শিৱেতি দ্ৱৌৱর্ণৌ পরপদ নযদ্ধংস গরুতৌ
তটৌ সংসারাব্ধের্নিজৱিষয বোধাংকুর দলে |
শ্রুতেরংতর্গোপাযিত পররহস্যৌ হৃদিচরৌ
ঘরট্টগ্রাৱাণৌ ভৱ ৱিটপি বীজৌঘ দলনে || ১ ||
শিৱেতি দ্ৱৌৱর্ণৌ জনন ৱিজয স্তংভ কলশৌ
দুরংতাংতর্ধ্ৱাংত প্রমথন শুভাধান চতুরৌ |
মহাযাত্রাধ্ৱস্য প্রমুখ জনতা কংচুকিৱরৌ
মরুজ্ঘংপাযৌতৌ কৃতফল নৱাংভোদমথনে || ২ ||
শিৱেতি দ্ৱৌৱর্ণৌ শিৱমৱদতাং চৈৱ ৱসুধা-
-মুভাভ্যাং ৱর্ণাভ্যাং রথরথিক যো রাজ্যকলনাত্ |
ততঃ সর্ৱঃ শেষঃ পরিকর ইহাত্যত্কিমপি নো
ক্ৱ চাঽহং ক্ৱ ত্ৱং না ক্ৱ পরমিদমূহ্যং বুধগণৈঃ || ৩ ||
শিৱেতি দ্ৱৌৱর্ণৌ ৱিহপরসুখাধান চতুরৌ
ক্রমোচ্চারাদ্ধাতোর্ৱিনিমযৱশাদর্থঘটনে |
রহস্যার্থো হ্যেষঃ প্রকটযতি নাম্নি ক্ষিতিরথং
প্রজানামানংদং কিমিতি ন ৱিদুর্মূঢধিষণাঃ || ৪ ||
শিৱেতি দ্ৱৌৱর্ণৌ যজুষিতু চতুর্থ্যেকৱচনো
নমঃ পূর্ৱো মংত্রঃ সমজনিজনিধ্ৱংস হতযে |
তথাপি প্রজ্ঞাংধাঃ জননমৃতি নক্রাহিজটিলে
পতন্ত্যেতচ্চিত্রং ভৱজলধিপংকে শিৱশিৱ || ৫ ||
শিৱেতি দ্ৱৌৱর্ণৌ ভজত ভজদানংদজনকে
ভুৱো ভর্তা ভূত্ৱা স তু ভৱতি মুক্তেরপি তথা |
উভাভ্যাং ৱর্ণাভ্যামধিগমযতার্তং ৱিনিমযাত্
ৱৱর্ণো ভূভারং দিশতি হি শিকারঃ পরপদম্ || ৬ ||
শিৱেতি দ্ৱৌৱর্ণৌ দ্ৱিৱচন কৃত দ্ৱংদ্ৱকলনা-
-দ্ব্রুৱংতৌ গূঢার্থং ভগৱদনুবংধান্ৱিত ধিযঃ |
ন কশ্চিন্মংত্রশ্চ প্রথযতি তদর্থানুগমনং
ততোঽযং সর্ৱাসু শ্রুতিষু জযঘংটা ৱিজযতে || ৭ ||
শিৱেতি দ্ৱৌৱর্ণৌ প্রথমমভিধাযানুগুণতঃ
অথো মে সংধানাদ্গতিরিতি চ সংধান পরথ |
ন কালো বধ্নাতি ত্যজতি ননু তত্কাল ইহ ৱঃ
কিমর্থং সংসারে পতথ যতথেমং মনুৱরম্ || ৮ ||
শিৱেতি দ্ৱৌৱর্ণৌ চরমপদ ৱিশ্ৱস্ৱরযুতা
ৱহং শব্দোচ্চারাদ্ভৱতি খলু ৱর্ণত্রযমনুঃ |
ইমং প্রাণাযামৈঃ পঠথ হঠযোগাদিভিরলং
ভৱেদাত্মেশৈক্যং করবদরতুল্যং বুধৱরাঃ || ৯ ||
শিৱেতি দ্ৱৌৱর্ণৌ মম কনকরত্নাযুষকথা
সুধাভোগাভোগামনুজপতপোধ্যানৱিধযঃ |
প্রথা বোধস্মৃতিরতিগতি প্রাপ্তিনিধযঃ
ভৱেতাং প্রারব্ধ প্রমথন শুভাধান চতুরৌ || ১০ ||
