ତପଃସ୍ଵାଧ୍ଯାଯନିରତଂ ତପସ୍ଵୀ ଵାଗ୍ଵିଦାଂ ଵରମ୍ |
ନାରଦଂ ପରିପପ୍ରଚ୍ଛ ଵାଲ୍ମୀକିର୍ମୁନିପୁଂଗଵମ୍ || ୧ ||

କୋଽନ୍ଵସ୍ମିନ୍ସାଂପ୍ରତଂ ଲୋକେ ଗୁଣଵାନ୍ କଶ୍ଚ ଵୀର୍ଯଵାନ୍ |
ଧର୍ମଜ୍ଞଶ୍ଚ କୃତଜ୍ଞଶ୍ଚ ସତ୍ଯଵାକ୍ଯୋ ଦୃଢଵ୍ରତଃ || ୨ ||

ଚାରିତ୍ରେଣ ଚ କୋ ଯୁକ୍ତଃ ସର୍ଵଭୂତେଷୁ କୋ ହିତଃ |
ଵିଦ୍ଵାନ୍ କଃ କଃ ସମର୍ଥଶ୍ଚ କଶ୍ଚୈକପ୍ରିଯଦର୍ଶନଃ || ୩ ||

ଆତ୍ମଵାନ୍ କୋ ଜିତକ୍ରୋଧୋ ଦ୍ଯୁତିମାନ୍ କୋଽନସୂଯକଃ |
କସ୍ଯ ବିଭ୍ଯତି ଦେଵାଶ୍ଚ ଜାତରୋଷସ୍ଯ ସଂଯୁଗେ || ୪ ||

ଏତଦିଚ୍ଛାମ୍ଯହଂ ଶ୍ରୋତୁଂ ପରଂ କୌତୂହଲଂ ହି ମେ |
ମହର୍ଷେ ତ୍ଵଂ ସମର୍ଥୋଽସି ଜ୍ଞାତୁମେଵଂଵିଧଂ ନରମ୍ || ୫ ||

ଶ୍ରୁତ୍ଵା ଚୈତତ୍ତ୍ରିଲୋକଜ୍ଞୋ ଵାଲ୍ମୀକେର୍ନାରଦୋ ଵଚଃ |
ଶ୍ରୂଯତାମିତି ଚାମଂତ୍ର୍ଯ ପ୍ରହୃଷ୍ଟୋ ଵାକ୍ଯମବ୍ରଵୀତ୍ || ୬ ||

ବହଵୋ ଦୁର୍ଲଭାଶ୍ଚୈଵ ଯେ ତ୍ଵଯା କୀର୍ତିତା ଗୁଣାଃ |
ମୁନେ ଵକ୍ଷ୍ଯାମ୍ଯହଂ ବୁଦ୍ଧ୍ଵା ତୈର୍ଯୁକ୍ତଃ ଶ୍ରୂଯତାଂ ନରଃ || ୭ || [ବୁଦ୍ଧ୍ଯା]

ଇକ୍ଷ୍ଵାକୁଵଂଶପ୍ରଭଵୋ ରାମୋ ନାମ ଜନୈଃ ଶ୍ରୁତଃ |
ନିଯତାତ୍ମା ମହାଵୀର୍ଯୋ ଦ୍ଯୁତିମାନ୍ଧୃତିମାନ୍ଵଶୀ || ୮ ||

ବୁଦ୍ଧିମାନ୍ନୀତିମାନ୍ଵାଗ୍ମୀ ଶ୍ରୀମାନ୍ ଶତ୍ରୁନିବର୍ହଣଃ |
ଵିପୁଲାଂସୋ ମହାବାହୁଃ କଂବୁଗ୍ରୀଵୋ ମହାହନୁଃ || ୯ ||

ମହୋରସ୍କୋ ମହେଷ୍ଵାସୋ ଗୂଢଜତ୍ରୁରରିଂଦମଃ |
ଆଜାନୁବାହୁଃ ସୁଶିରାଃ ସୁଲଲାଟଃ ସୁଵିକ୍ରମଃ || ୧୦ ||

ସମଃ ସମଵିଭକ୍ତାଂଗଃ ସ୍ନିଗ୍ଧଵର୍ଣଃ ପ୍ରତାପଵାନ୍ |
ପୀନଵକ୍ଷା ଵିଶାଲାକ୍ଷୋ ଲକ୍ଷ୍ମୀଵାନ୍ ଶୁଭଲକ୍ଷଣଃ || ୧୧ ||

ଧର୍ମଜ୍ଞଃ ସତ୍ଯସଂଧଶ୍ଚ ପ୍ରଜାନାଂ ଚ ହିତେ ରତଃ |
ଯଶସ୍ଵୀ ଜ୍ଞାନସଂପନ୍ନଃ ଶୁଚିର୍ଵଶ୍ଯଃ ସମାଧିମାନ୍ || ୧୨ ||

ପ୍ରଜାପତିସମଃ ଶ୍ରୀମାନ୍ ଧାତା ରିପୁନିଷୂଦନଃ |
ରକ୍ଷିତା ଜୀଵଲୋକସ୍ଯ ଧର୍ମସ୍ଯ ପରିରକ୍ଷିତା || ୧୩ ||

ରକ୍ଷିତା ସ୍ଵସ୍ଯ ଧର୍ମସ୍ଯ ସ୍ଵଜନସ୍ଯ ଚ ରକ୍ଷିତା |
ଵେଦଵେଦାଂଗତତ୍ତ୍ଵଜ୍ଞୋ ଧନୁର୍ଵେଦେ ଚ ନିଷ୍ଠିତଃ || ୧୪ ||

ସର୍ଵଶାସ୍ତ୍ରାର୍ଥତତ୍ତ୍ଵଜ୍ଞଃ ସ୍ମୃତିମାନ୍ପ୍ରତିଭାନଵାନ୍ |
ସର୍ଵଲୋକପ୍ରିଯଃ ସାଧୁରଦୀନାତ୍ମା ଵିଚକ୍ଷଣଃ || ୧୫ ||

ସର୍ଵଦାଭିଗତଃ ସଦ୍ଭିଃ ସମୁଦ୍ର ଇଵ ସିଂଧୁଭିଃ |
ଆର୍ଯଃ ସର୍ଵସମଶ୍ଚୈଵ ସଦୈଵ ପ୍ରିଯଦର୍ଶନଃ || ୧୬ ||

ସ ଚ ସର୍ଵଗୁଣୋପେତଃ କୌସଲ୍ଯାନଂଦଵର୍ଧନଃ |
ସମୁଦ୍ର ଇଵ ଗାଂଭୀର୍ଯେ ଧୈର୍ଯେଣ ହିମଵାନିଵ || ୧୭ ||

ଵିଷ୍ଣୁନା ସଦୃଶୋ ଵୀର୍ଯେ ସୋମଵତ୍ପ୍ରିଯଦର୍ଶନଃ |
କାଲାଗ୍ନିସଦୃଶଃ କ୍ରୋଧେ କ୍ଷମଯା ପୃଥିଵୀସମଃ || ୧୮ ||

ଧନଦେନ ସମସ୍ତ୍ଯାଗେ ସତ୍ଯେ ଧର୍ମ ଇଵାପରଃ |
ତମେଵଂ‍ଗୁଣସଂପନ୍ନଂ ରାମଂ ସତ୍ଯପରାକ୍ରମମ୍ || ୧୯ ||

ଜ୍ଯେଷ୍ଠଂ ଶ୍ରେଷ୍ଠଗୁଣୈର୍ଯୁକ୍ତଂ ପ୍ରିଯଂ ଦଶରଥଃ ସୁତମ୍ |
ପ୍ରକୃତୀନାଂ ହିତୈର୍ଯୁକ୍ତଂ ପ୍ରକୃତିପ୍ରିଯକାମ୍ଯଯା || ୨୦ ||

ଯୌଵରାଜ୍ଯେନ ସଂଯୋକ୍ତୁମୈଚ୍ଛତ୍ପ୍ରୀତ୍ଯା ମହୀପତିଃ |
ତସ୍ଯାଭିଷେକସଂଭାରାନ୍ଦୃଷ୍ଟ୍ଵା ଭାର୍ଯାଽଥ କୈକଯୀ || ୨୧ ||

ପୂର୍ଵଂ ଦତ୍ତଵରା ଦେଵୀ ଵରମେନମଯାଚତ |
ଵିଵାସନଂ ଚ ରାମସ୍ଯ ଭରତସ୍ଯାଭିଷେଚନମ୍ || ୨୨ ||

ସ ସତ୍ଯଵଚନାଦ୍ରାଜା ଧର୍ମପାଶେନ ସଂଯତଃ | [ଚୈଵ]
ଵିଵାସଯାମାସ ସୁତଂ ରାମଂ ଦଶରଥଃ ପ୍ରିଯମ୍ || ୨୩ ||

ସ ଜଗାମ ଵନଂ ଵୀରଃ ପ୍ରତିଜ୍ଞାମନୁପାଲଯନ୍ |
ପିତୁର୍ଵଚନନିର୍ଦେଶାତ୍କୈକେଯ୍ଯାଃ ପ୍ରିଯକାରଣାତ୍ || ୨୪ ||

