ശ്രീകൃഷ്ണ ഉവാച |
മത്തസിംധുരമസ്തകോപരി നൃത്യമാനപദാംബുജം
ഭക്തചിംതിതസിദ്ധിദാനവിചക്ഷണം കമലേക്ഷണമ് |
ഭുക്തിമുക്തിഫലപ്രദം ഭവപദ്മജാച്യുതപൂജിതം
കൃത്തിവാസസമാശ്രയേ മമ സര്വസിദ്ധിദമീശ്വരമ് || ൧ ||
വിത്തദപ്രിയമര്ചിതം കൃതകൃച്ഛ്രതീവ്രതപശ്ചരൈഃ
മുക്തികാമിഭിരാശ്രിതൈര്മുനിഭിര്ദൃഢാമലഭക്തിഭിഃ |
മുക്തിദം നിജപാദപംകജസക്തമാനസയോഗിനാം
കൃത്തിവാസസമാശ്രയേ മമ സര്വസിദ്ധിദമീശ്വരമ് || ൨ ||
കൃത്തദക്ഷമഖാധിപം വരവീരഭദ്രഗണേന വൈ
യക്ഷരാക്ഷസമര്ത്യകിന്നരദേവപന്നഗവംദിതമ് |
രക്തഭുഗ്ഗണനാഥഹൃദ്ഭ്രമരാംചിതാംഘ്രിസരോരുഹം
കൃത്തിവാസസമാശ്രയേ മമ സര്വസിദ്ധിദമീശ്വരമ് || ൩ ||
നക്തനാഥകളാധരം നഗജാപയോധരനീരജാ-
-ലിപ്തചംദനപംകകുംകുമപംകിലാമലവിഗ്രഹമ് |
ശക്തിമംതമശേഷസൃഷ്ടിവിധായകം സകലപ്രഭും
കൃത്തിവാസസമാശ്രയേ മമ സര്വസിദ്ധിദമീശ്വരമ് || ൪ ||
രക്തനീരജതുല്യപാദപയോജസന്മണിനൂപുരം
പത്തനത്രയദേഹപാടനപംകജാക്ഷശിലീമുഖമ് |
വിത്തശൈലശരാസനം പൃഥുശിംജിനീകൃതതക്ഷകം
കൃത്തിവാസസമാശ്രയേ മമ സര്വസിദ്ധിദമീശ്വരമ് || ൫ ||
യഃ പഠേച്ച ദിനേ ദിനേ സ്തവപംചരത്നമുമാപതേഃ
പ്രാതരേവ മയാ കൃതം നിഖിലാഘതൂലമഹാനലമ് |
തസ്യ പുത്രകളത്രമിത്രധനാനി സംതു കൃപാബലാത്
തേ മഹേശ്വര ശംകരാഖില വിശ്വനായക ശാശ്വത || ൬ ||
ഇതി ശ്രീശിവമഹാപുരാണേ ശ്രീകൃഷ്ണകൃത ശ്രീശിവപംചരത്നസ്തുതിഃ |