ଅସ୍ଯ ଶ୍ରୀରାମରକ୍ଷାସ୍ତୋତ୍ରମଂତ୍ରସ୍ଯ ବୁଧକୌଶିକ ଋଷିଃ ଶ୍ରୀସୀତାରାମଚଂଦ୍ରୋ ଦେଵତା ଅନୁଷ୍ଟୁପ୍ ଛଂଦଃ ସୀତା ଶକ୍ତିଃ ଶ୍ରୀମାନ୍ ହନୁମାନ୍ କୀଲକଂ ଶ୍ରୀରାମଚଂଦ୍ରପ୍ରୀତ୍ଯର୍ଥେ ରାମରକ୍ଷାସ୍ତୋତ୍ରଜପେ ଵିନିଯୋଗଃ ||
ଧ୍ଯାନଂ |
ଧ୍ଯାଯେଦାଜାନୁବାହୁଂ ଧୃତଶରଧନୁଷଂ ବଦ୍ଧପଦ୍ମାସନସ୍ଥଂ
ପୀତଂ ଵାସୋ ଵସାନଂ ନଵକମଲଦଳସ୍ପର୍ଧିନେତ୍ରଂ ପ୍ରସନ୍ନମ୍ |
ଵାମାଂକାରୂଢସୀତାମୁଖକମଲମିଲଲ୍ଲୋଚନଂ ନୀରଦାଭଂ
ନାନାଲଂକାରଦୀପ୍ତଂ ଦଧତମୁରୁଜଟାମଂଡଲଂ ରାମଚଂଦ୍ରମ୍ ||
ଅଥ ସ୍ତୋତ୍ରଂ |
ଚରିତଂ ରଘୁନାଥସ୍ଯ ଶତକୋଟିପ୍ରଵିସ୍ତରମ୍ |
ଏକୈକମକ୍ଷରଂ ପୁଂସାଂ ମହାପାତକନାଶନମ୍ || ୧ ||
ଧ୍ଯାତ୍ଵା ନୀଲୋତ୍ପଲଶ୍ଯାମଂ ରାମଂ ରାଜୀଵଲୋଚନମ୍ |
ଜାନକୀଲକ୍ଷ୍ମଣୋପେତଂ ଜଟାମୁକୁଟମଂଡିତମ୍ || ୨ ||
ସାଽସିତୂଣଧନୁର୍ବାଣପାଣିଂ ନକ୍ତଂଚରାଂତକମ୍ |
ସ୍ଵଲୀଲଯା ଜଗତ୍ତ୍ରାତୁମାଵିର୍ଭୂତମଜଂ ଵିଭୁମ୍ || ୩ ||
ରାମରକ୍ଷାଂ ପଠେତ୍ପ୍ରାଜ୍ଞଃ ପାପଘ୍ନୀଂ ସର୍ଵକାମଦାମ୍ |
ଶିରୋ ମେ ରାଘଵଃ ପାତୁ ଫାଲଂ ଦଶରଥାତ୍ମଜଃ || ୪ ||
କୌସଲ୍ଯେଯୋ ଦୃଶୌ ପାତୁ ଵିଶ୍ଵାମିତ୍ରପ୍ରିଯଃ ଶ୍ରୁତୀ |
ଘ୍ରାଣଂ ପାତୁ ମଖତ୍ରାତା ମୁଖଂ ସୌମିତ୍ରିଵତ୍ସଲଃ || ୫ ||
ଜିହ୍ଵାଂ ଵିଦ୍ଯାନିଧିଃ ପାତୁ କଂଠଂ ଭରତଵଂଦିତଃ |
ସ୍କଂଧୌ ଦିଵ୍ଯାଯୁଧଃ ପାତୁ ଭୁଜୌ ଭଗ୍ନେଶକାର୍ମୁକଃ || ୬ ||
କରୌ ସୀତାପତିଃ ପାତୁ ହୃଦଯଂ ଜାମଦଗ୍ନ୍ଯଜିତ୍ |
ମଧ୍ଯଂ ପାତୁ ଖରଧ୍ଵଂସୀ ନାଭିଂ ଜାଂବଵଦାଶ୍ରଯଃ || ୭ ||
ସୁଗ୍ରୀଵେଶଃ କଟୀ ପାତୁ ସକ୍ଥିନୀ ହନୁମତ୍ପ୍ରଭୁଃ |
