1 কৃষ্ণয়জুর্বেদ (কঠোপনিষৎ, মাণ্ডুক্যোপনিষৎ, শ্বেতশ্বতারোপনিষৎ)
ওঁ স॒হ না॑ববতু | স॒হ নৌ॑ ভুনক্তু |
স॒হ বী॒র্যং॑ করবাবহৈ |
তে॒জ॒স্বিনা॒বধী॑তমস্তু॒ মা বি॑দ্বিষা॒বহৈ᳚ ||
ওঁ শান্তিঃ॒ শান্তিঃ॒ শান্তিঃ॑ |
2 কৃষ্ণয়জুর্বেদ তৈত্তিরীয়োপনিষৎ
ওঁ শং নো॑ মি॒ত্রঃ শং বরু॑ণঃ | শং নো॑ ভবত্বর্য॒মা | শং ন॒ ইন্দ্রো॒
বৃহ॒স্পতিঃ॑ | শং নো॒ বিষ্ণু॑রুরুক্র॒মঃ | নমো॒ ব্রহ্ম॑ণে | নম॑স্তে বায়ো |
ত্বমে॒ব প্র॒ত্যক্ষং॒ ব্রহ্মা॑সি | ত্বমে॒ব প্র॒ত্যক্ষং॒ ব্রহ্ম॑ বদিষ্যামি | ঋ॒তং
ব॑দিষ্যামি | স॒ত্যং ব॑দিষ্যামি | তন্মাম॑বতু | তদ্ব॒ক্তার॑মবতু | অব॑তু॒ মাং |
অব॑তু ব॒ক্তারং᳚ || ওঁ শান্তিঃ॒ শান্তিঃ॒ শান্তিঃ॑ ||
3 অথর্ববেদ প্রশ্নোপনিষৎ মুণ্ডকোপনিষৎ মাণ্ডুক্যোপনিষৎ
ওঁ ভ॒দ্রং কর্ণে॑ভিঃ শৃণু॒য়াম॑ দেবাঃ |
ভ॒দ্রং প॑শ্যেমা॒ক্ষভি॒র্যজ॑ত্রাঃ |
স্থি॒রৈরঙ্গৈ᳚স্তুষ্টু॒বাং+স॑স্ত॒নূভিঃ॑ |
ব্যশে॑ম দে॒বহি॑তং॒ যদায়ুঃ॑ |
স্ব॒স্তি ন॒ ইন্দ্রো॑ বৃ॒দ্ধশ্র॑বাঃ |
স্ব॒স্তি নঃ॑ পূ॒ষা বি॒শ্ববে॑দাঃ |
স্ব॒স্তি ন॒স্তার্ক্ষ্যো॒ অরি॑ষ্টনেমিঃ |
স্ব॒স্তি নো॒ বৃহ॒স্পতি॑র্দধাতু |
ওঁ শান্তিঃ॒ শান্তিঃ॒ শান্তিঃ॑ ||
4 ওঁ নমো॒ ব্রহ্ম॑ণে॒ নমো॑ অস্ত্ব॒গ্নয়ে॒ নমঃ॑ পৃথি॒ব্যৈ নম॒ ওষ॑ধীভ্যঃ |
নমো॑ বা॒চে নমো॑ বা॒চস্পত॑য়ে॒ নমো॒ বিষ্ণ॑বে বৃহ॒তে ক॑রোমি || ওঁ শান্তিঃ॒
শান্তিঃ॒ শান্তিঃ॑ ||
5 ওঁ যশ্ছন্দ॑সামৃষ॒ভো বি॒শ্বরূ॑পঃ |
ছন্দো॒ভ্যোঽধ্য॒মৃতা᳚থ্সম্ব॒ভূব॑ | স মেন্দ্রো॑ মে॒ধয়া᳚
স্পৃণোতু | অ॒মৃত॑স্য দেব॒ধার॑ণো ভূয়াসং | শরী॑রং
