ઇંદ્ર ઉવાચ |
નમસ્તેઽસ્તુ મહામાયે શ્રીપીઠે સુરપૂજિતે |
શંખચક્રગદાહસ્તે મહાલક્ષ્મિ નમોઽસ્તુ તે || ૧ ||
નમસ્તે ગરુડારૂઢે કોલાસુરભયંકરિ |
સર્વપાપહરે દેવિ મહાલક્ષ્મિ નમોઽસ્તુ તે || ૨ ||
સર્વજ્ઞે સર્વવરદે સર્વદુષ્ટભયંકરિ |
સર્વદુઃખહરે દેવિ મહાલક્ષ્મિ નમોઽસ્તુ તે || ૩ ||
સિદ્ધિબુદ્ધિપ્રદે દેવિ ભુક્તિમુક્તિપ્રદાયિનિ |
મંત્રમૂર્તે સદા દેવિ મહાલક્ષ્મિ નમોઽસ્તુ તે || ૪ ||
આદ્યંતરહિતે દેવિ આદ્યશક્તિ મહેશ્વરિ |
યોગજે યોગસંભૂતે મહાલક્ષ્મિ નમોઽસ્તુ તે || ૫ || [યોગજ્ઞે]
સ્થૂલસૂક્ષ્મમહારૌદ્રે મહાશક્તે મહોદરે |
મહાપાપહરે દેવિ મહાલક્ષ્મિ નમોઽસ્તુ તે || ૬ ||
પદ્માસનસ્થિતે દેવિ પરબ્રહ્મસ્વરૂપિણિ |
પરમેશિ જગન્માતર્મહાલક્ષ્મિ નમોઽસ્તુ તે || ૭ ||
શ્વેતાંબરધરે દેવિ નાનાલંકારભૂષિતે |
જગત્સ્થિતે જગન્માતર્મહાલક્ષ્મિ નમોઽસ્તુ તે || ૮ ||
મહાલક્ષ્મ્યષ્ટકં સ્તોત્રં યઃ પઠેદ્ભક્તિમાન્નરઃ |
સર્વસિદ્ધિમવાપ્નોતિ રાજ્યં પ્રાપ્નોતિ સર્વદા || ૯ ||
એકકાલં પઠેન્નિત્યં મહાપાપવિનાશનમ્ |
દ્વિકાલં યઃ પઠેન્નિત્યં ધનધાન્યસમન્વિતઃ || ૧૦ ||
ત્રિકાલં યઃ પઠેન્નિત્યં મહાશત્રુવિનાશનમ્ |
મહાલક્ષ્મીર્ભવેન્નિત્યં પ્રસન્ના વરદા શુભા || ૧૧ ||
ઇતિ શ્રી મહાલક્ષ્મ્યષ્ટકમ્ ||