1 kṛṣṇayajurveda (kaṭhopaniṣat, māṃḍukyopaniṣat, śvetaśvatāropaniṣat)

oṃ sa̱ha nā̍vavatu | sa̱ha nau̍ bhunaktu |
sa̱ha vī̱rya̍ṃ karavāvahai |
te̱ja̱svinā̱vadhī̍tamastu̱ mā vi̍dviṣā̱vahai̎ ||

oṃ śāṃti̱ḥ śāṃti̱ḥ śāṃti̍ḥ |

2 kṛṣṇayajurveda taittirīyopaniṣat

oṃ śaṃ no̍ mi̱traḥ śaṃ varu̍ṇaḥ | śaṃ no̍ bhavatvarya̱mā | śaṃ na̱ iṃdro̱
bṛha̱spati̍ḥ | śaṃ no̱ viṣṇu̍rurukra̱maḥ | namo̱ brahma̍ṇe | nama̍ste vāyo |
tvame̱va pra̱tyakṣa̱ṃ brahmā̍si | tvame̱va pra̱tyakṣa̱ṃ brahma̍ vadiṣyāmi | ṛ̱taṃ
va̍diṣyāmi | sa̱tyaṃ va̍diṣyāmi | tanmāma̍vatu | tadva̱ktāra̍mavatu | ava̍tu̱ māṃ |
ava̍tu va̱ktāra̎ṃ || oṃ śāṃti̱ḥ śāṃti̱ḥ śāṃti̍ḥ ||

3 atharvaveda praśnopaniṣat muṃḍakopaniṣat māṃḍukyopaniṣat

oṃ bha̱draṃ karṇe̍bhiḥ śṛṇu̱yāma̍ devāḥ |
bha̱draṃ pa̍śyemā̱kṣabhi̱ryaja̍trāḥ |
sthi̱rairaṃgai̎stuṣṭu̱vāṃ+sa̍sta̱nūbhi̍ḥ |
vyaśe̍ma de̱vahi̍ta̱ṃ yadāyu̍ḥ |

sva̱sti na̱ iṃdro̍ vṛ̱ddhaśra̍vāḥ |
sva̱sti na̍ḥ pū̱ṣā vi̱śvave̍dāḥ |
sva̱sti na̱stārkṣyo̱ ari̍ṣṭanemiḥ |
sva̱sti no̱ bṛha̱spati̍rdadhātu |
oṃ śāṃti̱ḥ śāṃti̱ḥ śāṃti̍ḥ ||

4 oṃ namo̱ brahma̍ṇe̱ namo̍ astva̱gnaye̱ nama̍ḥ pṛthi̱vyai nama̱ oṣa̍dhībhyaḥ |
namo̍ vā̱ce namo̍ vā̱caspata̍ye̱ namo̱ viṣṇa̍ve bṛha̱te ka̍romi || oṃ śāṃti̱ḥ
śāṃti̱ḥ śāṃti̍ḥ ||

5 oṃ yaśchaṃda̍sāmṛṣa̱bho vi̱śvarū̍paḥ |
chaṃdo̱bhyo’dhya̱mṛtā̎thsaṃba̱bhūva̍ | sa meṃdro̍ me̱dhayā̎
spṛṇotu | a̱mṛta̍sya deva̱dhāra̍ṇo bhūyāsaṃ | śarī̍raṃ
me̱ vica̍rṣaṇaṃ | ji̱hvā me̱ madhu̍mattamā | karṇā̎bhyā̱ṃ
bhūri̱viśru̍vaṃ | brahma̍ṇaḥ ko̱śo̍​’si me̱dhayā pi̍hitaḥ | śru̱taṃ
me̍ gopāya | oṃ śāṃti̱ḥ śāṃti̱ḥ śāṃti̍ḥ ||