শিৱেতি দ্ৱৌৱর্ণৌ প্রতি সরধরৌ মুক্তিজননে
জনুর্লক্ষাকোটি প্রমথন পরা নিত্যসদৃশৌ |
কিযংতো ৱিস্রস্তা জগতি জনকা মজ্জননতঃ
স্মৃতিং জজ্ঞে চিত্তং শিৱশিৱ কদাপ্যস্তুৱ জনুঃ || ১১ ||
শিৱেতি দ্ৱৌৱর্ণৌ ৱিহজনুষি লব্ধৌকিলমুযা
পুরা গংগা স্নাতা ননু কিমু কৃতং চাধ্ৱরশতম্ |
জডস্যৈৱং কিং স্যাজ্জনককৃতমাদ্যং খলু তপঃ
কুমারো মে স্যাদিত্যনুমিতমিদং তদ্ধি পরমম্ || ১২ ||
শিৱেতি দ্ৱৌৱর্ণৌ শিৱশিৱ কদা নো পঠিতৱান্
পুরা নো চেত্ কিংস্ৱিত্ জঠর পিঠরী সংস্থিতিরিযম্ |
ক্ৱ শংভোর্নামোক্তিঃ ক্ৱ জননকথা চংডকিরণে
তপত্যভ্রেঽদভ্র ভ্রমণমিহ কিং স্যাদ্ধি তমসঃ || ১৩ ||
শিৱেতি দ্ৱৌৱর্ণৌ নিরত দুরিত ধ্ৱংসনপরৌ
অযত্নাদ্যস্যাস্তাং জগতি সকৃদাস্যাংতরগতৌ |
ন তস্যাপ্যাশাস্যঃ সুরকুলধুরীণস্য নিলযঃ
ন ধাতুস্তস্যাসীত্পিতুরপি স সর্ৱস্য জনকঃ || ১৪ ||
শিৱেতি দ্ৱৌৱর্ণৌ জগপতি সমৱাযস্তদপরং
নিমিত্তং ৱর্ণানাং শ্রুতিপথ রহস্যং নিগদিতম্ |
ন চেদিত্থং সৃষ্টৌ পরিকর ইহান্যোস্তিযদিকঃ
শিৱে সর্ৱাদ্ৱৈতে ন কিমপি চ ৱস্তুপ্রথযতি || ১৫ ||
শিৱেতি দ্ৱৌৱর্ণৌ ৱচসি মনসি ধ্ৱস্ত দুরিতৌ
প্রহৃত্যাংতর্ধ্ৱাংতং মিহির শশিনোঃ শক্তিমঘনাম্ |
প্রহস্য ৱ্যাখ্যাতস্তদুচিত তমোভেদনপদে
সমাসে নো ষষ্ঠী ৱিকসতি তৃতীযৈৱ সুকরা || ১৬ ||
শিৱেতি দ্ৱৌৱর্ণৌ ভুৱন ভৱজাতাংডঘটনা
পটিষ্ঠে চোর্ধ্ৱাথঃ স্ফুটপটুতরে খর্পরযুগে |
শিৱোলিংগং সর্ৱং তদুদরগতং স্যাদ্ধি নিগমঃ
তথাৱাদী সত্যং পদতি খলু তত্কেন ভৱতি || ১৭ ||
শিৱেতি দ্ৱৌৱর্ণৌ ভজ যজ শিৱার্ধাংগ ৱপুষং
ত্যজাসংতং মার্গং ৱ্রজশিৱপুরীং মুক্তিনিলযাম্ |
ন চেদেতৌ ৱরৌ ভজসি যজ দৈৱাস্যমমুতঃ
ত্যজ শ্রৌতং মার্গং ৱ্রজ নিরযমিচ্ছৈৱ সুখদা || ১৮ ||
শিৱেতি দ্ৱৌৱর্ণৌ পঠতি সমহান্ ধাতৃৱিষযে
পলাযধ্ৱং যূযং ভৱথ ভযভীতা যমভটাঃ |
পতংত্যা সংসার ভ্রমণ পরিতাপ প্রমথন
প্রচংডাস্তস্যাগ্রে প্রমথপতি ৱীক্ষারসঝরাঃ || ১৯ ||
শিৱেতি দ্ৱৌৱর্ণৌ মম ৱিমল জন্মাৱনিরুহঃ
ফলে দ্ৱে তত্রৈকং জনযতি রুচীঃ পাযসমযীঃ |
ফলত্যেকং সর্পির্দ্ৱযমপি মদগ্রগ্রসনতঃ
