ଭଜେ ଵିଶେଷସୁଂଦରଂ ସମସ୍ତପାପଖଂଡନମ୍ |
ସ୍ଵଭକ୍ତଚିତ୍ତରଂଜନଂ ସଦୈଵ ରାମମଦ୍ଵଯମ୍ || ୧ ||
ଜଟାକଲାପଶୋଭିତଂ ସମସ୍ତପାପନାଶକମ୍ |
ସ୍ଵଭକ୍ତଭୀତିଭଂଜନଂ ଭଜେ ହ ରାମମଦ୍ଵଯମ୍ || ୨ ||
ନିଜସ୍ଵରୂପବୋଧକଂ କୃପାକରଂ ଭଵାଽପହମ୍ |
ସମଂ ଶିଵଂ ନିରଂଜନଂ ଭଜେ ହ ରାମମଦ୍ଵଯମ୍ || ୩ ||
ସଦା ପ୍ରପଂଚକଲ୍ପିତଂ ହ୍ଯନାମରୂପଵାସ୍ତଵମ୍ |
ନିରାକୃତିଂ ନିରାମଯଂ ଭଜେ ହ ରାମମଦ୍ଵଯମ୍ || ୪ ||
ନିଷ୍ପ୍ରପଂଚ ନିର୍ଵିକଲ୍ପ ନିର୍ମଲଂ ନିରାମଯମ୍ |
ଚିଦେକରୂପସଂତତଂ ଭଜେ ହ ରାମମଦ୍ଵଯମ୍ || ୫ ||
ଭଵାବ୍ଧିପୋତରୂପକଂ ହ୍ଯଶେଷଦେହକଲ୍ପିତମ୍ |
ଗୁଣାକରଂ କୃପାକରଂ ଭଜେ ହ ରାମମଦ୍ଵଯମ୍ || ୬ ||
ମହାସୁଵାକ୍ଯବୋଧକୈର୍ଵିରାଜମାନଵାକ୍ପଦୈଃ |
ପରଂ ଚ ବ୍ରହ୍ମ ଵ୍ଯାପକଂ ଭଜେ ହ ରାମମଦ୍ଵଯମ୍ || ୭ ||
ଶିଵପ୍ରଦଂ ସୁଖପ୍ରଦଂ ଭଵଚ୍ଛିଦଂ ଭ୍ରମାପହମ୍ |
ଵିରାଜମାନଦୈଶିକଂ ଭଜେ ହ ରାମମଦ୍ଵଯମ୍ || ୮ ||
ରାମାଷ୍ଟକଂ ପଠତି ଯଃ ସୁଖଦଂ ସୁପୁଣ୍ଯଂ
ଵ୍ଯାସେନ ଭାଷିତମିଦଂ ଶୃଣୁତେ ମନୁଷ୍ଯଃ |
ଵିଦ୍ଯାଂ ଶ୍ରିଯଂ ଵିପୁଲସୌଖ୍ଯମନଂତକୀର୍ତିଂ
ସଂପ୍ରାପ୍ଯ ଦେହଵିଲଯେ ଲଭତେ ଚ ମୋକ୍ଷମ୍ || ୯ ||
ଇତି ଶ୍ରୀଵ୍ଯାସ ପ୍ରୋକ୍ତ ଶ୍ରୀରାମାଷ୍ଟକମ୍ |