6 oṃ taccha̱ṃ yorāvṛ̍ṇīmahe | gā̱tuṃ ya̱jñāya̍ | gā̱tuṃ ya̱jñapa̍taye | daivī̎
sva̱stira̍stu naḥ | sva̱stirmānu̍ṣebhyaḥ | ū̱rdhvaṃ ji̍gātu bheṣa̱jaṃ | śaṃ no̍
astu dvi̱pade̎ | śaṃ catu̍ṣpade || oṃ śāṃti̱ḥ śāṃti̱ḥ śāṃti̍ḥ ||

7 oṃ namo̍ vā̱ce yā co̍di̱tā yā cānu̍ditā̱ tasyai̍ vā̱ce namo̱ namo̍ vā̱ce namo̍
vā̱caspata̍ye̱ nama̱ ṛṣi̍bhyo maṃtra̱kṛdbhyo̱ maṃtra̍patibhyo̱ māmāmṛṣa̍yo
maṃtra̱kṛto̍ maṃtra̱pata̍ya̱ḥ parā̍du̱rmā ‘hamṛṣī̎nmaṃtra̱kṛto̍
maṃtra̱patī̱nparā̍dāṃ vaiśvade̱vīṃ vāca̍mudyāsaṃ+ śi̱vāmada̍stā̱ṃ juṣṭā̎ṃ
de̱vebhya̱ḥ śarma̍ me̱ dyauḥ śarma̍pṛthi̱vī śarma̱ viśva̍mi̱daṃ jaga̍t |
śarma̍ ca̱ṃdraśca̱ sūrya̍śca̱ śarma̍ brahmaprajāpa̱tī | bhū̱taṃ va̍diṣye̱
bhuva̍naṃ vadiṣye̱ tejo̍ vadiṣye̱ yaśo̍ vadiṣye̱ tapo̍ vadiṣye̱ brahma̍ vadiṣye
sa̱tyaṃ va̍diṣye̱ tasmā̍ a̱hami̱damu̍pa̱stara̍ṇa̱mupa̍stṛṇa upa̱stara̍ṇaṃ
me pra̱jāyai̍ paśū̱nāṃ bhū̍yādupa̱stara̍ṇama̱haṃ pra̱jāyai̍ paśū̱nāṃ bhū̍yāsa̱ṃ
prāṇā̍pānau mṛ̱tyormā̍pāta̱ṃ prāṇa̍pānau̱ mā mā̍ hāsiṣṭa̱ṃ madhu̍ maniṣye̱ madhu̍
janiṣye̱ madhu̍ vakṣyāmi̱ madhu̍ vadiṣyāmi̱ madhu̍matīṃ de̱vebhyo̱ vāca̍mudyāsaṃ+
śuśrū̱ṣeṇyā̎ṃ manu̱ṣye̎bhya̱staṃ mā̍ de̱vā a̍vaṃtu śo̱bhāyai̍ pi̱taro’nu̍madaṃtu
|| oṃ śāṃti̱ḥ śāṃti̱ḥ śāṃti̍ḥ ||

8 ṛgveda
ṛ̱ju̱nī̱tī no̱ varu̍ṇo mi̱tro na̍yatu vi̱dvān |
a̱rya̱mā de̱vaiḥ sa̱joṣā̍ḥ || 1 | 090 | 01
te hi vasvo̱ vasa̍vānā̱ste apra̍mūrā̱ maho̍bhiḥ |
vra̱tā ra̍kṣaṃte vi̱śvāhā̍ || 1 | 090 | 02
te a̱smabhya̱ṃ śarma̍ yaṃsanna̱mṛtā̱ martye̍bhyaḥ |
bādha̍mānā̱ apa̱ dviṣa̍ḥ || 1 | 090 | 03
vi na̍ḥ pa̱thaḥ su̍vi̱tāya̍ ci̱yaṃtviṃdro̍ ma̱ruta̍ḥ |
pū̱ṣā bhago̱ vaṃdyā̍saḥ || 1 | 090 | 04
u̱ta no̱ dhiyo̱ goa̍grā̱ḥ pūṣa̱nviṣṇa̱veva̍yāvaḥ |
kartā̍ naḥ svasti̱mata̍ḥ || 1 | 090 | 05
madhu̱ vātā̍ ṛtāya̱te madhu̍ kṣaraṃti̱ siṃdha̍vaḥ |
mādhvī̍rnaḥ sa̱ṃtvoṣa̍dhīḥ || 1 | 090 | 06
madhu̱ nakta̍mu̱toṣaso̱ madhu̍ma̱tpārthi̍va̱ṃ raja̍ḥ |
madhu̱ dyaura̍stu naḥ pi̱tā || 1 | 090 | 07
madhu̍mānno̱ vana̱spati̱rmadhu̍mām̐ astu̱ sūrya̍ḥ |
mādhvī̱rgāvo̍ bhavaṃtu naḥ || 1 | 090 | 08
śaṃ no̍ mi̱traḥ śaṃ varu̍ṇa̱ḥ śaṃ no̍ bhavatvarya̱mā |
śaṃ na̱ iṃdro̱ bṛha̱spati̱ḥ śaṃ no̱ viṣṇu̍rurukra̱maḥ || 1 | 090 | 09

