ৱিশুদ্ধং পরং সচ্চিদানংদরূপং
গুণাধারমাধারহীনং ৱরেণ্যম্ |
মহান্তং ৱিভান্তং গুহান্তং গুণান্তং
সুখান্তং স্ৱযং ধাম রামং প্রপদ্যে || ১ ||
শিৱং নিত্যমেকং ৱিভুং তারকাখ্যং
সুখাকারমাকারশূন্যং সুমান্যম্ |
মহেশং কলেশং সুরেশং পরেশং
নরেশং নিরীশং মহীশং প্রপদ্যে || ২ ||
যদাৱর্ণযত্কর্ণমূলেঽন্তকালে
শিৱো রাম রামেতি রামেতি কাশ্যাম্ |
তদেকং পরং তারকব্রহ্মরূপং
ভজেঽহং ভজেঽহং ভজেঽহং ভজেঽহম্ || ৩ ||
মহারত্নপীঠে শুভে কল্পমূলে
সুখাসীনমাদিত্যকোটিপ্রকাশম্ |
সদা জানকীলক্ষ্মণোপেতমেকং
সদা রামচংদ্রং ভজেঽহং ভজেঽহম্ || ৪ ||
ক্ৱণদ্রত্নমংজীরপাদারৱিংদং
লসন্মেখলাচারুপীতাংবরাঢ্যম্ |
মহারত্নহারোল্লসত্কৌস্তুভাংগং
নদচ্চংচরীমংজরীলোলমালম্ || ৫ ||
লসচ্চংদ্রিকাস্মেরশোণাধরাভং
সমুদ্যত্পতংগেংদুকোটিপ্রকাশম্ |
নমদ্ব্রহ্মরুদ্রাদিকোটীররত্ন
স্ফুরত্কান্তিনীরাজনারাধিতাংঘ্রিম্ || ৬ ||
পুরঃ প্রাংজলীনাংজনেযাদিভক্তান্
স্ৱচিন্মুদ্রযা ভদ্রযা বোধযন্তম্ |
ভজেঽহং ভজেঽহং সদা রামচংদ্রং
ত্ৱদন্যং ন মন্যে ন মন্যে ন মন্যে || ৭ ||
যদা মত্সমীপং কৃতান্তঃ সমেত্য
প্রচংডপ্রকোপৈর্ভটৈর্ভীষযেন্মাম্ |
তদাৱিষ্করোষি ত্ৱদীযং স্ৱরূপং
সদাপত্প্রণাশং সকোদংডবাণম্ || ৮ ||
নিজে মানসে মংদিরে সন্নিধেহি
প্রসীদ প্রসীদ প্রভো রামচংদ্র |
সসৌমিত্রিণা কৈকযীনংদনেন
স্ৱশক্ত্যানুভক্ত্যা চ সংসেৱ্যমান || ৯ ||
স্ৱভক্তাগ্রগণ্যৈঃ কপীশৈর্মহীশৈ-
-রনীকৈরনেকৈশ্চ রাম প্রসীদ |
নমস্তে নমোঽস্ত্ৱীশ রাম প্রসীদ
প্রশাধি প্রশাধি প্রকাশং প্রভো মাম্ || ১০ ||
ত্ৱমেৱাসি দৈৱং পরং মে যদেকং
সুচৈতন্যমেতত্ত্ৱদন্যং ন মন্যে |
যতোঽভূদমেযং ৱিযদ্ৱাযুতেজো
জলোর্ৱ্যাদিকার্যং চরং চাচরং চ || ১১ ||
নমঃ সচ্চিদানংদরূপায তস্মৈ
নমো দেৱদেৱায রামায তুভ্যম্ |
নমো জানকীজীৱিতেশায তুভ্যং
নমঃ পুংডরীকাযতাক্ষায তুভ্যম্ || ১২ ||
নমো ভক্তিযুক্তানুরক্তায তুভ্যং
নমঃ পুণ্যপুংজৈকলভ্যায তুভ্যম্ |
নমো ৱেদৱেদ্যায চাদ্যায পুংসে
নমঃ সুংদরাযেংদিরাৱল্লভায || ১৩ ||
নমো ৱিশ্ৱকর্ত্রে নমো ৱিশ্ৱহর্ত্রে
নমো ৱিশ্ৱভোক্ত্রে নমো ৱিশ্ৱমাত্রে |
নমো ৱিশ্ৱনেত্রে নমো ৱিশ্ৱজেত্রে
নমো ৱিশ্ৱপিত্রে নমো ৱিশ্ৱমাত্রে || ১৪ ||
নমস্তে নমস্তে সমস্তপ্রপংচ-
-প্রভোগপ্রযোগপ্রমাণপ্রৱীণ |
মদীযং মনস্ত্ৱত্পদদ্ৱংদ্ৱসেৱাং