ଊରୂ ରଘୂତ୍ତମଃ ପାତୁ ରକ୍ଷଃକୁଲଵିନାଶକୃତ୍ || ୮ ||
ଜାନୁନୀ ସେତୁକୃତ୍ପାତୁ ଜଂଘେ ଦଶମୁଖାଂତକଃ |
ପାଦୌ ଵିଭୀଷଣଶ୍ରୀଦଃ ପାତୁ ରାମୋଽଖିଲଂ ଵପୁଃ || ୯ ||
ଏତାଂ ରାମବଲୋପେତାଂ ରକ୍ଷାଂ ଯଃ ସୁକୃତୀ ପଠେତ୍ |
ସ ଚିରାଯୁଃ ସୁଖୀ ପୁତ୍ରୀ ଵିଜଯୀ ଵିନଯୀ ଭଵେତ୍ || ୧୦ ||
ପାତାଲଭୂତଲଵ୍ଯୋମଚାରିଣଶ୍ଛଦ୍ମଚାରିଣଃ |
ନ ଦ୍ରଷ୍ଟୁମପି ଶକ୍ତାସ୍ତେ ରକ୍ଷିତଂ ରାମନାମଭିଃ || ୧୧ ||
ରାମେତି ରାମଭଦ୍ରେତି ରାମଚଂଦ୍ରେତି ଵା ସ୍ମରନ୍ |
ନରୋ ନ ଲିପ୍ଯତେ ପାପୈର୍ଭୁକ୍ତିଂ ମୁକ୍ତିଂ ଚ ଵିଂଦତି || ୧୨ ||
ଜଗଜ୍ଜୈତ୍ରୈକମଂତ୍ରେଣ ରାମନାମ୍ନାଭିରକ୍ଷିତମ୍ |
ଯଃ କଂଠେ ଧାରଯେତ୍ତସ୍ଯ କରସ୍ଥାଃ ସର୍ଵସିଦ୍ଧଯଃ || ୧୩ ||
ଵଜ୍ରପଂଜରନାମେଦଂ ଯୋ ରାମକଵଚଂ ସ୍ମରେତ୍ |
ଅଵ୍ଯାହତାଜ୍ଞଃ ସର୍ଵତ୍ର ଲଭତେ ଜଯମଂଗଳମ୍ || ୧୪ ||
ଆଦିଷ୍ଟଵାନ୍ଯଥା ସ୍ଵପ୍ନେ ରାମରକ୍ଷାମିମାଂ ହରଃ |
ତଥା ଲିଖିତଵାନ୍ପ୍ରାତଃ ପ୍ରବୁଦ୍ଧୋ ବୁଧକୌଶିକଃ || ୧୫ ||
ଆରାମଃ କଲ୍ପଵୃକ୍ଷାଣାଂ ଵିରାମଃ ସକଲାପଦାମ୍ |
ଅଭିରାମସ୍ତ୍ରିଲୋକାନାଂ ରାମଃ ଶ୍ରୀମାନ୍ ସ ନଃ ପ୍ରଭୁଃ || ୧୬ ||
ତରୁଣୌ ରୂପସଂପନ୍ନୌ ସୁକୁମାରୌ ମହାବଲୌ |
ପୁଂଡରୀକ ଵିଶାଲାକ୍ଷୌ ଚୀରକୃଷ୍ଣାଜିନାଂବରୌ || ୧୭ ||
ଫଲମୂଲାଶିନୌ ଦାଂତୌ ତାପସୌ ବ୍ରହ୍ମଚାରିଣୌ |
ପୁତ୍ରୌ ଦଶରଥସ୍ଯୈତୌ ଭ୍ରାତରୌ ରାମଲକ୍ଷ୍ମଣୌ || ୧୮ ||
ଶରଣ୍ଯୌ ସର୍ଵସତ୍ତ୍ଵାନାଂ ଶ୍ରେଷ୍ଠୌ ସର୍ଵଧନୁଷ୍ମତାମ୍ |
ରକ୍ଷଃ କୁଲନିହଂତାରୌ ତ୍ରାଯେତାଂ ନୋ ରଘୂତ୍ତମୌ || ୧୯ ||