মে॒ বিচ॑র্ষণং | জি॒হ্বা মে॒ মধু॑মত্তমা | কর্ণা᳚ভ্যাং॒
ভূরি॒বিশ্রু॑বং | ব্রহ্ম॑ণঃ কো॒শো॑ঽসি মে॒ধয়া পি॑হিতঃ | শ্রু॒তং
মে॑ গোপায় | ওঁ শান্তিঃ॒ শান্তিঃ॒ শান্তিঃ॑ ||
6 ওঁ তচ্ছং॒ যোরাবৃ॑ণীমহে | গা॒তুং য॒জ্ঞায়॑ | গা॒তুং য॒জ্ঞপ॑তয়ে | দৈবী᳚
স্ব॒স্তির॑স্তু নঃ | স্ব॒স্তির্মানু॑ষেভ্যঃ | ঊ॒র্ধ্বং জি॑গাতু ভেষ॒জং | শং নো॑
অস্তু দ্বি॒পদে᳚ | শং চতু॑ষ্পদে || ওঁ শান্তিঃ॒ শান্তিঃ॒ শান্তিঃ॑ ||
7 ওঁ নমো॑ বা॒চে যা চো॑দি॒তা যা চানু॑দিতা॒ তস্যৈ॑ বা॒চে নমো॒ নমো॑ বা॒চে নমো॑
বা॒চস্পত॑য়ে॒ নম॒ ঋষি॑ভ্যো মন্ত্র॒কৃদ্ভ্যো॒ মন্ত্র॑পতিভ্যো॒ মামামৃষ॑য়ো
মন্ত্র॒কৃতো॑ মন্ত্র॒পত॑য়ঃ॒ পরা॑দু॒র্মা ঽহমৃষী᳚ন্মন্ত্র॒কৃতো॑
মন্ত্র॒পতী॒ন্পরা॑দাং বৈশ্বদে॒বীং বাচ॑মুদ্যাসং+ শি॒বামদ॑স্তাং॒ জুষ্টাং᳚
দে॒বেভ্যঃ॒ শর্ম॑ মে॒ দ্যৌঃ শর্ম॑পৃথি॒বী শর্ম॒ বিশ্ব॑মি॒দং জগ॑ৎ |
শর্ম॑ চন্॒দ্রশ্চ॒ সূর্য॑শ্চ॒ শর্ম॑ ব্রহ্মপ্রজাপ॒তী | ভূ॒তং ব॑দিষ্যে॒
ভুব॑নং বদিষ্যে॒ তেজো॑ বদিষ্যে॒ যশো॑ বদিষ্যে॒ তপো॑ বদিষ্যে॒ ব্রহ্ম॑ বদিষ্যে
স॒ত্যং ব॑দিষ্যে॒ তস্মা॑ অ॒হমি॒দমু॑প॒স্তর॑ণ॒মুপ॑স্তৃণ উপ॒স্তর॑ণং
মে প্র॒জায়ৈ॑ পশূ॒নাং ভূ॑য়াদুপ॒স্তর॑ণম॒হং প্র॒জায়ৈ॑ পশূ॒নাং ভূ॑য়াসং॒
প্রাণা॑পানৌ মৃ॒ত্যোর্মা॑পাতং॒ প্রাণ॑পানৌ॒ মা মা॑ হাসিষ্টং॒ মধু॑ মনিষ্যে॒ মধু॑
জনিষ্যে॒ মধু॑ বক্ষ্যামি॒ মধু॑ বদিষ্যামি॒ মধু॑মতীং দে॒বেভ্যো॒ বাচ॑মুদ্যাসং+
শুশ্রূ॒ষেণ্যাং᳚ মনু॒ষ্যে᳚ভ্য॒স্তং মা॑ দে॒বা অ॑বন্তু শো॒ভায়ৈ॑ পি॒তরোঽনু॑মদন্তু
|| ওঁ শান্তিঃ॒ শান্তিঃ॒ শান্তিঃ॑ ||
8 ঋগ্বেদ
