മഹിമ്നഃ പാരം തേ പരമവിദുഷോ യദ്യസദൃശീ
സ്തുതിര്ബ്രഹ്മാദീനാമപി തദവസന്നാസ്ത്വയി ഗിരഃ |
അഥാഽവാച്യഃ സര്വഃ സ്വമതിപരിണാമാവധി ഗൃണന്
മമാപ്യേഷ സ്തോത്രേ ഹര നിരപവാദഃ പരികരഃ || ൧ ||
അതീതഃ പംഥാനം തവ ച മഹിമാ വാങ്മനസയോ-
-രതദ്വ്യാവൃത്ത്യാ യം ചകിതമഭിധത്തേ ശ്രുതിരപി |
സ കസ്യ സ്തോതവ്യഃ കതിവിധഗുണഃ കസ്യ വിഷയഃ
പദേ ത്വര്വാചീനേ പതതി ന മനഃ കസ്യ ന വചഃ || ൨ ||
മധുസ്ഫീതാ വാചഃ പരമമമൃതം നിര്മിതവത-
-സ്തവ ബ്രഹ്മന് കിം വാഗപി സുരഗുരോര്വിസ്മയപദമ് |
മമ ത്വേതാം വാണീം ഗുണകഥനപുണ്യേന ഭവതഃ
പുനാമീത്യര്ഥേഽസ്മിന് പുരമഥന ബുദ്ധിര്വ്യവസിതാ || ൩ ||
തവൈശ്വര്യം യത്തജ്ജഗദുദയരക്ഷാപ്രലയകൃത്
ത്രയീവസ്തുവ്യസ്തം തിസൃഷു ഗുണഭിന്നാസു തനുഷു |
അഭവ്യാനാമസ്മിന് വരദ രമണീയാമരമണീം
വിഹംതും വ്യാക്രോശീം വിദധത ഇഹൈകേ ജഡധിയഃ || ൪ ||
കിമീഹഃ കിം കായഃ സ ഖലു കിമുപായസ്ത്രിഭുവനം
കിമാധാരോ ധാതാ സൃജതി കിമുപാദാന ഇതി ച |
അതര്ക്യൈശ്വര്യേ ത്വയ്യനവസരദുഃസ്ഥോ ഹതധിയഃ
കുതര്കോഽയം കാംശ്ചിന്മുഖരയതി മോഹായ ജഗതഃ || ൫ ||
അജന്മാനോ ലോകാഃ കിമവയവവംതോഽപി ജഗതാ-
-മധിഷ്ഠാതാരം കിം ഭവവിധിരനാദൃത്യ ഭവതി |
അനീശോ വാ കുര്യാദ്ഭുവനജനനേ കഃ പരികരോ
യതോ മംദാസ്ത്വാം പ്രത്യമരവര സംശേരത ഇമേ || ൬ ||
ത്രയീ സാംഖ്യം യോഗഃ പശുപതിമതം വൈഷ്ണവമിതി
പ്രഭിന്നേ പ്രസ്ഥാനേ പരമിദമദഃ പഥ്യമിതി ച |
രുചീനാം വൈചിത്ര്യാദൃജുകുടില നാനാപഥജുഷാം
നൃണാമേകോ ഗമ്യസ്ത്വമസി പയസാമര്ണവ ഇവ || ൭ ||
മഹോക്ഷഃ ഖട്വാംഗം പരശുരജിനം ഭസ്മ ഫണിനഃ
കപാലം ചേതീയത്തവ വരദ തംത്രോപകരണമ് |
സുരാസ്താം താമൃദ്ധിം ദധതി തു ഭവദ്ഭ്രൂപ്രണിഹിതാം
ന ഹി സ്വാത്മാരാമം വിഷയമൃഗതൃഷ്ണാ ഭ്രമയതി || ൮ ||
