মহিম্নঃ পারং তে পরমৱিদুষো যদ্যসদৃশী
স্তুতির্ব্রহ্মাদীনামপি তদৱসন্নাস্ত্ৱযি গিরঃ |
অথাঽৱাচ্যঃ সর্ৱঃ স্ৱমতিপরিণামাৱধি গৃণন্
মমাপ্যেষ স্তোত্রে হর নিরপৱাদঃ পরিকরঃ || ১ ||
অতীতঃ পংথানং তৱ চ মহিমা ৱাঙ্মনসযো-
-রতদ্ৱ্যাৱৃত্ত্যা যং চকিতমভিধত্তে শ্রুতিরপি |
স কস্য স্তোতৱ্যঃ কতিৱিধগুণঃ কস্য ৱিষযঃ
পদে ত্ৱর্ৱাচীনে পততি ন মনঃ কস্য ন ৱচঃ || ২ ||
মধুস্ফীতা ৱাচঃ পরমমমৃতং নির্মিতৱত-
-স্তৱ ব্রহ্মন্ কিং ৱাগপি সুরগুরোর্ৱিস্মযপদম্ |
মম ত্ৱেতাং ৱাণীং গুণকথনপুণ্যেন ভৱতঃ
পুনামীত্যর্থেঽস্মিন্ পুরমথন বুদ্ধির্ৱ্যৱসিতা || ৩ ||
তৱৈশ্ৱর্যং যত্তজ্জগদুদযরক্ষাপ্রলযকৃত্
ত্রযীৱস্তুৱ্যস্তং তিসৃষু গুণভিন্নাসু তনুষু |
অভৱ্যানামস্মিন্ ৱরদ রমণীযামরমণীং
ৱিহংতুং ৱ্যাক্রোশীং ৱিদধত ইহৈকে জডধিযঃ || ৪ ||
কিমীহঃ কিং কাযঃ স খলু কিমুপাযস্ত্রিভুৱনং
কিমাধারো ধাতা সৃজতি কিমুপাদান ইতি চ |
অতর্ক্যৈশ্ৱর্যে ত্ৱয্যনৱসরদুঃস্থো হতধিযঃ
কুতর্কোঽযং কাংশ্চিন্মুখরযতি মোহায জগতঃ || ৫ ||
অজন্মানো লোকাঃ কিমৱযৱৱংতোঽপি জগতা-
-মধিষ্ঠাতারং কিং ভৱৱিধিরনাদৃত্য ভৱতি |
অনীশো ৱা কুর্যাদ্ভুৱনজননে কঃ পরিকরো
যতো মংদাস্ত্ৱাং প্রত্যমরৱর সংশেরত ইমে || ৬ ||
ত্রযী সাংখ্যং যোগঃ পশুপতিমতং ৱৈষ্ণৱমিতি
প্রভিন্নে প্রস্থানে পরমিদমদঃ পথ্যমিতি চ |
রুচীনাং ৱৈচিত্র্যাদৃজুকুটিল নানাপথজুষাং
নৃণামেকো গম্যস্ত্ৱমসি পযসামর্ণৱ ইৱ || ৭ ||
মহোক্ষঃ খট্ৱাংগং পরশুরজিনং ভস্ম ফণিনঃ
কপালং চেতীযত্তৱ ৱরদ তংত্রোপকরণম্ |
সুরাস্তাং তামৃদ্ধিং দধতি তু ভৱদ্ভ্রূপ্রণিহিতাং
ন হি স্ৱাত্মারামং ৱিষযমৃগতৃষ্ণা ভ্রমযতি || ৮ ||
ধ্রুৱং কশ্চিত্ সর্ৱং সকলমপরস্ত্ৱধ্রুৱমিদং
পরো ধ্রৌৱ্যাধ্রৌৱ্যে জগতি গদতি ৱ্যস্তৱিষযে |
সমস্তেঽপ্যেতস্মিন্ পুরমথন তৈর্ৱিস্মিত ইৱ
স্তুৱংজিহ্রেমি ত্ৱাং ন খলু ননু ধৃষ্টা মুখরতা || ৯ ||
তৱৈশ্ৱর্যং যত্নাদ্যদুপরি ৱিরিংচির্হরিরধঃ
পরিচ্ছেত্তুং যাতাৱনলমনলস্কংধৱপুষঃ |
ততো ভক্তিশ্রদ্ধাভরগুরুগৃণদ্ভ্যাং গিরিশ যত্
স্ৱযং তস্থে তাভ্যাং তৱ কিমনুৱৃত্তির্ন ফলতি || ১০ ||
