গলদ্দানগংডং মিলদ্ভৃংগষংডং
চলচ্চারুশুংডং জগত্ত্রাণশৌংডম্ |
কনদ্দংতকাংডং ৱিপদ্ভংগচংডং
শিৱপ্রেমপিংডং ভজে ৱক্রতুংডম্ || ১ ||
অনাদ্যংতমাদ্যং পরং তত্ত্ৱমর্থং
চিদাকারমেকং তুরীযং ত্ৱমেযম্ |
হরিব্রহ্মমৃগ্যং পরব্রহ্মরূপং
মনোৱাগতীতং মহঃশৈৱমীডে || ২ ||
স্ৱশক্ত্যাদিশক্ত্যংতসিংহাসনস্থং
মনোহারিসর্ৱাংগরত্নোরুভূষম্ |
জটাহীংদুগংগাস্থিশম্যাকমৌলিং
পরাশক্তিমিত্রং নুমঃ পংচৱক্ত্রম্ || ৩ ||
শিৱেশানতত্পূরুষাঘোরৱামা-
-দিভিঃ পংচভির্হৃন্মুখৈঃ ষড্ভিরংগৈঃ |
অনৌপম্য ষট্ত্রিংশতং তত্ত্ৱৱিদ্যা-
-মতীতং পরং ত্ৱাং কথং ৱেত্তি কো ৱা || ৪ ||
প্রৱালপ্রৱাহপ্রভাশোণমর্ধং
মরুত্ৱন্মণিশ্রীমহঃশ্যামমর্ধম্ |
গুণস্যূতমেতদ্ৱপুঃ শৈৱমংতঃ
স্মরামি স্মরাপত্তিসংপত্তিহেতুম্ || ৫ ||
স্ৱসেৱাসমাযাতদেৱাসুরেংদ্রা-
-নমন্মৌলিমংদারমালাভিষক্তম্ |
নমস্যামি শংভো পদাংভোরুহং তে
ভৱাংভোধিপোতং ভৱানীৱিভাৱ্যম্ || ৬ ||
জগন্নাথ মন্নাথ গৌরীসনাথ
প্রপন্নানুকংপিন্ৱিপন্নার্তিহারিন্ |
মহঃস্তোমমূর্তে সমস্তৈকবংধো
নমস্তে নমস্তে পুনস্তে নমোঽস্তু || ৭ ||
ৱিরূপাক্ষ ৱিশ্ৱেশ ৱিশ্ৱাদিদেৱ
ত্রযীমূল শংভো শিৱ ত্র্যংবক ত্ৱম্ |
প্রসীদ স্মর ত্রাহি পশ্যাৱমুক্ত্যৈ
ক্ষমাং প্রাপ্নুহি ত্র্যক্ষ মাং রক্ষ মোদাত্ || ৮ ||
মহাদেৱ দেৱেশ দেৱাদিদেৱ
স্মরারে পুরারে যমারে হরেতি |
ব্রুৱাণঃ স্মরিষ্যামি ভক্ত্যা ভৱংতং
ততো মে দযাশীল দেৱ প্রসীদ || ৯ ||
ত্ৱদন্যঃ শরণ্যঃ প্রপন্নস্য নেতি
প্রসীদ স্মরন্নেৱ হন্যাস্তু দৈন্যম্ |
ন চেত্তে ভৱেদ্ভক্তৱাত্সল্যহানি-
-স্ততো মে দযালো সদা সন্নিধেহি || ১০ ||
অযং দানকালস্ত্ৱহং দানপাত্রং
ভৱানেৱ দাতা ত্ৱদন্যং ন যাচে |
ভৱদ্ভক্তিমেৱ স্থিরাং দেহি মহ্যং
কৃপাশীল শংভো কৃতার্থোঽস্মি তস্মাত্ || ১১ ||
পশুং ৱেত্সি চেন্মাং তমেৱাধিরূঢঃ
কলংকীতি ৱা মূর্ধ্নি ধত্সে তমেৱ |
দ্ৱিজিহ্ৱঃ পুনঃ সোঽপি তে কংঠভূষা
ত্ৱদংগীকৃতাঃ শর্ৱ সর্ৱেঽপি ধন্যাঃ || ১২ ||
ন শক্নোমি কর্তুং পরদ্রোহলেশং
কথং প্রীযসে ত্ৱং ন জানে গিরীশ |
তথাহি প্রসন্নোঽসি কস্যাপি কাংতা-
-সুতদ্রোহিণো ৱা পিতৃদ্রোহিণো ৱা || ১৩ ||
স্তুতিং ধ্যানমর্চাং যথাৱদ্ৱিধাতুং
ভজন্নপ্যজানন্মহেশাৱলংবে |
ত্রসংতং সুতং ত্রাতুমগ্রে মৃকংডো-