ঋ॒জু॒নী॒তী নো॒ বরু॑ণো মি॒ত্রো ন॑য়তু বি॒দ্বান্ |
অ॒র্য॒মা দে॒বৈঃ স॒জোষাঃ॑ || 1 | 090 | 01
তে হি বস্বো॒ বস॑বানা॒স্তে অপ্র॑মূরা॒ মহো॑ভিঃ |
ব্র॒তা র॑ক্ষন্তে বি॒শ্বাহা॑ || 1 | 090 | 02
তে অ॒স্মভ্যং॒ শর্ম॑ যংসন্ন॒মৃতা॒ মর্ত্যে॑ভ্যঃ |
বাধ॑মানা॒ অপ॒ দ্বিষঃ॑ || 1 | 090 | 03
বি নঃ॑ প॒থঃ সু॑বি॒তায়॑ চি॒য়ন্ত্বিন্দ্রো॑ ম॒রুতঃ॑ |
পূ॒ষা ভগো॒ বন্দ্যা॑সঃ || 1 | 090 | 04
উ॒ত নো॒ ধিয়ো॒ গোঅ॑গ্রাঃ॒ পূষ॒ন্বিষ্ণ॒বেব॑য়াবঃ |
কর্তা॑ নঃ স্বস্তি॒মতঃ॑ || 1 | 090 | 05
মধু॒ বাতা॑ ঋতায়॒তে মধু॑ ক্ষরন্তি॒ সিন্ধ॑বঃ |
মাধ্বী॑র্নঃ সন্॒ত্বোষ॑ধীঃ || 1 | 090 | 06
মধু॒ নক্ত॑মু॒তোষসো॒ মধু॑ম॒ৎপার্থি॑বং॒ রজঃ॑ |
মধু॒ দ্যৌর॑স্তু নঃ পি॒তা || 1 | 090 | 07
মধু॑মান্নো॒ বন॒স্পতি॒র্মধু॑মাঁ অস্তু॒ সূর্যঃ॑ |
মাধ্বী॒র্গাবো॑ ভবন্তু নঃ || 1 | 090 | 08
শং নো॑ মি॒ত্রঃ শং বরু॑ণঃ॒ শং নো॑ ভবত্বর্য॒মা |
শং ন॒ ইন্দ্রো॒ বৃহ॒স্পতিঃ॒ শং নো॒ বিষ্ণু॑রুরুক্র॒মঃ || 1 | 090 | 09
9 ঋগ্বেদ ঐতরেয়োপনিষৎ |
ওঁ বাঙ্মে॒ মন॑সি॒ প্রতি॑ষ্ঠিতা॒ মনো॑ মে॒ বাচি॒
প্রতি॑ষ্ঠিতমা॒বিরা॒বীর্ম॑ এধি বে॒দস্য ম॒ আণী᳚স্থঃ শ্রু॒তং মে॒ মা
প্রহা॑সীর॒নেনা॒ধীতে॑নাহোরা॒ত্রান্ সন্দ॑ধাম্যৃ॒তং ব॑দিষ্যামি স॒ত্যং ব॑দিষ্যামি॒
তন্মাম॑বতু॒ তদ্ব॒ক্তার॑মব॒ত্বব॑তু॒ মামব॑তু ব॒ক্তার॒মব॑তু ব॒ক্তারং᳚ ||
ওঁ শান্তিঃ॒ শান্তিঃ॒ শান্তিঃ॑ ||
10 শুক্লয়জুর্বেদ ঈশাবাস্যোপনিষৎ বৃহদারণ্যকোপনিষৎ
ওঁ পূর্ণ॒মদঃ॒ পূর্ণ॒মিদং॒ পূর্ণা॒ৎপূর্ণ॒মুদ॒চ্যতে | পূর্ণ॒স্য
পূর্ণ॒মাদা॒য় পূর্ণ॒মেবাবশি॒ষ্যতে || ওঁ শান্তিঃ॒ শান্তিঃ॒ শান্তিঃ॒ ||