অযত্নাদাপাদ্য ত্রিভুৱনমৱৈরৱ্যতিকরং
দশাস্যো যদ্বাহূনভৃত রণকংডূপরৱশান্ |
শিরঃপদ্মশ্রেণীরচিতচরণাংভোরুহবলেঃ
স্থিরাযাস্ত্ৱদ্ভক্তেস্ত্রিপুরহর ৱিস্ফূর্জিতমিদম্ || ১১ ||
অমুষ্য ত্ৱত্সেৱাসমধিগতসারং ভুজৱনং
বলাত্ কৈলাসেঽপি ত্ৱদধিৱসতৌ ৱিক্রমযতঃ |
অলভ্যা পাতালেঽপ্যলসচলিতাংগুষ্ঠশিরসি
প্রতিষ্ঠা ত্ৱয্যাসীদ্ধ্রুৱমুপচিতো মুহ্যতি খলঃ || ১২ ||
যদৃদ্ধিং সুত্রাম্ণো ৱরদ পরমোচ্চৈরপি সতী-
-মধশ্চক্রে বাণঃ পরিজনৱিধেযত্রিভুৱনঃ |
ন তচ্চিত্রং তস্মিন্ ৱরিৱসিতরি ত্ৱচ্চরণযো-
-র্ন কস্যাপ্যুন্নত্যৈ ভৱতি শিরসস্ত্ৱয্যৱনতিঃ || ১৩ ||
অকাংডব্রহ্মাংডক্ষযচকিতদেৱাসুরকৃপা-
-ৱিধেযস্যাসীদ্যস্ত্রিনযনৱিষং সংহৃতৱতঃ |
স কল্মাষঃ কংঠে তৱ ন কুরুতে ন শ্রিযমহো
ৱিকারোঽপি শ্লাঘ্যো ভুৱনভযভংগৱ্যসনিনঃ || ১৪ ||
অসিদ্ধার্থা নৈৱ ক্ৱচিদপি সদেৱাসুরনরে
নিৱর্তংতে নিত্যং জগতি জযিনো যস্য ৱিশিখাঃ |
স পশ্যন্নীশ ত্ৱামিতরসুরসাধারণমভূত্
স্মরঃ স্মর্তৱ্যাত্মা ন হি ৱশিষু পথ্যঃ পরিভৱঃ || ১৫ ||
মহী পাদাঘাতাদ্ৱ্রজতি সহসা সংশযপদং
পদং ৱিষ্ণোর্ভ্রাম্যদ্ভুজপরিঘরুগ্ণগ্রহগণম্ |
মুহুর্দ্যৌর্দৌস্থ্যং যাত্যনিভৃতজটাতাডিততটা
জগদ্রক্ষাযৈ ত্ৱং নটসি ননু ৱামৈৱ ৱিভুতা || ১৬ ||
ৱিযদ্ৱ্যাপী তারাগণগুণিতফেনোদ্গমরুচিঃ
প্রৱাহো ৱারাং যঃ পৃষতলঘুদৃষ্টঃ শিরসি তে |
জগদ্দ্ৱীপাকারং জলধিৱলযং তেন কৃতমি-
-ত্যনেনৈৱোন্নেযং ধৃতমহিম দিৱ্যং তৱ ৱপুঃ || ১৭ ||
রথঃ ক্ষোণী যংতা শতধৃতিরগেংদ্রো ধনুরথো
রথাংগে চংদ্রার্কৌ রথচরণপাণিঃ শর ইতি |
দিধক্ষোস্তে কোঽযং ত্রিপুরতৃণমাডংবরৱিধি-
-র্ৱিধেযৈঃ ক্রীডংত্যো ন খলু পরতংত্রাঃ প্রভুধিযঃ || ১৮ ||
হরিস্তে সাহস্রং কমলবলিমাধায পদযো-
-র্যদেকোনে তস্মিন্ নিজমুদহরন্নেত্রকমলম্ |
গতো ভক্ত্যুদ্রেকঃ পরিণতিমসৌ চক্রৱপুষা
ত্রযাণাং রক্ষাযৈ ত্রিপুরহর জাগর্তি জগতাম্ || ১৯ ||
ক্রতৌ সুপ্তে জাগ্রত্ত্ৱমসি ফলযোগে ক্রতুমতাং
ক্ৱ কর্ম প্রধ্ৱস্তং ফলতি পুরুষারাধনমৃতে |
অতস্ত্ৱাং সংপ্রেক্ষ্য ক্রতুষু ফলদানপ্রতিভুৱং
শ্রুতৌ শ্রদ্ধাং বদ্ধ্ৱা দৃঢপরিকরঃ কর্মসু জনঃ || ২০ ||
