વેંકટેશો વાસુદેવઃ પ્રદ્યુમ્નોઽમિતવિક્રમઃ |
સંકર્ષણોઽનિરુદ્ધશ્ચ શેષાદ્રિપતિરેવ ચ || ૧ ||
જનાર્દનઃ પદ્મનાભો વેંકટાચલવાસિનઃ |
સૃષ્ટિકર્તા જગન્નાથો માધવો ભક્તવત્સલઃ || ૨ ||
ગોવિંદો ગોપતિઃ કૃષ્ણઃ કેશવો ગરુડધ્વજઃ |
વરાહો વામનશ્ચૈવ નારાયણ અધોક્ષજઃ || ૩ ||
શ્રીધરઃ પુંડરીકાક્ષઃ સર્વદેવસ્તુતો હરિઃ |
શ્રીનૃસિંહો મહાસિંહઃ સૂત્રાકારઃ પુરાતનઃ || ૪ ||
રમાનાથો મહીભર્તા ભૂધરઃ પુરુષોત્તમઃ |
ચોળપુત્રપ્રિયઃ શાંતો બ્રહ્માદીનાં વરપ્રદઃ || ૫ ||
શ્રીનિધિઃ સર્વભૂતાનાં ભયકૃદ્ભયનાશનઃ |
શ્રીરામો રામભદ્રશ્ચ ભવબંધૈકમોચકઃ || ૬ ||
ભૂતાવાસો ગિરિવાસઃ શ્રીનિવાસઃ શ્રિયઃ પતિઃ |
અચ્યુતાનંત ગોવિંદો વિષ્ણુર્વેંકટનાયકઃ || ૭ ||
સર્વદેવૈકશરણં સર્વદેવૈકદૈવતમ્ |
સમસ્તદેવકવચં સર્વદેવશિખામણિઃ || ૮ ||
ઇતીદં કીર્તિતં યસ્ય વિષ્ણોરમિતતેજસઃ |
ત્રિકાલે યઃ પઠેન્નિત્યં પાપં તસ્ય ન વિદ્યતે || ૯ ||
રાજદ્વારે પઠેદ્ઘોરે સંગ્રામે રિપુસંકટે |
ભૂતસર્પપિશાચાદિભયં નાસ્તિ કદાચન || ૧૦ ||
અપુત્રો લભતે પુત્રાન્ નિર્ધનો ધનવાન્ ભવેત્ |
રોગાર્તો મુચ્યતે રોગાદ્બદ્ધો મુચ્યેત બંધનાત્ || ૧૧ ||
યદ્યદિષ્ટતમં લોકે તત્તત્પ્રાપ્નોત્યસંશયઃ |
ઐશ્વર્યં રાજસમ્માનં ભુક્તિમુક્તિફલપ્રદમ્ || ૧૨ ||
વિષ્ણોર્લોકૈકસોપાનં સર્વદુઃખૈકનાશનમ્ |
સર્વૈશ્વર્યપ્રદં નૄણાં સર્વમંગળકારકમ્ || ૧૩ ||
માયાવી પરમાનંદં ત્યક્ત્વા વૈકુંઠમુત્તમમ્ |
સ્વામિપુષ્કરિણીતીરે રમયા સહ મોદતે || ૧૪ ||
કળ્યાણાદ્ભુતગાત્રાય કામિતાર્થપ્રદાયિને |
શ્રીમદ્વેંકટનાથાય શ્રીનિવાસાય તે નમઃ || ૧૫ ||
ઇતિ શ્રી બ્રહ્માંડપુરાણે બ્રહ્મનારદસંવાદે વેંકટગિરિમાહાત્મ્યે શ્રી વેંકટેશ અષ્ટકમ્ |