ଜଗଦ୍ଧାତ୍ରି ନମସ୍ତୁଭ୍ଯଂ ଵିଷ୍ଣୋଶ୍ଚ ପ୍ରିଯଵଲ୍ଲଭେ |
ଯତୋ ବ୍ରହ୍ମାଦଯୋ ଦେଵାଃ ସୃଷ୍ଟିସ୍ଥିତ୍ଯଂତକାରିଣଃ ||

ନମସ୍ତୁଲସି କଲ୍ଯାଣି ନମୋ ଵିଷ୍ଣୁପ୍ରିଯେ ଶୁଭେ |
ନମୋ ମୋକ୍ଷପ୍ରଦେ ଦେଵି ନମଃ ସଂପତ୍ପ୍ରଦାଯିକେ ||

ତୁଲସୀ ପାତୁ ମାଂ ନିତ୍ଯଂ ସର୍ଵାପଦ୍ଭ୍ଯୋଽପି ସର୍ଵଦା |
କୀର୍ତିତା ଵାପି ସ୍ମୃତା ଵାପି ପଵିତ୍ରଯତି ମାନଵମ୍ ||

ନମାମି ଶିରସା ଦେଵୀଂ ତୁଲସୀଂ ଵିଲସତ୍ତନୁଂ |
ଯାଂ ଦୃଷ୍ଟ୍ଵା ପାପିନୋ ମର୍ତ୍ଯାଃ ମୁଚ୍ଯଂତେ ସର୍ଵକିଲ୍ବିଷାତ୍ ||

ତୁଲସ୍ଯା ରକ୍ଷିତଂ ସର୍ଵଂ ଜଗଦେତଚ୍ଚରାଚରଂ |
ଯା ଵିନର୍ହଂତି ପାପାନି ଦୃଷ୍ଟ୍ଵା ଵା ପାପିଭିର୍ନରୈଃ ||

ନମସ୍ତୁଲସ୍ଯତିତରାଂ ଯସ୍ଯୈ ବଦ୍ଧାଂଜଲିଂ କଲୌ |
କଲଯଂତି ସୁଖଂ ସର୍ଵଂ ସ୍ତ୍ରିଯୋ ଵୈଶ୍ଯାସ୍ତଥାଽପରେ ||

ତୁଲସ୍ଯା ନାପରଂ କିଂଚିଦ୍ଦୈଵତଂ ଜଗତୀତଲେ |
ଯଥା ପଵିତ୍ରିତୋ ଲୋକୋ ଵିଷ୍ଣୁସଂଗେନ ଵୈଷ୍ଣଵଃ ||

ତୁଲସ୍ଯାଃ ପଲ୍ଲଵଂ ଵିଷ୍ଣୋଃ ଶିରସ୍ଯାରୋପିତଂ କଲୌ |
ଆରୋପଯତି ସର୍ଵାଣି ଶ୍ରେଯାଂସି ଵରମସ୍ତକେ ||

ତୁଲସ୍ଯାଂ ସକଲା ଦେଵା ଵସଂତି ସତତଂ ଯତଃ |
ଅତସ୍ତାମର୍ଚଯେଲ୍ଲୋକେ ସର୍ଵାନ୍ ଦେଵାନ୍ ସମର୍ଚଯନ୍ ||

ନମସ୍ତୁଲସି ସର୍ଵଜ୍ଞେ ପୁରୁଷୋତ୍ତମଵଲ୍ଲଭେ |
ପାହି ମାଂ ସର୍ଵ ପାପେଭ୍ଯଃ ସର୍ଵସମ୍ପତ୍ପ୍ରଦାଯିକେ ||

ଇତି ସ୍ତୋତ୍ରଂ ପୁରା ଗୀତଂ ପୁଂଡରୀକେଣ ଧୀମତା |
ଵିଷ୍ଣୁମର୍ଚଯତା ନିତ୍ଯଂ ଶୋଭନୈସ୍ତୁଲସୀଦଲୈଃ ||

ତୁଲସୀ ଶ୍ରୀର୍ମହାଲକ୍ଷ୍ମୀର୍ଵିଦ୍ଯାଵିଦ୍ଯା ଯଶସ୍ଵିନୀ |
ଧର୍ମ୍ଯା ଧର୍ମାନନା ଦେଵୀ ଦେଵଦେଵମନଃପ୍ରିଯା ||

ଲକ୍ଷ୍ମୀପ୍ରିଯସଖୀ ଦେଵୀ ଦ୍ଯୌର୍ଭୂମିରଚଲା ଚଲା |
ଷୋଡଶୈତାନି ନାମାନି ତୁଲସ୍ଯାଃ କୀର୍ତଯନ୍ନରଃ ||

ଲଭତେ ସୁତରାଂ ଭକ୍ତିମଂତେ ଵିଷ୍ଣୁପଦଂ ଲଭେତ୍ |
ତୁଲସୀ ଭୂର୍ମହାଲକ୍ଷ୍ମୀଃ ପଦ୍ମିନୀ ଶ୍ରୀର୍ହରିପ୍ରିଯା ||

ତୁଲସି ଶ୍ରୀସଖି ଶୁଭେ ପାପହାରିଣି ପୁଣ୍ଯଦେ |
ନମସ୍ତେ ନାରଦନୁତେ ନାରାଯଣମନଃପ୍ରିଯେ ||

ଇତି ଶ୍ରୀପୁଂଡରୀକକୃତଂ ତୁଲସୀସ୍ତୋତ୍ରମ୍ ||