ক্রিযাদক্ষো দক্ষঃ ক্রতুপতিরধীশস্তনুভৃতা-
-মৃষীণামার্ত্ৱিজ্যং শরণদ সদস্যাঃ সুরগণাঃ |
ক্রতুভ্রেষস্ত্ৱত্তঃ ক্রতুফলৱিধানৱ্যসনিনো
ধ্রুৱং কর্তুঃ শ্রদ্ধাৱিধুরমভিচারায হি মখাঃ || ২১ ||
প্রজানাথং নাথ প্রসভমভিকং স্ৱাং দুহিতরং
গতং রোহিদ্ভূতাং রিরমযিষুমৃষ্যস্য ৱপুষা |
ধনুষ্পাণের্যাতং দিৱমপি সপত্রাকৃতমমুং
ত্রসংতং তেঽদ্যাপি ত্যজতি ন মৃগৱ্যাধরভসঃ || ২২ ||
স্ৱলাৱণ্যাশংসাধৃতধনুষমহ্নায তৃণৱত্
পুরঃ প্লুষ্টং দৃষ্ট্ৱা পুরমথন পুষ্পাযুধমপি |
যদি স্ত্রৈণং দেৱী যমনিরত দেহার্ধঘটনা-
-দৱৈতি ত্ৱামদ্ধা বত ৱরদ মুগ্ধা যুৱতযঃ || ২৩ ||
শ্মশানেষ্ৱাক্রীডা স্মরহর পিশাচাঃ সহচরা-
-শ্চিতাভস্মালেপঃ স্রগপি নৃকরোটীপরিকরঃ |
অমংগল্যং শীলং তৱ ভৱতু নামৈৱমখিলং
তথাপি স্মর্তৄণাং ৱরদ পরমং মংগলমসি || ২৪ ||
মনঃ প্রত্যক্চিত্তে সৱিধমৱধাযাত্তমরুতঃ
প্রহৃষ্যদ্রোমাণঃ প্রমদসলিলোত্সংগিতদৃশঃ |
যদালোক্যাহ্লাদং হ্রদ ইৱ নিমজ্যামৃতমযে
দধত্যংতস্তত্ত্ৱং কিমপি যমিনস্তত্ কিল ভৱান্ || ২৫ ||
ত্ৱমর্কস্ত্ৱং সোমস্ত্ৱমসি পৱনস্ত্ৱং হুতৱহ-
-স্ত্ৱমাপস্ত্ৱং ৱ্যোম ত্ৱমু ধরণিরাত্মা ত্ৱমিতি চ |
পরিচ্ছিন্নামেৱং ত্ৱযি পরিণতা বিভ্রতি গিরং
ন ৱিদ্মস্তত্তত্ত্ৱং ৱযমিহ তু যত্ত্ৱং ন ভৱসি || ২৬ ||
ত্রযীং তিস্রো ৱৃত্তীস্ত্রিভুৱনমথো ত্রীনপি সুরা-
-নকারাদ্যৈর্ৱর্ণৈস্ত্রিভিরভিদধত্ তীর্ণৱিকৃতি |
তুরীযং তে ধাম ধ্ৱনিভিরৱরুংধানমণুভিঃ
সমস্তং ৱ্যস্তং ত্ৱাং শরণদ গৃণাত্যোমিতি পদম্ || ২৭ ||
ভৱঃ শর্ৱো রুদ্রঃ পশুপতিরথোগ্রঃ সহমহাং-
-স্তথা ভীমেশানাৱিতি যদভিধানাষ্টকমিদম্ |
অমুষ্মিন্ প্রত্যেকং প্রৱিচরতি দেৱ শ্রুতিরপি
প্রিযাযাস্মৈ ধাম্নে প্রৱিহিতনমস্যোঽস্মি ভৱতে || ২৮ ||
নমো নেদিষ্ঠায প্রিযদৱ দৱিষ্ঠায চ নমো
নমঃ ক্ষোদিষ্ঠায স্মরহর মহিষ্ঠায চ নমঃ |
নমো ৱর্ষিষ্ঠায ত্রিনযন যৱিষ্ঠায চ নমো
নমঃ সর্ৱস্মৈ তে তদিদমিতি শর্ৱায চ নমঃ || ২৯ ||
বহুলরজসে ৱিশ্ৱোত্পত্তৌ ভৱায নমো নমঃ
প্রবলতমসে তত্সংহারে হরায নমো নমঃ |
জনসুখকৃতে সত্ত্ৱোদ্রিক্তৌ মৃডায নমো নমঃ
প্রমহসি পদে নিস্ত্রৈগুণ্যে শিৱায নমো নমঃ || ৩০ ||
কৃশপরিণতি চেতঃ ক্লেশৱশ্যং ক্ৱ চেদং
ক্ৱ চ তৱ গুণসীমোল্লংঘিনী শশ্ৱদৃদ্ধিঃ |
ইতি চকিতমমংদীকৃত্য মাং ভক্তিরাধা-
-দ্ৱরদ চরণযোস্তে ৱাক্যপুষ্পোপহারম্ || ৩১ ||
অসিতগিরিসমং স্যাত্কজ্জলং সিংধুপাত্রে
সুরতরুৱরশাখা লেখনী পত্রমুর্ৱী |
লিখতি যদি গৃহীত্ৱা শারদা সর্ৱকালং
তদপি তৱ গুণানামীশ পারং ন যাতি || ৩২ ||
অসুরসুরমুনীংদ্রৈরর্চিতস্যেংদুমৌলে-
-র্গ্রথিতগুণমহিম্নো নির্গুণস্যেশ্ৱরস্য |
সকলগণৱরিষ্ঠঃ পুষ্পদংতাভিধানঃ
রুচিরমলঘুৱৃত্তৈঃ স্তোত্রমেতচ্চকার || ৩৩ ||
অহরহরনৱদ্যং ধূর্জটেঃ স্তোত্রমেতত্
পঠতি পরমভক্ত্যা শুদ্ধচিত্তঃ পুমান্ যঃ |
স ভৱতি শিৱলোকে রুদ্রতুল্যস্তথাত্র
প্রচুরতরধনাযুঃ পুত্রৱান্ কীর্তিমাংশ্চ || ৩৪ ||
মহেশান্নাপরো দেৱো মহিম্নো নাপরা স্তুতিঃ |
অঘোরান্নাপরো মংত্রো নাস্তি তত্ত্ৱং গুরোঃ পরম্ || ৩৫ ||
দীক্ষা দানং তপস্তীর্থং জ্ঞানং যাগাদিকাঃ ক্রিযাঃ |
মহিম্নঃ স্তৱ পাঠস্য কলাং নার্হংতি ষোডশীম্ || ৩৬ ||
কুসুমদশননামা সর্ৱগংধর্ৱরাজঃ
শিশুশশিধরমৌলের্দেৱদেৱস্য দাসঃ |
স খলু নিজমহিম্নো ভ্রষ্ট এৱাস্য রোষাত্
স্তৱনমিদমকার্ষীদ্দিৱ্যদিৱ্যং মহিম্নঃ || ৩৭ ||
সুরৱরমুনিপূজ্যং স্ৱর্গমোক্ষৈকহেতুং
পঠতি যদি মনুষ্যঃ প্রাংজলির্নান্যচেতাঃ |
ৱ্রজতি শিৱসমীপং কিন্নরৈঃ স্তূযমানঃ
স্তৱনমিদমমোঘং পুষ্পদংতপ্রণীতম্ || ৩৮ ||
আসমাপ্তমিদং স্তোত্রং পুণ্যং গংধর্ৱভাষিতম্ |
অনৌপম্যং মনোহারি শিৱমীশ্ৱরৱর্ণনম্ || ৩৯ ||
ইত্যেষা ৱাঙ্মযী পূজা শ্রীমচ্ছংকরপাদযোঃ |
অর্পিতা তেন দেৱেশঃ প্রীযতাং মে সদাশিৱঃ || ৪০ ||
তৱ তত্ত্ৱং ন জানামি কীদৃশোঽসি মহেশ্ৱর |
যাদৃশোঽসি মহাদেৱ তাদৃশায নমো নমঃ || ৪১ ||
এককালং দ্ৱিকালং ৱা ত্রিকালং যঃ পঠেন্নরঃ |
সর্ৱপাপৱিনির্মুক্তঃ শিৱলোকে মহীযতে || ৪২ ||
শ্রীপুষ্পদংতমুখপংকজনির্গতেন
স্তোত্রেণ কিল্বিষহরেণ হরপ্রিযেণ |
কংঠস্থিতেন পঠিতেন সমাহিতেন
সুপ্রীণিতো ভৱতি ভূতপতির্মহেশঃ || ৪৩ ||
ইতি শ্রীপুষ্পদংত ৱিরচিতং শ্রী শিৱ মহিম্নঃ স্তোত্রম্ |