नवरत्नमालिका अंबिकास्तुतिः
(श्रीकालहस्तिक्षेत्रस्थज्ञानप्रसूनांबिकास्तुतिः)
श्रीनरकंठीरवशास्त्रिविरचिता |
श्रीनाकनाथमुखनानासहस्रसुरसेनाग्रमौलिवलभी-
सूनावलीबहुललीनालिनीमधुरगानांचितांघ्रिनलिना |
मानातिलंघिमहिमानादिरानतजनानामनेकफलदा
ज्ञानांबिका भवतु दीनावनी कुशलदानाय मे भगवती || १ ||
राकाशशांकरुचिराकारचारुपादना(पतदा)काशसिंधुलहरी-
नीकाशसूक्तिसरणीकारिणी प्रकृतिमूकात्मनामपि नृणां |
पाकाहितप्रमुखनाकालयप्रकरशोकापनोदनचणा
श्रीकालहस्तिनगरैकायनावतु पिनाकायुधस्य दयिता || २ ||
श्रेणीभवद्दिविषदेणीदृगुल्लसितवेणीपिनद्धसुमनो-
द्रोणीमरंदरसवेणीप्रसारभृशशोणीकृतांघ्रिकमला |
श्रोणीनटत्सरकृपाणीमनोज्ञघनवेणी कृपार्द्रहृदया
क्षोणीधरेंद्रतनयाणीयसीमपि च वाणीं प्रगल्भयतु मे || ३ ||
केलीसमाकलिततालीदलश्रवणपालीविभूषणमणी-
वा(पा)ली मदोद्धतमरालीगतिर्दिंशतु नालीकदीर्घनयना |
चूलीतलाभरणनालीकवैरिशकलालीभवत्सुरवधूःऽ
काली गिरं मृदु मृणालीभुजा मम मधूलीरसोर्मिमधुरां || ४ ||
हृद्यानवद्यतरगद्यानुबद्धमृदुपद्याभिरूपकवितां
दद्याज्जगन्महितविद्यां त्रयीशिखरवेद्या हिमाद्रितनया |
आद्या परा मम शरद्यामिनीशभृदविद्याविलासशमनी
विद्याधरी समभिवाद्या ज्वलन्मणिनिषद्यायमाणरशना || ५ ||
हालामदाकलितहेलालसद्बहुललोलारुणाक्षियुगली
लीलापिनद्धसुरसालावलीप्रसवमालासुगंधचिकुरा |
कैलासनाथहितशीला करांचितशुकालापलोलहृदया
वेलातिलंघिशुभजालाय मे भवतु शैलाधिनाथतनया || ६ ||
चंडापदानयुतचंडाभिधासुरपिचंडावदारणचणा
भंडासुरोग्रभुजदंडाग्रनिर्दलनशौंडायुधोद्धतकरा |
शुंडानुकारिकरकांडावदीर्णजगदंडाट्टहासभयदा
दंडायुधाय शशिखंडावतंसितशिखंडा न चार्पयतु मां || ७ ||
हुंकारनिर्गलदशंकापतद्विषदहंकारमारतिमिरां
अंकांतलंबिसितक्ङ्कालहारसदलंकारबंधुरगलां |
ह्रींकारिणीं भयदटंकारकार्मुककरां कालहस्तिनिलयां
पंकापहामपकलंकावतंसहरिणांकां भजे भगवतीं || ८ ||
कंठारवोद्यदुपकंठारिदुर्विषहकंठीरवेंद्रगमनो-
त्कंठा निकामशितिकंठानुकर्षिकलकंठानुलापललिता |
शुंठीभवद्दनुजकंठीरवप्रकरकुंठीकृतिक्षमबला
कुंठीकरोतु नरकंठीरवाख्यकविकंठीरवस्य दुरितं || ९ ||
श्रीकालहस्तिनिलयज्ञानप्रसवांबिकामुदे रचिता |
नरकंठीरवकृतिना नवरत्नस्तुतिरियं चिरं जयतु || १० ||
|| इति श्रीनरकंठीरवशास्त्रिविरचिता नवरत्नमालिका समाप्ता ||