ତଂ ଵ୍ରଜଂତଂ ପ୍ରିଯୋ ଭ୍ରାତା ଲକ୍ଷ୍ମଣୋଽନୁଜଗାମ ହ |
ସ୍ନେହାଦ୍ଵିନଯସଂପନ୍ନଃ ସୁମିତ୍ରାନଂଦଵର୍ଧନଃ || ୨୫ ||

ଭ୍ରାତରଂ ଦଯିତୋ ଭ୍ରାତୁଃ ସୌଭ୍ରାତ୍ରମନୁଦର୍ଶଯନ୍ |
ରାମସ୍ଯ ଦଯିତା ଭାର୍ଯା ନିତ୍ଯଂ ପ୍ରାଣସମା ହିତା || ୨୬ ||

ଜନକସ୍ଯ କୁଲେ ଜାତା ଦେଵମାଯେଵ ନିର୍ମିତା |
ସର୍ଵଲକ୍ଷଣସଂପନ୍ନା ନାରୀଣାମୁତ୍ତମା ଵଧୂଃ || ୨୭ ||

ସୀତାପ୍ଯନୁଗତା ରାମଂ ଶଶିନଂ ରୋହିଣୀ ଯଥା |
ପୌରୈରନୁଗତୋ ଦୂରଂ ପିତ୍ରା ଦଶରଥେନ ଚ || ୨୮ ||

ଶୃଂଗିବେରପୁରେ ସୂତଂ ଗଂଗାକୂଲେ ଵ୍ଯସର୍ଜଯତ୍ |
ଗୁହମାସାଦ୍ଯ ଧର୍ମାତ୍ମା ନିଷାଦାଧିପତିଂ ପ୍ରିଯମ୍ || ୨୯ ||

ଗୁହେନ ସହିତୋ ରାମୋ ଲକ୍ଷ୍ମଣେନ ଚ ସୀତଯା |
ତେ ଵନେନ ଵନଂ ଗତ୍ଵା ନଦୀସ୍ତୀର୍ତ୍ଵା ବହୂଦକାଃ || ୩୦ ||

ଚିତ୍ରକୂଟମନୁପ୍ରାପ୍ଯ ଭରଦ୍ଵାଜସ୍ଯ ଶାସନାତ୍ |
ରମ୍ଯମାଵସଥଂ କୃତ୍ଵା ରମମାଣା ଵନେ ତ୍ରଯଃ || ୩୧ ||

ଦେଵଗଂଧର୍ଵସଂକାଶାସ୍ତତ୍ର ତେ ନ୍ଯଵସନ୍ସୁଖମ୍ |
ଚିତ୍ରକୂଟଂ ଗତେ ରାମେ ପୁତ୍ରଶୋକାତୁରସ୍ତଥା || ୩୨ ||

ରାଜା ଦଶରଥଃ ସ୍ଵର୍ଗଂ ଜଗାମ ଵିଲପନ୍ସୁତମ୍ |
ମୃତେ ତୁ ତସ୍ମିନ୍ଭରତୋ ଵସିଷ୍ଠପ୍ରମୁଖୈର୍ଦ୍ଵିଜୈଃ || ୩୩ ||

ନିଯୁଜ୍ଯମାନୋ ରାଜ୍ଯାଯ ନୈଚ୍ଛଦ୍ରାଜ୍ଯଂ ମହାବଲଃ |
ସ ଜଗାମ ଵନଂ ଵୀରୋ ରାମପାଦପ୍ରସାଦକଃ || ୩୪ ||

ଗତ୍ଵା ତୁ ସୁମହାତ୍ମାନଂ ରାମଂ ସତ୍ଯପରାକ୍ରମମ୍ | [ସ ମହା.]
ଅଯାଚଦ୍ଭ୍ରାତରଂ ରାମମାର୍ଯଭାଵପୁରସ୍କୃତଃ || ୩୫ ||

ତ୍ଵମେଵ ରାଜା ଧର୍ମଜ୍ଞ ଇତି ରାମଂ ଵଚୋଽବ୍ରଵୀତ୍ |
ରାମୋଽପି ପରମୋଦାରଃ ସୁମୁଖଃ ସୁମହାଯଶାଃ || ୩୬ ||

ନ ଚୈଚ୍ଛତ୍ପିତୁରାଦେଶାଦ୍ରାଜ୍ଯଂ ରାମୋ ମହାବଲଃ |
ପାଦୁକେ ଚାସ୍ଯ ରାଜ୍ଯାଯ ନ୍ଯାସଂ ଦତ୍ତ୍ଵା ପୁନଃ ପୁନଃ || ୩୭ ||