ധ്രുവം കശ്ചിത് സര്വം സകലമപരസ്ത്വധ്രുവമിദം
പരോ ധ്രൌവ്യാധ്രൌവ്യേ ജഗതി ഗദതി വ്യസ്തവിഷയേ |
സമസ്തേഽപ്യേതസ്മിന് പുരമഥന തൈര്വിസ്മിത ഇവ
സ്തുവംജിഹ്രേമി ത്വാം ന ഖലു നനു ധൃഷ്ടാ മുഖരതാ || ൯ ||
തവൈശ്വര്യം യത്നാദ്യദുപരി വിരിംചിര്ഹരിരധഃ
പരിച്ഛേത്തും യാതാവനലമനലസ്കംധവപുഷഃ |
തതോ ഭക്തിശ്രദ്ധാഭരഗുരുഗൃണദ്ഭ്യാം ഗിരിശ യത്
സ്വയം തസ്ഥേ താഭ്യാം തവ കിമനുവൃത്തിര്ന ഫലതി || ൧൦ ||
അയത്നാദാപാദ്യ ത്രിഭുവനമവൈരവ്യതികരം
ദശാസ്യോ യദ്ബാഹൂനഭൃത രണകംഡൂപരവശാന് |
ശിരഃപദ്മശ്രേണീരചിതചരണാംഭോരുഹബലേഃ
സ്ഥിരായാസ്ത്വദ്ഭക്തേസ്ത്രിപുരഹര വിസ്ഫൂര്ജിതമിദമ് || ൧൧ ||
അമുഷ്യ ത്വത്സേവാസമധിഗതസാരം ഭുജവനം
ബലാത് കൈലാസേഽപി ത്വദധിവസതൌ വിക്രമയതഃ |
അലഭ്യാ പാതാലേഽപ്യലസചലിതാംഗുഷ്ഠശിരസി
പ്രതിഷ്ഠാ ത്വയ്യാസീദ്ധ്രുവമുപചിതോ മുഹ്യതി ഖലഃ || ൧൨ ||
യദൃദ്ധിം സുത്രാമ്ണോ വരദ പരമോച്ചൈരപി സതീ-
-മധശ്ചക്രേ ബാണഃ പരിജനവിധേയത്രിഭുവനഃ |
ന തച്ചിത്രം തസ്മിന് വരിവസിതരി ത്വച്ചരണയോ-
-ര്ന കസ്യാപ്യുന്നത്യൈ ഭവതി ശിരസസ്ത്വയ്യവനതിഃ || ൧൩ ||
അകാംഡബ്രഹ്മാംഡക്ഷയചകിതദേവാസുരകൃപാ-
-വിധേയസ്യാസീദ്യസ്ത്രിനയനവിഷം സംഹൃതവതഃ |
സ കല്മാഷഃ കംഠേ തവ ന കുരുതേ ന ശ്രിയമഹോ
വികാരോഽപി ശ്ലാഘ്യോ ഭുവനഭയഭംഗവ്യസനിനഃ || ൧൪ ||
അസിദ്ധാര്ഥാ നൈവ ക്വചിദപി സദേവാസുരനരേ
നിവര്തംതേ നിത്യം ജഗതി ജയിനോ യസ്യ വിശിഖാഃ |
സ പശ്യന്നീശ ത്വാമിതരസുരസാധാരണമഭൂത്
സ്മരഃ സ്മര്തവ്യാത്മാ ന ഹി വശിഷു പഥ്യഃ പരിഭവഃ || ൧൫ ||
മഹീ പാദാഘാതാദ്വ്രജതി സഹസാ സംശയപദം
പദം വിഷ്ണോര്ഭ്രാമ്യദ്ഭുജപരിഘരുഗ്ണഗ്രഹഗണമ് |
മുഹുര്ദ്യൌര്ദൌസ്ഥ്യം യാത്യനിഭൃതജടാതാഡിതതടാ
ജഗദ്രക്ഷായൈ ത്വം നടസി നനു വാമൈവ വിഭുതാ || ൧൬ ||
