శ్రీమాన్ వేంకటనాథార్యః కవితార్కికకేసరీ |
వేదాంతాచార్యవర్యో మే సన్నిధత్తాం సదా హృది ||
అహం మద్రక్షణభరో మద్రక్షణఫలం తథా |
న మమ శ్రీపతేరేవేత్యాత్మానం నిక్షిపేత్ బుధః || ౧ ||
న్యస్యామ్యకించనః శ్రీమన్ అనుకూలోఽన్యవర్జితః |
విశ్వాసప్రార్థనాపూర్వం ఆత్మరక్షాభరం త్వయి || ౨ ||
స్వామీ స్వశేషం స్వవశం స్వభరత్వేన నిర్భరమ్ |
స్వదత్తస్వధియా స్వార్థం స్వస్మిన్ న్యస్యతి మాం స్వయమ్ || ౩ ||
శ్రీమన్నభీష్టవరద త్వామస్మి శరణం గతః |
ఏతద్దేహావసానే మాం త్వత్పాదం ప్రాపయ స్వయమ్ || ౪ ||
త్వచ్ఛేషత్వే స్థిరధియం త్వత్ ప్రాప్త్యేకప్రయోజనమ్ |
నిషిద్ధకామ్యరహితం కురు మాం నిత్యకింకరమ్ || ౫ ||
దేవీభూషణహేత్యాదిజుష్టస్య భగవంస్తవ |
నిత్యం నిరపరాధేషు కైంకర్యేషు నియుంక్ష్వ మామ్ || ౬ ||
మాం మదీయం చ నిఖిలం చేతనాఽచేతనాత్మకమ్ |
స్వకైంకర్యోపకరణం వరద స్వీకురు స్వయమ్ || ౭ ||
త్వదేకరక్ష్యస్య మమ త్వమేవ కరుణాకర |
న ప్రవర్తయ పాపాని ప్రవృత్తాని నివర్తయ || ౮ ||
అకృత్యానాం చ కరణం కృత్యానాం వర్జనం చ మే |
క్షమస్వ నిఖిలం దేవ ప్రణతార్తిహర ప్రభో || ౯ ||
శ్రీమాన్ నియతపంచాంగం మద్రక్షణభరార్పణమ్ |
అచీకరత్ స్వయం స్వస్మిన్ అతోఽహమిహ నిర్భరః || ౧౦ ||
మంగళశ్లోకః –
సంసారావర్తవేగప్రశమనశుభదృగ్దేశికప్రేక్షితోహం
సంత్యక్తోన్యైరుపాయైరనుచితచరితేశ్వద్య శాంతాభిసంధిః |
నిశ్శంకస్తత్త్వదృష్ట్వా నిరవధికదయం ప్రార్థ్య సంరక్షకం త్వాం
న్యస్య త్వత్పాదపద్మే వరద నిజభరం నిర్భరో నిర్భయోస్మి ||
ఇతి శ్రీమద్వేంకటనాథస్య వేదాంతాచార్యస్య కృతిషు న్యాస దశకమ్ ||