ದೇ. ೧ ಪರ್ಜನ್ಯಃ, ೨ ಮಿತ್ರಃ, ೩ ವರುಣಃ, ೪ ಚಂದ್ರಃ, ೫ ಸೂರ್ಯಃ, (೧-೯ ಮೂತ್ರಮೋಚನಂ)| ಅನುಷ್ಟುಪ್, ೧-೫ ಪಥ್ಯಾಪಂಕ್ತಿಃ|
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ॑ ಪ॒ರ್ಜನ್ಯಂ॑ ಶ॒ತವೃ॑ಷ್ಣ್ಯಂ |
ತೇನಾ॑ ತೇ ತ॒ನ್ವೇ॑(೩) ಶಂ ಕ॑ರಂ ಪೃಥಿ॒ವ್ಯಾಂ ತೇ॑ ನಿ॒ಷೇಚ॑ನಂ ಬ॒ಹಿಷ್ಟೇ॑ ಅಸ್ತು॒ ಬಾಲಿತಿ॑ || ೧||
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ॑ ಮಿ॒ತ್ರಂ ಶ॒ತವೃ॑ಷ್ಣ್ಯಂ |
ತೇನಾ॑ ತೇ ತ॒ನ್ವೇ॑(೩) ಶಂ ಕ॑ರಂ ಪೃಥಿ॒ವ್ಯಾಂ ತೇ॑ ನಿ॒ಷೇಚ॑ನಂ ಬ॒ಹಿಷ್ಟೇ॑ ಅಸ್ತು॒ ಬಾಲಿತಿ॑ || ೨||
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ॒ ವರು॑ಣಂ ಶ॒ತವೃ॑ಷ್ಣ್ಯಂ |
ತೇನಾ॑ ತೇ ತ॒ನ್ವೇ॑(೩) ಶಂ ಕ॑ರಂ ಪೃಥಿ॒ವ್ಯಾಂ ತೇ॑ ನಿ॒ಷೇಚ॑ನಂ ಬ॒ಹಿಷ್ಟೇ॑ ಅಸ್ತು॒ ಬಾಲಿತಿ॑ || ೩||
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ॑ ಚಂ॒ದ್ರಂ ಶ॒ತವೃ॑ಷ್ಣ್ಯಂ |
ತೇನಾ॑ ತೇ ತ॒ನ್ವೇ॑(೩) ಶಂ ಕ॑ರಂ ಪೃಥಿ॒ವ್ಯಾಂ ತೇ॑ ನಿ॒ಷೇಚ॑ನಂ ಬ॒ಹಿಷ್ಟೇ॑ ಅಸ್ತು॒ ಬಾಲಿತಿ॑ || ೪||
ವಿ॒ದ್ಮಾ ಶ॒ರಸ್ಯ॑ ಪಿ॒ತರಂ॒ ಸೂರ್ಯಂ॑ ಶ॒ತವೃ॑ಷ್ಣ್ಯಂ |
ತೇನಾ॑ ತೇ ತ॒ನ್ವೇ॑(೩) ಶಂ ಕ॑ರಂ ಪೃಥಿ॒ವ್ಯಾಂ ತೇ॑ ನಿ॒ಷೇಚ॑ನಂ ಬ॒ಹಿಷ್ಟೇ॑ ಅಸ್ತು॒ ಬಾಲಿತಿ॑ || ೫||
ಯದಾಂ॒ತ್ರೇಷು॑ ಗವೀ॒ನ್ಯೋರ್ಯದ್ವ॒ಸ್ತಾವಧಿ॒ ಸಂಶ್ರು॑ತಂ |
ಏ॒ವಾ ತೇ॒ ಮೂತ್ರಂ॑ ಮುಚ್ಯತಾಂ ಬ॒ಹಿರ್ಬಾಲಿತಿ॑ ಸರ್ವ॒ಕಂ || ೬||
ಪ್ರ ತೇ॑ ಭಿನದ್ಮಿ॒ ಮೇಹ॑ನಂ॒ ವರ್ತ್ರಂ॑ ವೇಶಂ॒ತ್ಯಾ ಇ॑ವ |
ಏ॒ವಾ ತೇ॒ ಮೂತ್ರಂ॑ ಮುಚ್ಯತಾಂ ಬ॒ಹಿರ್ಬಾಲಿತಿ॑ ಸರ್ವ॒ಕಂ || ೭||
ವಿಷಿ॑ತಂ ತೇ ವಸ್ತಿಬಿ॒ಲಂ ಸ॑ಮು॒ದ್ರಸ್ಯೋ॑ದ॒ಧೇರಿ॑ವ |
ಏ॒ವಾ ತೇ॒ ಮೂತ್ರಂ॑ ಮುಚ್ಯತಾಂ ಬ॒ಹಿರ್ಬಾಲಿತಿ॑ ಸರ್ವ॒ಕಂ || ೮||
ಯಥೇ॑ಷು॒ಕಾ ಪ॒ರಾಪ॑ತ॒ದವ॑ಸೃ॒ಷ್ಟಾಧಿ॒ ಧನ್ವ॑ನಃ |
ಏ॒ವಾ ತೇ॒ ಮೂತ್ರಂ॑ ಮುಚ್ಯತಾಂ ಬಹಿ॒ರ್ಬಾಲಿತಿ॑ ಸರ್ವ॒ಕಂ ||೯||