ശിവേതി ദ്വൌവര്ണൌ പരപദ നയദ്ധംസ ഗരുതൌ
തടൌ സംസാരാബ്ധേര്നിജവിഷയ ബോധാംകുര ദലേ |
ശ്രുതേരംതര്ഗോപായിത പരരഹസ്യൌ ഹൃദിചരൌ
ഘരട്ടഗ്രാവാണൌ ഭവ വിടപി ബീജൌഘ ദലനേ || ൧ ||
ശിവേതി ദ്വൌവര്ണൌ ജനന വിജയ സ്തംഭ കലശൌ
ദുരംതാംതര്ധ്വാംത പ്രമഥന ശുഭാധാന ചതുരൌ |
മഹായാത്രാധ്വസ്യ പ്രമുഖ ജനതാ കംചുകിവരൌ
മരുജ്ഘംപായൌതൌ കൃതഫല നവാംഭോദമഥനേ || ൨ ||
ശിവേതി ദ്വൌവര്ണൌ ശിവമവദതാം ചൈവ വസുധാ-
-മുഭാഭ്യാം വര്ണാഭ്യാം രഥരഥിക യോ രാജ്യകലനാത് |
തതഃ സര്വഃ ശേഷഃ പരികര ഇഹാത്യത്കിമപി നോ
ക്വ ചാഽഹം ക്വ ത്വം നാ ക്വ പരമിദമൂഹ്യം ബുധഗണൈഃ || ൩ ||
ശിവേതി ദ്വൌവര്ണൌ വിഹപരസുഖാധാന ചതുരൌ
ക്രമോച്ചാരാദ്ധാതോര്വിനിമയവശാദര്ഥഘടനേ |
രഹസ്യാര്ഥോ ഹ്യേഷഃ പ്രകടയതി നാമ്നി ക്ഷിതിരഥം
പ്രജാനാമാനംദം കിമിതി ന വിദുര്മൂഢധിഷണാഃ || ൪ ||
ശിവേതി ദ്വൌവര്ണൌ യജുഷിതു ചതുര്ഥ്യേകവചനോ
നമഃ പൂര്വോ മംത്രഃ സമജനിജനിധ്വംസ ഹതയേ |
തഥാപി പ്രജ്ഞാംധാഃ ജനനമൃതി നക്രാഹിജടിലേ
പതന്ത്യേതച്ചിത്രം ഭവജലധിപംകേ ശിവശിവ || ൫ ||
ശിവേതി ദ്വൌവര്ണൌ ഭജത ഭജദാനംദജനകേ
ഭുവോ ഭര്താ ഭൂത്വാ സ തു ഭവതി മുക്തേരപി തഥാ |
ഉഭാഭ്യാം വര്ണാഭ്യാമധിഗമയതാര്തം വിനിമയാത്
വവര്ണോ ഭൂഭാരം ദിശതി ഹി ശികാരഃ പരപദമ് || ൬ ||
ശിവേതി ദ്വൌവര്ണൌ ദ്വിവചന കൃത ദ്വംദ്വകലനാ-
-ദ്ബ്രുവംതൌ ഗൂഢാര്ഥം ഭഗവദനുബംധാന്വിത ധിയഃ |
ന കശ്ചിന്മംത്രശ്ച പ്രഥയതി തദര്ഥാനുഗമനം
തതോഽയം സര്വാസു ശ്രുതിഷു ജയഘംടാ വിജയതേ || ൭ ||
ശിവേതി ദ്വൌവര്ണൌ പ്രഥമമഭിധായാനുഗുണതഃ
അഥോ മേ സംധാനാദ്ഗതിരിതി ച സംധാന പരഥ |
ന കാലോ ബധ്നാതി ത്യജതി നനു തത്കാല ഇഹ വഃ
കിമര്ഥം സംസാരേ പതഥ യതഥേമം മനുവരമ് || ൮ ||
ശിവേതി ദ്വൌവര്ണൌ ചരമപദ വിശ്വസ്വരയുതാ
വഹം ശബ്ദോച്ചാരാദ്ഭവതി ഖലു വര്ണത്രയമനുഃ |
ഇമം പ്രാണായാമൈഃ പഠഥ ഹഠയോഗാദിഭിരലം
ഭവേദാത്മേശൈക്യം കരബദരതുല്യം ബുധവരാഃ || ൯ ||
ശിവേതി ദ്വൌവര്ണൌ മമ കനകരത്നായുഷകഥാ
സുധാഭോഗാഭോഗാമനുജപതപോധ്യാനവിധയഃ |
പ്രഥാ ബോധസ്മൃതിരതിഗതി പ്രാപ്തിനിധയഃ
ഭവേതാം പ്രാരബ്ധ പ്രമഥന ശുഭാധാന ചതുരൌ || ൧൦ ||