ଆତ୍ତସଜ୍ଯଧନୁଷାଵିଷୁସ୍ପୃଶାଵକ୍ଷଯାଶୁଗନିଷଂଗସଂଗିନୌ |
ରକ୍ଷଣାଯ ମମ ରାମଲକ୍ଷ୍ମଣାଵଗ୍ରତଃ ପଥି ସଦୈଵ ଗଚ୍ଛତାମ୍ || ୨୦ ||
ସନ୍ନଦ୍ଧଃ କଵଚୀ ଖଡ୍ଗୀ ଚାପବାଣଧରୋ ଯୁଵା |
ଗଚ୍ଛନ୍ମନୋରଥାନ୍ନଶ୍ଚ ରାମଃ ପାତୁ ସଲକ୍ଷ୍ମଣଃ || ୨୧ ||
ରାମୋ ଦାଶରଥିଃ ଶୂରୋ ଲକ୍ଷ୍ମଣାନୁଚରୋ ବଲୀ |
କାକୁତ୍ସ୍ଥଃ ପୁରୁଷଃ ପୂର୍ଣଃ କୌସଲ୍ଯେଯୋ ରଘୂତ୍ତମଃ || ୨୨ ||
ଵେଦାଂତଵେଦ୍ଯୋ ଯଜ୍ଞେଶଃ ପୁରାଣପୁରୁଷୋତ୍ତମଃ |
ଜାନକୀଵଲ୍ଲଭଃ ଶ୍ରୀମାନପ୍ରମେଯପରାକ୍ରମଃ || ୨୩ ||
ଇତ୍ଯେତାନି ଜପେନ୍ନିତ୍ଯଂ ମଦ୍ଭକ୍ତଃ ଶ୍ରଦ୍ଧଯାନ୍ଵିତଃ |
ଅଶ୍ଵମେଧାଧିକଂ ପୁଣ୍ଯଂ ସଂପ୍ରାପ୍ନୋତି ନ ସଂଶଯଃ || ୨୪ ||
ରାମଂ ଦୂର୍ଵାଦଲଶ୍ଯାମଂ ପଦ୍ମାକ୍ଷଂ ପୀତଵାସସମ୍ |
ସ୍ତୁଵଂତି ନାମଭିର୍ଦିଵ୍ଯୈର୍ନ ତେ ସଂସାରିଣୋ ନରାଃ || ୨୫ ||
ରାମଂ ଲକ୍ଷ୍ମଣପୂର୍ଵଜଂ ରଘୁଵରଂ ସୀତାପତିଂ ସୁଂଦରଂ
କାକୁତ୍ସ୍ଥଂ କରୁଣାର୍ଣଵଂ ଗୁଣନିଧିଂ ଵିପ୍ରପ୍ରିଯଂ ଧାର୍ମିକମ୍ |
ରାଜେଂଦ୍ରଂ ସତ୍ଯସଂଧଂ ଦଶରଥତନଯଂ ଶ୍ଯାମଲଂ ଶାଂତମୂର୍ତିଂ
ଵଂଦେ ଲୋକାଭିରାମଂ ରଘୁକୁଲତିଲକଂ ରାଘଵଂ ରାଵଣାରିମ୍ || ୨୬ ||
ରାମାଯ ରାମଭଦ୍ରାଯ ରାମଚଂଦ୍ରାଯ ଵେଧସେ |
ରଘୁନାଥାଯ ନାଥାଯ ସୀତାଯାଃ ପତଯେ ନମଃ || ୨୭ ||
ଶ୍ରୀରାମ ରାମ ରଘୁନଂଦନ ରାମ ରାମ
ଶ୍ରୀରାମ ରାମ ଭରତାଗ୍ରଜ ରାମ ରାମ |
ଶ୍ରୀରାମ ରାମ ରଣକର୍କଶ ରାମ ରାମ
ଶ୍ରୀରାମ ରାମ ଶରଣଂ ଭଵ ରାମ ରାମ || ୨୮ ||
ଶ୍ରୀରାମଚଂଦ୍ରଚରଣୌ ମନସା ସ୍ମରାମି
ଶ୍ରୀରାମଚଂଦ୍ରଚରଣୌ ଵଚସା ଗୃଣାମି |
ଶ୍ରୀରାମଚଂଦ୍ରଚରଣୌ ଶିରସା ନମାମି
