వినోదమోదమోదితా దయోదయోజ్జ్వలాంతరా
నిశుంభశుంభదంభదారణే సుదారుణాఽరుణా |
అఖండగండదండముండమండలీవిమండితా
ప్రచండచండరశ్మిరశ్మిరాశిశోభితా శివా || ౧ ||
అమందనందినందినీ ధరాధరేంద్రనందినీ
ప్రతీర్ణశీర్ణతారిణీ సదార్యకార్యకారిణీ |
తదంధకాంతకాంతకప్రియేశకాంతకాంతకా
మురారికామచారికామమారిధారిణీ శివా || ౨ ||
అశేషవేషశూన్యదేశభర్తృకేశశోభితా
గణేశదేవతేశశేషనిర్నిమేషవీక్షితా |
జితస్వశింజితాఽలికుంజపుంజమంజుగుంజితా
సమస్తమస్తకస్థితా నిరస్తకామకస్తవా || ౩ ||
ససంభ్రమం భ్రమం భ్రమం భ్రమంతి మూఢమానవా
ముదా బుధాః సుధాం విహాయ ధావమానమానసాః |
అధీనదీనహీనవారిహీనమీనజీవనా
దదాతు శంప్రదాఽనిశం వశంవదార్థమాశిషమ్ || ౪ ||
విలోలలోచనాంచితోచితైశ్చితా సదా గుణై-
-రపాస్యదాస్యమేవమాస్యహాస్యలాస్యకారిణీ |
నిరాశ్రయాఽఽశ్రయాశ్రయేశ్వరీ సదా వరీయసీ
కరోతు శం శివాఽనిశం హి శంకరాంకశోభినీ || ౫ ||
ఇతి శ్రీమచ్ఛంకరాచార్య విరచితం శ్రీ పార్వతీ పంచకమ్ |