വിയദ്വ്യാപീ താരാഗണഗുണിതഫേനോദ്ഗമരുചിഃ
പ്രവാഹോ വാരാം യഃ പൃഷതലഘുദൃഷ്ടഃ ശിരസി തേ |
ജഗദ്ദ്വീപാകാരം ജലധിവലയം തേന കൃതമി-
-ത്യനേനൈവോന്നേയം ധൃതമഹിമ ദിവ്യം തവ വപുഃ || ൧൭ ||
രഥഃ ക്ഷോണീ യംതാ ശതധൃതിരഗേംദ്രോ ധനുരഥോ
രഥാംഗേ ചംദ്രാര്കൌ രഥചരണപാണിഃ ശര ഇതി |
ദിധക്ഷോസ്തേ കോഽയം ത്രിപുരതൃണമാഡംബരവിധി-
-ര്വിധേയൈഃ ക്രീഡംത്യോ ന ഖലു പരതംത്രാഃ പ്രഭുധിയഃ || ൧൮ ||
ഹരിസ്തേ സാഹസ്രം കമലബലിമാധായ പദയോ-
-ര്യദേകോനേ തസ്മിന് നിജമുദഹരന്നേത്രകമലമ് |
ഗതോ ഭക്ത്യുദ്രേകഃ പരിണതിമസൌ ചക്രവപുഷാ
ത്രയാണാം രക്ഷായൈ ത്രിപുരഹര ജാഗര്തി ജഗതാമ് || ൧൯ ||
ക്രതൌ സുപ്തേ ജാഗ്രത്ത്വമസി ഫലയോഗേ ക്രതുമതാം
ക്വ കര്മ പ്രധ്വസ്തം ഫലതി പുരുഷാരാധനമൃതേ |
അതസ്ത്വാം സംപ്രേക്ഷ്യ ക്രതുഷു ഫലദാനപ്രതിഭുവം
ശ്രുതൌ ശ്രദ്ധാം ബദ്ധ്വാ ദൃഢപരികരഃ കര്മസു ജനഃ || ൨൦ ||
ക്രിയാദക്ഷോ ദക്ഷഃ ക്രതുപതിരധീശസ്തനുഭൃതാ-
-മൃഷീണാമാര്ത്വിജ്യം ശരണദ സദസ്യാഃ സുരഗണാഃ |
ക്രതുഭ്രേഷസ്ത്വത്തഃ ക്രതുഫലവിധാനവ്യസനിനോ
ധ്രുവം കര്തുഃ ശ്രദ്ധാവിധുരമഭിചാരായ ഹി മഖാഃ || ൨൧ ||
പ്രജാനാഥം നാഥ പ്രസഭമഭികം സ്വാം ദുഹിതരം
ഗതം രോഹിദ്ഭൂതാം രിരമയിഷുമൃഷ്യസ്യ വപുഷാ |
ധനുഷ്പാണേര്യാതം ദിവമപി സപത്രാകൃതമമും
ത്രസംതം തേഽദ്യാപി ത്യജതി ന മൃഗവ്യാധരഭസഃ || ൨൨ ||
സ്വലാവണ്യാശംസാധൃതധനുഷമഹ്നായ തൃണവത്
പുരഃ പ്ലുഷ്ടം ദൃഷ്ട്വാ പുരമഥന പുഷ്പായുധമപി |
യദി സ്ത്രൈണം ദേവീ യമനിരത ദേഹാര്ധഘടനാ-
-ദവൈതി ത്വാമദ്ധാ ബത വരദ മുഗ്ധാ യുവതയഃ || ൨൩ ||
ശ്മശാനേഷ്വാക്രീഡാ സ്മരഹര പിശാചാഃ സഹചരാ-
-ശ്ചിതാഭസ്മാലേപഃ സ്രഗപി നൃകരോടീപരികരഃ |
അമംഗള്യം ശീലം തവ ഭവതു നാമൈവമഖിലം
തഥാപി സ്മര്തൄണാം വരദ പരമം മംഗളമസി || ൨൪ ||