ত্ৱরত্যেকাস্ৱাদে নমতি রুচিতাসীদ্দ্ৱিকলনে || ২০ ||
শিৱেতি দ্ৱৌৱর্ণৌ পঠসি হঠযোগাদিভিরলং
কিমুদ্দিশ্যাত্মানং ৱ্যথযসি ৱৃথা ভ্রাংতিরফলা |
করস্থে শ্রীখংডে মৃগযসি হি মুস্তাং সিকতলে
জডাদেশঃ কাং কাং দিশতি ৱিপদং নো শিৱ শিৱ || ২১ ||
শিৱেতি দ্ৱৌৱর্ণৌ ৱদ যদি শিৱং ৱাংছতি ভৱান্
ন চেদেতন্নেৱ শ্রুতিসময সিদ্ধাংতমৱদম্ |
ৱিনা হেতোঃ কার্যং ন খলু পটতংতূন্ ঘটমৃদঃ
ন জানীষে কিং ৱা শিৱৱিরহিতো নাপ্স্যতি শিৱম্ || ২২ ||
শিৱেতি দ্ৱৌৱর্ণৌ পরমশিৱ কারুণ্যজলধে
স্থিরীকৃত্য স্ৱাংতে মম ৱিমলভাৱং কুরু সদা |
চরেযং সর্ৱং তে নিরুপম নিরাতংক মহসাং
জ্ৱলজ্জ্ৱালাজাল জ্ৱলিতমিদমাসীজ্জগদিতি || ২৩ ||
শিৱেতি দ্ৱৌৱর্ণৌ ৱদ ৱদ রসজ্ঞে বুধগণাঃ
ভৱংতীং তন্নাম্নীমভিদধতু চৈনং যদি ন চেত্ |
ন যোগং রূঢিং ৱা ভজসি খলু ডিত্থাদি তুলনা
ভৱেদ্দৈৱীশক্তিস্ত্ৱযি ৱিফলিতা স্যাদ্ধিচিনুহি || ২৪ ||
শিৱেতি দ্ৱৌৱর্ণৌ জগতি খলু নেত্রদ্ৱযমিদং
বহিশ্চক্ষুর্দ্ৱংদ্ৱং ন হি দিশতি ৱস্তু ৱ্যৱহিতম্ |
ইদং বাহ্যাভ্যংতঃ স্ফুট ৱিমল ৱিজ্ঞান ৱিভৱং
গরীযস্ত্ৱোচ্চারাদ্দিশতি খলু নেত্রং সমধিকম্ || ২৫ ||
শিৱেতি দ্ৱৌৱর্ণৌ ৱদনসদনে যস্য মহতঃ
তদীযং পাদাব্জং রঘুপতি পদাব্জং প্রহসতি |
ন তচ্চিত্রং তস্মিন্ পরম পুরুষার্থং প্রদরজো
ৱ্রজালানে মৌনের্দিশতি কিল সংসারপতনম্ || ২৬ ||
শিৱেতি দ্ৱৌৱর্ণৌ সকৃথৱশমুচ্চারণ বলাত্
দিশেতাং সাম্রাজ্যং পুরমথন তে মুক্তিনিলযম্ |
ন চেত্তস্যৈৱাংতঃ কিমিৱ নিৱসেদাংতরগুহা-
-ৱিহারেলোলঃ সন্নিদমুদৱহন্মে দৃঢপদম্ || ২৭ ||
শিৱেতি দ্ৱৌৱর্ণৌ ক্ষিতিজলশিখিস্পর্শনৱিযত্
ৱিৱস্ৱচ্ছীতাংশু প্রথমপুরুষৈরষ্টভিরিদম্ |
ততং ৱিশ্ৱং পশ্চাদ্ৱদতি ইতি মত্ৱা সুখমহো
নরঃ প্রোজ্ঝন্ সর্ৱং কিমিতি ন পিবেত্তন্মথুরসম্ || ২৮ ||
শিৱেতি দ্ৱৌৱর্ণৌ প্রকটিত নিজদ্ৱংদ্ৱৱিধযা
জগন্মাতাপিত্রোর্মিধুনমদধাতাং শ্রুতিপথে |
জনাস্তস্মাদ্যূযং তরত চরতাৱশ্যমৱনৌ
পিতৃভ্যাং নৈৱান্যত্ পরমপদ সংপ্রাপ্তি ৱিভৱে || ২৯ ||
