ఋషయ ఊచుః |
కథం సారస్వతప్రాప్తిః కేన ధ్యానేన సువ్రత |
మహాసరస్వతీ యేన తుష్టా భవతి తద్వద || ౧ ||

అశ్వలాయన ఉవాచ |
శృణ్వంతు ఋషయః సర్వే గుహ్యాద్గుహ్యతమం మహత్ |
దశశ్లోకీస్తుతిమిమాం వదామి ధ్యానపూర్వకమ్ || ౨ ||

ధ్యానం –
అంకుశం చాక్షసూత్రం చ పాశం పుస్తం చ ధారిణీమ్ |
ముక్తాహారైః సమాయుక్తాం దేవీం ధ్యాయేచ్చతుర్భుజామ్ || ౩ ||

సితేన దర్పణాభేన వక్త్రేణ పరిభూషితామ్ |
సుస్తనీం వేదిమధ్యాం తాం చంద్రార్ధకృతశేఖరామ్ || ౪ ||

జటాకలాపసంయుక్తాం పూర్ణచంద్రనిభాననామ్ |
త్రిలోచనీం మహాదేవీం స్వర్ణనూపురధారిణీమ్ || ౫ ||

కటకస్వర్ణరత్నాఢ్యమహావలయభూషితామ్ |
కంబుకంఠీం సుతామ్రోష్టీం సర్వాభరణభూషితామ్ || ౬ ||

కేయూరైర్మేఖలాద్యైశ్చ ద్యోతయంతీం జగత్త్రయమ్ |
శబ్దబ్రహ్మారణిం ధ్యాయేద్ధ్యానకామః సమాహితః || ౭ ||

వక్ష్యే సారస్వతం స్తోత్రం వాక్ప్రవృత్తికరం శుభమ్ |
లక్ష్మీవివర్ధనం చైవ వివాదే విజయప్రదమ్ || ౮ ||

పరబ్రహ్మాత్మికాం దేవీం భుక్తిముక్తిఫలప్రదామ్ |
ప్రణమ్య స్తౌమి తామేవ జ్ఞానశక్తిం సరస్వతీమ్ || ౯ ||

స్తుతిః –
యా వేదాంతోక్తతత్త్వైకస్వరూపా పరమార్థతః |
నామరూపాత్మికా వ్యక్తా సా మాం పాతు సరస్వతీ || ౧౦ ||

యా సాంగోపాంగవేదేషు చతుర్ష్వేకైవ గీయతే |
అద్వైతా బ్రహ్మణః శక్తిః సా మాం పాతు సరస్వతీ || ౧౧ ||

యా వర్ణపదవాక్యార్థస్వరూపేణైవ వర్తతే |
అనాదినిధనానంతా సా మాం పాతు సరస్వతీ || ౧౨ ||

అధ్యాత్మమధిదేవం చ దేవానాం సమ్యగీశ్వరీ |
ప్రత్యగాత్మేవ సంతీ యా సా మాం పాతు సరస్వతీ || ౧౩ ||

అంతర్యామ్యాత్మనా విశ్వం త్రైలోక్యం యా నియచ్ఛతి |
రుద్రాదిత్యాదిరూపస్థా సా మాం పాతు సరస్వతీ || ౧౪ ||

యా ప్రత్యగ్దృష్టిభిర్జ్ఞానైర్వ్యజ్యమానానుభూయతే |
వ్యాపినీ జ్ఞప్తిరూపైకా సా మాం పాతు సరస్వతీ || ౧౫ ||

నామజాత్యాదిభిర్భేదైరష్టధా యా వికల్పితా |
నిర్వికల్పాత్మికా చైవ సా మాం పాతు సరస్వతీ || ౧౬ ||

వ్యక్తావ్యక్తగిరః సర్వే దేవాద్యా వ్యాహరంతి యామ్ |
సర్వకామదుఘా ధేనుః సా మాం పాతు సరస్వతీ || ౧౭ ||

యాం విదిత్వాఖిలం బంధం నిర్మథ్యామలవర్త్మనా |
యోగీ యాతి పరం స్థానం సా మాం పాతు సరస్వతీ || ౧౮ ||

