భృగురువాచ |
బ్రహ్మన్ బ్రహ్మవిదాం శ్రేష్ఠ బ్రహ్మజ్ఞానవిశారద |
సర్వజ్ఞ సర్వజనక సర్వపూజకపూజిత || ౧ ||
సరస్వత్యాశ్చ కవచం బ్రూహి విశ్వజయం ప్రభో |
అయాతయామమంత్రాణాం సమూహో యత్ర సంయుతః || ౨ ||
బ్రహ్మోవాచ |
శృణు వత్స ప్రవక్ష్యామి కవచం సర్వకామదమ్ |
శ్రుతిసారం శ్రుతిసుఖం శ్రుత్యుక్తం శ్రుతిపూజితమ్ || ౩ ||
ఉక్తం కృష్ణేన గోలోకే మహ్యం వృందావనే వనే |
రాసేశ్వరేణ విభునా రాసే వై రాసమండలే || ౪ ||
అతీవ గోపనీయం చ కల్పవృక్షసమం పరమ్ |
అశ్రుతాద్భుతమంత్రాణాం సమూహైశ్చ సమన్వితమ్ || ౫ ||
యద్ధృత్వా పఠనాద్బ్రహ్మన్ బుద్ధిమాంశ్చ బృహస్పతిః |
యద్ధృత్వా భగవాంఛుక్రః సర్వదైత్యేషు పూజితః || ౬ ||
పఠనాద్ధారణాద్వాగ్మీ కవీంద్రో వాల్మికో మునిః |
స్వాయంభువో మనుశ్చైవ యద్ధృత్వా సర్వపూజితః || ౭ ||
కణాదో గౌతమః కణ్వః పాణినిః శాకటాయనః |
గ్రంథం చకార యద్ధృత్వా దక్షః కాత్యాయనః స్వయమ్ || ౮ ||
ధృత్వా వేదవిభాగం చ పురాణాన్యఖిలాని చ |
చకార లీలామాత్రేణ కృష్ణద్వైపాయనః స్వయమ్ || ౯ ||
శాతాతపశ్చ సంవర్తో వశిష్ఠశ్చ పరాశరః |
యద్ధృత్వా పఠనాద్గ్రంథం యాజ్ఞవల్క్యశ్చకార సః || ౧౦ ||
ఋష్యశృంగో భరద్వాజశ్చాస్తీకో దేవలస్తథా |
జైగీషవ్యోఽథ జాబాలిర్యద్ధృత్వా సర్వపూజితః || ౧౧ ||
కవచస్యాస్య విప్రేంద్ర ఋషిరేష ప్రజాపతిః |
స్వయం బృహస్పతిశ్ఛందో దేవో రాసేశ్వరః ప్రభుః || ౧౨ ||
సర్వతత్త్వపరిజ్ఞానే సర్వార్థేఽపి చ సాధనే |
కవితాసు చ సర్వాసు వినియోగః ప్రకీర్తితః || ౧౩ ||
– కవచం –
ఓం హ్రీం సరస్వత్యై స్వాహా శిరో మే పాతు సర్వతః |
శ్రీం వాగ్దేవతాయై స్వాహా భాలం మే సర్వదాఽవతు || ౧౪ ||
ఓం సరస్వత్యై స్వాహేతి శ్రోత్రం పాతు నిరంతరమ్ |
ఓం శ్రీం హ్రీం భారత్యై స్వాహా నేత్రయుగ్మం సదాఽవతు || ౧౫ ||
ఓం హ్రీం వాగ్వాదిన్యై స్వాహా నాసాం మే సర్వతోఽవతు |
హ్రీం విద్యాధిష్ఠాతృదేవ్యై స్వాహా శ్రోత్రం సదాఽవతు || ౧౬ ||
ఓం శ్రీం హ్రీం బ్రాహ్మ్యై స్వాహేతి దంతపంక్తీః సదాఽవతు |