-র্যমপ্রাণনির্ৱাপণং ত্ৱত্পদাব্জম্ || ১৪ ||
শিরোদৃষ্টিহৃদ্রোগশূলপ্রমেহ-
-জ্ৱরার্শোজরাযক্ষ্মহিক্কাৱিষার্তান্ |
ত্ৱমাদ্যো ভিষগ্ভেষজং ভস্ম শংভো
ত্ৱমুল্লাঘযাস্মান্ৱপুর্লাঘৱায || ১৫ ||
দরিদ্রোঽস্ম্যভদ্রোঽস্মি ভগ্নোঽস্মি দূযে
ৱিষণ্ণোঽস্মি সন্নোঽস্মি খিন্নোঽস্মি চাহম্ |
ভৱান্প্রাণিনামংতরাত্মাসি শংভো
মমাধিং ন ৱেত্সি প্রভো রক্ষ মাং ত্ৱম্ || ১৬ ||
ত্ৱদক্ষ্ণোঃ কটাক্ষঃ পতেত্ত্র্যক্ষ যত্র
ক্ষণং ক্ষ্মা চ লক্ষ্মীঃ স্ৱযং তং ৱৃণাতে |
কিরীটস্ফুরচ্চামরচ্ছত্রমালা-
-কলাচীগজক্ষৌমভূষাৱিশেষৈঃ || ১৭ ||
ভৱান্যৈ ভৱাযাপি মাত্রে চ পিত্রে
মৃডান্যৈ মৃডাযাপ্যঘঘ্ন্যৈ মখঘ্নে |
শিৱাংগ্যৈ শিৱাংগায কুর্মঃ শিৱাযৈ
শিৱাযাংবিকাযৈ নমস্ত্র্যংবকায || ১৮ ||
ভৱদ্গৌরৱং মল্লঘুত্ৱং ৱিদিত্ৱা
প্রভো রক্ষ কারুণ্যদৃষ্ট্যানুগং মাম্ |
শিৱাত্মানুভাৱস্তুতাৱক্ষমোঽহং
স্ৱশক্ত্যা কৃতং মেঽপরাধং ক্ষমস্ৱ || ১৯ ||
যদা কর্ণরংধ্রং ৱ্রজেত্কালৱাহ-
-দ্ৱিষত্কংঠঘংটাঘণাত্কারনাদঃ |
ৱৃষাধীশমারুহ্য দেৱৌপৱাহ্যং
তদা ৱত্স মা ভীরিতি প্রীণয ত্ৱম্ || ২০ ||
যদা দারুণাভাষণা ভীষণা মে
ভৱিষ্যংত্যুপাংতে কৃতাংতস্য দূতাঃ |
তদা মন্মনস্ত্ৱত্পদাংভোরুহস্থং
কথং নিশ্চলং স্যান্নমস্তেঽস্তু শংভো || ২১ ||
যদা দুর্নিৱারৱ্যথোঽহং শযানো
লুঠন্নিঃশ্ৱসন্নিঃসৃতাৱ্যক্তৱাণিঃ |
তদা জহ্নুকন্যাজলালংকৃতং তে
জটামংডলং মন্মনোমংদিরং স্যাত্ || ২২ ||
যদা পুত্রমিত্রাদযো মত্সকাশে
রুদংত্যস্য হা কীদৃশীযং দশেতি |
তদা দেৱদেৱেশ গৌরীশ শংভো
নমস্তে শিৱাযেত্যজস্রং ব্রৱাণি || ২৩ ||
যদা পশ্যতাং মামসৌ ৱেত্তি নাস্মা-
-নযং শ্ৱাস এৱেতি ৱাচো ভৱেযুঃ |
তদা ভূতিভূষং ভুজংগাৱনদ্ধং
পুরারে ভৱংতং স্ফুটং ভাৱযেযম্ || ২৪ ||
যদা যাতনাদেহসংদেহৱাহী
ভৱেদাত্মদেহে ন মোহো মহান্মে |
তদা কাশশীতাংশুসংকাশমীশ
স্মরারে ৱপুস্তে নমস্তে স্মরামি || ২৫ ||
যদাপারমচ্ছাযমস্থানমদ্ভি-
-র্জনৈর্ৱা ৱিহীনং গমিষ্যামি মার্গম্ |
তদা তং নিরুংধন্কৃতাংতস্য মার্গং
মহাদেৱ মহ্যং মনোজ্ঞং প্রযচ্ছ || ২৬ ||
যদা রৌরৱাদি স্মরন্নেৱ ভীত্যা
ৱ্রজাম্যত্র মোহং মহাদেৱ ঘোরম্ |
তদা মামহো নাথ কস্তারযিষ্য-
-ত্যনাথং পরাধীনমর্ধেংদুমৌলে || ২৭ ||