11 রুদ্রপ্রশ্নঃ
ওঁ ইডা॑ দেব॒হূর্মনু॑র্যজ্ঞ॒নীর্বৃহ॒স্পতি॑রুক্থাম॒দানি॑
শꣳসিষ॒দ্বিশ্বে॑দে॒বাঃ সূ᳚ক্ত॒বাচঃ॒
পৃথি॑বীমাত॒র্মা মা॑ হিꣳসী॒র্মধু॑ মনিষ্যে॒
মধু॑ জনিষ্যে॒ মধু॒ বক্ষ্যামি॒ মধু॑ বদিষ্যামি॒
মধু॒মতীং দে॒বেভ্যো॒ বাচ॑মুদ্যাসꣳ শুশ্রূ॒ষেণ্যাং᳚
মনু॒ষ্যে᳚ভ্য॒স্তং মা॑ দে॒বা অ॑বন্তু শো॒ভায়ৈ॑
পি॒তরোঽনু॑মদন্তু ||
ওঁ শান্তিঃ॒ শান্তিঃ॒ শান্তিঃ॑ ||
12 ঘোষাশান্তিঃ
ওঁ শং নো॒ বাতঃ॑ পবতাং মাত॒রিশ্বা॒ শং ন॑স্তপতু॒ সূর্যঃ॑ | অহা॑নি॒ শং ভ॑বন্তু
ন॒শ্শং+ রাত্রিঃ॒ প্রতি॑ ধীয়তাং | শমু॒ষানো॒ ব্যু॑চ্ছতু॒ শমা॑দি॒ত্য উদে॑তু নঃ |
শি॒বা ন॒শ্শন্ত॑মাভব সুমৃডী॒কা সর॑স্বতি |
মাতে॒ ব্যো॑ম সন্॒দৃশি॑ | ইডা॑য়ৈ॒বাস্ত্ব॑সি বাস্তু॒ মদ্বা᳚স্তু॒মন্তো॑ ভূয়াস্ম॒
মা বাস্তো᳚-শ্ছিথ্স্মহ্যবা॒স্তুস্স ভূ॑য়া॒দ্যো᳚ঽস্মান্দ্বেষ্টি॒ যং চ॑ ব॒য়ং দ্বি॒ষ্মঃ |
প্র॒তি॒ষ্ঠাসি॑ প্রতি॒ষ্ঠাবন্॑তো ভূয়াস্ম॒মা
প্র॑তি॒ষ্ঠায়া᳚-শ্ছিথ্স্মহ্যপ্রতি॒ষ্ঠস্স ভূ॑য়া॒দ্যো᳚ঽস্মান্দ্বেষ্টি॒ যং চ॑ ব॒য়ং
দ্বি॒ষ্মঃ | আবা॑তবাহি ভেষ॒জং বিবা॑তবাহি॒ যদ্রপঃ॑ | ত্বং+ হি বি॒শ্বভে॑ষজো
দে॒বানাং᳚ দূ॒ত ঈয়॑সে | দ্বাবি॒মৌ বাতৌ॑ বাত॒ আসিন্ধো॒রাপ॑রা॒বতঃ॑ ||
দক্ষং॑ মে অ॒ন্য আ॒বাতু॒ পরা॒ন্যোবা॑তু॒ যদ্রপঃ॑ | যদ॒দোবা॑ততে
গৃ॒হে॑ঽমৃত॑স্য নি॒ধির্হি॒তঃ | ততো॑ নো দেহি জী॒বসে॒ ততো॑ নো ধেহি ভেষ॒জং
| ততো॑ নো॒ মহ॒ আব॑হ॒ বাত॒ আবা॑তু ভেষ॒জং |
শম্॒ভূর্ম॑য়ো॒ভূর্নো॑ হৃ॒দেপ্রণ॒ আয়ূং+ষি তারিষৎ | ইন্দ্র॑স্য গৃ॒হো॑ঽসি॒ তং