മനഃ പ്രത്യക്ചിത്തേ സവിധമവധായാത്തമരുതഃ
പ്രഹൃഷ്യദ്രോമാണഃ പ്രമദസലിലോത്സംഗിതദൃശഃ |
യദാലോക്യാഹ്ലാദം ഹ്രദ ഇവ നിമജ്യാമൃതമയേ
ദധത്യംതസ്തത്ത്വം കിമപി യമിനസ്തത് കില ഭവാന് || ൨൫ ||
ത്വമര്കസ്ത്വം സോമസ്ത്വമസി പവനസ്ത്വം ഹുതവഹ-
-സ്ത്വമാപസ്ത്വം വ്യോമ ത്വമു ധരണിരാത്മാ ത്വമിതി ച |
പരിച്ഛിന്നാമേവം ത്വയി പരിണതാ ബിഭ്രതി ഗിരം
ന വിദ്മസ്തത്തത്ത്വം വയമിഹ തു യത്ത്വം ന ഭവസി || ൨൬ ||
ത്രയീം തിസ്രോ വൃത്തീസ്ത്രിഭുവനമഥോ ത്രീനപി സുരാ-
-നകാരാദ്യൈര്വര്ണൈസ്ത്രിഭിരഭിദധത് തീര്ണവികൃതി |
തുരീയം തേ ധാമ ധ്വനിഭിരവരുംധാനമണുഭിഃ
സമസ്തം വ്യസ്തം ത്വാം ശരണദ ഗൃണാത്യോമിതി പദമ് || ൨൭ ||
ഭവഃ ശര്വോ രുദ്രഃ പശുപതിരഥോഗ്രഃ സഹമഹാം-
-സ്തഥാ ഭീമേശാനാവിതി യദഭിധാനാഷ്ടകമിദമ് |
അമുഷ്മിന് പ്രത്യേകം പ്രവിചരതി ദേവ ശ്രുതിരപി
പ്രിയായാസ്മൈ ധാമ്നേ പ്രവിഹിതനമസ്യോഽസ്മി ഭവതേ || ൨൮ ||
നമോ നേദിഷ്ഠായ പ്രിയദവ ദവിഷ്ഠായ ച നമോ
നമഃ ക്ഷോദിഷ്ഠായ സ്മരഹര മഹിഷ്ഠായ ച നമഃ |
നമോ വര്ഷിഷ്ഠായ ത്രിനയന യവിഷ്ഠായ ച നമോ
നമഃ സര്വസ്മൈ തേ തദിദമിതി ശര്വായ ച നമഃ || ൨൯ ||
ബഹുലരജസേ വിശ്വോത്പത്തൌ ഭവായ നമോ നമഃ
പ്രബലതമസേ തത്സംഹാരേ ഹരായ നമോ നമഃ |
ജനസുഖകൃതേ സത്ത്വോദ്രിക്തൌ മൃഡായ നമോ നമഃ
പ്രമഹസി പദേ നിസ്ത്രൈഗുണ്യേ ശിവായ നമോ നമഃ || ൩൦ ||
കൃശപരിണതി ചേതഃ ക്ലേശവശ്യം ക്വ ചേദം
ക്വ ച തവ ഗുണസീമോല്ലംഘിനീ ശശ്വദൃദ്ധിഃ |
ഇതി ചകിതമമംദീകൃത്യ മാം ഭക്തിരാധാ-
-ദ്വരദ ചരണയോസ്തേ വാക്യപുഷ്പോപഹാരമ് || ൩൧ ||
അസിതഗിരിസമം സ്യാത്കജ്ജലം സിംധുപാത്രേ
സുരതരുവരശാഖാ ലേഖനീ പത്രമുര്വീ |
ലിഖതി യദി ഗൃഹീത്വാ ശാരദാ സര്വകാലം
തദപി തവ ഗുണാനാമീശ പാരം ന യാതി || ൩൨ ||