ఐమిత్యేకాక్షరో మంత్రో మమ కంఠం సదాఽవతు || ౧౭ ||
ఓం శ్రీం హ్రీం పాతు మే గ్రీవాం స్కంధం మే శ్రీం సదాఽవతు |
శ్రీం విద్యాధిష్ఠాతృదేవ్యై స్వాహా వక్షః సదాఽవతు || ౧౮ ||
ఓం హ్రీం విద్యాస్వరూపాయై స్వాహా మే పాతు నాభికామ్ |
ఓం హ్రీం క్లీం వాణ్యై స్వాహేతి మమ పృష్ఠం సదాఽవతు || ౧౯ ||
ఓం సర్వవర్ణాత్మికాయై పాదయుగ్మం సదాఽవతు |
ఓం వాగధిష్ఠాతృదేవ్యై సర్వాంగం మే సదాఽవతు || ౨౦ ||
ఓం సర్వకంఠవాసిన్యై స్వాహా ప్రాచ్యాం సదాఽవతు |
ఓం హ్రీం జిహ్వాగ్రవాసిన్యై స్వాహాఽగ్నిదిశి రక్షతు || ౨౧ ||
ఓం ఐం హ్రీం శ్రీం సరస్వత్యై బుధజనన్యై స్వాహా |
సతతం మంత్రరాజోఽయం దక్షిణే మాం సదాఽవతు || ౨౨ ||
ఓం హ్రీం శ్రీం త్ర్యక్షరో మంత్రో నైరృత్యాం మే సదాఽవతు |
కవిజిహ్వాగ్రవాసిన్యై స్వాహా మాం వారుణేఽవతు || ౨౩ ||
ఓం సదంబికాయై స్వాహా వాయవ్యే మాం సదాఽవతు |
ఓం గద్యపద్యవాసిన్యై స్వాహా మాముత్తరేఽవతు || ౨౪ ||
ఓం సర్వశాస్త్రవాసిన్యై స్వాహైశాన్యాం సదాఽవతు |
ఓం హ్రీం సర్వపూజితాయై స్వాహా చోర్ధ్వం సదాఽవతు || ౨౫ ||
ఐం హ్రీం పుస్తకవాసిన్యై స్వాహాఽధో మాం సదాఽవతు |
ఓం గ్రంథబీజరూపాయై స్వాహా మాం సర్వతోఽవతు || ౨౬ ||
ఇతి తే కథితం విప్ర సర్వమంత్రౌఘవిగ్రహమ్ |
ఇదం విశ్వజయం నామ కవచం బ్రహ్మరూపకమ్ || ౨౭ ||
పురా శ్రుతం ధర్మవక్త్రాత్ పర్వతే గంధమాదనే |
తవ స్నేహాన్మయాఽఽఖ్యాతం ప్రవక్తవ్యం న కస్యచిత్ || ౨౮ ||
గురుమభ్యర్చ్య విధివద్వస్త్రాలంకారచందనైః |
ప్రణమ్య దండవద్భూమౌ కవచం ధారయేత్సుధీః || ౨౯ ||
పంచలక్షజపేనైవ సిద్ధం తు కవచం భవేత్ |
యది స్యాత్ సిద్ధకవచో బృహస్పతి సమో భవేత్ || ౩౦ ||
మహావాగ్మీ కవీంద్రశ్చ త్రైలోక్యవిజయీ భవేత్ |
శక్నోతి సర్వం జేతుం స కవచస్య ప్రభావతః || ౩౧ ||
ఇదం తే కాణ్వశాఖోక్తం కథితం కవచం మునే |
స్తోత్రం పూజావిధానం చ ధ్యానం వై వందనం తథా || ౩౨ ||
ఇతి శ్రీబ్రహ్మవైవర్తే మహాపురాణే ప్రకృతిఖండే నారదనారాయణసంవాదే చతుర్థోఽధ్యాయే శ్రీ సరస్వతీ కవచమ్ ||