ত্বা॒ প্রপ॑দ্যে॒ সগু॒স্সাশ্বঃ॑ | স॒হ যন্মে॒ অস্তি॒ তেন॑ | ভূঃ প্রপ॑দ্যে॒ ভুবঃ॒
প্রপ॑দ্যে॒ সুবঃ॒ প্রপ॑দ্যে॒ ভূর্ভুব॒স্সুবঃ॒ প্রপ॑দ্যে বা॒য়ুং প্রপ॒দ্যেনা᳚র্তাং
দে॒বতাং॒ প্রপ॒দ্যেঽশ্মা॑নমাখ॒ণং প্রপ॑দ্যে প্র॒জাপ॑তের্ব্রহ্মকো॒শং
ব্রহ্ম॒প্রপ॑দ্য॒ ওঁ প্রপ॑দ্যে |
অন্॒তরি॑ক্ষং ম উ॒র্বন্॑তরং॑ বৃ॒হদ॒গ্নয়ঃ॒ পর্ব॑তাশ্চ॒ যয়া॒ বাতঃ॑
স্ব॒স্ত্যা স্ব॑স্তি॒মান্তয়া᳚ স্ব॒স্ত্যা স্ব॑স্তি॒মান॑সানি |
প্রাণা॑পানৌ মৃ॒ত্যোর্মা॑পাতং॒ প্রাণা॑পানৌ॒ মা মা॑ হাসিষ্টং॒ ময়ি॑ মে॒ধাং ময়ি॑
প্র॒জাং ময়্য॒গ্নিস্তেজো॑ দধাতু॒ ময়ি॑ মে॒ধাং ময়ি॑ প্র॒জাং ময়ীন্দ্র॑ ইন্দ্রি॒য়ং
দ॑ধাতু॒ ময়ি॑ মে॒ধাং ময়ি॑ প্র॒জাং ময়ি॒ সূর্যো॒ ভ্রাজো॑ দধাতু ||
দ্যু॒ভি-র॒ক্তুভিঃ॒ পরি॑পাতম॒স্মানরি॑ষ্টেভিরশ্বিনা॒ সৌভ॑গেভিঃ | তন্নো॑
মি॒ত্রো বরু॑ণো মামহন্তা॒মদি॑তিঃ॒ সিন্ধুঃ॑ পৃথি॒বী উ॒তদ্যৌঃ | কয়া॑নশ্চি॒ত্র
আভু॑বদূ॒তী স॒দাবৃ॑ধ॒স্সখা᳚ |
কয়া॒শচি॑ষ্ঠয়া বৃ॒তা | কস্ত্বা॑ স॒ত্যো মদা॑নাং॒ মং+হি॑ষ্ঠো মথ্স॒দন্ধ॑সঃ |
দৃ॒ঢা চি॑দা॒রুজে॒ বসু॑ | অ॒ভীষুণ॒স্সখী॑নামবি॒তা জ॑রিতৄ॒ণাং |
শ॒তং ভ॑বাস্যূ॒তিভিঃ॑ | বয়॑স্সুপ॒র্ণা উপ॑সেদু॒রিন্দ্রং॑ প্রি॒য়মে॑ধা॒ ঋষ॑য়ো॒
নাধ॑মানাঃ | অপ॑ধ্বান্॒তমূ᳚র্ণু॒হি পূ॒র্ধিচক্ষু॑র্মুমু॒গ্ধ্য॑স্মন্নি॒ধয়ে॑ব
ব॒দ্ধান্ |
শং নো॑ দে॒বীর॒ভিষ্ট॑য়॒ আপো॑ ভবন্তু পী॒তয়ে᳚ | শংয়োর॒ভিস্র॑বন্তু নঃ ||
ঈশা॑না॒বার্যা॑ণাং॒ ক্ষয়ন্॑তীশ্চর্ষণী॒নাং | অ॒পো যা॑চামি ভেষ॒জং |
সু॒মি॒ত্রান॒ আপ॒ ওষ॑ধয়ঃ সন্তু দুর্মি॒ত্রাস্তস্মৈ॑ ভূয়াসু॒র্যো᳚ঽস্মান্দ্বেষ্টি॒
