തതോ യുദ്ധപരിശ്രാംതം സമരേ ചിംതയാ സ്ഥിതമ് |
രാവണം ചാഗ്രതോ ദൃഷ്ട്വാ യുദ്ധായ സമുപസ്ഥിതമ് || ൧ ||
ദൈവതൈശ്ച സമാഗമ്യ ദ്രഷ്ടുമഭ്യാഗതോ രണമ് |
ഉപാഗമ്യാബ്രവീദ്രാമമഗസ്ത്യോ ഭഗവാനൃഷിഃ || ൨ ||
രാമ രാമ മഹാബാഹോ ശൃണു ഗുഹ്യം സനാതനമ് |
യേന സര്വാനരീന് വത്സ സമരേ വിജയിഷ്യസി || ൩ ||
ആദിത്യഹൃദയം പുണ്യം സര്വശത്രുവിനാശനമ് |
ജയാവഹം ജപേന്നിത്യമക്ഷയ്യം പരമം ശിവമ് || ൪ ||
സര്വമംഗളമാംഗള്യം സര്വപാപപ്രണാശനമ് |
ചിംതാശോകപ്രശമനമായുര്വര്ധനമുത്തമമ് || ൫ ||
രശ്മിമംതം സമുദ്യംതം ദേവാസുരനമസ്കൃതമ് |
പൂജയസ്വ വിവസ്വംതം ഭാസ്കരം ഭുവനേശ്വരമ് || ൬ ||
സര്വദേവാത്മകോ ഹ്യേഷ തേജസ്വീ രശ്മിഭാവനഃ |
ഏഷ ദേവാസുരഗണാഁല്ലോകാന് പാതി ഗഭസ്തിഭിഃ || ൭ ||
ഏഷ ബ്രഹ്മാ ച വിഷ്ണുശ്ച ശിവഃ സ്കംദഃ പ്രജാപതിഃ |
മഹേംദ്രോ ധനദഃ കാലോ യമഃ സോമോ ഹ്യപാം പതിഃ || ൮ ||
പിതരോ വസവഃ സാധ്യാ ഹ്യശ്വിനൌ മരുതോ മനുഃ |
വായുര്വഹ്നിഃ പ്രജാപ്രാണ ഋതുകര്താ പ്രഭാകരഃ || ൯ ||
ആദിത്യഃ സവിതാ സൂര്യഃ ഖഗഃ പൂഷാ ഗഭസ്തിമാന് |
സുവര്ണസദൃശോ ഭാനുര്ഹിരണ്യരേതാ ദിവാകരഃ || ൧൦ ||
ഹരിദശ്വഃ സഹസ്രാര്ചിഃ സപ്തസപ്തിര്മരീചിമാന് |
തിമിരോന്മഥനഃ ശംഭുസ്ത്വഷ്ടാ മാര്താംഡ അംശുമാന് || ൧൧ ||
ഹിരണ്യഗര്ഭഃ ശിശിരസ്തപനോ ഭാസ്കരോ രവിഃ |
അഗ്നിഗര്ഭോഽദിതേഃ പുത്രഃ ശംഖഃ ശിശിരനാശനഃ || ൧൨ ||
വ്യോമനാഥസ്തമോഭേദീ ഋഗ്യജുഃസാമപാരഗഃ |
ഘനവൃഷ്ടിരപാം മിത്രോ വിംധ്യവീഥീപ്ലവംഗമഃ || ൧൩ ||
ആതപീ മംഡലീ മൃത്യുഃ പിംഗളഃ സര്വതാപനഃ |
കവിര്വിശ്വോ മഹാതേജാ രക്തഃ സര്വഭവോദ്ഭവഃ || ൧൪ ||
നക്ഷത്രഗ്രഹതാരാണാമധിപോ വിശ്വഭാവനഃ |
തേജസാമപി തേജസ്വീ ദ്വാദശാത്മന്നമോഽസ്തു തേ || ൧൫ ||
നമഃ പൂര്വായ ഗിരയേ പശ്ചിമായാദ്രയേ നമഃ | [പശ്ചിമേ ഗിരയേ]
