ଵେଂକଟେଶୋ ଵାସୁଦେଵଃ ପ୍ରଦ୍ଯୁମ୍ନୋଽମିତଵିକ୍ରମଃ |
ସଂକର୍ଷଣୋଽନିରୁଦ୍ଧଶ୍ଚ ଶେଷାଦ୍ରିପତିରେଵ ଚ || ୧ ||
ଜନାର୍ଦନଃ ପଦ୍ମନାଭୋ ଵେଂକଟାଚଲଵାସିନଃ |
ସୃଷ୍ଟିକର୍ତା ଜଗନ୍ନାଥୋ ମାଧଵୋ ଭକ୍ତଵତ୍ସଲଃ || ୨ ||
ଗୋଵିଂଦୋ ଗୋପତିଃ କୃଷ୍ଣଃ କେଶଵୋ ଗରୁଡଧ୍ଵଜଃ |
ଵରାହୋ ଵାମନଶ୍ଚୈଵ ନାରାଯଣ ଅଧୋକ୍ଷଜଃ || ୩ ||
ଶ୍ରୀଧରଃ ପୁଂଡରୀକାକ୍ଷଃ ସର୍ଵଦେଵସ୍ତୁତୋ ହରିଃ |
ଶ୍ରୀନୃସିଂହୋ ମହାସିଂହଃ ସୂତ୍ରାକାରଃ ପୁରାତନଃ || ୪ ||
ରମାନାଥୋ ମହୀଭର୍ତା ଭୂଧରଃ ପୁରୁଷୋତ୍ତମଃ |
ଚୋଳପୁତ୍ରପ୍ରିଯଃ ଶାଂତୋ ବ୍ରହ୍ମାଦୀନାଂ ଵରପ୍ରଦଃ || ୫ ||
ଶ୍ରୀନିଧିଃ ସର୍ଵଭୂତାନାଂ ଭଯକୃଦ୍ଭଯନାଶନଃ |
ଶ୍ରୀରାମୋ ରାମଭଦ୍ରଶ୍ଚ ଭଵବଂଧୈକମୋଚକଃ || ୬ ||
ଭୂତାଵାସୋ ଗିରିଵାସଃ ଶ୍ରୀନିଵାସଃ ଶ୍ରିଯଃ ପତିଃ |
ଅଚ୍ଯୁତାନଂତ ଗୋଵିଂଦୋ ଵିଷ୍ଣୁର୍ଵେଂକଟନାଯକଃ || ୭ ||
ସର୍ଵଦେଵୈକଶରଣଂ ସର୍ଵଦେଵୈକଦୈଵତମ୍ |
ସମସ୍ତଦେଵକଵଚଂ ସର୍ଵଦେଵଶିଖାମଣିଃ || ୮ ||
ଇତୀଦଂ କୀର୍ତିତଂ ଯସ୍ଯ ଵିଷ୍ଣୋରମିତତେଜସଃ |
ତ୍ରିକାଲେ ଯଃ ପଠେନ୍ନିତ୍ଯଂ ପାପଂ ତସ୍ଯ ନ ଵିଦ୍ଯତେ || ୯ ||
ରାଜଦ୍ଵାରେ ପଠେଦ୍ଘୋରେ ସଂଗ୍ରାମେ ରିପୁସଂକଟେ |
ଭୂତସର୍ପପିଶାଚାଦିଭଯଂ ନାସ୍ତି କଦାଚନ || ୧୦ ||
ଅପୁତ୍ରୋ ଲଭତେ ପୁତ୍ରାନ୍ ନିର୍ଧନୋ ଧନଵାନ୍ ଭଵେତ୍ |
ରୋଗାର୍ତୋ ମୁଚ୍ଯତେ ରୋଗାଦ୍ବଦ୍ଧୋ ମୁଚ୍ଯେତ ବଂଧନାତ୍ || ୧୧ ||
ଯଦ୍ଯଦିଷ୍ଟତମଂ ଲୋକେ ତତ୍ତତ୍ପ୍ରାପ୍ନୋତ୍ଯସଂଶଯଃ |
ଐଶ୍ଵର୍ଯଂ ରାଜସମ୍ମାନଂ ଭୁକ୍ତିମୁକ୍ତିଫଲପ୍ରଦମ୍ || ୧୨ ||
ଵିଷ୍ଣୋର୍ଲୋକୈକସୋପାନଂ ସର୍ଵଦୁଃଖୈକନାଶନମ୍ |
ସର୍ଵୈଶ୍ଵର୍ଯପ୍ରଦଂ ନୄଣାଂ ସର୍ଵମଂଗଳକାରକମ୍ || ୧୩ ||
ମାଯାଵୀ ପରମାନଂଦଂ ତ୍ଯକ୍ତ୍ଵା ଵୈକୁଂଠମୁତ୍ତମମ୍ |
ସ୍ଵାମିପୁଷ୍କରିଣୀତୀରେ ରମଯା ସହ ମୋଦତେ || ୧୪ ||
କଳ୍ଯାଣାଦ୍ଭୁତଗାତ୍ରାଯ କାମିତାର୍ଥପ୍ରଦାଯିନେ |
ଶ୍ରୀମଦ୍ଵେଂକଟନାଥାଯ ଶ୍ରୀନିଵାସାଯ ତେ ନମଃ || ୧୫ ||
ଇତି ଶ୍ରୀ ବ୍ରହ୍ମାଂଡପୁରାଣେ ବ୍ରହ୍ମନାରଦସଂଵାଦେ ଵେଂକଟଗିରିମାହାତ୍ମ୍ଯେ ଶ୍ରୀ ଵେଂକଟେଶ ଅଷ୍ଟକମ୍ |