9 ṛgveda aitareyopaniṣat |

oṃ vāṅme̱ mana̍si̱ prati̍ṣṭhitā̱ mano̍ me̱ vāci̱
prati̍ṣṭhitamā̱virā̱vīrma̍ edhi ve̱dasya ma̱ āṇī̎sthaḥ śru̱taṃ me̱ mā
prahā̍sīra̱nenā̱dhīte̍nāhorā̱trān saṃda̍dhāmyṛ̱taṃ va̍diṣyāmi sa̱tyaṃ va̍diṣyāmi̱
tanmāma̍vatu̱ tadva̱ktāra̍mava̱tvava̍tu̱ māmava̍tu va̱ktāra̱mava̍tu va̱ktāra̎ṃ ||

oṃ śāṃti̱ḥ śāṃti̱ḥ śāṃti̍ḥ ||

10 śuklayajurveda īśāvāsyopaniṣat bṛhadāraṇyakopaniṣat

oṃ pūrṇa̱mada̱ḥ pūrṇa̱mida̱ṃ pūrṇā̱tpūrṇa̱muda̱cyate | pūrṇa̱sya
pūrṇa̱mādā̱ya pūrṇa̱mevāvaśi̱ṣyate || oṃ śāṃti̱ḥ śāṃti̱ḥ śāṃti̱ḥ ||

11 rudrapraśnaḥ
oṃ iḍā̍ deva̱hūrmanu̍ryajña̱nīrbṛha̱spati̍rukthāma̱dāni̍
śagͫsiṣa̱dviśve̍de̱vāḥ sū̎kta̱vāca̱ḥ
pṛthi̍vīmāta̱rmā mā̍ higͫsī̱rmadhu̍ maniṣye̱
madhu̍ janiṣye̱ madhu̱ vakṣyāmi̱ madhu̍ vadiṣyāmi̱
madhu̱matīṃ de̱vebhyo̱ vāca̍mudyāsagͫ śuśrū̱ṣeṇyā̎ṃ
manu̱ṣye̎bhya̱staṃ mā̍ de̱vā a̍vaṃtu śo̱bhāyai̍
pi̱taro’nu̍madaṃtu ||