ନିଵର୍ତଯାମାସ ତତୋ ଭରତଂ ଭରତାଗ୍ରଜଃ |
ସ କାମମନଵାପ୍ଯୈଵ ରାମପାଦାଵୁପସ୍ପୃଶନ୍ || ୩୮ ||

ନଂଦିଗ୍ରାମେଽକରୋଦ୍ରାଜ୍ଯଂ ରାମାଗମନକାଂକ୍ଷଯା |
ଗତେ ତୁ ଭରତେ ଶ୍ରୀମାନ୍ସତ୍ଯସଂଧୋ ଜିତେଂଦ୍ରିଯଃ || ୩୯ ||

ରାମସ୍ତୁ ପୁନରାଲକ୍ଷ୍ଯ ନାଗରସ୍ଯ ଜନସ୍ଯ ଚ |
ତତ୍ରାଗମନମେକାଗ୍ରୋ ଦଂଡକାନ୍ପ୍ରଵିଵେଶ ହ || ୪୦ ||

ପ୍ରଵିଶ୍ଯ ତୁ ମହାରଣ୍ଯଂ ରାମୋ ରାଜୀଵଲୋଚନଃ |
ଵିରାଧଂ ରାକ୍ଷସଂ ହତ୍ଵା ଶରଭଂଗଂ ଦଦର୍ଶ ହ || ୪୧ ||

ସୁତୀକ୍ଷ୍ଣଂ ଚାପ୍ଯଗସ୍ତ୍ଯଂ ଚ ଅଗସ୍ତ୍ଯଭ୍ରାତରଂ ତଥା |
ଅଗସ୍ତ୍ଯଵଚନାଚ୍ଚୈଵ ଜଗ୍ରାହୈଂଦ୍ରଂ ଶରାସନମ୍ || ୪୨ ||

ଖଡ୍ଗଂ ଚ ପରମପ୍ରୀତସ୍ତୂଣୀ ଚାକ୍ଷଯସାଯକୌ |
ଵସତସ୍ତସ୍ଯ ରାମସ୍ଯ ଵନେ ଵନଚରୈଃ ସହ || ୪୩ ||

ଋଷଯୋଽଭ୍ଯାଗମନ୍ସର୍ଵେ ଵଧାଯାସୁରରକ୍ଷସାମ୍ |
ସ ତେଷାଂ ପ୍ରତିଶୁଶ୍ରାଵ ରାକ୍ଷସାନାଂ ତଥା ଵନେ || ୪୪ ||

ପ୍ରତିଜ୍ଞାତଶ୍ଚ ରାମେଣ ଵଧଃ ସଂଯତି ରକ୍ଷସାମ୍ |
ଋଷୀଣାମଗ୍ନିକଲ୍ପାନାଂ ଦଂଡକାରଣ୍ଯଵାସିନାମ୍ || ୪୫ ||

ତେନ ତତ୍ରୈଵ ଵସତା ଜନସ୍ଥାନନିଵାସିନୀ |
ଵିରୂପିତା ଶୂର୍ପଣଖା ରାକ୍ଷସୀ କାମରୂପିଣୀ || ୪୬ ||

ତତଃ ଶୂର୍ପଣଖାଵାକ୍ଯାଦୁଦ୍ଯୁକ୍ତାନ୍ସର୍ଵରାକ୍ଷସାନ୍ |
ଖରଂ ତ୍ରିଶିରସଂ ଚୈଵ ଦୂଷଣଂ ଚୈଵ ରାକ୍ଷସମ୍ || ୪୭ ||

ନିଜଘାନ ରଣେ ରାମସ୍ତେଷାଂ ଚୈଵ ପଦାନୁଗାନ୍ |
ଵନେ ତସ୍ମିନ୍ନିଵସତା ଜନସ୍ଥାନନିଵାସିନାମ୍ || ୪୮ ||

ରକ୍ଷସାଂ ନିହତାନ୍ଯାସନ୍ସହସ୍ରାଣି ଚତୁର୍ଦଶ |
ତତୋ ଜ୍ଞାତିଵଧଂ ଶ୍ରୁତ୍ଵା ରାଵଣଃ କ୍ରୋଧମୂର୍ଛିତଃ || ୪୯ ||

ସହାଯଂ ଵରଯାମାସ ମାରୀଚଂ ନାମ ରାକ୍ଷସମ୍ |
ଵାର୍ଯମାଣଃ ସୁବହୁଶୋ ମାରୀଚେନ ସ ରାଵଣଃ || ୫୦ ||

ନ ଵିରୋଧୋ ବଲଵତା କ୍ଷମୋ ରାଵଣ ତେନ ତେ |
ଅନାଦୃତ୍ଯ ତୁ ତଦ୍ଵାକ୍ଯଂ ରାଵଣଃ କାଲଚୋଦିତଃ || ୫୧ ||

