ଧ୍ଯାନମ୍ –
ମାଣିକ୍ଯଵୀଣାମୁପଲାଲଯଂତୀଂ
ମଦାଲସାଂ ମଂଜୁଲଵାଗ୍ଵିଲାସାମ୍ |
ମାହେଂଦ୍ରନୀଲଦ୍ଯୁତିକୋମଲାଂଗୀଂ
ମାତଂଗକନ୍ଯାଂ ମନସା ସ୍ମରାମି || ୧ ||
ଚତୁର୍ଭୁଜେ ଚଂଦ୍ରକଳାଵତଂସେ
କୁଚୋନ୍ନତେ କୁଂକୁମରାଗ ଶୋଣେ |
ପୁଂଡ୍ରେକ୍ଷୁପାଶାଂକୁଶପୁଷ୍ପବାଣ-
-ହସ୍ତେ ନମସ୍ତେ ଜଗଦେକମାତଃ || ୨ ||
ମାତା ମରକତଶ୍ଯାମା ମାତଂଗୀ ମଦଶାଲିନୀ |
କୁର୍ଯାତ୍କଟାକ୍ଷଂ କଳ୍ଯାଣୀ କଦଂବଵନଵାସିନୀ || ୩ ||
ଜଯ ମାତଂଗତନଯେ ଜଯ ନୀଲୋତ୍ପଲଦ୍ଯୁତେ |
ଜଯ ସଂଗୀତରସିକେ ଜଯ ଲୀଲାଶୁକପ୍ରିଯେ || ୪ ||
ଦଂଡକମ୍ –
ଜଯ ଜନନି ସୁଧା ସମୁଦ୍ରାଂତରୁଦ୍ଯନ୍ ମଣିଦ୍ଵୀପ ସଂରୂଢ ବିଲ୍ଵାଟଵୀମଧ୍ଯକଲ୍ପଦ୍ରୁମାକଲ୍ପ କାଦଂବକାଂତାର ଵାସପ୍ରିଯେ କୃତ୍ତିଵାସଃପ୍ରିଯେ ସର୍ଵଲୋକପ୍ରିଯେ |
ସାଦରାରବ୍ଧ ସଂଗୀତ ସଂଭାଵନା ସଂଭ୍ରମାଲୋଲ ନୀପସ୍ରଗାବଦ୍ଧଚୂଲୀ ସନାଥତ୍ରିକେ ସାନୁମତ୍ପୁତ୍ରିକେ | ଶେଖରୀଭୂତ ଶୀତାଂଶୁରେଖା ମଯୂଖାଵଲୀ ବଦ୍ଧ ସୁସ୍ନିଗ୍ଧ ନୀଲାଲକଶ୍ରେଣିଶୃଂଗାରିତେ ଲୋକସଂଭାଵିତେ | କାମଲୀଲା ଧନୁଃସନ୍ନିଭ ଭ୍ରୂଲତାପୁଷ୍ପ ସଂଦୋହ ସଂଦେହ କୃଲ୍ଲୋଚନେ ଵାକ୍ସୁଧାସେଚନେ | ଚାରୁ ଗୋରୋଚନା ପଂକ କେଲୀ ଲଲାମାଭିରାମେ ସୁରାମେ ରମେ | ପ୍ରୋଲ୍ଲସଦ୍ଵାଲିକା ମୌକ୍ତିକଶ୍ରେଣିକା ଚଂଦ୍ରିକା ମଂଡଲୋଦ୍ଭାସି ଲାଵଣ୍ଯଗଂଡସ୍ଥଲ ନ୍ଯସ୍ତକସ୍ତୂରିକାପତ୍ରରେଖା ସମୁଦ୍ଭୂତ ସୌରଭ୍ଯ ସଂଭ୍ରାଂତ ଭୃଂଗାଂଗନା ଗୀତସାଂଦ୍ରୀଭଵନ୍ମଂଦ୍ର ତଂତ୍ରୀସ୍ଵରେ ସୁସ୍ଵରେ ଭାସ୍ଵରେ | ଵଲ୍ଲକୀ ଵାଦନ ପ୍ରକ୍ରିଯା ଲୋଲ ତାଲୀଦଲାବଦ୍ଧତାଟଂକ ଭୂଷାଵିଶେଷାନ୍ଵିତେ ସିଦ୍ଧସମ୍ମାନିତେ | ଦିଵ୍ଯ ହାଲାମଦୋଦ୍ଵେଲ ହେଲାଲସଚ୍ଚକ୍ଷୁରାଂଦୋଲନ ଶ୍ରୀସମାକ୍ଷିପ୍ତ କର୍ଣୈକ ନୀଲୋତ୍ପଲେ ପୂରିତାଶେଷ ଲୋକାଭିଵାଂଛା ଫଲେ ଶ୍ରୀଫଲେ | ସ୍ଵେଦ ବିଂଦୂଲ୍ଲସତ୍ଫାଲ ଲାଵଣ୍ଯ ନିଷ୍ଯଂଦ ସଂଦୋହ ସଂଦେହକୃନ୍ନାସିକା ମୌକ୍ତିକେ ସର୍ଵଵିଶ୍ଵାତ୍ମିକେ କାଲିକେ | ମୁଗ୍ଧ ମଂଦସ୍ମିତୋଦାର ଵକ୍ତ୍ରସ୍ଫୁରତ୍ପୂଗ ତାଂବୂଲକର୍ପୂର ଖଂଡୋତ୍କରେ ଜ୍ଞାନମୁଦ୍ରାକରେ ସର୍ଵସଂପତ୍କରେ ପଦ୍ମଭାସ୍ଵତ୍କରେ | କୁଂଦପୁଷ୍ପଦ୍ଯୁତି ସ୍ନିଗ୍ଧ ଦଂତାଵଲୀ ନିର୍ମଲାଲୋଲ କଲ୍ଲୋଲ ସମ୍ମେଲନ ସ୍ମେରଶୋଣାଧରେ ଚାରୁଵୀଣାଧରେ ପକ୍ଵବିଂବାଧରେ |
ସୁଲଲିତ ନଵଯୌଵନାରଂଭ ଚଂଦ୍ରୋଦଯୋଦ୍ଵେଲ ଲାଵଣ୍ଯ ଦୁଗ୍ଧାର୍ଣଵାଵିର୍ଭଵତ୍କଂବୁବିବ୍ବୋକ ଭୃତ୍କଂଧରେ ସତ୍କଲାମଂଦିରେ ମଂଥରେ | ଦିଵ୍ଯରତ୍ନପ୍ରଭା ବଂଧୁରଚ୍ଛନ୍ନ ହାରାଦିଭୂଷା ସମୁଦ୍ଯୋତମାନାନଵଦ୍ଯାଂଶୁ ଶୋଭେ ଶୁଭେ | ରତ୍ନକେଯୂର ରଶ୍ମିଚ୍ଛଟା ପଲ୍ଲଵପ୍ରୋଲ୍ଲସଦ୍ଦୋର୍ଲତା ରାଜିତେ ଯୋଗିଭିଃ ପୂଜିତେ | ଵିଶ୍ଵଦିଙ୍ମଂଡଲଵ୍ଯାପି ମାଣିକ୍ଯତେଜଃ ସ୍ଫୁରତ୍କଂକଣାଲଂକୃତେ ଵିଭ୍ରମାଲଂକୃତେ ସାଧକୈଃ ସତ୍କୃତେ | ଵାସରାରଂଭ ଵେଲା ସମୁଜ୍ଜୃଂଭମାଣାରଵିଂଦ ପ୍ରତିଦ୍ଵଂଦ୍ଵିପାଣିଦ୍ଵଯେ ସଂତତୋଦ୍ଯଦ୍ଦଯେ ଅଦ୍ଵଯେ | ଦିଵ୍ଯ ରତ୍ନୋର୍ମିକାଦୀଧିତି ସ୍ତୋମସଂଧ୍ଯାଯମାନାଂଗୁଲୀ ପଲ୍ଲଵୋଦ୍ଯନ୍ନଖେଂଦୁ ପ୍ରଭାମଂଡଲେ ସନ୍ନତାଖଂଡଲେ ଚିତ୍ପ୍ରଭାମଂଡଲେ ପ୍ରୋଲ୍ଲସତ୍କୁଂଡଲେ | ତାରକାରାଜିନୀକାଶ ହାରାଵଲିସ୍ମେର ଚାରୁସ୍ତନାଭୋଗ ଭାରାନମନ୍ମଧ୍ଯଵଲ୍ଲୀଵଲିଚ୍ଛେଦ ଵୀଚୀସମୁଲ୍ଲାସ ସଂଦର୍ଶିତାକାର ସୌଂଦର୍ଯ ରତ୍ନାକରେ ଵଲ୍ଲକୀଭୃତ୍କରେ କିଂକର ଶ୍ରୀକରେ | ହେମକୁଂଭୋପମୋତ୍ତୁଂଗ ଵକ୍ଷୋଜ ଭାରାଵନମ୍ରେ ତ୍ରିଲୋକାଵନମ୍ରେ | ଲସଦ୍ଵୃତ୍ତ ଗଂଭୀର ନାଭୀ ସରସ୍ତୀର ଶୈଵାଲ ଶଂକାକର ଶ୍ଯାମ ରୋମାଵଲୀଭୂଷଣେ ମଂଜୁ ସଂଭାଷଣେ | ଚାରୁ ଶିଂଜତ୍କଟୀ ସୂତ୍ର ନିର୍ଭର୍ତ୍ସିତାନଂଗ ଲୀଲା ଧନୁଃ ଶିଂଜିନୀଡଂବରେ ଦିଵ୍ଯରତ୍ନାଂବରେ |
ପଦ୍ମରାଗୋଲ୍ଲସନ୍ମେଖଲା ଭାସ୍ଵର ଶ୍ରୋଣି ଶୋଭା ଜିତ ସ୍ଵର୍ଣଭୂଭୃତ୍ତଲେ ଚଂଦ୍ରିକାଶୀତଲେ |
ଵିକସିତ ନଵ କିଂଶୁକାତାମ୍ର ଦିଵ୍ଯାଂଶୁକଚ୍ଛନ୍ନ ଚାରୂରୁଶୋଭା ପରାଭୂତସିଂଦୂର ଶୋଣାଯମାନେଂଦ୍ର ମାତଂଗ ହସ୍ତାର୍ଗଲେ ଵୈଭଵାନର୍ଗଲେ ଶ୍ଯାମଲେ | କୋମଲ ସ୍ନିଗ୍ଧ ନୀଲୋପଲୋତ୍ପାଦିତାନଂଗ ତୂଣୀର ଶଂକାକରୋଦାର ଜଂଘାଲତେ ଚାରୁଲୀଲାଗତେ | ନମ୍ର ଦିକ୍ପାଲ ସୀମଂତିନୀ କୁଂତଲ ସ୍ନିଗ୍ଧ ନୀଲ ପ୍ରଭା ପୁଂଜ ସଂଜାତ ଦୂର୍ଵାଂକୁରାଶଂକ ସାରଂଗ ସଂଯୋଗ ରିଂଖନ୍ନଖେଂଦୂଜ୍ଜ୍ଵଲେ ପ୍ରୋଜ୍ଜ୍ଵଲେ ନିର୍ମଲେ | ପ୍ରହ୍ଵ ଦେଵେଶ ଲକ୍ଷ୍ମୀଶ ଭୂତେଶ ତୋଯେଶ ଵାଣୀଶ କୀନାଶ ଦୈତ୍ଯେଶ ଯକ୍ଷେଶ ଵାଯ୍ଵଗ୍ନିକୋଟୀର ମାଣିକ୍ଯ ସଂଘୃଷ୍ଟ ବାଲାତପୋଦ୍ଦାମ ଲାକ୍ଷାରସାରୁଣ୍ଯ ତାରୁଣ୍ଯ ଲକ୍ଷ୍ମୀଗୃହୀତାଂଘ୍ରି ପଦ୍ମେ ସୁପଦ୍ମେ ଉମେ |