ശിവേതി ദ്വൌവര്ണൌ പ്രതി സരധരൌ മുക്തിജനനേ
ജനുര്ലക്ഷാകോടി പ്രമഥന പരാ നിത്യസദൃശൌ |
കിയംതോ വിസ്രസ്താ ജഗതി ജനകാ മജ്ജനനതഃ
സ്മൃതിം ജജ്ഞേ ചിത്തം ശിവശിവ കദാപ്യസ്തുവ ജനുഃ || ൧൧ ||
ശിവേതി ദ്വൌവര്ണൌ വിഹജനുഷി ലബ്ധൌകിലമുയാ
പുരാ ഗംഗാ സ്നാതാ നനു കിമു കൃതം ചാധ്വരശതമ് |
ജഡസ്യൈവം കിം സ്യാജ്ജനകകൃതമാദ്യം ഖലു തപഃ
കുമാരോ മേ സ്യാദിത്യനുമിതമിദം തദ്ധി പരമമ് || ൧൨ ||
ശിവേതി ദ്വൌവര്ണൌ ശിവശിവ കദാ നോ പഠിതവാന്
പുരാ നോ ചേത് കിംസ്വിത് ജഠര പിഠരീ സംസ്ഥിതിരിയമ് |
ക്വ ശംഭോര്നാമോക്തിഃ ക്വ ജനനകഥാ ചംഡകിരണേ
തപത്യഭ്രേഽദഭ്ര ഭ്രമണമിഹ കിം സ്യാദ്ധി തമസഃ || ൧൩ ||
ശിവേതി ദ്വൌവര്ണൌ നിരത ദുരിത ധ്വംസനപരൌ
അയത്നാദ്യസ്യാസ്താം ജഗതി സകൃദാസ്യാംതരഗതൌ |
ന തസ്യാപ്യാശാസ്യഃ സുരകുലധുരീണസ്യ നിലയഃ
ന ധാതുസ്തസ്യാസീത്പിതുരപി സ സര്വസ്യ ജനകഃ || ൧൪ ||
ശിവേതി ദ്വൌവര്ണൌ ജഗപതി സമവായസ്തദപരം
നിമിത്തം വര്ണാനാം ശ്രുതിപഥ രഹസ്യം നിഗദിതമ് |
ന ചേദിത്ഥം സൃഷ്ടൌ പരികര ഇഹാന്യോസ്തിയദികഃ
ശിവേ സര്വാദ്വൈതേ ന കിമപി ച വസ്തുപ്രഥയതി || ൧൫ ||
ശിവേതി ദ്വൌവര്ണൌ വചസി മനസി ധ്വസ്ത ദുരിതൌ
പ്രഹൃത്യാംതര്ധ്വാംതം മിഹിര ശശിനോഃ ശക്തിമഘനാമ് |
പ്രഹസ്യ വ്യാഖ്യാതസ്തദുചിത തമോഭേദനപദേ
സമാസേ നോ ഷഷ്ഠീ വികസതി തൃതീയൈവ സുകരാ || ൧൬ ||
ശിവേതി ദ്വൌവര്ണൌ ഭുവന ഭവജാതാംഡഘടനാ
പടിഷ്ഠേ ചോര്ധ്വാഥഃ സ്ഫുടപടുതരേ ഖര്പരയുഗേ |
ശിവോലിംഗം സര്വം തദുദരഗതം സ്യാദ്ധി നിഗമഃ
തഥാവാദീ സത്യം പദതി ഖലു തത്കേന ഭവതി || ൧൭ ||
ശിവേതി ദ്വൌവര്ണൌ ഭജ യജ ശിവാര്ധാംഗ വപുഷം
ത്യജാസംതം മാര്ഗം വ്രജശിവപുരീം മുക്തിനിലയാമ് |
ന ചേദേതൌ വരൌ ഭജസി യജ ദൈവാസ്യമമുതഃ
ത്യജ ശ്രൌതം മാര്ഗം വ്രജ നിരയമിച്ഛൈവ സുഖദാ || ൧൮ ||
ശിവേതി ദ്വൌവര്ണൌ പഠതി സമഹാന് ധാതൃവിഷയേ
പലായധ്വം യൂയം ഭവഥ ഭയഭീതാ യമഭടാഃ |
പതംത്യാ സംസാര ഭ്രമണ പരിതാപ പ്രമഥന
പ്രചംഡാസ്തസ്യാഗ്രേ പ്രമഥപതി വീക്ഷാരസഝരാഃ || ൧൯ ||
ശിവേതി ദ്വൌവര്ണൌ മമ വിമല ജന്മാവനിരുഹഃ
ഫലേ ദ്വേ തത്രൈകം ജനയതി രുചീഃ പായസമയീഃ |
ഫലത്യേകം സര്പിര്ദ്വയമപി മദഗ്രഗ്രസനതഃ
ത്വരത്യേകാസ്വാദേ നമതി രുചിതാസീദ്ദ്വികലനേ || ൨൦ ||
ശിവേതി ദ്വൌവര്ണൌ പഠസി ഹഠയോഗാദിഭിരലം
കിമുദ്ദിശ്യാത്മാനം വ്യഥയസി വൃഥാ ഭ്രാംതിരഫലാ |
കരസ്ഥേ ശ്രീഖംഡേ മൃഗയസി ഹി മുസ്താം സികതലേ
ജഡാദേശഃ കാം കാം ദിശതി വിപദം നോ ശിവ ശിവ || ൨൧ ||
ശിവേതി ദ്വൌവര്ണൌ വദ യദി ശിവം വാംഛതി ഭവാന്
ന ചേദേതന്നേവ ശ്രുതിസമയ സിദ്ധാംതമവദമ് |
വിനാ ഹേതോഃ കാര്യം ന ഖലു പടതംതൂന് ഘടമൃദഃ
ന ജാനീഷേ കിം വാ ശിവവിരഹിതോ നാപ്സ്യതി ശിവമ് || ൨൨ ||
ശിവേതി ദ്വൌവര്ണൌ പരമശിവ കാരുണ്യജലധേ
സ്ഥിരീകൃത്യ സ്വാംതേ മമ വിമലഭാവം കുരു സദാ |
ചരേയം സര്വം തേ നിരുപമ നിരാതംക മഹസാം
ജ്വലജ്ജ്വാലാജാല ജ്വലിതമിദമാസീജ്ജഗദിതി || ൨൩ ||
ശിവേതി ദ്വൌവര്ണൌ വദ വദ രസജ്ഞേ ബുധഗണാഃ
ഭവംതീം തന്നാമ്നീമഭിദധതു ചൈനം യദി ന ചേത് |
ന യോഗം രൂഢിം വാ ഭജസി ഖലു ഡിത്ഥാദി തുലനാ
ഭവേദ്ദൈവീശക്തിസ്ത്വയി വിഫലിതാ സ്യാദ്ധിചിനുഹി || ൨൪ ||
ശിവേതി ദ്വൌവര്ണൌ ജഗതി ഖലു നേത്രദ്വയമിദം
ബഹിശ്ചക്ഷുര്ദ്വംദ്വം ന ഹി ദിശതി വസ്തു വ്യവഹിതമ് |
ഇദം ബാഹ്യാഭ്യംതഃ സ്ഫുട വിമല വിജ്ഞാന വിഭവം
ഗരീയസ്ത്വോച്ചാരാദ്ദിശതി ഖലു നേത്രം സമധികമ് || ൨൫ ||
ശിവേതി ദ്വൌവര്ണൌ വദനസദനേ യസ്യ മഹതഃ
തദീയം പാദാബ്ജം രഘുപതി പദാബ്ജം പ്രഹസതി |
ന തച്ചിത്രം തസ്മിന് പരമ പുരുഷാര്ഥം പ്രദരജോ
വ്രജാലാനേ മൌനേര്ദിശതി കില സംസാരപതനമ് || ൨൬ ||
ശിവേതി ദ്വൌവര്ണൌ സകൃഥവശമുച്ചാരണ ബലാത്
ദിശേതാം സാമ്രാജ്യം പുരമഥന തേ മുക്തിനിലയമ് |
ന ചേത്തസ്യൈവാംതഃ കിമിവ നിവസേദാംതരഗുഹാ-
-വിഹാരേലോലഃ സന്നിദമുദവഹന്മേ ദൃഢപദമ് || ൨൭ ||
ശിവേതി ദ്വൌവര്ണൌ ക്ഷിതിജലശിഖിസ്പര്ശനവിയത്
വിവസ്വച്ഛീതാംശു പ്രഥമപുരുഷൈരഷ്ടഭിരിദമ് |
തതം വിശ്വം പശ്ചാദ്വദതി ഇതി മത്വാ സുഖമഹോ
നരഃ പ്രോജ്ഝന് സര്വം കിമിതി ന പിബേത്തന്മഥുരസമ് || ൨൮ ||
ശിവേതി ദ്വൌവര്ണൌ പ്രകടിത നിജദ്വംദ്വവിധയാ
ജഗന്മാതാപിത്രോര്മിധുനമദധാതാം ശ്രുതിപഥേ |
ജനാസ്തസ്മാദ്യൂയം തരത ചരതാവശ്യമവനൌ
പിതൃഭ്യാം നൈവാന്യത് പരമപദ സംപ്രാപ്തി വിഭവേ || ൨൯ ||