അസുരസുരമുനീംദ്രൈരര്ചിതസ്യേംദുമൌളേ-
-ര്ഗ്രഥിതഗുണമഹിമ്നോ നിര്ഗുണസ്യേശ്വരസ്യ |
സകലഗണവരിഷ്ഠഃ പുഷ്പദംതാഭിധാനഃ
രുചിരമലഘുവൃത്തൈഃ സ്തോത്രമേതച്ചകാര || ൩൩ ||
അഹരഹരനവദ്യം ധൂര്ജടേഃ സ്തോത്രമേതത്
പഠതി പരമഭക്ത്യാ ശുദ്ധചിത്തഃ പുമാന് യഃ |
സ ഭവതി ശിവലോകേ രുദ്രതുല്യസ്തഥാത്ര
പ്രചുരതരധനായുഃ പുത്രവാന് കീര്തിമാംശ്ച || ൩൪ ||
മഹേശാന്നാപരോ ദേവോ മഹിമ്നോ നാപരാ സ്തുതിഃ |
അഘോരാന്നാപരോ മംത്രോ നാസ്തി തത്ത്വം ഗുരോഃ പരമ് || ൩൫ ||
ദീക്ഷാ ദാനം തപസ്തീര്ഥം ജ്ഞാനം യാഗാദികാഃ ക്രിയാഃ |
മഹിമ്നഃ സ്തവ പാഠസ്യ കലാം നാര്ഹംതി ഷോഡശീമ് || ൩൬ ||
കുസുമദശനനാമാ സര്വഗംധര്വരാജഃ
ശിശുശശിധരമൌലേര്ദേവദേവസ്യ ദാസഃ |
സ ഖലു നിജമഹിമ്നോ ഭ്രഷ്ട ഏവാസ്യ രോഷാത്
സ്തവനമിദമകാര്ഷീദ്ദിവ്യദിവ്യം മഹിമ്നഃ || ൩൭ ||
സുരവരമുനിപൂജ്യം സ്വര്ഗമോക്ഷൈകഹേതും
പഠതി യദി മനുഷ്യഃ പ്രാംജലിര്നാന്യചേതാഃ |
വ്രജതി ശിവസമീപം കിന്നരൈഃ സ്തൂയമാനഃ
സ്തവനമിദമമോഘം പുഷ്പദംതപ്രണീതമ് || ൩൮ ||
ആസമാപ്തമിദം സ്തോത്രം പുണ്യം ഗംധര്വഭാഷിതമ് |
അനൌപമ്യം മനോഹാരി ശിവമീശ്വരവര്ണനമ് || ൩൯ ||
ഇത്യേഷാ വാങ്മയീ പൂജാ ശ്രീമച്ഛംകരപാദയോഃ |
അര്പിതാ തേന ദേവേശഃ പ്രീയതാം മേ സദാശിവഃ || ൪൦ ||
തവ തത്ത്വം ന ജാനാമി കീദൃശോഽസി മഹേശ്വര |
യാദൃശോഽസി മഹാദേവ താദൃശായ നമോ നമഃ || ൪൧ ||
ഏകകാലം ദ്വികാലം വാ ത്രികാലം യഃ പഠേന്നരഃ |
സര്വപാപവിനിര്മുക്തഃ ശിവലോകേ മഹീയതേ || ൪൨ ||
ശ്രീപുഷ്പദംതമുഖപംകജനിര്ഗതേന
സ്തോത്രേണ കില്ബിഷഹരേണ ഹരപ്രിയേണ |
കംഠസ്ഥിതേന പഠിതേന സമാഹിതേന
സുപ്രീണിതോ ഭവതി ഭൂതപതിര്മഹേശഃ || ൪൩ ||
ഇതി ശ്രീപുഷ്പദംത വിരചിതം ശ്രീ ശിവ മഹിമ്നഃ സ്തോത്രമ് |