କୁଲଶେଖରପାଂଡ୍ଯ ଉଵାଚ –
ମହାନୀପାରଣ୍ଯାଂତର କନକପଦ୍ମାକରତଟୀ
ମହେଂଦ୍ରାନୀତାଷ୍ଟଦ୍ଵିପଧୃତଵିମାନାଂତରଗତମ୍ |
ମହାଲୀଲାଭୂତପ୍ରକଟିତଵିଶିଷ୍ଟାତ୍ମଵିଭଵଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧ ||
ନମନ୍ନାଳୀକାକ୍ଷାଂବୁଜ ଭଵସୁନାଶୀର ମକୁଟୀ
ଵମନ୍ମାଣିକ୍ଯାଂଶୁସ୍ଫୁରଦରୁଣପାଦାବ୍ଜଯୁଗଳମ୍ |
ଅମଂଦାନଂଦାବ୍ଧିଂ ହରିନଯନପଦ୍ମାର୍ଚିତପଦଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୨ ||
ମହାମାତଂଗାସୃଗ୍ଵରଵସନମଦୀଂଦ୍ରତନଯା
ମହାଭାଗ୍ଯଂ ମତ୍ତାଂଧକକରଟିକଂଠୀରଵଵରମ୍ |
ମହାଭୋଗୀଂଦ୍ରୋଦ୍ଯତ୍ଫଣଗଣିଗଣାଲଂକୃତତନୁଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୩ ||
ସମୀରାହାରେଂଦ୍ରାଂଗଦମଖିଲଲୋକୈକଜନନଂ
ସମୀରାହାରାତ୍ମା ପ୍ରଣତଜନହୃତ୍ପଦ୍ମନିଲଯମ୍ |
ସୁମୀନାକ୍ଷୀ ଵକ୍ତ୍ରାଂବୁଜ ତରୁଣସୂରଂ ସୁମନସଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୪ ||
ନତାଘୌଘାରଣ୍ଯାନଲମନିଲଭୁଙ୍ନାଥଵଲଯଂ
ସୁଧାଂଶୋରର୍ଧାଂଶଂ ଶିରସି ଦଧତଂ ଜହ୍ନୁତନଯାମ୍ |
ଵଦାନ୍ଯାନାମାଦ୍ଯଂ ଵରଵିବୁଧଵଂଦ୍ଯଂ ଵରଗୁଣଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୫ ||
ମହାଦୁଗ୍ଧାଂବୋଧୌମଥନଜଵସଂଭୂତମସିତଂ
ମହାକାଳଂ କଂଠେ ସକଲଭଯଭଂଗାଯ ଦଧତମ୍ |
ମହାକାରୁଣ୍ଯାବ୍ଧିଂ ମଧୁମଥନ ଦୃଗ୍ଦୂରଚରଣଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୬ ||
ଦଶାସ୍ଯାହଂକାର ଦ୍ରୁମ କୁଲିଶିତାଂଗୁଷ୍ଠନଖରଂ
ନିଶାନାଥ ଶ୍ରୀଜିନ୍ନିଜଵଦନବିଂବଂ ନିରଵଧିମ୍ |
ଵିଶାଲାକ୍ଷଂ ଵିଶ୍ଵପ୍ରଭଵ ଭରଣୋପାଯକରଣଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୭ ||
ଅନାକାରଂହାରିକୃତଭୁଜଗରାଜଂ ପୁରହରଂ
ସନାଥଂ ଶର୍ଵାଣ୍ଯା ସରସିରୁହପତ୍ରାଯତଦୃଶମ୍ |
ଦିନାରଂଭାଦିତ୍ଯାଯୁତଶତନିଭାନଂଦଵପୁଷଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୮ ||
ଉମାପୀନୋତ୍ତୁଂଗ ସ୍ତନତଟଲ ସତ୍କୁଂକୁମରଜ-
ସ୍ସମାହାରାତ୍ଯଂତାରୁଣଵିପୁଲଦୋରଂତରତଲମ୍ |