oṃ śāṃti̱ḥ śāṃti̱ḥ śāṃti̍ḥ ||

12 ghoṣāśāṃtiḥ
oṃ śaṃ no̱ vāta̍ḥ pavatāṃ māta̱riśvā̱ śaṃ na̍stapatu̱ sūrya̍ḥ | ahā̍ni̱ śaṃ bha̍vaṃtu
na̱śśaṃ+ rātri̱ḥ prati̍ dhīyatāṃ | śamu̱ṣāno̱ vyu̍cchatu̱ śamā̍di̱tya ude̍tu naḥ |
śi̱vā na̱śśaṃta̍mābhava sumṛḍī̱kā sara̍svati |
māte̱ vyo̍ma sa̱ṃdṛśi̍ | iḍā̍yai̱vāstva̍si vāstu̱ madvā̎stu̱maṃto̍ bhūyāsma̱
mā vāsto̎-śchithsmahyavā̱stussa bhū̍yā̱dyo̎’smāṃdveṣṭi̱ yaṃ ca̍ va̱yaṃ dvi̱ṣmaḥ |
pra̱ti̱ṣṭhāsi̍ prati̱ṣṭhāva̍ṃto bhūyāsma̱mā
pra̍ti̱ṣṭhāyā̎-śchithsmahyaprati̱ṣṭhassa bhū̍yā̱dyo̎’smāṃdveṣṭi̱ yaṃ ca̍ va̱yaṃ
dvi̱ṣmaḥ | āvā̍tavāhi bheṣa̱jaṃ vivā̍tavāhi̱ yadrapa̍ḥ | tvaṃ+ hi vi̱śvabhe̍ṣajo
de̱vānā̎ṃ dū̱ta īya̍se | dvāvi̱mau vātau̍ vāta̱ āsiṃdho̱rāpa̍rā̱vata̍ḥ ||

dakṣa̍ṃ me a̱nya ā̱vātu̱ parā̱nyovā̍tu̱ yadrapa̍ḥ | yada̱dovā̍tate
gṛ̱he̍​’mṛta̍sya ni̱dhirhi̱taḥ | tato̍ no dehi jī̱vase̱ tato̍ no dhehi bheṣa̱jaṃ
| tato̍ no̱ maha̱ āva̍ha̱ vāta̱ āvā̍tu bheṣa̱jaṃ |
śa̱ṃbhūrma̍yo̱bhūrno̍ hṛ̱depraṇa̱ āyūṃ+ṣi tāriṣat | iṃdra̍sya gṛ̱ho̍​’si̱ taṃ
tvā̱ prapa̍dye̱ sagu̱ssāśva̍ḥ | sa̱ha yanme̱ asti̱ tena̍ | bhūḥ prapa̍dye̱ bhuva̱ḥ
prapa̍dye̱ suva̱ḥ prapa̍dye̱ bhūrbhuva̱ssuva̱ḥ prapa̍dye vā̱yuṃ prapa̱dyenā̎rtāṃ
de̱vatā̱ṃ prapa̱dye’śmā̍namākha̱ṇaṃ prapa̍dye pra̱jāpa̍terbrahmako̱śaṃ
brahma̱prapa̍dya̱ oṃ prapa̍dye |
a̱ṃtari̍kṣaṃ ma u̱rva̍ṃtara̍ṃ bṛ̱hada̱gnaya̱ḥ parva̍tāśca̱ yayā̱ vāta̍ḥ
sva̱styā sva̍sti̱māṃtayā̎ sva̱styā sva̍sti̱māna̍sāni |
prāṇā̍pānau mṛ̱tyormā̍pāta̱ṃ prāṇā̍pānau̱ mā mā̍ hāsiṣṭa̱ṃ mayi̍ me̱dhāṃ mayi̍
pra̱jāṃ mayya̱gnistejo̍ dadhātu̱ mayi̍ me̱dhāṃ mayi̍ pra̱jāṃ mayīṃdra̍ iṃdri̱yaṃ
da̍dhātu̱ mayi̍ me̱dhāṃ mayi̍ pra̱jāṃ mayi̱ sūryo̱ bhrājo̍ dadhātu ||