ശിവേതി ദ്വൌവര്ണൌ രസിക രസനാ രംഗചതുരൌ
മനോധര്മാധര്മാഭ്യസന ഗജകംഠീരവ ശിശൂ |
വപുഃ കാര്യാകാര്യ വ്യസന ഹരിണ വ്യാഘ്രകലഭൌ
വിനോദം തന്വാതേ കിമിഹ മമ കാലാപനയനേ || ൩൦ ||
ശിവേതി ദ്വൌവര്ണൌ ജഗതി വശധാതു പ്രകടിതാ
വിതി പ്രോചുഃ കേചിദ്ധ്രുവമിതി തദീയാസ്ത്വചതുരാഃ |
ശിവാത്സൂത്രോദ്ധാരസ്തദനുഖലു ധാത്വര്ഥ വിവൃതിഃ
കഥം പൌര്വാപര്യം വദത വിബുധാഃ സംശയമിദമ് || ൩൧ ||
ശിവേതി ദ്വൌവര്ണൌ ഗുരുമുഖത യേഷ്യന്നഹരഹഃ
ജപിഷ്യത്യാശാസ്യം ന ഖലു തദയം പൂര്ണഹൃദയഃ |
ഇതി പ്രാചീനാസ്തേ ശിവപദമുപേത്യ സ്ഥിതിമിതാഃ
കിമുദ്ദിശ്യാജാപീസ്ത്വമിഹ ശിവ ഏവാസി ഭഗവാന് || ൩൨ ||
ശിവേതി ദ്വൌവര്ണൌ മനുരയമഭിന്ന സ്വരഹലാം
വിഭേദാശ്ചത്വാരഃ ഫലിത പുരുഷാര്ഥഃ ശ്രുതിമതാഃ |
നചൈകസ്മിന്മംത്രേ സകലപുരുഷാര്ഥ പ്രതിഗതിഃ
കിമര്ഥം ഭ്രാംത്യാന്യന്മനു ധിഷണയാ ബിഭ്രഥ ധുരമ് || ൩൩ ||
ശിവേതി ദ്വൌവര്ണൌ മധുരിമ ഗരിമ്ണാ മധുരസേ
പയഃപൂരേ കുത്സാം ന പരമപരം കിം ജനയതാമ് |
ജിഹാസന്നാഹാരേ സുരപുരി സദാ ഗാംഗ സലിലം
പിബന് കോ വാ ലിപ്സാം ഭജതി സരസഃ പല്വലജലേ || ൩൪ ||
ശിവേതി ദ്വൌവര്ണൌ പരമപദ മാം പാഹി പദയോ-
-ര്മിളിത്വാധാവംതേ യുഗമഭവ ദഷ്ടാക്ഷരമനുഃ |
സകൃത്തം യഃ കോവാ പഠതി തദധീനോ ഗിരിധനുഃ
പരഃ സര്വാദ്വൈത പ്രഥിത നിജസാമ്രാജ്യവിഭവൈഃ || ൩൫ ||
ശിവേതി ദ്വൌവര്ണൌ മമ വപുഷി സര്വാംഗ കവചൌ
പരം സവ്യാസവ്യ പ്രസരണ പടിഷ്ഠാംബക വരൌ |
ഉഭാവംതര്ബാഹ്യാഹിത മഥനകോദംഡതിലകൌ
ഭൃശം സ്യാത്താം മോക്ഷശ്രിയമവസരേ ദാതു മുദിതൌ || ൩൬ ||
ശിവപദാദധികോ ന പരോ മനുഃ
ശിവപദാദധികാ ന പരാ ഗതിഃ |
ശിവപദാദധികം ന പരം പദം
ശിവപദാദധികം ന ഹി ശാസനമ് || ൩൭ ||
ശിവസ്ത്രാതാ ശിവോദാതാ ശിവോ മാതാ ശിവഃ പിതാ |
ശിവ ഏവ ഹി മേ സര്വം ശിവാദന്യം ന വേദ്മ്യഹമ് || ൩൮ ||
ശിവപദമണിമാലാം യേ തു കൈവല്യമൂലാം
ദധതി പഠനമാത്രാദ്ദ്രാക്ഛിവാധീന ചിത്താഃ |
ഭവതി ഖലു ഭവാനീ ഭര്ഗയോ രാജധാനീ
പ്രമഥ വിഹൃതിവാടീ ഭാനുഭൂതേശ്ച പേടീ || ൩൯ ||
ശിവലിംഗമുമൈവാംഗ മനയാ സഹിതസ്തഥാ |
തയോഃ സംബംധ ഇത്യേവം പദത്രയമുപാസ്മഹേ || ൪൦ ||
ഇതി ശ്രീശംകരാചാര്യകൃത ശിവപദമണിമാലാ |