ଜଗାମ ସହମାରୀଚସ୍ତସ୍ଯାଶ୍ରମପଦଂ ତଦା |
ତେନ ମାଯାଵିନା ଦୂରମପଵାହ୍ଯ ନୃପାତ୍ମଜୌ || ୫୨ ||

ଜହାର ଭାର୍ଯାଂ ରାମସ୍ଯ ଗୃଧ୍ରଂ ହତ୍ଵା ଜଟାଯୁଷମ୍ |
ଗୃଧ୍ରଂ ଚ ନିହତଂ ଦୃଷ୍ଟ୍ଵା ହୃତାଂ ଶ୍ରୁତ୍ଵା ଚ ମୈଥିଲୀମ୍ || ୫୩ ||

ରାଘଵଃ ଶୋକସଂତପ୍ତୋ ଵିଲଲାପାକୁଲେଂଦ୍ରିଯଃ |
ତତସ୍ତେନୈଵ ଶୋକେନ ଗୃଧ୍ରଂ ଦଗ୍ଧ୍ଵା ଜଟାଯୁଷମ୍ || ୫୪ ||

ମାର୍ଗମାଣୋ ଵନେ ସୀତାଂ ରାକ୍ଷସଂ ସଂଦଦର୍ଶ ହ |
କବଂଧଂ ନାମ ରୂପେଣ ଵିକୃତଂ ଘୋରଦର୍ଶନମ୍ || ୫୫ ||

ତଂ ନିହତ୍ଯ ମହାବାହୁର୍ଦଦାହ ସ୍ଵର୍ଗତଶ୍ଚ ସଃ |
ସ ଚାଽଽସ୍ଯ କଥଯାମାସ ଶବରୀଂ ଧର୍ମଚାରିଣୀମ୍ || ୫୬ ||

ଶ୍ରମଣୀଂ ଧର୍ମନିପୁଣାମଭିଗଚ୍ଛେତି ରାଘଵମ୍ |
ସୋଽଭ୍ଯଗଚ୍ଛନ୍ମହାତେଜାଃ ଶବରୀଂ ଶତ୍ରୁସୂଦନଃ || ୫୭ ||

ଶବର୍ଯା ପୂଜିତଃ ସମ୍ଯଗ୍ରାମୋ ଦଶରଥାତ୍ମଜଃ |
ପଂପାତୀରେ ହନୁମତା ସଂଗତୋ ଵାନରେଣ ହ || ୫୮ ||

ହନୁମଦ୍ଵଚନାଚ୍ଚୈଵ ସୁଗ୍ରୀଵେଣ ସମାଗତଃ |
ସୁଗ୍ରୀଵାଯ ଚ ତତ୍ସର୍ଵଂ ଶଂସଦ୍ରାମୋ ମହାବଲଃ || ୫୯ ||

ଆଦିତସ୍ତଦ୍ଯଥାଵୃତ୍ତଂ ସୀତାଯାଶ୍ଚ ଵିଶେଷତଃ |
ସୁଗ୍ରୀଵଶ୍ଚାପି ତତ୍ସର୍ଵଂ ଶ୍ରୁତ୍ଵା ରାମସ୍ଯ ଵାନରଃ || ୬୦ ||

ଚକାର ସଖ୍ଯଂ ରାମେଣ ପ୍ରୀତଶ୍ଚୈଵାଗ୍ନିସାକ୍ଷିକମ୍ |
ତତୋ ଵାନରରାଜେନ ଵୈରାନୁକଥନଂ ପ୍ରତି || ୬୧ ||

ରାମାଯାଵେଦିତଂ ସର୍ଵଂ ପ୍ରଣଯାଦ୍ଦୁଃଖିତେନ ଚ |
ପ୍ରତିଜ୍ଞାତଂ ଚ ରାମେଣ ତଦା ଵାଲିଵଧଂ ପ୍ରତି || ୬୨ ||

ଵାଲିନଶ୍ଚ ବଲଂ ତତ୍ର କଥଯାମାସ ଵାନରଃ |
ସୁଗ୍ରୀଵଃ ଶଂକିତଶ୍ଚାସୀନ୍ନିତ୍ଯଂ ଵୀର୍ଯେଣ ରାଘଵେ || ୬୩ ||

ରାଘଵପ୍ରତ୍ଯଯାର୍ଥଂ ତୁ ଦୁଂଦୁଭେଃ କାଯମୁତ୍ତମମ୍ |
ଦର୍ଶଯାମାସ ସୁଗ୍ରୀଵୋ ମହାପର୍ଵତ ସନ୍ନିଭମ୍ || ୬୪ ||