ସୁରୁଚିର ନଵରତ୍ନ ପୀଠସ୍ଥିତେ ସୁସ୍ଥିତେ | ରତ୍ନପଦ୍ମାସନେ ରତ୍ନସିଂହାସନେ ଶଂଖପଦ୍ମଦ୍ଵଯୋପାଶ୍ରିତେ | ତତ୍ର ଵିଘ୍ନେଶ ଦୁର୍ଗା ଵଟୁ କ୍ଷେତ୍ରପାଲୈର୍ଯୁତେ | ମତ୍ତମାତଂଗ କନ୍ଯାସମୂହାନ୍ଵିତେ ମଂଜୁଲା ମେନକାଦ୍ଯଂଗନା ମାନିତେ ଭୈରଵୈରଷ୍ଟଭିର୍ଵେଷ୍ଟିତେ | ଦେଵି ଵାମାଦିଭିଃ ଶକ୍ତିଭିଃ ସେଵିତେ | ଧାତ୍ରିଲକ୍ଷ୍ମ୍ଯାଦି ଶକ୍ତ୍ଯଷ୍ଟକୈଃ ସଂଯୁତେ | ମାତୃକାମଂଡଲୈର୍ମଂଡିତେ | ଯକ୍ଷ ଗଂଧର୍ଵ ସିଦ୍ଧାଂଗନା ମଂଡଲୈରର୍ଚିତେ | ପଂଚବାଣାତ୍ମିକେ | ପଂଚବାଣେନ ରତ୍ଯା ଚ ସଂଭାଵିତେ | ପ୍ରୀତିଭାଜା ଵସଂତେନ ଚାନଂଦିତେ | ଭକ୍ତିଭାଜାଂ ପରଂ ଶ୍ରେଯସେ କଲ୍ପସେ | ଯୋଗିନାଂ ମାନସେ ଦ୍ଯୋତସେ | ଛଂଦସାମୋଜସା ଭ୍ରାଜସେ | ଗୀତଵିଦ୍ଯା ଵିନୋଦାତିତୃଷ୍ଣେନ କୃଷ୍ଣେନ ସଂପୂଜ୍ଯସେ | ଭକ୍ତିମଚ୍ଚେତସା ଵେଧସା ସ୍ତୂଯସେ | ଵିଶ୍ଵହୃଦ୍ଯେନ ଵାଦ୍ଯେନ ଵିଦ୍ଯାଧରୈର୍ଗୀଯସେ |
ଶ୍ରଵଣହରଣ ଦକ୍ଷିଣକ୍ଵାଣଯା ଵୀଣଯା କିନ୍ନରୈର୍ଗୀଯସେ | ଯକ୍ଷ ଗଂଧର୍ଵ ସିଦ୍ଧାଂଗନା ମଂଡଲୈରର୍ଚ୍ଯସେ | ସର୍ଵସୌଭାଗ୍ଯଵାଂଛାଵତୀଭିର୍ଵଧୂଭିଃ ସୁରାଣାଂ ସମାରାଧ୍ଯସେ | ସର୍ଵଵିଦ୍ଯାଵିଶେଷାତ୍ମକଂ ଚାଟୁଗାଥାସମୁଚ୍ଚାରଣଂ କଂଠମୂଲୋଲ୍ଲସଦ୍ଵର୍ଣରାଜିତ୍ରଯଂ କୋମଲଶ୍ଯାମଲୋଦାରପକ୍ଷଦ୍ଵଯଂ ତୁଂଡଶୋଭାତିଦୂରୀଭଵତ୍କିଂଶୁକଂ ତଂ ଶୁକଂ ଲାଲଯଂତୀ ପରିକ୍ରୀଡସେ | ପାଣିପଦ୍ମଦ୍ଵଯେନାକ୍ଷମାଲାମପି ସ୍ଫାଟିକୀଂ ଜ୍ଞାନସାରାତ୍ମକଂ ପୁସ୍ତକଂ ଚାଂକୁଶଂ ପାଶମାବିଭ୍ରତୀ ଯେନ ସଂଚିଂତ୍ଯସେ ତସ୍ଯ ଵକ୍ତ୍ରାଂତରାତ୍ ଗଦ୍ଯପଦ୍ଯାତ୍ମିକା ଭାରତୀ ନିସ୍ସରେତ୍ | ଯେନ ଵା ଯାଵକାଭାକୃତିର୍ଭାଵ୍ଯସେ ତସ୍ଯ ଵଶ୍ଯା ଭଵଂତି ସ୍ତ୍ରିଯଃ ପୂରୁଷାଃ | ଯେନ ଵା ଶାତକୁଂଭଦ୍ଯୁତିର୍ଭାଵ୍ଯସେ ସୋଽପି ଲକ୍ଷ୍ମୀସହସ୍ରୈଃ ପରିକ୍ରୀଡତେ | କିଂ ନ ସିଦ୍ଧ୍ଯେଦ୍ଵପୁଃ ଶ୍ଯାମଲଂ କୋମଲଂ ଚଂଦ୍ରଚୂଡାନ୍ଵିତଂ ତାଵକଂ ଧ୍ଯାଯତଃ | ତସ୍ଯ ଲୀଲାସରୋ ଵାରିଧିଃ, ତସ୍ଯ କେଲୀଵନଂ ନଂଦନଂ, ତସ୍ଯ ଭଦ୍ରାସନଂ ଭୂତଲଂ, ତସ୍ଯ ଗୀର୍ଦେଵତା କିଂକରୀ, ତସ୍ଯ ଚାଜ୍ଞାକରୀ ଶ୍ରୀଃ ସ୍ଵଯମ୍ | ସର୍ଵତୀର୍ଥାତ୍ମିକେ, ସର୍ଵମଂତ୍ରାତ୍ମିକେ, ସର୍ଵତଂତ୍ରାତ୍ମିକେ, ସର୍ଵଯଂତ୍ରାତ୍ମିକେ, ସର୍ଵପୀଠାତ୍ମିକେ, ସର୍ଵତତ୍ତ୍ଵାତ୍ମିକେ, ସର୍ଵଶକ୍ତ୍ଯାତ୍ମିକେ, ସର୍ଵଵିଦ୍ଯାତ୍ମିକେ, ସର୍ଵଯୋଗାତ୍ମିକେ, ସର୍ଵନାଦାତ୍ମିକେ, ସର୍ଵଶବ୍ଦାତ୍ମିକେ, ସର୍ଵଵିଶ୍ଵାତ୍ମିକେ, ସର୍ଵଦୀକ୍ଷାତ୍ମିକେ, ସର୍ଵସର୍ଵାତ୍ମିକେ, ସର୍ଵଗେ, ପାହି ମାଂ ପାହି ମାଂ ପାହି ମାଂ, ଦେଵି ତୁଭ୍ଯଂ ନମୋ, ଦେଵି ତୁଭ୍ଯଂ ନମୋ, ଦେଵି ତୁଭ୍ଯଂ ନମଃ ||
ଇତି ଶ୍ରୀକାଳିଦାସ କୃତ ଶ୍ରୀ ଶ୍ଯାମଲା ଦଂଡକମ୍ |