నామజాత్యాదికం సర్వం యస్యామావిశ్య తాం పునః |
ధ్యాయంతీ బ్రహ్మరూపైకా సా మాం పాతు సరస్వతీ || ౧౯ ||

ఫలశ్రుతిః –
యః కవిత్వం నిరాతంకం భుక్తిం ముక్తిం చ వాంఛతి |
సోఽభ్యర్చ్యైనాం దశశ్లోక్యా భక్త్యా స్తౌతు సరస్వతీమ్ || ౨౦ ||

తస్యైవం స్తువతో నిత్యం సమభ్యర్చ్య సరస్వతీమ్ |
భక్తిశ్రద్ధాభియుక్తస్య షణ్మాసాత్ ప్రత్యయో భవేత్ || ౨౧ ||

తతః ప్రవర్తతే వాణీ స్వేచ్ఛయా లలితాక్షరా |
గద్యపద్యాత్మికా విద్యా ప్రమేయైశ్చ వివర్తతే || ౨౨ ||

అశ్రుతో బుధ్యతే గ్రంథః ప్రాయః సారస్వతః కవిః |
శ్రుతం చ ధారయేదాశు స్ఖలద్వాక్ స్పష్టవాగ్భవేత్ || ౨౩ ||

ప్రఖ్యాతః సర్వలోకేషు వాగ్మీ భవతి పూజితః |
అజితః ప్రతిపక్షాణాం స్వయం జేతాఽధిజాయతే || ౨౪ ||

అయోధ్యైర్వేదబాహ్యైర్వా వివాదే ప్రస్తుతే సతి |
అహం వాచస్పతిర్విష్ణుః శివో వాస్మీతి భావయేత్ || ౨౫ ||

ఏవం భావయతా తేన బృహస్పతిరపి స్వయమ్ |
న శక్నోతి పరం వక్తుం నరేష్వన్యేషు కా కథా || ౨౬ ||

న కాంచన స్త్రియం నిందేత్ న దేవాన్నాపి చ ద్విజాన్ |
అనార్యైర్నాభిభాషేత సర్వత్రైవ క్షమీ భవేత్ || ౨౭ ||

సర్వత్రైవ ప్రియం బ్రూయాత్ యథేచ్ఛాలబ్ధమాత్మనః |
శ్లోకైరేవ తిరస్కృత్య ద్విషంతం ప్రతివాదినమ్ || ౨౮ ||

ప్రతివాదిగజానాం తు సింహో భవతి తద్వచః |
యద్వాగితిద్వ్యృచేనైవ దేవీం యోఽర్చతి సువ్రతః |
తస్య నాసంస్కృతా వాణీ ముఖాదుచ్చారితా క్వచిత్ || ౨౯ ||

ప్రథమం భారతీ నామ ద్వితీయం చ సరస్వతీ |
తృతీయం శారదా దేవీ చతుర్థం కంసమర్దనీ || ౩౦ ||

పంచమం తు జగన్మాతా షష్ఠం చైవ తు పార్వతీ |
సప్తమం చైవ కామక్షీ హ్యష్టమం బ్రహ్మచారిణీ || ౩౧ ||

నవమం చైవ వారాహీ దశమం బ్రహ్మపుత్రికా |
ఏకాదశం చ వాగ్దేవీ ద్వాదశం వరదాంబికా || ౩౨ ||

ద్వాదశైతాని నామాని త్రిసంధ్యం యః పఠేన్నరః |
తస్య సారస్వతం చైవ షణ్మాసేనైవ సిధ్యతి || ౩౩ ||

యస్యాః స్మరణమాత్రేణ వాగ్విభూతిర్విజృంభతే |
సా భారతీ ప్రసన్నాక్షీ రమతాం మన్ముఖాంబుజే || ౩౪ ||

ఇత్యాశ్వలాయనమునిర్నిజగాద దేవ్యాః
స్తోత్రం సమస్తఫలభోగనిధానభూతమ్ |
ఏతత్ పఠన్ ద్విజవరః శుచితాముపైతి
సంధ్యాసు వాంఛితముపైతిన సంశయోఽత్ర || ౩౫ ||

ఇతి అశ్వలాయన ప్రోక్త శ్రీ సరస్వతీ దశశ్లోకీ స్తుతిః ||