শিৱেতি দ্ৱৌৱর্ণৌ রসিক রসনা রংগচতুরৌ
মনোধর্মাধর্মাভ্যসন গজকংঠীরৱ শিশূ |
ৱপুঃ কার্যাকার্য ৱ্যসন হরিণ ৱ্যাঘ্রকলভৌ
ৱিনোদং তন্ৱাতে কিমিহ মম কালাপনযনে || ৩০ ||
শিৱেতি দ্ৱৌৱর্ণৌ জগতি ৱশধাতু প্রকটিতা
ৱিতি প্রোচুঃ কেচিদ্ধ্রুৱমিতি তদীযাস্ত্ৱচতুরাঃ |
শিৱাত্সূত্রোদ্ধারস্তদনুখলু ধাত্ৱর্থ ৱিৱৃতিঃ
কথং পৌর্ৱাপর্যং ৱদত ৱিবুধাঃ সংশযমিদম্ || ৩১ ||
শিৱেতি দ্ৱৌৱর্ণৌ গুরুমুখত যেষ্যন্নহরহঃ
জপিষ্যত্যাশাস্যং ন খলু তদযং পূর্ণহৃদযঃ |
ইতি প্রাচীনাস্তে শিৱপদমুপেত্য স্থিতিমিতাঃ
কিমুদ্দিশ্যাজাপীস্ত্ৱমিহ শিৱ এৱাসি ভগৱান্ || ৩২ ||
শিৱেতি দ্ৱৌৱর্ণৌ মনুরযমভিন্ন স্ৱরহলাং
ৱিভেদাশ্চত্ৱারঃ ফলিত পুরুষার্থঃ শ্রুতিমতাঃ |
নচৈকস্মিন্মংত্রে সকলপুরুষার্থ প্রতিগতিঃ
কিমর্থং ভ্রাংত্যান্যন্মনু ধিষণযা বিভ্রথ ধুরম্ || ৩৩ ||
শিৱেতি দ্ৱৌৱর্ণৌ মধুরিম গরিম্ণা মধুরসে
পযঃপূরে কুত্সাং ন পরমপরং কিং জনযতাম্ |
জিহাসন্নাহারে সুরপুরি সদা গাংগ সলিলং
পিবন্ কো ৱা লিপ্সাং ভজতি সরসঃ পল্ৱলজলে || ৩৪ ||
শিৱেতি দ্ৱৌৱর্ণৌ পরমপদ মাং পাহি পদযো-
-র্মিলিত্ৱাধাৱংতে যুগমভৱ দষ্টাক্ষরমনুঃ |
সকৃত্তং যঃ কোৱা পঠতি তদধীনো গিরিধনুঃ
পরঃ সর্ৱাদ্ৱৈত প্রথিত নিজসাম্রাজ্যৱিভৱৈঃ || ৩৫ ||
শিৱেতি দ্ৱৌৱর্ণৌ মম ৱপুষি সর্ৱাংগ কৱচৌ
পরং সৱ্যাসৱ্য প্রসরণ পটিষ্ঠাংবক ৱরৌ |
উভাৱংতর্বাহ্যাহিত মথনকোদংডতিলকৌ
ভৃশং স্যাত্তাং মোক্ষশ্রিযমৱসরে দাতু মুদিতৌ || ৩৬ ||
শিৱপদাদধিকো ন পরো মনুঃ
শিৱপদাদধিকা ন পরা গতিঃ |
শিৱপদাদধিকং ন পরং পদং
শিৱপদাদধিকং ন হি শাসনম্ || ৩৭ ||
শিৱস্ত্রাতা শিৱোদাতা শিৱো মাতা শিৱঃ পিতা |
শিৱ এৱ হি মে সর্ৱং শিৱাদন্যং ন ৱেদ্ম্যহম্ || ৩৮ ||
শিৱপদমণিমালাং যে তু কৈৱল্যমূলাং
দধতি পঠনমাত্রাদ্দ্রাক্ছিৱাধীন চিত্তাঃ |
ভৱতি খলু ভৱানী ভর্গযো রাজধানী
প্রমথ ৱিহৃতিৱাটী ভানুভূতেশ্চ পেটী || ৩৯ ||
শিৱলিংগমুমৈৱাংগ মনযা সহিতস্তথা |
তযোঃ সংবংধ ইত্যেৱং পদত্রযমুপাস্মহে || ৪০ ||
ইতি শ্রীশংকরাচার্যকৃত শিৱপদমণিমালা |