dyu̱bhi-ra̱ktubhi̱ḥ pari̍pātama̱smānari̍ṣṭebhiraśvinā̱ saubha̍gebhiḥ | tanno̍
mi̱tro varu̍ṇo māmahaṃtā̱madi̍ti̱ḥ siṃdhu̍ḥ pṛthi̱vī u̱tadyauḥ | kayā̍naści̱tra
ābhu̍vadū̱tī sa̱dāvṛ̍dha̱ssakhā̎ |
kayā̱śaci̍ṣṭhayā vṛ̱tā | kastvā̍ sa̱tyo madā̍nā̱ṃ maṃ+hi̍ṣṭho mathsa̱daṃdha̍saḥ |
dṛ̱ḍhā ci̍dā̱ruje̱ vasu̍ | a̱bhīṣuṇa̱ssakhī̍nāmavi̱tā ja̍ritṝ̱ṇāṃ |
śa̱taṃ bha̍vāsyū̱tibhi̍ḥ | vaya̍ssupa̱rṇā upa̍sedu̱riṃdra̍ṃ pri̱yame̍dhā̱ ṛṣa̍yo̱
nādha̍mānāḥ | apa̍dhvā̱ṃtamū̎rṇu̱hi pū̱rdhicakṣu̍rmumu̱gdhya̍smanni̱dhaye̍va
ba̱ddhān |
śaṃ no̍ de̱vīra̱bhiṣṭa̍ya̱ āpo̍ bhavaṃtu pī̱taye̎ | śaṃyora̱bhisra̍vaṃtu naḥ ||

īśā̍nā̱vāryā̍ṇā̱ṃ kṣaya̍ṃtīścarṣaṇī̱nāṃ | a̱po yā̍cāmi bheṣa̱jaṃ |
su̱mi̱trāna̱ āpa̱ oṣa̍dhayaḥ saṃtu durmi̱trāstasmai̍ bhūyāsu̱ryo̎’smāṃdveṣṭi̱
yaṃ ca̍ va̱yaṃ dvi̱ṣmaḥ |
āpo̱ hiṣṭhā ma̍yo̱bhuva̱stā na̍ ū̱rje da̍dhātana | ma̱heraṇā̍ya̱ cakṣa̍se |
yo va̍ḥ śi̱vata̍mo rasa̱stasya̍ bhājayate̱ ha na̍ḥ | u̱śa̱tīri̍va mā̱ta̍raḥ |
tasmā̱ ara̍ṃgamāmavo̱ yasya̱ kṣayā̍ya̱ jinva̍tha | āpo̍ ja̱naya̍thā ca naḥ |
pṛ̱thi̱vī śā̱ṃtā sāgninā̍ śā̱ṃtā sāme̍ śā̱ṃtā śucaṃ+̍ śamayatu | a̱ṃtari̍kṣaṃ+
śā̱ṃtaṃ tadvā̱yunā̍ śā̱ṃtaṃ tanme̍ śā̱ṃtaṃ+ śucaṃ+̍ śamayatu | dyauśśā̱ṃtā
sādi̱tyena̍ śā̱ṃtā sā me̍ śā̱ṃtā śucaṃ+̍ śamayatu |
pṛ̱thi̱vī śāṃti̍ra̱ṃtari̍kṣa̱ṃ+̱
śāṃti̱-rdyau-śśāṃti̱rdiśa̱-śśāṃti̍-ravāṃtaradi̱śā-śśāṃti̍-ra̱gni-
śśāṃti̍-rvā̱yu-śśāṃti̍-rādi̱tya-śśāṃti̍-śca̱ṃdramā̱-śśāṃti̱-
rnakṣa̍trāṇi̱-śāṃti̱-rāpa̱-śśāṃti̱-roṣa̍dhaya̱-śśāṃti̱-
rvana̱spata̍ya̱-śśāṃti̱-rgau-śśāṃti̍-ra̱jā-śāṃti̱-raśva̱-śśāṃti̱ḥ
puru̍ṣa̱-śśāṃti̱-rbrahma̱-śśāṃti̍-rbrāhma̱ṇa-śśāṃti̱-śśāṃti̍-re̱va
śāṃti-śśāṃti̍-rme astu̱ śāṃti̍ḥ |
tayā̱hagͫ śā̱ṃtyā sa̍rvaśā̱ṃtyā mahya̍ṃ dvi̱pade̱ catu̍ṣpade ca̱ śāṃti̍ṃ karomi
śāṃti̍rme astu̱ śāṃti̍ḥ ||

