વિશુદ્ધં પરં સચ્ચિદાનંદરૂપં
ગુણાધારમાધારહીનં વરેણ્યમ્ |
મહાન્તં વિભાન્તં ગુહાન્તં ગુણાન્તં
સુખાન્તં સ્વયં ધામ રામં પ્રપદ્યે || ૧ ||
શિવં નિત્યમેકં વિભું તારકાખ્યં
સુખાકારમાકારશૂન્યં સુમાન્યમ્ |
મહેશં કલેશં સુરેશં પરેશં
નરેશં નિરીશં મહીશં પ્રપદ્યે || ૨ ||
યદાવર્ણયત્કર્ણમૂલેઽન્તકાલે
શિવો રામ રામેતિ રામેતિ કાશ્યામ્ |
તદેકં પરં તારકબ્રહ્મરૂપં
ભજેઽહં ભજેઽહં ભજેઽહં ભજેઽહમ્ || ૩ ||
મહારત્નપીઠે શુભે કલ્પમૂલે
સુખાસીનમાદિત્યકોટિપ્રકાશમ્ |
સદા જાનકીલક્ષ્મણોપેતમેકં
સદા રામચંદ્રં ભજેઽહં ભજેઽહમ્ || ૪ ||
ક્વણદ્રત્નમંજીરપાદારવિંદં
લસન્મેખલાચારુપીતાંબરાઢ્યમ્ |
મહારત્નહારોલ્લસત્કૌસ્તુભાંગં
નદચ્ચંચરીમંજરીલોલમાલમ્ || ૫ ||
લસચ્ચંદ્રિકાસ્મેરશોણાધરાભં
સમુદ્યત્પતંગેંદુકોટિપ્રકાશમ્ |
નમદ્બ્રહ્મરુદ્રાદિકોટીરરત્ન
સ્ફુરત્કાન્તિનીરાજનારાધિતાંઘ્રિમ્ || ૬ ||
પુરઃ પ્રાંજલીનાંજનેયાદિભક્તાન્
સ્વચિન્મુદ્રયા ભદ્રયા બોધયન્તમ્ |
ભજેઽહં ભજેઽહં સદા રામચંદ્રં
ત્વદન્યં ન મન્યે ન મન્યે ન મન્યે || ૭ ||
યદા મત્સમીપં કૃતાન્તઃ સમેત્ય
પ્રચંડપ્રકોપૈર્ભટૈર્ભીષયેન્મામ્ |
તદાવિષ્કરોષિ ત્વદીયં સ્વરૂપં
સદાપત્પ્રણાશં સકોદંડબાણમ્ || ૮ ||
નિજે માનસે મંદિરે સન્નિધેહિ
પ્રસીદ પ્રસીદ પ્રભો રામચંદ્ર |
સસૌમિત્રિણા કૈકયીનંદનેન
સ્વશક્ત્યાનુભક્ત્યા ચ સંસેવ્યમાન || ૯ ||
સ્વભક્તાગ્રગણ્યૈઃ કપીશૈર્મહીશૈ-
-રનીકૈરનેકૈશ્ચ રામ પ્રસીદ |
નમસ્તે નમોઽસ્ત્વીશ રામ પ્રસીદ
પ્રશાધિ પ્રશાધિ પ્રકાશં પ્રભો મામ્ || ૧૦ ||
ત્વમેવાસિ દૈવં પરં મે યદેકં
સુચૈતન્યમેતત્ત્વદન્યં ન મન્યે |
યતોઽભૂદમેયં વિયદ્વાયુતેજો
જલોર્વ્યાદિકાર્યં ચરં ચાચરં ચ || ૧૧ ||
નમઃ સચ્ચિદાનંદરૂપાય તસ્મૈ
નમો દેવદેવાય રામાય તુભ્યમ્ |
નમો જાનકીજીવિતેશાય તુભ્યં
નમઃ પુંડરીકાયતાક્ષાય તુભ્યમ્ || ૧૨ ||
નમો ભક્તિયુક્તાનુરક્તાય તુભ્યં
નમઃ પુણ્યપુંજૈકલભ્યાય તુભ્યમ્ |
નમો વેદવેદ્યાય ચાદ્યાય પુંસે
નમઃ સુંદરાયેંદિરાવલ્લભાય || ૧૩ ||
નમો વિશ્વકર્ત્રે નમો વિશ્વહર્ત્રે
નમો વિશ્વભોક્ત્રે નમો વિશ્વમાત્રે |
નમો વિશ્વનેત્રે નમો વિશ્વજેત્રે
નમો વિશ્વપિત્રે નમો વિશ્વમાત્રે || ૧૪ ||
નમસ્તે નમસ્તે સમસ્તપ્રપંચ-
-પ્રભોગપ્રયોગપ્રમાણપ્રવીણ |
મદીયં મનસ્ત્વત્પદદ્વંદ્વસેવાં