যং চ॑ ব॒য়ং দ্বি॒ষ্মঃ |
আপো॒ হিষ্ঠা ম॑য়ো॒ভুব॒স্তা ন॑ ঊ॒র্জে দ॑ধাতন | ম॒হেরণা॑য়॒ চক্ষ॑সে |
যো বঃ॑ শি॒বত॑মো রস॒স্তস্য॑ ভাজয়তে॒ হ নঃ॑ | উ॒শ॒তীরি॑ব মা॒ত॑রঃ |
তস্মা॒ অরঙ্॑গমামবো॒ যস্য॒ ক্ষয়া॑য়॒ জিন্ব॑থ | আপো॑ জ॒নয়॑থা চ নঃ |
পৃ॒থি॒বী শান্॒তা সাগ্নিনা॑ শান্॒তা সামে॑ শান্॒তা শুচং+॑ শময়তু | অন্॒তরি॑ক্ষং+
শান্॒তং তদ্বা॒য়ুনা॑ শান্॒তং তন্মে॑ শান্॒তং+ শুচং+॑ শময়তু | দ্যৌশ্শান্॒তা
সাদি॒ত্যেন॑ শান্॒তা সা মে॑ শান্॒তা শুচং+॑ শময়তু |
পৃ॒থি॒বী শান্তি॑রন্॒তরি॑ক্ষং॒+॒
শান্তি॒-র্দ্যৌ-শ্শান্তি॒র্দিশ॒-শ্শান্তি॑-রবান্তরদি॒শা-শ্শান্তি॑-র॒গ্নি-
শ্শান্তি॑-র্বা॒য়ু-শ্শান্তি॑-রাদি॒ত্য-শ্শান্তি॑-শ্চন্॒দ্রমা॒-শ্শান্তি॒-
র্নক্ষ॑ত্রাণি॒-শান্তি॒-রাপ॒-শ্শান্তি॒-রোষ॑ধয়॒-শ্শান্তি॒-
র্বন॒স্পত॑য়॒-শ্শান্তি॒-র্গৌ-শ্শান্তি॑-র॒জা-শান্তি॒-রশ্ব॒-শ্শান্তিঃ॒
পুরু॑ষ॒-শ্শান্তি॒-র্ব্রহ্ম॒-শ্শান্তি॑-র্ব্রাহ্ম॒ণ-শ্শান্তি॒-শ্শান্তি॑-রে॒ব
শান্তি-শ্শান্তি॑-র্মে অস্তু॒ শান্তিঃ॑ |
তয়া॒হꣳ শান্॒ত্যা স॑র্বশান্॒ত্যা মহ্যং॑ দ্বি॒পদে॒ চতু॑ষ্পদে চ॒ শান্তিং॑ করোমি
শান্তি॑র্মে অস্তু॒ শান্তিঃ॑ ||
এহ॒ শ্রীশ্চ॒ হ্রীশ্চ॒ ধৃতি॑শ্চ॒ তপো॑ মে॒ধা প্র॑তি॒ষ্ঠা শ্র॒দ্ধা স॒ত্যং
ধর্ম॑শ্চৈ॒তানি॒ মোত্তি॑ষ্ঠন্ত॒-মনূত্তি॑ষ্ঠন্তু॒ মা মা॒গ্॒ শ্রীশ্চ॒ হ্রীশ্চ॒
ধৃতি॑শ্চ॒ তপো॑ মে॒ধা প্র॑তি॒ষ্ঠা শ্র॒দ্ধা স॒ত্যং ধর্ম॑শ্চৈ॒তানি॑ মা॒
মা হা॑সিষুঃ |
উদায়ু॑ষা স্বা॒য়ুষোদোষ॑ধীনাং॒+ রসে॒নোৎপ॒র্জন্য॑স্য॒
শুষ্মে॒ণোদ॑স্থাম॒মৃতাং॒+॒ অনু॑ | তচ্চক্ষু॑র্দে॒বহি॑তং
