ಯಸ್ಮಿನ್ ಜಗತ್ಸರ್ವಮಿದಂ ವಿಭಾತಿ
ಯಶ್ಚಾಪ್ಯನನ್ಯಃ ಸಕಲಪ್ರಪಂಚಾತ್ |
ತಿಲೇಷು ತೈಲೋಪಮಮಾಸ್ಥಿತಂ ತ್ವಾಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೧ ||
ಪಶ್ಯಂತಿ ಯನ್ನ ಶ್ರುತಯಃ ಶಿರಸ್ಥಂ
ಶಿರಃಸ್ಥಿತಂ ವಸ್ತ್ವಿವ ಸರ್ವಲೋಕಾಃ |
ತ್ವಾಮಾತ್ಮಭೂತಂ ಜಗತಾಂ ತ್ರಯಾಣಾಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೨ ||
ಅಣೋರಣೀಯಾನ್ ಮಹತೋ ಮಹೀಯಾ-
-ನಾತ್ಮಾ ಗುಹಾಯಾಂ ನಿಹಿತೋಽಸ್ಯ ಜಂತೋಃ |
ತ್ವಂ ಸರ್ವಭೂತಸ್ಥಿತಮಾತ್ಮರೂಪಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೩ ||
ಯಃ ಸರ್ವಸಾಕ್ಷೀ ತಮಸಃ ಪರಸ್ತಾ-
-ದ್ವಿಭಾತಿ ಸರ್ವಂ ಕಿಲ ಯಸ್ಯ ಭಾಸಾ |
ತ್ವಾಮಾಗಮಾಂತೈರಪಿ ದುರ್ನಿರೂಪಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೪ ||
ಪುಮಾನವಿಜ್ಞಾಯ ಶಿವಂ ಕದಾಚಿ-
-ದ್ದುಃಖಸ್ಯ ನಾಂತಂ ಸಮುಪೈತಿ ಧೀರಃ |
ತ್ವಾಂ ಸಚ್ಚಿದಾನಂದಮಯಂ ಪ್ರಶಾಂತಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೫ ||
ಅಜಂ ಪುರಾಣಂ ಪುರುಷಂ ಮಹಾಂತಂ
ಅನಶ್ವರಂ ವಾಙ್ಮನಸಾಽತಿ ದೂರಮ್ |
ಜ್ಞಾನಾತ್ಮನಾಂ ಹೃದ್ಯವಭಾಸಮಾನಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೬ ||
ವದಂತ್ಯಮೀ ಯತ್ಪದಮೇವ ವೇದಾ
ಜ್ಞಾತೇ ತು ಯಾಸ್ಮಿನ್ ಸಕಲಂ ವಿಬುದ್ಧಮ್ |
ತ್ವಾಂ ಪ್ರತ್ಯಗಾತ್ಮನಮಚಿಂತ್ಯಶಕ್ತಿಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೭ ||
ಯಂ ನಿರ್ವಿಕಲ್ಪೇನ ಸಮಾಧಿನೈವ
ತಪಸ್ವಿನಶ್ಚೇತಸಿ ವೀತರಾಗಾಃ |
ಧ್ಯಾಯಂತಿ ತೇಜೋಮಯಮದ್ಭುತಂ ತ್ವಾಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೮ ||
ತ್ರಿಲೋಚನಂ ಚಂದ್ರಕಲಾವತಂಸಂ
ಗಂಗಾತರಂಗೋಲ್ಲಸದುತ್ತಮಾಂಗಮ್ |
ಸ್ಮೇರಾಸ್ಯಮಿಷ್ಟಪ್ರದಮಷ್ಟಮೂರ್ತಿಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೯ ||
ಅಪಾರಸಚ್ಚಿತ್ಸುಖರಾಶಿಮೇಕ-
-ಮನಾದಿಮಧ್ಯಾಂತಮನಂತರೂಪಮ್ |
ತ್ರಿಲೋಚನಂ ನೀಲಗಲಂ ಪ್ರಶಾಂತಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೧೦ ||
ಕೈಲಾಸಶೈಲೇಂದ್ರಶಿರಸ್ತಟೇಷು
ನಗೇಂದ್ರಪುತ್ರ್ಯಾ ಸಹ ಸಂವಸಂತಮ್ |
ವಿಭೂತಿ ರುದ್ರಾಕ್ಷವಿಭೂಷಿತಾಂಗಂ
ಶ್ರೀಚಂದ್ರಮೌಳೀಶ್ವರಮಾಶ್ರಯಾಮಃ || ೧೧ ||
ಇತಿ ಶಿವರಹಸ್ಯಾಂತರ್ಗತೇ ಗಣೈಃ ಕೃತ ಶ್ರೀ ಚಂದ್ರಮೌಳೀಶ್ವರ ಸ್ತುತಿಃ ||