વિધાતું પ્રવૃત્તં સુચૈતન્યસિદ્ધ્યૈ || ૧૫ ||
શિલાપિ ત્વદંઘ્રિક્ષમાસંગિરેણુ
પ્રસાદાદ્ધિ ચૈતન્યમાધત્ત રામ |
નરસ્ત્વત્પદદ્વંદ્વસેવાવિધાના-
-ત્સુચૈતન્યમેતીતિ કિં ચિત્રમત્ર || ૧૬ ||
પવિત્રં ચરિત્રં વિચિત્રં ત્વદીયં
નરા યે સ્મરન્ત્યન્વહં રામચંદ્ર |
ભવન્તં ભવાન્તં ભરન્તં ભજન્તો
લભન્તે કૃતાન્તં ન પશ્યન્ત્યતોઽન્તે || ૧૭ ||
સ પુણ્યઃ સ ગણ્યઃ શરણ્યો મમાયં
નરો વેદ યો દેવચૂડામણિં ત્વામ્ |
સદાકારમેકં ચિદાનંદરૂપં
મનોવાગગમ્યં પરં ધામ રામ || ૧૮ ||
પ્રચંડપ્રતાપપ્રભાવાભિભૂત-
-પ્રભૂતારિવીર પ્રભો રામચંદ્ર |
બલં તે કથં વર્ણ્યતેઽતીવ બાલ્યે
યતોઽખંડિ ચંડીશકોદંડદંડમ્ || ૧૯ ||
દશગ્રીવમુગ્રં સપુત્રં સમિત્રં
સરિદ્દુર્ગમધ્યસ્થરક્ષોગણેશમ્ |
ભવન્તં વિના રામ વીરો નરો વા
સુરો વાઽમરો વા જયેત્કસ્ત્રિલોક્યામ્ || ૨૦ ||
સદા રામ રામેતિ રામામૃતં તે
સદારામમાનંદનિષ્યંદકંદમ્ |
પિબન્તં નમન્તં સુદન્તં હસન્તં
હનૂમન્તમન્તર્ભજે તં નિતાન્તમ્ || ૨૧ ||
સદા રામ રામેતિ રામામૃતં તે
સદારામમાનંદનિષ્યંદકંદમ્ |
પિબન્નન્વહં નન્વહં નૈવ મૃત્યો-
-ર્બિભેમિ પ્રસાદાદસાદાત્તવૈવ || ૨૨ ||
અસીતાસમેતૈરકોદંડભૂષૈ-
-રસૌમિત્રિવંદ્યૈરચંડપ્રતાપૈઃ |
અલંકેશકાલૈરસુગ્રીવમિત્રૈ-
-રરામાભિધેયૈરલં દૈવતૈર્નઃ || ૨૩ ||
અવીરાસનસ્થૈરચિન્મુદ્રિકાઢ્યૈ-
-રભક્તાંજનેયાદિતત્ત્વપ્રકાશૈઃ |
અમંદારમૂલૈરમંદારમાલૈ-
-રરામાભિધેયૈરલં દૈવતૈર્નઃ || ૨૪ ||
અસિંધુપ્રકોપૈરવંદ્યપ્રતાપૈ-
-રબંધુપ્રયાણૈરમંદસ્મિતાઢ્યૈઃ |
અદંડપ્રવાસૈરખંડપ્રબોધૈ-
-રરામાભિધેયૈરલં દૈવતૈર્નઃ || ૨૫ ||
હરે રામ સીતાપતે રાવણારે
ખરારે મુરારેઽસુરારે પરેતિ |
લપન્તં નયન્તં સદાકાલમેવં
સમાલોકયાલોકયાશેષબંધો || ૨૬ ||
નમસ્તે સુમિત્રાસુપુત્રાભિવંદ્ય
નમસ્તે સદા કૈકયીનંદનેડ્ય |
નમસ્તે સદા વાનરાધીશવંદ્ય
નમસ્તે નમસ્તે સદા રામચંદ્ર || ૨૭ ||
પ્રસીદ પ્રસીદ પ્રચંડપ્રતાપ
પ્રસીદ પ્રસીદ પ્રચંડારિકાલ |
પ્રસીદ પ્રસીદ પ્રપન્નાનુકંપિન્
પ્રસીદ પ્રસીદ પ્રભો રામચંદ્ર || ૨૮ ||
ભુજંગપ્રયાતં પરં વેદસારં
મુદા રામચંદ્રસ્ય ભક્ત્યા ચ નિત્યમ્ |
પઠન્સન્તતં ચિન્તયન્સ્વાન્તરંગે
સ એવ સ્વયં રામચંદ્રઃ સ ધન્યઃ || ૨૯ ||
ઇતિ શ્રીમચ્છંકરાચાર્ય કૃતં શ્રી રામ ભુજંગપ્રયાત સ્તોત્રમ્ |