যদা শ্ৱেতপত্রাযতালংঘ্যশক্তেঃ
কৃতাংতাদ্ভযং ভক্তৱাত্সল্যভাৱাত্ |
তদা পাহি মাং পার্ৱতীৱল্লভান্যং
ন পশ্যামি পাতারমেতাদৃশং মে || ২৮ ||
ইদানীমিদানীং মৃতির্মে ভৱিত্রী-
-ত্যহো সংততং চিংতযা পীডিতোঽস্মি |
কথং নাম মা ভূন্মৃতৌ ভীতিরেষা
নমস্তে গতীনাং গতে নীলকংঠ || ২৯ ||
অমর্যাদমেৱাহমাবালৱৃদ্ধং
হরংতং কৃতাংতং সমীক্ষ্যাস্মি ভীতঃ |
মৃতৌ তাৱকাংঘ্র্যব্জদিৱ্যপ্রসাদা-
-দ্ভৱানীপতে নির্ভযোঽহং ভৱানি || ৩০ ||
জরাজন্মগর্ভাধিৱাসাদিদুঃখা-
-ন্যসহ্যানি জহ্যাং জগন্নাথ দেৱ |
ভৱংতং ৱিনা মে গতির্নৈৱ শংভো
দযালো ন জাগর্তি কিং ৱা দযা তে || ৩১ ||
শিৱাযেতি শব্দো নমঃপূর্ৱ এষ
স্মরন্মুক্তিকৃন্মৃত্যুহা তত্ত্ৱৱাচী |
মহেশান মা গান্মনস্তো ৱচস্তঃ
সদা মহ্যমেতত্প্রদানং প্রযচ্ছ || ৩২ ||
ত্ৱমপ্যংব মাং পশ্য শীতাংশুমৌলি-
-প্রিযে ভেষজং ত্ৱং ভৱৱ্যাধিশাংতৌ |
বহুক্লেশভাজং পদাংভোজপোতে
ভৱাব্ধৌ নিমগ্নং নযস্ৱাদ্য পারম্ || ৩৩ ||
অনুদ্যল্ললাটাক্ষিৱহ্নিপ্ররোহৈ-
-রৱামস্ফুরচ্চারুৱামোরুশোভৈঃ |
অনংগভ্রমদ্ভোগিভূষাৱিশেষৈ-
-রচংদ্রার্ধচূডৈরলং দৈৱতৈর্নঃ || ৩৪ ||
অকংঠেকলংকাদনংগেভুজংগা-
-দপাণৌকপালাদফালেনলাক্ষাত্ |
অমৌলৌশশাংকাদৱামেকলত্রা-
-দহং দেৱমন্যং ন মন্যে ন মন্যে || ৩৫ ||
মহাদেৱ শংভো গিরীশ ত্রিশূলিং-
-স্ত্ৱযীদং সমস্তং ৱিভাতীতি যস্মাত্ |
শিৱাদন্যথা দৈৱতং নাভিজানে
শিৱোঽহং শিৱোঽহং শিৱোঽহং শিৱোঽহম্ || ৩৬ ||
যতোঽজাযতেদং প্রপংচং ৱিচিত্রং
স্থিতিং যাতি যস্মিন্যদেকাংতমংতে |
স কর্মাদিহীনঃ স্ৱযংজ্যোতিরাত্মা
শিৱোঽহং শিৱোঽহং শিৱোঽহং শিৱোঽহম্ || ৩৭ ||
কিরীটে নিশেশো ললাটে হুতাশো
ভুজে ভোগিরাজো গলে কালিমা চ |
তনৌ কামিনী যস্য তত্তুল্যদেৱং
ন জানে ন জানে ন জানে ন জানে || ৩৮ ||
অনেন স্তৱেনাদরাদংবিকেশং
পরাং ভক্তিমাসাদ্য যং যে নমংতি |
মৃতৌ নির্ভযাস্তে জনাস্তং ভজংতে
হৃদংভোজমধ্যে সদাসীনমীশম্ || ৩৯ ||
ভুজংগপ্রিযাকল্প শংভো মযৈৱং
ভুজংগপ্রযাতেন ৱৃত্তেন ক্লুপ্তম্ |
নরঃ স্তোত্রমেতত্পঠিত্ৱোরুভক্ত্যা
সুপুত্রাযুরারোগ্যমৈশ্ৱর্যমেতি || ৪০ ||
ইতি শ্রীমত্পরমহংসপরিৱ্রাজকাচার্যস্য শ্রীগোৱিংদভগৱত্পূজ্যপাদশিষ্যস্য শ্রীমচ্ছংকরভগৱতঃ কৃতৌ শিৱ ভুজংগম্ |