ଉତ୍ସ୍ମଯିତ୍ଵା ମହାବାହୁଃ ପ୍ରେକ୍ଷ୍ଯ ଚାସ୍ଥି ମହାବଲଃ |
ପାଦାଂଗୁଷ୍ଠେନ ଚିକ୍ଷେପ ସଂପୂର୍ଣଂ ଦଶଯୋଜନମ୍ || ୬୫ ||

ବିଭେଦ ଚ ପୁନଃ ସାଲାନ୍ସପ୍ତୈକେନ ମହେଷୁଣା |
ଗିରିଂ ରସାତଲଂ ଚୈଵ ଜନଯନ୍ପ୍ରତ୍ଯଯଂ ତଦା || ୬୬ ||

ତତଃ ପ୍ରୀତମନାସ୍ତେନ ଵିଶ୍ଵସ୍ତଃ ସ ମହାକପିଃ |
କିଷ୍କିଂଧାଂ ରାମସହିତୋ ଜଗାମ ଚ ଗୁହାଂ ତଦା || ୬୭ ||

ତତୋଽଗର୍ଜଦ୍ଧରିଵରଃ ସୁଗ୍ରୀଵୋ ହେମପିଂଗଳଃ |
ତେନ ନାଦେନ ମହତା ନିର୍ଜଗାମ ହରୀଶ୍ଵରଃ || ୬୮ ||

ଅନୁମାନ୍ଯ ତଦା ତାରାଂ ସୁଗ୍ରୀଵେଣ ସମାଗତଃ |
ନିଜଘାନ ଚ ତତ୍ରୈନଂ ଶରେଣୈକେନ ରାଘଵଃ || ୬୯ ||

ତତଃ ସୁଗ୍ରୀଵଵଚନାଦ୍ଧତ୍ଵା ଵାଲିନମାହଵେ |
ସୁଗ୍ରୀଵମେଵ ତଦ୍ରାଜ୍ଯେ ରାଘଵଃ ପ୍ରତ୍ଯପାଦଯତ୍ || ୭୦ ||

ସ ଚ ସର୍ଵାନ୍ସମାନୀଯ ଵାନରାନ୍ଵାନରର୍ଷଭଃ |
ଦିଶଃ ପ୍ରସ୍ଥାପଯାମାସ ଦିଦୃକ୍ଷୁର୍ଜନକାତ୍ମଜାମ୍ || ୭୧ ||

ତତୋ ଗୃଧ୍ରସ୍ଯ ଵଚନାତ୍ସଂପାତେର୍ହନୁମାନ୍ବଲୀ |
ଶତଯୋଜନଵିସ୍ତୀର୍ଣଂ ପୁପ୍ଲୁଵେ ଲଵଣାର୍ଣଵମ୍ || ୭୨ ||

ତତ୍ର ଲଂକାଂ ସମାସାଦ୍ଯ ପୁରୀଂ ରାଵଣପାଲିତାମ୍ |
ଦଦର୍ଶ ସୀତାଂ ଧ୍ଯାଯଂତୀମଶୋକଵନିକାଂ ଗତାମ୍ || ୭୩ ||

ନିଵେଦଯିତ୍ଵାଽଭିଜ୍ଞାନଂ ପ୍ରଵୃତ୍ତିଂ ଚ ନିଵେଦ୍ଯ ଚ |
ସମାଶ୍ଵାସ୍ଯ ଚ ଵୈଦେହୀଂ ମର୍ଦଯାମାସ ତୋରଣମ୍ || ୭୪ ||

ପଂଚ ସେନାଗ୍ରଗାନ୍ହତ୍ଵା ସପ୍ତ ମଂତ୍ରିସୁତାନପି |
ଶୂରମକ୍ଷଂ ଚ ନିଷ୍ପିଷ୍ଯ ଗ୍ରହଣଂ ସମୁପାଗମତ୍ || ୭୫ ||

ଅସ୍ତ୍ରେଣୋନ୍ମୁକ୍ତମାତ୍ମାନଂ ଜ୍ଞାତ୍ଵା ପୈତାମହାଦ୍ଵରାତ୍ |
ମର୍ଷଯନ୍ରାକ୍ଷସାନ୍ଵୀରୋ ଯଂତ୍ରିଣସ୍ତାନ୍ଯଦୃଚ୍ଛଯା || ୭୬ ||

ତତୋ ଦଗ୍ଧ୍ଵା ପୁରୀଂ ଲଂକାମୃତେ ସୀତାଂ ଚ ମୈଥିଲୀମ୍ |
ରାମାଯ ପ୍ରିଯମାଖ୍ଯାତୁଂ ପୁନରାଯାନ୍ମହାକପିଃ || ୭୭ ||