ରମା ଵାଣୀଂଦ୍ରାଣୀରତିଵିରଚିତାରାଧନଵିଧିଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୯ ||
ଧରାପାଥସ୍ସ୍ଵାହାସହଚର ଜଗତ୍ପ୍ରାଣଶଶଭୃ-
ତ୍ସୁରାଧ୍ଵାହର୍ନାଦାଧ୍ଵର କରଶରୀରଂ ଶଶିଧରମ୍ |
ସୁରାହାରାସ୍ଵାଦାତିଶଯ ନିଜଵାଚଂ ସୁଖକରଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧୦ ||
ଧରାପୀଠଂ ଧାରାଧରକଲଶମାକାଶଵପୁଷଂ
ଧରାଭୃଦ୍ଦୋଦ୍ଦଂଡଂ ତପନ ଶଶି ଵୈଶ୍ଵାନରଦୃଶମ୍ |
ଵିରାଜନ୍ନକ୍ଷତ୍ର ପ୍ରସଵମୁଦରୀଭୂତ ଜଲଧିଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧୧ ||
ସୁପର୍ଣାଂକାଂଭୋଜାସନ ଦୃଗତି ଦୂରାଂଘ୍ରିମକୁଟଂ
ସୁଵର୍ଣାହାର ସ୍ରକ୍ସୁରଵିଟପିଶାଖାଯୁତଭୁଜମ୍ |
ଅପର୍ଣାପାଦାବ୍ଜାହତି ଚଲିତ ଚଂଦ୍ରାର୍ଥିତ ଜଟଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧୨ ||
ମଖାରାତିଂ ମଂଦସ୍ମିତ ମଧୁରବିଂବାଧର ଲସ-
ନ୍ମୁଖାଂଭୋଜଂ ମୁଗ୍ଧାମୃତକିରଣଚୂଡାମଣିଧରମ୍ |
ନଖାକୃଷ୍ଟେଭତ୍ଵକ୍ପରିଵୃତ ଶରୀରଂ ପଶୁପତିଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧୩ ||
ସହସ୍ରାବ୍ଜୈକୋନେ ନିଜନଯନମୁଦ୍ଧୃତ୍ଯ ଜଯତେ
ସହସ୍ରାଖ୍ଯାପୂର୍ତ୍ଯୈ ସରସିଜଦୃଶେ ଯେନ କୃପଯା |
ସହସ୍ରାରଂ ଦତ୍ତଂ ତପନ ନିଯୁତାଭଂ ରଥପଦଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧୪ ||
ରଥାଵନ୍ଯାମ୍ନାଯାଶ୍ଵମଜରଥକାରଂ ରଣପଟୁଂ
ରଥାଂଗାଦିତ୍ଯେଂଦୁଂ ରଥପଦ ଧରାସ୍ତ୍ରଂ ରଥିଵରମ୍ |
ରଥାଧାରେଷ୍ଵାସଂ ରଥଧର ଗୁଣଂ ରମ୍ଯଫଲଦଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧୫ ||
ଧରାକର୍ଷାପାସ୍ତ ପ୍ରଚୁର ଭୁଜକଂଡୂଯନ ଜଲଂ
ଧରାହାର୍ଯଦ୍ଵୈଧୀ କରଣହୃତଲୋକତ୍ରଯଭଯମ୍ |
ସ୍ମରାକାରାହାରାଵୃତଚଟୁଲ ପାଲାନଲକଣଂ
ମହାଦେଵଂ ଵଂଦେ ମଧୁରଶଫରାକ୍ଷୀସହଚରମ୍ || ୧୬ ||
ସୋମସୁଂଦରନାଥସ୍ଯ ସ୍ତୋତ୍ରଂ ଭକ୍ତ୍ଯା ପଠଂତି ଯେ |
ଶ୍ରିଯାପରମଯା ଯୁକ୍ତାଶ୍ଶିଵମଂତେ ଭଜଂତି ତେ || ୧୭ ||
ଇତି ଶ୍ରୀହାଲାସ୍ଯମହାତ୍ମ୍ଯେ କୁଲଶେଖରପାଂଡ୍ଯକୃତା ଶ୍ରୀଶିଵସ୍ତୁତିଃ |