വേംകടേശോ വാസുദേവഃ പ്രദ്യുമ്നോഽമിതവിക്രമഃ |
സംകര്ഷണോഽനിരുദ്ധശ്ച ശേഷാദ്രിപതിരേവ ച || ൧ ||
ജനാര്ദനഃ പദ്മനാഭോ വേംകടാചലവാസിനഃ |
സൃഷ്ടികര്താ ജഗന്നാഥോ മാധവോ ഭക്തവത്സലഃ || ൨ ||
ഗോവിംദോ ഗോപതിഃ കൃഷ്ണഃ കേശവോ ഗരുഡധ്വജഃ |
വരാഹോ വാമനശ്ചൈവ നാരായണ അധോക്ഷജഃ || ൩ ||
ശ്രീധരഃ പുംഡരീകാക്ഷഃ സര്വദേവസ്തുതോ ഹരിഃ |
ശ്രീനൃസിംഹോ മഹാസിംഹഃ സൂത്രാകാരഃ പുരാതനഃ || ൪ ||
രമാനാഥോ മഹീഭര്താ ഭൂധരഃ പുരുഷോത്തമഃ |
ചോളപുത്രപ്രിയഃ ശാംതോ ബ്രഹ്മാദീനാം വരപ്രദഃ || ൫ ||
ശ്രീനിധിഃ സര്വഭൂതാനാം ഭയകൃദ്ഭയനാശനഃ |
ശ്രീരാമോ രാമഭദ്രശ്ച ഭവബംധൈകമോചകഃ || ൬ ||
ഭൂതാവാസോ ഗിരിവാസഃ ശ്രീനിവാസഃ ശ്രിയഃ പതിഃ |
അച്യുതാനംത ഗോവിംദോ വിഷ്ണുര്വേംകടനായകഃ || ൭ ||
സര്വദേവൈകശരണം സര്വദേവൈകദൈവതമ് |
സമസ്തദേവകവചം സര്വദേവശിഖാമണിഃ || ൮ ||
ഇതീദം കീര്തിതം യസ്യ വിഷ്ണോരമിതതേജസഃ |
ത്രികാലേ യഃ പഠേന്നിത്യം പാപം തസ്യ ന വിദ്യതേ || ൯ ||
രാജദ്വാരേ പഠേദ്ഘോരേ സംഗ്രാമേ രിപുസംകടേ |
ഭൂതസര്പപിശാചാദിഭയം നാസ്തി കദാചന || ൧൦ ||
അപുത്രോ ലഭതേ പുത്രാന് നിര്ധനോ ധനവാന് ഭവേത് |
രോഗാര്തോ മുച്യതേ രോഗാദ്ബദ്ധോ മുച്യേത ബംധനാത് || ൧൧ ||
യദ്യദിഷ്ടതമം ലോകേ തത്തത്പ്രാപ്നോത്യസംശയഃ |
ഐശ്വര്യം രാജസമ്മാനം ഭുക്തിമുക്തിഫലപ്രദമ് || ൧൨ ||
വിഷ്ണോര്ലോകൈകസോപാനം സര്വദുഃഖൈകനാശനമ് |
സര്വൈശ്വര്യപ്രദം നൄണാം സര്വമംഗളകാരകമ് || ൧൩ ||
മായാവീ പരമാനംദം ത്യക്ത്വാ വൈകുംഠമുത്തമമ് |
സ്വാമിപുഷ്കരിണീതീരേ രമയാ സഹ മോദതേ || ൧൪ ||
കള്യാണാദ്ഭുതഗാത്രായ കാമിതാര്ഥപ്രദായിനേ |
ശ്രീമദ്വേംകടനാഥായ ശ്രീനിവാസായ തേ നമഃ || ൧൫ ||
ഇതി ശ്രീ ബ്രഹ്മാംഡപുരാണേ ബ്രഹ്മനാരദസംവാദേ വേംകടഗിരിമാഹാത്മ്യേ ശ്രീ വേംകടേശ അഷ്ടകമ് |