পু॒রস্তা᳚চ্ছু॒ক্রমু॒চ্চর॑ৎ |
পশ্যে॑ম শ॒রদ॑শ্শ॒তং জীবে॑ম শ॒রদ॑শ্শ॒তং নন্দা॑ম শ॒রদ॑শ্শ॒তং
মোদা॑ম শ॒রদ॑শ্শ॒তং ভবা॑ম শ॒রদ॑শ্শ॒তং+ শৃ॒ণবা॑ম
শ॒রদ॑শ্শ॒তং প্রব্র॑বাম শ॒রদ॑শ্শ॒তমজী॑তাস্স্যাম শ॒রদ॑শ্শ॒তং
জ্যোক্চ॒ সূর্যং॑ দৃ॒শে |
য উদ॑গান্মহ॒তোঽর্ণবা᳚দ্বি॒ভ্রাজ॑মানস্সরি॒রস্য॒ মধ্যা॒থ্সমা॑ বৃষ॒ভো
লো॑হিতা॒ক্ষস্সূর্যো॑ বিপ॒শ্চিন্মন॑সা পুনাতু ||
ব্রহ্ম॑ণ॒শ্চোত॑ন্যসি॒ ব্রহ্ম॑ণ আ॒ণীস্থো॒ ব্রহ্ম॑ণ আ॒বপ॑নমসি ধারি॒তেয়ং
পৃ॑থি॒বী ব্রহ্ম॑ণা ম॒হী ধা॑রি॒তমে॑নেন ম॒হদন্॒তরি॑ক্ষং॒ দিবং॑ দাধার
পৃথি॒বীং+ সদে॑বাং॒ যদ॒হং বেদ॒ তদ॒হং ধা॑রয়াণি॒ মামদ্বেদোঽধি॒ বিস্র॑সৎ |
মে॒ধা॒ম॒নী॒ষে মাবি॑শতাং+ স॒মীচী॑ ভূ॒তস্য॒ ভব্য॒স্যাব॑রুধ্যৈ॒
সর্ব॒মায়ু॑রয়াণি॒ সর্ব॒মায়ু॑রয়াণি |
আ॒ভির্গী॒র্ভির্যদতো॑ন ঊ॒নমাপ্যা॑য়য হরিবো॒ বর্ধ॑মানঃ | য॒দা স্তো॒তৃভ্যো॒
মহি॑ গো॒ত্রা রু॒জাসি॑ ভূয়িষ্ঠ॒ভাজো॒ অধ॑ তে স্যাম | ব্রহ্ম॒ প্রাবা॑দিষ্ম॒ তন্নো॒
মা হা॑সীৎ || ওঁ শান্তিঃ॒ শান্তিঃ॒ শান্তিঃ॑ ||
ওঁ সং ত্বা॑ সিঞ্চামি॒ যজু॑ষা প্র॒জামায়ু॒র্ধনং॑ চ || ওঁ শান্তিঃ॒ শান্তিঃ॒ শান্তিঃ॑ ||
13 সামবেদ কেনোপনিষৎ ছান্দোগ্যোপনিষৎ
ওঁ আপ্যায়ন্তু মমাঙ্গানি বাক্প্রাণশ্চক্ষুঃশ্রোত্রং |
অথো বলমিন্দ্রিয়াণি চ সর্বাণি |
সর্বং ব্রহ্মৌপনিষদং মাঽহং ব্রহ্মনিরাকুর্যাং |
মা মা ব্রহ্মনিরাকরোদনিরাকরণমস্তু |
অনিরাকরণং মেঽস্তু |
তদাত্মনি নিরতে য উপনিষৎসু ধর্মাস্তে ময়ি সন্তু |
তে ময়ি সন্তু ||
ওঁ শান্তিঃ॒ শান্তিঃ॒ শান্তিঃ॑ ||
ওঁ শান্তিঃ শান্তিঃ শান্তিঃ ||