નમોઽસ્તુતે ભૈરવ ભીમમૂર્તે ત્રૈલોક્ય ગોપ્ત્રેશિતશૂલપાણે |
કપાલપાણે ભુજગેશહાર ત્રિનેત્ર માં પાહિ વિપન્ન બુદ્ધિમ્ || ૧ ||
જયસ્વ સર્વેશ્વર વિશ્વમૂર્તે સુરાસુરૈર્વંદિતપાદપીઠ |
ત્રૈલોક્ય માતર્ગુરવે વૃષાંક ભીતશ્શરણ્યં શરણા ગતોસ્મિ || ૨ ||
ત્વં નાથ દેવાશ્શિવમીરયંતિ સિદ્ધા હરં સ્થાણુમમર્ષિતાશ્ચ |
ભીમં ચ યક્ષા મનુજા મહેશ્વરં ભૂતાનિ ભૂતાધિપ મુચ્ચરંતિ || ૩ ||
નિશાચરાસ્તૂગ્રમુપાચરંતિ ભવેતિ પુણ્યાઃ પિતરો નમસ્તે |
દાસોઽસ્મિ તુભ્યં હર પાહિ મહ્યં પાપક્ષયં મે કુરુ લોકનાથ || ૪ ||
ભવાં-સ્ત્રિદેવ-સ્ત્રિયુગ-સ્ત્રિધર્મા ત્રિપુષ્કરશ્ચાસિ વિભો ત્રિનેત્ર |
ત્રયારુણિસ્ત્વં શ્રુતિરવ્યયાત્મા પુનીહિ માં ત્વાં શરણં ગતોઽસ્મિ || ૫ ||
ત્રિણાચિકેત-સ્ત્રિપદપ્રતિષ્ઠ-ષ્ષડંગવિત્ સ્ત્રીવિષયેષ્વલુબ્ધઃ |
ત્રૈલોક્યનાથોસિ પુનીહિ શંભો દાસોઽસ્મિ ભીતશ્શરણાગતસ્તે || ૬ ||
કૃતો મહાશંકર તેઽપરાધો મયા મહાભૂતપતે ગિરીશ |
કામારિણા નિર્જિતમાનસેન પ્રસાદયે ત્વાં શિરસા નતોઽસ્મિ || ૭ ||
પાપોઽહં પાપકર્માઽહં પાપાત્મા પાપસંભવઃ |
ત્રાહિ માં દેવદેવેશ સર્વપાપહરો ભવ || ૮ ||
મમ દૈવાપરાધોસ્તિ ત્વયા વૈ તાદૃશોપ્યહમ્ |
સ્પૃષ્ટઃ પાપસમાચારો માં પ્રસન્નો ભવેશ્વર || ૯ ||
ત્વં કર્તા ચૈવ ધાતા ચ જયત્વં ચ મહાજય |
ત્વં મંગલ્યસ્ત્વમોંકાર-સ્ત્વમોંકારો વ્યયો ધૃતઃ || ૧૦ ||
ત્વં બ્રહ્મસૃષ્ટિકૃન્નાથસ્ત્વં વિષ્ણુસ્ત્વં મહેશ્વરઃ |
ત્વમિંદ્રસ્ત્વં વષટ્કારો ધર્મસ્ત્વં તુ હિતોત્તમઃ || ૧૧ ||
સૂક્ષ્મસ્ત્વં વ્યક્તરૂપસ્ત્વં ત્વમવ્યક્તશ્ચધીવરઃ |
ત્વયા સર્વમિદં વ્યાપ્તં જગત્ સ્થાવરજંગમમ્ || ૧૨ ||
ત્વમાદિરંતો મધ્યં ચ ત્વમેવ ચ સહસ્રપાત્ |
વિજયસ્ત્વં સહસ્રાક્ષો ચિત્તપાખ્યો મહાભુજઃ || ૧૩ ||
અનંતસ્સર્વગો વ્યાપી હંસઃ પુણ્યાધિકોચ્યુતઃ |
ગીર્વાણપતિરવ્યગ્રો રુદ્રઃ પશુપતિશ્શિવઃ || ૧૪ ||
ત્રૈવિદ્યસ્ત્વં જિતક્રોધો જિતારાતિર્જિતેંદ્રિયઃ |
જયશ્ચ શૂલપાણિ સ્ત્વં પાહિ માં શરણાગતમ્ || ૧૫ ||
ઇતિ શ્રીવામનપુરાણાન્તર્ગત અંધક કૃત શિવ સ્તુતિઃ |