કુલશેખરપાંડ્ય ઉવાચ –
મહાનીપારણ્યાંતર કનકપદ્માકરતટી
મહેંદ્રાનીતાષ્ટદ્વિપધૃતવિમાનાંતરગતમ્ |
મહાલીલાભૂતપ્રકટિતવિશિષ્ટાત્મવિભવં
મહાદેવં વંદે મધુરશફરાક્ષીસહચરમ્ || ૧ ||
નમન્નાળીકાક્ષાંબુજ ભવસુનાશીર મકુટી
વમન્માણિક્યાંશુસ્ફુરદરુણપાદાબ્જયુગળમ્ |
અમંદાનંદાબ્ધિં હરિનયનપદ્માર્ચિતપદં
મહાદેવં વંદે મધુરશફરાક્ષીસહચરમ્ || ૨ ||
મહામાતંગાસૃગ્વરવસનમદીંદ્રતનયા
મહાભાગ્યં મત્તાંધકકરટિકંઠીરવવરમ્ |
મહાભોગીંદ્રોદ્યત્ફણગણિગણાલંકૃતતનું
મહાદેવં વંદે મધુરશફરાક્ષીસહચરમ્ || ૩ ||
સમીરાહારેંદ્રાંગદમખિલલોકૈકજનનં
સમીરાહારાત્મા પ્રણતજનહૃત્પદ્મનિલયમ્ |
સુમીનાક્ષી વક્ત્રાંબુજ તરુણસૂરં સુમનસં
મહાદેવં વંદે મધુરશફરાક્ષીસહચરમ્ || ૪ ||
નતાઘૌઘારણ્યાનલમનિલભુઙ્નાથવલયં
સુધાંશોરર્ધાંશં શિરસિ દધતં જહ્નુતનયામ્ |
વદાન્યાનામાદ્યં વરવિબુધવંદ્યં વરગુણં
મહાદેવં વંદે મધુરશફરાક્ષીસહચરમ્ || ૫ ||
મહાદુગ્ધાંબોધૌમથનજવસંભૂતમસિતં
મહાકાળં કંઠે સકલભયભંગાય દધતમ્ |
મહાકારુણ્યાબ્ધિં મધુમથન દૃગ્દૂરચરણં
મહાદેવં વંદે મધુરશફરાક્ષીસહચરમ્ || ૬ ||
દશાસ્યાહંકાર દ્રુમ કુલિશિતાંગુષ્ઠનખરં
નિશાનાથ શ્રીજિન્નિજવદનબિંબં નિરવધિમ્ |
વિશાલાક્ષં વિશ્વપ્રભવ ભરણોપાયકરણં
મહાદેવં વંદે મધુરશફરાક્ષીસહચરમ્ || ૭ ||
અનાકારંહારિકૃતભુજગરાજં પુરહરં
સનાથં શર્વાણ્યા સરસિરુહપત્રાયતદૃશમ્ |
દિનારંભાદિત્યાયુતશતનિભાનંદવપુષં
મહાદેવં વંદે મધુરશફરાક્ષીસહચરમ્ || ૮ ||
ઉમાપીનોત્તુંગ સ્તનતટલ સત્કુંકુમરજ-
સ્સમાહારાત્યંતારુણવિપુલદોરંતરતલમ્ |
રમા વાણીંદ્રાણીરતિવિરચિતારાધનવિધિં
મહાદેવં વંદે મધુરશફરાક્ષીસહચરમ્ || ૯ ||
ધરાપાથસ્સ્વાહાસહચર જગત્પ્રાણશશભૃ-
ત્સુરાધ્વાહર્નાદાધ્વર કરશરીરં શશિધરમ્ |
સુરાહારાસ્વાદાતિશય નિજવાચં સુખકરં
મહાદેવં વંદે મધુરશફરાક્ષીસહચરમ્ || ૧૦ ||
ધરાપીઠં ધારાધરકલશમાકાશવપુષં
ધરાભૃદ્દોદ્દંડં તપન શશિ વૈશ્વાનરદૃશમ્ |
વિરાજન્નક્ષત્ર પ્રસવમુદરીભૂત જલધિં
મહાદેવં વંદે મધુરશફરાક્ષીસહચરમ્ || ૧૧ ||
સુપર્ણાંકાંભોજાસન દૃગતિ દૂરાંઘ્રિમકુટં
સુવર્ણાહાર સ્રક્સુરવિટપિશાખાયુતભુજમ્ |
અપર્ણાપાદાબ્જાહતિ ચલિત ચંદ્રાર્થિત જટં
મહાદેવં વંદે મધુરશફરાક્ષીસહચરમ્ || ૧૨ ||
મખારાતિં મંદસ્મિત મધુરબિંબાધર લસ-
ન્મુખાંભોજં મુગ્ધામૃતકિરણચૂડામણિધરમ્ |
નખાકૃષ્ટેભત્વક્પરિવૃત શરીરં પશુપતિં
મહાદેવં વંદે મધુરશફરાક્ષીસહચરમ્ || ૧૩ ||
સહસ્રાબ્જૈકોને નિજનયનમુદ્ધૃત્ય જયતે
સહસ્રાખ્યાપૂર્ત્યૈ સરસિજદૃશે યેન કૃપયા |
સહસ્રારં દત્તં તપન નિયુતાભં રથપદં
મહાદેવં વંદે મધુરશફરાક્ષીસહચરમ્ || ૧૪ ||
રથાવન્યામ્નાયાશ્વમજરથકારં રણપટું
રથાંગાદિત્યેંદું રથપદ ધરાસ્ત્રં રથિવરમ્ |
રથાધારેષ્વાસં રથધર ગુણં રમ્યફલદં
મહાદેવં વંદે મધુરશફરાક્ષીસહચરમ્ || ૧૫ ||
ધરાકર્ષાપાસ્ત પ્રચુર ભુજકંડૂયન જલં
ધરાહાર્યદ્વૈધી કરણહૃતલોકત્રયભયમ્ |
સ્મરાકારાહારાવૃતચટુલ પાલાનલકણં
મહાદેવં વંદે મધુરશફરાક્ષીસહચરમ્ || ૧૬ ||
સોમસુંદરનાથસ્ય સ્તોત્રં ભક્ત્યા પઠંતિ યે |
શ્રિયાપરમયા યુક્તાશ્શિવમંતે ભજંતિ તે || ૧૭ ||
ઇતિ શ્રીહાલાસ્યમહાત્મ્યે કુલશેખરપાંડ્યકૃતા શ્રીશિવસ્તુતિઃ |