బృహస్పతిరువాచ |
సరస్వతి నమస్యామి చేతనాం హృది సంస్థితామ్ |
కంఠస్థాం పద్మయోనిం త్వాం హ్రీంకారాం సుప్రియాం సదా || ౧ ||
మతిదాం వరదాం చైవ సర్వకామఫలప్రదామ్ |
కేశవస్య ప్రియాం దేవీం వీణాహస్తాం వరప్రదామ్ || ౨ ||
మంత్రప్రియాం సదా హృద్యాం కుమతిధ్వంసకారిణీమ్ |
స్వప్రకాశాం నిరాలంబామజ్ఞానతిమిరాపహామ్ || ౩ ||
మోక్షప్రియాం శుభాం నిత్యాం సుభగాం శోభనప్రియామ్ |
పద్మోపవిష్టాం కుండలినీం శుక్లవస్త్రాం మనోహరామ్ || ౪ ||
ఆదిత్యమండలే లీనాం ప్రణమామి జనప్రియామ్ |
జ్ఞానాకారాం జగద్ద్వీపాం భక్తవిఘ్నవినాశినీమ్ || ౫ ||
ఇతి సత్యం స్తుతా దేవీ వాగీశేన మహాత్మనా |
ఆత్మానం దర్శయామాస శరదిందుసమప్రభామ్ || ౬ ||
శ్రీసరస్వత్యువాచ |
వరం వృణీష్వ భద్రం త్వం యత్తే మనసి వర్తతే |
బృహస్పతిరువాచ |
ప్రసన్నా యది మే దేవి పరం జ్ఞానం ప్రయచ్ఛ మే || ౭ ||
శ్రీసరస్వత్యువాచ |
దత్తం తే నిర్మలం జ్ఞానం కుమతిధ్వంసకారకమ్ |
స్తోత్రేణానేన మాం భక్త్యా యే స్తువంతి సదా నరాః || ౮ ||
లభంతే పరమం జ్ఞానం మమ తుల్యపరాక్రమాః |
కవిత్వం మత్ప్రసాదేన ప్రాప్నువంతి మనోగతమ్ || ౯ ||
త్రిసంధ్యం ప్రయతో భూత్వా యస్త్విమం పఠతే నరః |
తస్య కంఠే సదా వాసం కరిష్యామి న సంశయః || ౧౦ ||
ఇతి శ్రీరుద్రయామలే శ్రీబృహస్పతికృత శ్రీ సరస్వతీ స్తోత్రమ్ ||