ସୋଽଭିଗମ୍ଯ ମହାତ୍ମାନଂ କୃତ୍ଵା ରାମଂ ପ୍ରଦକ୍ଷିଣମ୍ |
ନ୍ଯଵେଦଯଦମେଯାତ୍ମା ଦୃଷ୍ଟା ସୀତେତି ତତ୍ତ୍ଵତଃ || ୭୮ ||

ତତଃ ସୁଗ୍ରୀଵସହିତୋ ଗତ୍ଵା ତୀରଂ ମହୋଦଧେଃ |
ସମୁଦ୍ରଂ କ୍ଷୋଭଯାମାସ ଶରୈରାଦିତ୍ଯସନ୍ନିଭୈଃ || ୭୯ ||

ଦର୍ଶଯାମାସ ଚାତ୍ମାନଂ ସମୁଦ୍ରଃ ସରିତାଂ ପତିଃ |
ସମୁଦ୍ରଵଚନାଚ୍ଚୈଵ ନଲଂ ସେତୁମକାରଯତ୍ || ୮୦ ||

ତେନ ଗତ୍ଵା ପୁରୀଂ ଲଂକାଂ ହତ୍ଵା ରାଵଣମାହଵେ |
ରାମଃ ସୀତାମନୁପ୍ରାପ୍ଯ ପରାଂ ଵ୍ରୀଡାମୁପାଗମତ୍ || ୮୧ ||

ତାମୁଵାଚ ତତୋ ରାମଃ ପରୁଷଂ ଜନସଂସଦି |
ଅମୃଷ୍ଯମାଣା ସା ସୀତା ଵିଵେଶ ଜ୍ଵଲନଂ ସତୀ || ୮୨ ||

ତତୋଽଗ୍ନିଵଚନାତ୍ସୀତାଂ ଜ୍ଞାତ୍ଵା ଵିଗତକଲ୍ମଷାମ୍ |
ବଭୌ ରାମଃ ସଂପ୍ରହୃଷ୍ଟଃ ପୂଜିତଃ ସର୍ଵଦୈଵତୈଃ || ୮୩ ||

କର୍ମଣା ତେନ ମହତା ତ୍ରୈଲୋକ୍ଯଂ ସଚରାଚରମ୍ |
ସଦେଵର୍ଷିଗଣଂ ତୁଷ୍ଟଂ ରାଘଵସ୍ଯ ମହାତ୍ମନଃ || ୮୪ ||

ଅଭିଷିଚ୍ଯ ଚ ଲଂକାଯାଂ ରାକ୍ଷସେଂଦ୍ରଂ ଵିଭୀଷଣମ୍ |
କୃତକୃତ୍ଯସ୍ତଦା ରାମୋ ଵିଜ୍ଵରଃ ପ୍ରମୁମୋଦ ହ || ୮୫ ||

ଦେଵତାଭ୍ଯୋ ଵରଂ ପ୍ରାପ୍ଯ ସମୁତ୍ଥାପ୍ଯ ଚ ଵାନରାନ୍ |
ଅଯୋଧ୍ଯାଂ ପ୍ରସ୍ଥିତୋ ରାମଃ ପୁଷ୍ପକେଣ ସୁହୃଦ୍ଵୃତଃ || ୮୬ ||

ଭରଦ୍ଵାଜାଶ୍ରମଂ ଗତ୍ଵା ରାମଃ ସତ୍ଯପରାକ୍ରମଃ |
ଭରତସ୍ଯାଂତିକଂ ରାମୋ ହନୂମଂତଂ ଵ୍ଯସର୍ଜଯତ୍ || ୮୭ ||

ପୁନରାଖ୍ଯାଯିକାଂ ଜଲ୍ପନ୍ସୁଗ୍ରୀଵସହିତଶ୍ଚ ସଃ |
ପୁଷ୍ପକଂ ତତ୍ସମାରୁହ୍ଯ ନଂଦିଗ୍ରାମଂ ଯଯୌ ତଦା || ୮୮ ||

ନଂଦିଗ୍ରାମେ ଜଟାଂ ହିତ୍ଵା ଭ୍ରାତୃଭିଃ ସହିତୋଽନଘଃ |
ରାମଃ ସୀତାମନୁପ୍ରାପ୍ଯ ରାଜ୍ଯଂ ପୁନରଵାପ୍ତଵାନ୍ || ୮୯ ||

ପ୍ରହୃଷ୍ଟମୁଦିତୋ ଲୋକସ୍ତୁଷ୍ଟଃ ପୁଷ୍ଟଃ ସୁଧାର୍ମିକଃ | [ପ୍ରହୃଷ୍ଟୋ]
ନିରାମଯୋ ହ୍ଯରୋଗଶ୍ଚ ଦୁର୍ଭିକ୍ଷଭଯଵର୍ଜିତଃ || ୯୦ ||