ଶ୍ରୀରାମଚଂଦ୍ରଚରଣୌ ଶରଣଂ ପ୍ରପଦ୍ଯେ || ୨୯ ||
ମାତା ରାମୋ ମତ୍ପିତା ରାମଚଂଦ୍ରଃ
ସ୍ଵାମୀ ରାମୋ ମତ୍ସଖା ରାମଚଂଦ୍ରଃ |
ସର୍ଵସ୍ଵଂ ମେ ରାମଚଂଦ୍ରୋ ଦଯାଳୁଃ
ନାନ୍ଯଂ ଜାନେ ନୈଵ ଜାନେ ନ ଜାନେ || ୩୦ ||
ଦକ୍ଷିଣେ ଲକ୍ଷ୍ମଣୋ ଯସ୍ଯ ଵାମେ ଚ ଜନକାତ୍ମଜା |
ପୁରତୋ ମାରୁତିର୍ଯସ୍ଯ ତଂ ଵଂଦେ ରଘୁନଂଦନମ୍ || ୩୧ ||
ଲୋକାଭିରାମଂ ରଣରଂଗଧୀରଂ
ରାଜୀଵନେତ୍ରଂ ରଘୁଵଂଶନାଥମ୍ |
କାରୁଣ୍ଯରୂପଂ କରୁଣାକରଂ ତଂ
ଶ୍ରୀରାମଚଂଦ୍ରଂ ଶରଣଂ ପ୍ରପଦ୍ଯେ || ୩୨ ||
ମନୋଜଵଂ ମାରୁତତୁଲ୍ଯଵେଗଂ
ଜିତେଂଦ୍ରିଯଂ ବୁଦ୍ଧିମତାଂ ଵରିଷ୍ଠମ୍ |
ଵାତାତ୍ମଜଂ ଵାନରଯୂଥମୁଖ୍ଯଂ
ଶ୍ରୀରାମଦୂତଂ ଶରଣଂ ପ୍ରପଦ୍ଯେ || ୩୩ ||
କୂଜଂତଂ ରାମରାମେତି ମଧୁରଂ ମଧୁରାକ୍ଷରମ୍ |
ଆରୁହ୍ଯ କଵିତାଶାଖାଂ ଵଂଦେ ଵାଲ୍ମୀକିକୋକିଲମ୍ || ୩୪ ||
ଆପଦାମପହର୍ତାରଂ ଦାତାରଂ ସର୍ଵସଂପଦାମ୍ |
ଲୋକାଭିରାମଂ ଶ୍ରୀରାମଂ ଭୂଯୋ ଭୂଯୋ ନମାମ୍ଯହମ୍ || ୩୫ ||
ଭର୍ଜନଂ ଭଵବୀଜାନାମର୍ଜନଂ ସୁଖସଂପଦାମ୍ |
ତର୍ଜନଂ ଯମଦୂତାନାଂ ରାମରାମେତି ଗର୍ଜନମ୍ || ୩୬ ||
ରାମୋ ରାଜମଣିଃ ସଦା ଵିଜଯତେ ରାମଂ ରମେଶଂ ଭଜେ
ରାମେଣାଭିହତା ନିଶାଚରଚମୂ ରାମାଯ ତସ୍ମୈ ନମଃ |
ରାମାନ୍ନାସ୍ତି ପରାଯଣଂ ପରତରଂ ରାମସ୍ଯ ଦାସୋଽସ୍ମ୍ଯହଂ
ରାମେ ଚିତ୍ତଲଯଃ ସଦା ଭଵତୁ ମେ ଭୋ ରାମ ମାମୁଦ୍ଧର || ୩୭ ||
ଶ୍ରୀରାମ ରାମ ରାମେତି ରମେ ରାମେ ମନୋରମେ |
ସହସ୍ରନାମ ତତ୍ତୁଲ୍ଯଂ ରାମନାମ ଵରାନନେ || ୩୮ ||
ଇତି ଶ୍ରୀବୁଧକୌଶିକମୁନି ଵିରଚିତଂ ଶ୍ରୀରାମରକ୍ଷା ସ୍ତୋତ୍ରମ୍ |