্তনাভোগ ভারানমন্মধ্যৱল্লীৱলিচ্ছেদ ৱীচীসমুল্লাস সংদর্শিতাকার সৌংদর্য রত্নাকরে ৱল্লকীভৃত্করে কিংকর শ্রীকরে | হেমকুংভোপমোত্তুংগ ৱক্ষোজ ভারাৱনম্রে ত্রিলোকাৱনম্রে | লসদ্ৱৃত্ত গংভীর নাভী সরস্তীর শৈৱাল শংকাকর শ্যাম রোমাৱলীভূষণে মংজু সংভাষণে | চারু শিংজত্কটী সূত্র নির্ভর্ত্সিতানংগ লীলা ধনুঃ শিংজিনীডংবরে দিৱ্যরত্নাংবরে |
পদ্মরাগোল্লসন্মেখলা ভাস্ৱর শ্রোণি শোভা জিত স্ৱর্ণভূভৃত্তলে চংদ্রিকাশীতলে |
ৱিকসিত নৱ কিংশুকাতাম্র দিৱ্যাংশুকচ্ছন্ন চারূরুশোভা পরাভূতসিংদূর শোণাযমানেংদ্র মাতংগ হস্তার্গলে ৱৈভৱানর্গলে শ্যামলে | কোমল স্নিগ্ধ নীলোপলোত্পাদিতানংগ তূণীর শংকাকরোদার জংঘালতে চারুলীলাগতে | নম্র দিক্পাল সীমংতিনী কুংতল স্নিগ্ধ নীল প্রভা পুংজ সংজাত দূর্ৱাংকুরাশংক সারংগ সংযোগ রিংখন্নখেংদূজ্জ্ৱলে প্রোজ্জ্ৱলে নির্মলে | প্রহ্ৱ দেৱেশ লক্ষ্মীশ ভূতেশ তোযেশ ৱাণীশ কীনাশ দৈত্যেশ যক্ষেশ ৱায্ৱগ্নিকোটীর মাণিক্য সংঘৃষ্ট বালাতপোদ্দাম লাক্ষারসারুণ্য তারুণ্য লক্ষ্মীগৃহীতাংঘ্রি পদ্মে সুপদ্মে উমে |
সুরুচির নৱরত্ন পীঠস্থিতে সুস্থিতে | রত্নপদ্মাসনে রত্নসিংহাসনে শংখপদ্মদ্ৱযোপাশ্রিতে | তত্র ৱিঘ্নেশ দুর্গা ৱটু ক্ষেত্রপালৈর্যুতে | মত্তমাতংগ কন্যাসমূহান্ৱিতে মংজুলা মেনকাদ্যংগনা মানিতে ভৈরৱৈরষ্টভির্ৱেষ্টিতে | দেৱি ৱামাদিভিঃ শক্তিভিঃ সেৱিতে | ধাত্রিলক্ষ্ম্যাদি শক্ত্যষ্টকৈঃ সংযুতে | মাতৃকামংডলৈর্মংডিতে | যক্ষ গংধর্ৱ সিদ্ধাংগনা মংডলৈরর্চিতে | পংচবাণাত্মিকে | পংচবাণেন রত্যা চ সংভাৱিতে | প্রীতিভাজা ৱসংতেন চানংদিতে | ভক্তিভাজাং পরং শ্রেযসে কল্পসে | যোগিনাং মানসে দ্যোতসে | ছংদসামোজসা ভ্রাজসে | গীতৱিদ্যা ৱিনোদাতিতৃষ্ণেন কৃষ্ণেন সংপূজ্যসে | ভক্তিমচ্চেতসা ৱেধসা স্তূযসে | ৱিশ্ৱহৃদ্যেন ৱাদ্যেন ৱিদ্যাধরৈর্গীযসে |
শ্রৱণহরণ দক্ষিণক্ৱাণযা ৱীণযা কিন্নরৈর্গীযসে | যক্ষ গংধর্ৱ সিদ্ধাংগনা মংডলৈরর্চ্যসে | সর্ৱসৌভাগ্যৱাংছাৱতীভির্ৱধূভিঃ সুরাণাং সমারাধ্যসে | সর্ৱৱিদ্যাৱিশেষাত্মকং চাটুগাথাসমুচ্চারণং কংঠমূলোল্লসদ্ৱর্ণরাজিত্রযং কোমলশ্যামলোদারপক্ষদ্ৱযং তুংডশোভাতিদূরীভৱত্কিংশুকং তং শুকং লালযংতী পরিক্রীডসে | পাণিপদ্মদ্ৱযেনাক্ষমালামপি স্ফাটিকীং জ্ঞানসারাত্মকং পুস্তকং চাংকুশং পাশমাবিভ্রতী যেন সংচিংত্যসে তস্য ৱক্ত্রাংতরাত্ গদ্যপদ্যাত্মিকা ভারতী নিস্সরেত্ | যেন ৱা যাৱকাভাকৃতির্ভাৱ্যসে তস্য ৱশ্যা ভৱংতি স্ত্রিযঃ পূরুষাঃ | যেন ৱা শাতকুংভদ্যুতির্ভাৱ্যসে সোঽপি লক্ষ্মীসহস্রৈঃ পরিক্রীডতে | কিং ন সিদ্ধ্যেদ্ৱপুঃ শ্যামলং কোমলং চংদ্রচূডান্ৱিতং তাৱকং ধ্যাযতঃ | তস্য লীলাসরো ৱারিধিঃ, তস্য কেলীৱনং নংদনং, তস্য ভদ্রাসনং ভূতলং, তস্য গীর্দেৱতা কিংকরী, তস্য চাজ্ঞাকরী শ্রীঃ স্ৱযম্ | সর্ৱতীর্থাত্মিকে, সর্ৱমংত্রাত্মিকে, সর্ৱতংত্রাত্মিকে, সর্ৱযংত্রাত্মিকে, সর্ৱপীঠাত্মিকে, সর্ৱতত্ত্ৱাত্মিকে, সর্ৱশক্ত্যাত্মিকে, সর্ৱৱিদ্যাত্মিকে, সর্ৱযোগাত্মিকে, সর্ৱনাদাত্মিকে, সর্ৱশব্দাত্মিকে, সর্ৱৱিশ্ৱাত্মিকে, সর্ৱদীক্ষাত্মিকে, সর্ৱসর্ৱাত্মিকে, সর্ৱগে, পাহি মাং পাহি মাং পাহি মাং, দেৱি তুভ্যং নমো, দেৱি তুভ্যং নমো, দেৱি তুভ্যং নমঃ ||
ইতি শ্রীকালিদাস কৃত শ্রী শ্যামলা দংডকম্ |