ନ ପୁତ୍ରମରଣଂ କିଂଚିଦ୍ଦ୍ରକ୍ଷ୍ଯଂତି ପୁରୁଷାଃ କ୍ଵଚିତ୍ |
ନାର୍ଯଶ୍ଚାଵିଧଵା ନିତ୍ଯଂ ଭଵିଷ୍ଯଂତି ପତିଵ୍ରତାଃ || ୯୧ ||

ନ ଚାଗ୍ନିଜଂ ଭଯଂ କିଂଚିନ୍ନାପ୍ସୁ ମଜ୍ଜଂତି ଜଂତଵଃ |
ନ ଵାତଜଂ ଭଯଂ କିଂଚିନ୍ନାପି ଜ୍ଵରକୃତଂ ତଥା || ୯୨ ||

ନ ଚାପି କ୍ଷୁଦ୍ଭଯଂ ତତ୍ର ନ ତସ୍କରଭଯଂ ତଥା |
ନଗରାଣି ଚ ରାଷ୍ଟ୍ରାଣି ଧନଧାନ୍ଯଯୁତାନି ଚ || ୯୩ ||

ନିତ୍ଯଂ ପ୍ରମୁଦିତାଃ ସର୍ଵେ ଯଥା କୃତଯୁଗେ ତଥା |
ଅଶ୍ଵମେଧଶତୈରିଷ୍ଟ୍ଵା ତଥା ବହୁସୁଵର୍ଣକୈଃ || ୯୪ ||

ଗଵାଂ କୋଟ୍ଯଯୁତଂ ଦତ୍ଵା ଵିଦ୍ଵଦ୍ଭ୍ଯୋ ଵିଧିପୂର୍ଵକମ୍ |
ଅସଂଖ୍ଯେଯଂ ଧନଂ ଦତ୍ଵା ବ୍ରାହ୍ମଣେଭ୍ଯୋ ମହାଯଶାଃ || ୯୫ ||

ରାଜଵଂଶାନ୍ ଶତଗୁଣାନ୍ ସ୍ଥାପଯିଷ୍ଯତି ରାଘଵଃ |
ଚାତୁର୍ଵର୍ଣ୍ଯଂ ଚ ଲୋକେଽସ୍ମିନ୍ ସ୍ଵେ ସ୍ଵେ ଧର୍ମେ ନିଯୋକ୍ଷ୍ଯତି || ୯୬ ||

ଦଶଵର୍ଷସହସ୍ରାଣି ଦଶଵର୍ଷଶତାନି ଚ |
ରାମୋ ରାଜ୍ଯମୁପାସିତ୍ଵା ବ୍ରହ୍ମଲୋକଂ ପ୍ରଯାସ୍ଯତି || ୯୭ ||

ଇଦଂ ପଵିତ୍ରଂ ପାପଘ୍ନଂ ପୁଣ୍ଯଂ ଵେଦୈଶ୍ଚ ସମ୍ମିତମ୍ |
ଯଃ ପଠେଦ୍ରାମଚରିତଂ ସର୍ଵପାପୈଃ ପ୍ରମୁଚ୍ଯତେ || ୯୮ ||

ଏତଦାଖ୍ଯାନମାଯୁଷ୍ଯଂ ପଠନ୍ରାମାଯଣଂ ନରଃ |
ସପୁତ୍ରପୌତ୍ରଃ ସଗଣଃ ପ୍ରେତ୍ଯ ସ୍ଵର୍ଗେ ମହୀଯତେ || ୯୯ ||

ପଠନ୍ ଦ୍ଵିଜୋ ଵାଗୃଷଭତ୍ଵମୀଯା-
-ତ୍ସ୍ଯାତ୍ କ୍ଷତ୍ରିଯୋ ଭୂମିପତିତ୍ଵମୀଯାତ୍ |
ଵଣିଗ୍ଜନଃ ପଣ୍ଯଫଲତ୍ଵମୀଯା-
-ଜ୍ଜନଶ୍ଚ ଶୂଦ୍ରୋଽପି ମହତ୍ତ୍ଵମୀଯାତ୍ || ୧୦୦ ||

ଇତ୍ଯାର୍ଷେ ଶ୍ରୀମଦ୍ରାମାଯଣେ ଵାଲ୍ମୀକୀଯେ ଆଦିକାଵ୍ଯେ ବାଲକାଂଡେ (ନାରଦଵାକ୍ଯଂ ନାମ) ପ୍ରଥମଃ ସର୍ଗଃ || ୧ ||