ৱিধাতুং প্রৱৃত্তং সুচৈতন্যসিদ্ধ্যৈ || ১৫ ||
শিলাপি ত্ৱদংঘ্রিক্ষমাসংগিরেণু
প্রসাদাদ্ধি চৈতন্যমাধত্ত রাম |
নরস্ত্ৱত্পদদ্ৱংদ্ৱসেৱাৱিধানা-
-ত্সুচৈতন্যমেতীতি কিং চিত্রমত্র || ১৬ ||
পৱিত্রং চরিত্রং ৱিচিত্রং ত্ৱদীযং
নরা যে স্মরন্ত্যন্ৱহং রামচংদ্র |
ভৱন্তং ভৱান্তং ভরন্তং ভজন্তো
লভন্তে কৃতান্তং ন পশ্যন্ত্যতোঽন্তে || ১৭ ||
স পুণ্যঃ স গণ্যঃ শরণ্যো মমাযং
নরো ৱেদ যো দেৱচূডামণিং ত্ৱাম্ |
সদাকারমেকং চিদানংদরূপং
মনোৱাগগম্যং পরং ধাম রাম || ১৮ ||
প্রচংডপ্রতাপপ্রভাৱাভিভূত-
-প্রভূতারিৱীর প্রভো রামচংদ্র |
বলং তে কথং ৱর্ণ্যতেঽতীৱ বাল্যে
যতোঽখংডি চংডীশকোদংডদংডম্ || ১৯ ||
দশগ্রীৱমুগ্রং সপুত্রং সমিত্রং
সরিদ্দুর্গমধ্যস্থরক্ষোগণেশম্ |
ভৱন্তং ৱিনা রাম ৱীরো নরো ৱা
সুরো ৱাঽমরো ৱা জযেত্কস্ত্রিলোক্যাম্ || ২০ ||
সদা রাম রামেতি রামামৃতং তে
সদারামমানংদনিষ্যংদকংদম্ |
পিবন্তং নমন্তং সুদন্তং হসন্তং
হনূমন্তমন্তর্ভজে তং নিতান্তম্ || ২১ ||
সদা রাম রামেতি রামামৃতং তে
সদারামমানংদনিষ্যংদকংদম্ |
পিবন্নন্ৱহং নন্ৱহং নৈৱ মৃত্যো-
-র্বিভেমি প্রসাদাদসাদাত্তৱৈৱ || ২২ ||
অসীতাসমেতৈরকোদংডভূষৈ-
-রসৌমিত্রিৱংদ্যৈরচংডপ্রতাপৈঃ |
অলংকেশকালৈরসুগ্রীৱমিত্রৈ-
-ররামাভিধেযৈরলং দৈৱতৈর্নঃ || ২৩ ||
অৱীরাসনস্থৈরচিন্মুদ্রিকাঢ্যৈ-
-রভক্তাংজনেযাদিতত্ত্ৱপ্রকাশৈঃ |
অমংদারমূলৈরমংদারমালৈ-
-ররামাভিধেযৈরলং দৈৱতৈর্নঃ || ২৪ ||
অসিংধুপ্রকোপৈরৱংদ্যপ্রতাপৈ-
-রবংধুপ্রযাণৈরমংদস্মিতাঢ্যৈঃ |
অদংডপ্রৱাসৈরখংডপ্রবোধৈ-
-ররামাভিধেযৈরলং দৈৱতৈর্নঃ || ২৫ ||
হরে রাম সীতাপতে রাৱণারে
খরারে মুরারেঽসুরারে পরেতি |
লপন্তং নযন্তং সদাকালমেৱং
সমালোকযালোকযাশেষবংধো || ২৬ ||
নমস্তে সুমিত্রাসুপুত্রাভিৱংদ্য
নমস্তে সদা কৈকযীনংদনেড্য |
নমস্তে সদা ৱানরাধীশৱংদ্য
নমস্তে নমস্তে সদা রামচংদ্র || ২৭ ||
প্রসীদ প্রসীদ প্রচংডপ্রতাপ
প্রসীদ প্রসীদ প্রচংডারিকাল |
প্রসীদ প্রসীদ প্রপন্নানুকংপিন্
প্রসীদ প্রসীদ প্রভো রামচংদ্র || ২৮ ||
ভুজংগপ্রযাতং পরং ৱেদসারং
মুদা রামচংদ্রস্য ভক্ত্যা চ নিত্যম্ |
পঠন্সন্ততং চিন্তযন্স্ৱান্তরংগে
স এৱ স্ৱযং রামচংদ্রঃ স ধন্যঃ || ২৯ ||
ইতি শ্রীমচ্ছংকরাচার্য কৃতং শ্রী রাম ভুজংগপ্রযাত স্তোত্রম্ |