നമോഽസ്തുതേ ഭൈരവ ഭീമമൂര്തേ ത്രൈലോക്യ ഗോപ്ത്രേശിതശൂലപാണേ |
കപാലപാണേ ഭുജഗേശഹാര ത്രിനേത്ര മാം പാഹി വിപന്ന ബുദ്ധിമ് || ൧ ||
ജയസ്വ സര്വേശ്വര വിശ്വമൂര്തേ സുരാസുരൈര്വംദിതപാദപീഠ |
ത്രൈലോക്യ മാതര്ഗുരവേ വൃഷാംക ഭീതശ്ശരണ്യം ശരണാ ഗതോസ്മി || ൨ ||
ത്വം നാഥ ദേവാശ്ശിവമീരയംതി സിദ്ധാ ഹരം സ്ഥാണുമമര്ഷിതാശ്ച |
ഭീമം ച യക്ഷാ മനുജാ മഹേശ്വരം ഭൂതാനി ഭൂതാധിപ മുച്ചരംതി || ൩ ||
നിശാചരാസ്തൂഗ്രമുപാചരംതി ഭവേതി പുണ്യാഃ പിതരോ നമസ്തേ |
ദാസോഽസ്മി തുഭ്യം ഹര പാഹി മഹ്യം പാപക്ഷയം മേ കുരു ലോകനാഥ || ൪ ||
ഭവാം-സ്ത്രിദേവ-സ്ത്രിയുഗ-സ്ത്രിധര്മാ ത്രിപുഷ്കരശ്ചാസി വിഭോ ത്രിനേത്ര |
ത്രയാരുണിസ്ത്വം ശ്രുതിരവ്യയാത്മാ പുനീഹി മാം ത്വാം ശരണം ഗതോഽസ്മി || ൫ ||
ത്രിണാചികേത-സ്ത്രിപദപ്രതിഷ്ഠ-ഷ്ഷഡംഗവിത് സ്ത്രീവിഷയേഷ്വലുബ്ധഃ |
ത്രൈലോക്യനാഥോസി പുനീഹി ശംഭോ ദാസോഽസ്മി ഭീതശ്ശരണാഗതസ്തേ || ൬ ||
കൃതോ മഹാശംകര തേഽപരാധോ മയാ മഹാഭൂതപതേ ഗിരീശ |
കാമാരിണാ നിര്ജിതമാനസേന പ്രസാദയേ ത്വാം ശിരസാ നതോഽസ്മി || ൭ ||
പാപോഽഹം പാപകര്മാഽഹം പാപാത്മാ പാപസംഭവഃ |
ത്രാഹി മാം ദേവദേവേശ സര്വപാപഹരോ ഭവ || ൮ ||
മമ ദൈവാപരാധോസ്തി ത്വയാ വൈ താദൃശോപ്യഹമ് |
സ്പൃഷ്ടഃ പാപസമാചാരോ മാം പ്രസന്നോ ഭവേശ്വര || ൯ ||
ത്വം കര്താ ചൈവ ധാതാ ച ജയത്വം ച മഹാജയ |
ത്വം മംഗല്യസ്ത്വമോംകാര-സ്ത്വമോംകാരോ വ്യയോ ധൃതഃ || ൧൦ ||
ത്വം ബ്രഹ്മസൃഷ്ടികൃന്നാഥസ്ത്വം വിഷ്ണുസ്ത്വം മഹേശ്വരഃ |
ത്വമിംദ്രസ്ത്വം വഷട്കാരോ ധര്മസ്ത്വം തു ഹിതോത്തമഃ || ൧൧ ||
സൂക്ഷ്മസ്ത്വം വ്യക്തരൂപസ്ത്വം ത്വമവ്യക്തശ്ചധീവരഃ |
ത്വയാ സര്വമിദം വ്യാപ്തം ജഗത് സ്ഥാവരജംഗമമ് || ൧൨ ||
ത്വമാദിരംതോ മധ്യം ച ത്വമേവ ച സഹസ്രപാത് |
വിജയസ്ത്വം സഹസ്രാക്ഷോ ചിത്തപാഖ്യോ മഹാഭുജഃ || ൧൩ ||
അനംതസ്സര്വഗോ വ്യാപീ ഹംസഃ പുണ്യാധികോച്യുതഃ |
ഗീര്വാണപതിരവ്യഗ്രോ രുദ്രഃ പശുപതിശ്ശിവഃ || ൧൪ ||
ത്രൈവിദ്യസ്ത്വം ജിതക്രോധോ ജിതാരാതിര്ജിതേംദ്രിയഃ |
ജയശ്ച ശൂലപാണി സ്ത്വം പാഹി മാം ശരണാഗതമ് || ൧൫ ||
ഇതി ശ്രീവാമനപുരാണാന്തര്ഗത അംധക കൃത ശിവ സ്തുതിഃ |