శ్రీమత్కాంచీమునిం వందే కమలాపతినందనమ్ |
వరదాంఘ్రిసదాసంగరసాయనపరాయణమ్ ||
దేవరాజదయాపాత్రం శ్రీకాంచీపూర్ణముత్తమమ్ |
రామానుజమునేర్మాన్యం వందేఽహం సజ్జనాశ్రయమ్ ||
నమస్తే హస్తిశైలేశ శ్రీమన్నంబుజలోచన |
శరణం త్వాం ప్రపన్నోఽస్మి ప్రణతార్తిహరాచ్యుత || ౧ ||
సమస్తప్రాణిసంత్రాణప్రవీణ కరుణోల్బణ |
విలసంతు కటాక్షాస్తే మయ్యస్మిన్ జగతాం పతే || ౨ ||
నిందితాచారకరణం నివృత్తం కృత్యకర్మణః |
పాపీయాంసమమర్యాదం పాహి మాం వరదప్రభో || ౩ ||
సంసారమరుకాంతారే దుర్వ్యాధివ్యాఘ్రభీషణే |
విషయక్షుద్రగుల్మాఢ్యే తృషాపాదపశాలిని || ౪ ||
పుత్రదారగృహక్షేత్రమృగతృష్ణాంబుపుష్కలే |
కృత్యాకృత్యవివేకాంధం పరిభ్రాంతమితస్తతః || ౫ ||
అజస్రం జాతతృష్ణార్తమవసన్నాంగమక్షమమ్ |
క్షీణశక్తిబలారోగ్యం కేవలం క్లేశసంశ్రయమ్ || ౬ ||
సంతప్తం వివిధైర్దుఃఖైర్దుర్వచైరేవమాదిభిః |
దేవరాజ దయాసింధో దేవదేవ జగత్పతే || ౭ ||
త్వదీక్షణసుధాసింధువీచివిక్షేపశీకరైః |
కారుణ్యమారుతానీతైః శీతలైరభిషించ మామ్ || ౮ ||
ఇతి శ్రీకాంచీపూర్ణ విరచితం శ్రీ దేవరాజాష్టకమ్ ||