అతుల్యవీర్యముగ్రతేజసం సురం
సుకాంతిమింద్రియప్రదం సుకాంతిదమ్ |
కృపారసైకపూర్ణమాదిరూపిణం
దివాకరం సదా భజే సుభాస్వరమ్ || ౧ ||
ఇనం మహీపతిం చ నిత్యసంస్తుతం
కలాసువర్ణభూషణం రథస్థితమ్ |
అచింత్యమాత్మరూపిణం గ్రహాశ్రయం
దివాకరం సదా భజే సుభాస్వరమ్ || ౨ ||
ఉషోదయం వసుప్రదం సువర్చసం
విదిక్ప్రకాశకం కవిం కృపాకరమ్ |
సుశాంతమూర్తిమూర్ధ్వగం జగజ్జ్వలం
దివాకరం సదా భజే సుభాస్వరమ్ || ౩ ||
ఋషిప్రపూజితం వరం వియచ్చరం
పరం ప్రభుం సరోరుహస్య వల్లభమ్ |
సమస్తభూమిపం చ తారకాపతిం
దివాకరం సదా భజే సుభాస్వరమ్ || ౪ ||
గ్రహాధిపం గుణాన్వితం చ నిర్జరం
సుఖప్రదం శుభాశయం భయాపహమ్ |
హిరణ్యగర్భముత్తమం చ భాస్కరం
దివాకరం సదా భజే సుభాస్వరమ్ || ౫ ||
ఇతి శ్రీ దివాకర పంచకమ్ |