ജഗദ്ധാത്രി നമസ്തുഭ്യം വിഷ്ണോശ്ച പ്രിയവല്ലഭേ |
യതോ ബ്രഹ്മാദയോ ദേവാഃ സൃഷ്ടിസ്ഥിത്യംതകാരിണഃ ||
നമസ്തുലസി കല്യാണി നമോ വിഷ്ണുപ്രിയേ ശുഭേ |
നമോ മോക്ഷപ്രദേ ദേവി നമഃ സംപത്പ്രദായികേ ||
തുലസീ പാതു മാം നിത്യം സര്വാപദ്ഭ്യോഽപി സര്വദാ |
കീര്തിതാ വാപി സ്മൃതാ വാപി പവിത്രയതി മാനവമ് ||
നമാമി ശിരസാ ദേവീം തുലസീം വിലസത്തനും |
യാം ദൃഷ്ട്വാ പാപിനോ മര്ത്യാഃ മുച്യംതേ സര്വകില്ബിഷാത് ||
തുലസ്യാ രക്ഷിതം സര്വം ജഗദേതച്ചരാചരം |
യാ വിനര്ഹംതി പാപാനി ദൃഷ്ട്വാ വാ പാപിഭിര്നരൈഃ ||
നമസ്തുലസ്യതിതരാം യസ്യൈ ബദ്ധാംജലിം കലൌ |
കലയംതി സുഖം സര്വം സ്ത്രിയോ വൈശ്യാസ്തഥാഽപരേ ||
തുലസ്യാ നാപരം കിംചിദ്ദൈവതം ജഗതീതലേ |
യഥാ പവിത്രിതോ ലോകോ വിഷ്ണുസംഗേന വൈഷ്ണവഃ ||
തുലസ്യാഃ പല്ലവം വിഷ്ണോഃ ശിരസ്യാരോപിതം കലൌ |
ആരോപയതി സര്വാണി ശ്രേയാംസി വരമസ്തകേ ||
തുലസ്യാം സകലാ ദേവാ വസംതി സതതം യതഃ |
അതസ്താമര്ചയേല്ലോകേ സര്വാന് ദേവാന് സമര്ചയന് ||
നമസ്തുലസി സര്വജ്ഞേ പുരുഷോത്തമവല്ലഭേ |
പാഹി മാം സര്വ പാപേഭ്യഃ സര്വസമ്പത്പ്രദായികേ ||
ഇതി സ്തോത്രം പുരാ ഗീതം പുംഡരീകേണ ധീമതാ |
വിഷ്ണുമര്ചയതാ നിത്യം ശോഭനൈസ്തുലസീദലൈഃ ||
തുലസീ ശ്രീര്മഹാലക്ഷ്മീര്വിദ്യാവിദ്യാ യശസ്വിനീ |
ധര്മ്യാ ധര്മാനനാ ദേവീ ദേവദേവമനഃപ്രിയാ ||
ലക്ഷ്മീപ്രിയസഖീ ദേവീ ദ്യൌര്ഭൂമിരചലാ ചലാ |
ഷോഡശൈതാനി നാമാനി തുലസ്യാഃ കീര്തയന്നരഃ ||
ലഭതേ സുതരാം ഭക്തിമംതേ വിഷ്ണുപദം ലഭേത് |
തുലസീ ഭൂര്മഹാലക്ഷ്മീഃ പദ്മിനീ ശ്രീര്ഹരിപ്രിയാ ||
തുലസി ശ്രീസഖി ശുഭേ പാപഹാരിണി പുണ്യദേ |
നമസ്തേ നാരദനുതേ നാരായണമനഃപ്രിയേ ||
ഇതി ശ്രീപുംഡരീകകൃതം തുലസീസ്തോത്രമ് ||