yasmin jagatsarvamidaṁ vibhāti
yaścāpyananyaḥ sakalaprapañcāt |
tilēṣu tailōpamamāsthitaṁ tvāṁ
śrīcandramaulīśvaramāśrayāmaḥ || 1 ||
paśyanti yanna śrutayaḥ śirasthaṁ
śiraḥsthitaṁ vastviva sarvalōkāḥ |
tvāmātmabhūtaṁ jagatāṁ trayāṇāṁ
śrīcandramaulīśvaramāśrayāmaḥ || 2 ||
aṇōraṇīyān mahatō mahīyā-
-nātmā guhāyāṁ nihitō:’sya jantōḥ |
tvaṁ sarvabhūtasthitamātmarūpaṁ
śrīcandramaulīśvaramāśrayāmaḥ || 3 ||
yaḥ sarvasākṣī tamasaḥ parastā-
-dvibhāti sarvaṁ kila yasya bhāsā |
tvāmāgamāntairapi durnirūpaṁ
śrīcandramaulīśvaramāśrayāmaḥ || 4 ||
pumānavijñāya śivaṁ kadāci-
-dduḥkhasya nāntaṁ samupaiti dhīraḥ |
tvāṁ saccidānandamayaṁ praśāntaṁ
śrīcandramaulīśvaramāśrayāmaḥ || 5 ||
ajaṁ purāṇaṁ puruṣaṁ mahāntaṁ
anaśvaraṁ vāṅmanasā:’ti dūram |
jñānātmanāṁ hr̥dyavabhāsamānaṁ
śrīcandramaulīśvaramāśrayāmaḥ || 6 ||
vadantyamī yatpadamēva vēdā
jñātē tu yāsmin sakalaṁ vibuddham |
tvāṁ pratyagātmanamacintyaśaktiṁ
śrīcandramaulīśvaramāśrayāmaḥ || 7 ||
yaṁ nirvikalpēna samādhinaiva
tapasvinaścētasi vītarāgāḥ |
dhyāyanti tējōmayamadbhutaṁ tvāṁ
śrīcandramaulīśvaramāśrayāmaḥ || 8 ||
trilōcanaṁ candrakalāvataṁsaṁ
gaṅgātaraṅgōllasaduttamāṅgam |
smērāsyamiṣṭapradamaṣṭamūrtiṁ
śrīcandramaulīśvaramāśrayāmaḥ || 9 ||
apārasaccitsukharāśimēka-
-manādimadhyāntamanantarūpam |
trilōcanaṁ nīlagalaṁ praśāntaṁ
śrīcandramaulīśvaramāśrayāmaḥ || 10 ||
kailāsaśailēndraśirastaṭēṣu
nagēndraputryā saha saṁvasantam |
vibhūti rudrākṣavibhūṣitāṅgaṁ
śrīcandramaulīśvaramāśrayāmaḥ || 11 ||
iti śivarahasyāntargatē gaṇaiḥ kr̥ta śrī candramaulīśvara stutiḥ ||