వరదాప్యహేతుకరుణా-
-జన్మావనిరపి పయోజభవజాయే |
కిం కురుషే న కృపాం మయి
వద వద వాగ్వాదిని స్వాహా || ౧ ||
కిం వా మమాస్తి మహతీ
పాపతతిస్తత్ప్రభేదనే తరసా |
కిం వా న తేఽస్తి శక్తిర్వద
వద వాగ్వాదిని స్వాహా || ౨ ||
కిం జీవః పరమశివా-
-ద్భిన్నోఽభిన్నోఽథ భేదశ్చ |
ఔపాధికః స్వతో వా
వద వద వాగ్వాదిని స్వాహా || ౩ ||
వియదాదికం జగదిదం
సర్వం మిథ్యాఽథవా సత్యమ్ |
మిథ్యాత్వధీః కథం స్యా-
-ద్వద వద వాగ్వాదిని స్వాహా || ౪ ||
జ్ఞానం కర్మ చ మిలితం
హేతుర్మోక్షేఽథవా జ్ఞానమ్ |
తజ్జ్ఞానం కేన భవే-
-ద్వద వద వాగ్వాదిని స్వాహా || ౫ ||
జ్ఞానం విచారసాధ్యం
కిం వా యోగేన కర్మసాహస్రైః |
కీదృక్సోఽపి విచారో
వద వద వాగ్వాదిని స్వాహా || ౬ ||
ఇతి శ్రీసచ్చిదానందశివాభినవనృసింహభారతీస్వామిభిః విరచితం శ్రీ వాగ్వాదినీ షట్కమ్ ||