വിക്രമപാംഡ്യ ഉവാച-
കല്യാണാചലകോദംഡകാംതദോര്ദംഡമംഡിതമ് |
കബളീകൃതസംസാരം കലയേഽട്ടാലസുംദരമ് || ൧ ||
കാലകൂടപ്രഭാജാലകളംകീകൃതകംധരമ് |
കലാധരം കലാമൌളിം കലയേഽട്ടാലസുംദരമ് || ൨ ||
കാലകാലം കളാതീതം കലാവംതം ച നിഷ്കളമ് |
കമലാപതിസംസ്തുത്യം കലയേഽട്ടാലസുംദരമ് || ൩ ||
കാംതാര്ധം കമനീയാംഗം കരുണാമൃതസാഗരമ് |
കലികല്മഷദോഷഘ്നം കലയേഽട്ടാലസുംദരമ് || ൪ ||
കദംബകാനനാധീശം കാംക്ഷിതാര്ഥസുരദ്രുമമ് |
കാമശാസനമീശാനം കലയേഽട്ടാലസുംദരമ് || ൫ ||
സൃഷ്ടാനി മായയാ യേന ബ്രഹ്മാംഡാനി ബഹൂനി ച |
രക്ഷിതാനി ഹതാന്യംതേ കലയേഽട്ടാലസുംദരമ് || ൬ ||
സ്വഭക്തജനസംതാപപാപാപദ്ഭംഗതത്പരമ് |
കാരണം സര്വജഗതാം കലയേഽട്ടാലസുംദരമ് || ൭ ||
കുലശേഖരവംശോത്ഥഭൂപാനാം കുലദൈവതമ് |
പരിപൂര്ണം ചിദാനംദം കലയേഽട്ടാലസുംദരമ് || ൮ ||
അട്ടാലവീരശ്രീശംഭോരഷ്ടകം വരമിഷ്ടദമ് |
പഠതാം ശൃണ്വതാം സദ്യസ്തനോതു പരമാം ശ്രിയമ് || ൯ ||
ഇതി ശ്രീഹാലാസ്യമാഹാത്മ്യേ വിക്രമപാംഡ്യകൃതം അട്ടാലസുംദരാഷ്ടകമ് |