ദേ. 1 പർജന്യഃ, 2 മിത്രഃ, 3 വരുണഃ, 4 ചന്ദ്രഃ, 5 സൂര്യഃ, (1-9 മൂത്രമോചനം)| അനുഷ്ടുപ്, 1-5 പഥ്യാപങ്ക്തിഃ|

വി॒ദ്മാ ശ॒രസ്യ॑ പി॒തരം॑ പ॒ർജന്യം॑ ശ॒തവൃ॑ഷ്ണ്യം |
തേനാ॑ തേ ത॒ന്വേ॑(3) ശം ക॑രം പൃഥി॒വ്യാം തേ॑ നി॒ഷേച॑നം ബ॒ഹിഷ്ടേ॑ അസ്തു॒ ബാലിതി॑ || 1 ||

വി॒ദ്മാ ശ॒രസ്യ॑ പി॒തരം॑ മി॒ത്രം ശ॒തവൃ॑ഷ്ണ്യം |
തേനാ॑ തേ ത॒ന്വേ॑(3) ശം ക॑രം പൃഥി॒വ്യാം തേ॑ നി॒ഷേച॑നം ബ॒ഹിഷ്ടേ॑ അസ്തു॒ ബാലിതി॑ || 2 ||

വി॒ദ്മാ ശ॒രസ്യ॑ പി॒തരം॒ വരു॑ണം ശ॒തവൃ॑ഷ്ണ്യം |
തേനാ॑ തേ ത॒ന്വേ॑(3) ശം ക॑രം പൃഥി॒വ്യാം തേ॑ നി॒ഷേച॑നം ബ॒ഹിഷ്ടേ॑ അസ്തു॒ ബാലിതി॑ || 3 ||

വി॒ദ്മാ ശ॒രസ്യ॑ പി॒തരം॑ ച॒ന്ദ്രം ശ॒തവൃ॑ഷ്ണ്യം |
തേനാ॑ തേ ത॒ന്വേ॑(3) ശം ക॑രം പൃഥി॒വ്യാം തേ॑ നി॒ഷേച॑നം ബ॒ഹിഷ്ടേ॑ അസ്തു॒ ബാലിതി॑ || 4 ||

വി॒ദ്മാ ശ॒രസ്യ॑ പി॒തരം॒ സൂര്യം॑ ശ॒തവൃ॑ഷ്ണ്യം |
തേനാ॑ തേ ത॒ന്വേ॑(3) ശം ക॑രം പൃഥി॒വ്യാം തേ॑ നി॒ഷേച॑നം ബ॒ഹിഷ്ടേ॑ അസ്തു॒ ബാലിതി॑ || 5 ||

യദാ॒ന്ത്രേഷു॑ ഗവീ॒ന്യോര്യദ്വ॒സ്താവധി॒ സംശ്രു॑തം |
ഏ॒വാ തേ॒ മൂത്രം॑ മുച്യതാം ബ॒ഹിർബാലിതി॑ സർവ॒കം || 6 ||

പ്ര തേ॑ ഭിനദ്മി॒ മേഹ॑നം॒ വർത്രം॑ വേശ॒ന്ത്യാ ഇ॑വ |
ഏ॒വാ തേ॒ മൂത്രം॑ മുച്യതാം ബ॒ഹിർബാലിതി॑ സർവ॒കം || 7 ||

വിഷി॑തം തേ വസ്തിബി॒ലം സ॑മു॒ദ്രസ്യോ॑ദ॒ധേരി॑വ |
ഏ॒വാ തേ॒ മൂത്രം॑ മുച്യതാം ബ॒ഹിർബാലിതി॑ സർവ॒കം || 8 ||

യഥേ॑ഷു॒കാ പ॒രാപ॑ത॒ദവ॑സൃ॒ഷ്ടാധി॒ ധന്വ॑നഃ |
ഏ॒വാ തേ॒ മൂത്രം॑ മുച്യതാം ബഹി॒ർബാലിതി॑ സർവ॒കം || 9 ||