ജ്യോതിര്ഗണാനാം പതയേ ദിനാധിപതയേ നമഃ || ൧൬ ||
ജയായ ജയഭദ്രായ ഹര്യശ്വായ നമോ നമഃ |
നമോ നമഃ സഹസ്രാംശോ ആദിത്യായ നമോ നമഃ || ൧൭ ||
നമ ഉഗ്രായ വീരായ സാരംഗായ നമോ നമഃ |
നമഃ പദ്മപ്രബോധായ മാര്താംഡായ നമോ നമഃ || ൧൮ ||
ബ്രഹ്മേശാനാച്യുതേശായ സൂര്യായാദിത്യവര്ചസേ |
ഭാസ്വതേ സര്വഭക്ഷായ രൌദ്രായ വപുഷേ നമഃ || ൧൯ ||
തമോഘ്നായ ഹിമഘ്നായ ശത്രുഘ്നായാമിതാത്മനേ |
കൃതഘ്നഘ്നായ ദേവായ ജ്യോതിഷാം പതയേ നമഃ || ൨൦ ||
തപ്തചാമീകരാഭായ വഹ്നയേ വിശ്വകര്മണേ |
നമസ്തമോഽഭിനിഘ്നായ രുചയേ ലോകസാക്ഷിണേ || ൨൧ ||
നാശയത്യേഷ വൈ ഭൂതം തദേവ സൃജതി പ്രഭുഃ |
പായത്യേഷ തപത്യേഷ വര്ഷത്യേഷ ഗഭസ്തിഭിഃ || ൨൨ ||
ഏഷ സുപ്തേഷു ജാഗര്തി ഭൂതേഷു പരിനിഷ്ഠിതഃ |
ഏഷ ഏവാഗ്നിഹോത്രം ച ഫലം ചൈവാഗ്നിഹോത്രിണാമ് || ൨൩ ||
വേദാശ്ച ക്രതവശ്ചൈവ ക്രതൂനാം ഫലമേവ ച |
യാനി കൃത്യാനി ലോകേഷു സര്വ ഏഷ രവിഃ പ്രഭുഃ || ൨൪ ||
ഏനമാപത്സു കൃച്ഛ്രേഷു കാംതാരേഷു ഭയേഷു ച |
കീര്തയന് പുരുഷഃ കശ്ചിന്നാവസീദതി രാഘവ || ൨൫ ||
പൂജയസ്വൈനമേകാഗ്രോ ദേവദേവം ജഗത്പതിമ് |
ഏതത്ത്രിഗുണിതം ജപ്ത്വാ യുദ്ധേഷു വിജയിഷ്യസി || ൨൬ ||
അസ്മിന് ക്ഷണേ മഹാബാഹോ രാവണം ത്വം വധിഷ്യസി |
ഏവമുക്ത്വാ തദാഽഗസ്ത്യോ ജഗാമ ച യഥാഗതമ് || ൨൭ ||
ഏതച്ഛ്രുത്വാ മഹാതേജാ നഷ്ടശോകോഽഭവത്തദാ |
ധാരയാമാസ സുപ്രീതോ രാഘവഃ പ്രയതാത്മവാന് || ൨൮ ||
ആദിത്യം പ്രേക്ഷ്യ ജപ്ത്വാ തു പരം ഹര്ഷമവാപ്തവാന് |
ത്രിരാചമ്യ ശുചിര്ഭൂത്വാ ധനുരാദായ വീര്യവാന് || ൨൯ ||
രാവണം പ്രേക്ഷ്യ ഹൃഷ്ടാത്മാ യുദ്ധായ സമുപാഗമത് |
സര്വയത്നേന മഹതാ വധേ തസ്യ ധൃതോഽഭവത് || ൩൦ ||
അഥ രവിരവദന്നിരീക്ഷ്യ രാമം
മുദിതമനാഃ പരമം പ്രഹൃഷ്യമാണഃ |
നിശിചരപതിസംക്ഷയം വിദിത്വാ
സുരഗണമധ്യഗതോ വചസ്ത്വരേതി || ൩൧ ||
ഇതി ആദിത്യ ഹൃദയമ് |