eha̱ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ
dharma̍ścai̱tāni̱ motti̍ṣṭhaṃta̱-manūtti̍ṣṭhaṃtu̱ mā mā̱g̱ śrīśca̱ hrīśca̱
dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̍ mā̱
mā hā̍siṣuḥ |
udāyu̍ṣā svā̱yuṣodoṣa̍dhīnā̱ṃ+ rase̱notpa̱rjanya̍sya̱
śuṣme̱ṇoda̍sthāma̱mṛtā̱ṃ+̱ anu̍ | taccakṣu̍rde̱vahi̍taṃ
pu̱rastā̎cchu̱kramu̱ccara̍t |
paśye̍ma śa̱rada̍śśa̱taṃ jīve̍ma śa̱rada̍śśa̱taṃ naṃdā̍ma śa̱rada̍śśa̱taṃ
modā̍ma śa̱rada̍śśa̱taṃ bhavā̍ma śa̱rada̍śśa̱taṃ+ śṛ̱ṇavā̍ma
śa̱rada̍śśa̱taṃ prabra̍vāma śa̱rada̍śśa̱tamajī̍tāssyāma śa̱rada̍śśa̱taṃ
jyokca̱ sūrya̍ṃ dṛ̱śe |
ya uda̍gānmaha̱to’rṇavā̎dvi̱bhrāja̍mānassari̱rasya̱ madhyā̱thsamā̍ vṛṣa̱bho
lo̍hitā̱kṣassūryo̍ vipa̱ścinmana̍sā punātu ||

brahma̍ṇa̱ścota̍nyasi̱ brahma̍ṇa ā̱ṇīstho̱ brahma̍ṇa ā̱vapa̍namasi dhāri̱teyaṃ
pṛ̍thi̱vī brahma̍ṇā ma̱hī dhā̍ri̱tame̍nena ma̱hada̱ṃtari̍kṣa̱ṃ diva̍ṃ dādhāra
pṛthi̱vīṃ+ sade̍vā̱ṃ yada̱haṃ veda̱ tada̱haṃ dhā̍rayāṇi̱ māmadvedo’dhi̱ visra̍sat |
me̱dhā̱ma̱nī̱ṣe māvi̍śatāṃ+ sa̱mīcī̍ bhū̱tasya̱ bhavya̱syāva̍rudhyai̱
sarva̱māyu̍rayāṇi̱ sarva̱māyu̍rayāṇi |
ā̱bhirgī̱rbhiryadato̍na ū̱namāpyā̍yaya harivo̱ vardha̍mānaḥ | ya̱dā sto̱tṛbhyo̱
mahi̍ go̱trā ru̱jāsi̍ bhūyiṣṭha̱bhājo̱ adha̍ te syāma | brahma̱ prāvā̍diṣma̱ tanno̱
mā hā̍sīt || oṃ śāṃti̱ḥ śāṃti̱ḥ śāṃti̍ḥ ||

oṃ saṃ tvā̍ siṃcāmi̱ yaju̍ṣā pra̱jāmāyu̱rdhana̍ṃ ca || oṃ śāṃti̱ḥ śāṃti̱ḥ śāṃti̍ḥ ||

13 sāmaveda kenopaniṣat chāṃdogyopaniṣat

oṃ āpyāyaṃtu mamāṃgāni vākprāṇaścakṣuḥśrotraṃ |
atho balamiṃdriyāṇi ca sarvāṇi |
sarvaṃ brahmaupaniṣadaṃ mā’haṃ brahmanirākuryāṃ |
mā mā brahmanirākarodanirākaraṇamastu |
anirākaraṇaṃ me’stu |
tadātmani nirate ya upaniṣatsu dharmāste mayi saṃtu |
te mayi saṃtu ||

oṃ śāṃti̱ḥ śāṃti̱ḥ śāṃti̍ḥ ||
oṃ śāṃtiḥ śāṃtiḥ śāṃtiḥ ||