navaratnamālikā aṃbikāstutiḥ
(śrīkālahastikṣetrasthajñānaprasūnāṃbikāstutiḥ)
śrīnarakaṃṭhīravaśāstriviracitā |
śrīnākanāthamukhanānāsahasrasurasenāgramaulivalabhī-
sūnāvalībahulalīnālinīmadhuragānāṃcitāṃghrinalinā |
mānātilaṃghimahimānādirānatajanānāmanekaphaladā
jñānāṃbikā bhavatu dīnāvanī kuśaladānāya me bhagavatī || 1 ||
rākāśaśāṃkarucirākāracārupādanā(patadā)kāśasiṃdhulaharī-
nīkāśasūktisaraṇīkāriṇī prakṛtimūkātmanāmapi nṛṇāṃ |
pākāhitapramukhanākālayaprakaraśokāpanodanacaṇā
śrīkālahastinagaraikāyanāvatu pinākāyudhasya dayitā || 2 ||
śreṇībhavaddiviṣadeṇīdṛgullasitaveṇīpinaddhasumano-
droṇīmaraṃdarasaveṇīprasārabhṛśaśoṇīkṛtāṃghrikamalā |
śroṇīnaṭatsarakṛpāṇīmanojñaghanaveṇī kṛpārdrahṛdayā
kṣoṇīdhareṃdratanayāṇīyasīmapi ca vāṇīṃ pragalbhayatu me || 3 ||
kelīsamākalitatālīdalaśravaṇapālīvibhūṣaṇamaṇī-
vā(pā)lī madoddhatamarālīgatirdiṃśatu nālīkadīrghanayanā |
cūlītalābharaṇanālīkavairiśakalālībhavatsuravadhūḥ’
kālī giraṃ mṛdu mṛṇālībhujā mama madhūlīrasormimadhurāṃ || 4 ||
hṛdyānavadyataragadyānubaddhamṛdupadyābhirūpakavitāṃ
dadyājjaganmahitavidyāṃ trayīśikharavedyā himādritanayā |
ādyā parā mama śaradyāminīśabhṛdavidyāvilāsaśamanī
vidyādharī samabhivādyā jvalanmaṇiniṣadyāyamāṇaraśanā || 5 ||
hālāmadākalitahelālasadbahulalolāruṇākṣiyugalī
līlāpinaddhasurasālāvalīprasavamālāsugaṃdhacikurā |
kailāsanāthahitaśīlā karāṃcitaśukālāpalolahṛdayā
velātilaṃghiśubhajālāya me bhavatu śailādhināthatanayā || 6 ||
caṃḍāpadānayutacaṃḍābhidhāsurapicaṃḍāvadāraṇacaṇā
bhaṃḍāsurograbhujadaṃḍāgranirdalanaśauṃḍāyudhoddhatakarā |
śuṃḍānukārikarakāṃḍāvadīrṇajagadaṃḍāṭṭahāsabhayadā
daṃḍāyudhāya śaśikhaṃḍāvataṃsitaśikhaṃḍā na cārpayatu māṃ || 7 ||
huṃkāranirgaladaśaṃkāpatadviṣadahaṃkāramāratimirāṃ
aṃkāṃtalaṃbisitakṅkālahārasadalaṃkārabaṃdhuragalāṃ |
hrīṃkāriṇīṃ bhayadaṭaṃkārakārmukakarāṃ kālahastinilayāṃ
paṃkāpahāmapakalaṃkāvataṃsahariṇāṃkāṃ bhaje bhagavatīṃ || 8 ||
kaṃṭhāravodyadupakaṃṭhāridurviṣahakaṃṭhīraveṃdragamano-
tkaṃṭhā nikāmaśitikaṃṭhānukarṣikalakaṃṭhānulāpalalitā |
śuṃṭhībhavaddanujakaṃṭhīravaprakarakuṃṭhīkṛtikṣamabalā
kuṃṭhīkarotu narakaṃṭhīravākhyakavikaṃṭhīravasya duritaṃ || 9 ||
śrīkālahastinilayajñānaprasavāṃbikāmude racitā |
narakaṃṭhīravakṛtinā navaratnastutiriyaṃ ciraṃ jayatu || 10 ||
|| iti śrīnarakaṃṭhīravaśāstriviracitā navaratnamālikā samāptā ||