પિતામહશિરચ્છેદપ્રવીણકરપલ્લવ |
નમસ્તુભ્યં નમસ્તુભ્યં નમસ્તુભ્યં મહેશ્વર || ૧ ||

નિશુંભશુંભપ્રમુખદૈત્યશિક્ષણદક્ષિણે |
નમસ્તુભ્યં નમસ્તુભ્યં નમસ્તુભ્યં મહેશ્વરિ || ૨ ||

શૈલરાજસ્ય જામાતઃ શશિરેખાવતંસક |
નમસ્તુભ્યં નમસ્તુભ્યં નમસ્તુભ્યં મહેશ્વર || ૩ ||

શૈલરાજાત્મજે માતઃ શાતકુંભનિભપ્રભે |
નમસ્તુભ્યં નમસ્તુભ્યં નમસ્તુભ્યં મહેશ્વરિ || ૪ ||

ભૂતનાથ પુરારાતે ભુજંગામૃતભૂષણ |
નમસ્તુભ્યં નમસ્તુભ્યં નમસ્તુભ્યં મહેશ્વર || ૫ ||

પાદપ્રણતભક્તાનાં પારિજાતગુણાધિકે |
નમસ્તુભ્યં નમસ્તુભ્યં નમસ્તુભ્યં મહેશ્વરિ || ૬ ||

હાલાસ્યેશ દયામૂર્તે હાલાહલલસદ્ગળ |
નમસ્તુભ્યં નમસ્તુભ્યં નમસ્તુભ્યં મહેશ્વર || ૭ ||

નિતંબિનિ મહેશસ્ય કદંબવનનાયિકે |
નમસ્તુભ્યં નમસ્તુભ્યં નમસ્તુભ્યં મહેશ્વરિ || ૮ ||

ઇતિ શ્રીહાલાસ્યમાહાત્મ્યે સંઘિલકૃતં ઉમામહેશ્વરાષ્ટકમ્ |