ద్విసప్తతితమదశకమ్ (౭౨) – అక్రూరగోకులయాత్రా
కంసోఽథ నారదగిరా వ్రజవాసినం త్వా-
మాకర్ణ్య దీర్ణహృదయః స హి గాన్దినేయమ్ |
ఆహూయ కార్ముకమఖచ్ఛలతో భవన్త-
మానేతుమేనమహినోదహినాథశాయిన్ || ౭౨-౧ ||
అక్రూర ఏష భవదఙ్ఘ్రిపరశ్చిరాయ
త్వద్దర్శనాక్షమమనాః క్షితిపాలభీత్యా |
తస్యాజ్ఞయైవ పునరీక్షితుముద్యతస్త్వా-
మానన్దభారమతిభూరితరం బభార || ౭౨-౨ ||
సోఽయం రథేన సుకృతీ భవతో నివాసం
గచ్ఛన్మనోరథగణాంస్త్వయి ధార్యమాణాన్ |
ఆస్వాదయన్ముహురపాయభయేన దైవం
సమ్ప్రార్థయన్పథి న కిఞ్చిదపి వ్యజానాత్ || ౭౨-౩ ||
ద్రక్ష్యామి వేదశతగీతగతిం పుమాంసం
స్ప్రక్ష్యామి కింస్విదపినామ పరిష్వజేయమ్ |
కిం వక్ష్యతే స ఖలు మాం క్వను వీక్షితః స్యా-
దిత్థం నినాయ స భవన్మయమేవ మార్గమ్ || ౭౨-౪ ||
భూయః క్రమాదభివిశన్భవదఙ్ఘ్రిపూతం
వృన్దావనం హరవిరిఞ్చసురాభివన్ద్యమ్ |
ఆనన్దమగ్న ఇవ లగ్న ఇవ ప్రమోహే
కిం కిం దశాన్తరమవాప న పఙ్కజాక్ష || ౭౨-౫ ||
పశ్యన్నవన్దత భవద్విహృతిస్థలాని
పాంసుష్వవేష్టత భవచ్చరణాఙ్కితేషు |
కిం బ్రూమహే బహుజనా హి తదాపి జాతా
ఏవం తు భక్తితరలా విరలాః పరాత్మన్ || ౭౨-౬ ||
సాయం స గోపభవనాని భవచ్చరిత్ర-
గీతామృతప్రసృతకర్ణరసాయనాని |
పశ్యన్ప్రమోదసరిదేవ కిలోహ్యమానో
గచ్ఛన్భవద్భవనసన్నిధిమన్వయాసీత్ || ౭౨-౭ ||
తావద్దదర్శ పశుదోహవిలోకలోలం
భక్తోత్తమాగతిమివ ప్రతిపాలయన్తమ్ |
భూమన్ భవన్తమయమగ్రజవన్తమన్త-
ర్బ్రహ్మానుభూతిరససిన్ధుమివోద్వమన్తమ్ || ౭౨-౮ ||
సాయన్తనాప్లవవిశేషవివిక్తగాత్రౌ
ద్వౌ పీతనీలరుచిరాంబరలోభనీయౌ |
నాతిప్రపఞ్చధృతభూషణచారువేషౌ
మన్దస్మితార్ద్రవదనౌ స యువాం దదర్శ || ౭౨-౯ ||
దూరాద్రథాత్సమవరుహ్య నమన్తమేన-
ముత్థాప్య భక్తకులమౌలిమథోపగూహన్ |
హర్షాన్మితాక్షరగిరా కుశలానుయోగీ
పాణిం ప్రగృహ్య సబలోఽథ గృహం నినేథ || ౭౨-౧౦ ||
నన్దేన సాకమమితాదరమర్చయిత్వా
తం యాదవం తదుదితాం నిశమయ్య వార్తామ్ |
గోపేషు భూపతినిదేశకథాం నివేద్య
నానాకథాభిరిహ తేన నిశామనైషీః || ౭౨-౧౧ ||
చన్ద్రాగృహే కిముత చన్ద్రభగాగృహే ను
రాధాగృహే ను భవనే కిము మైత్రవిన్దే |
ధూర్తో విలంబత ఇతి ప్రమదాభిరుచ్చై-
రాశఙ్కితో నిశి మరుత్పురనాథ పాయాః || ౭౨-౧౨ ||
ఇతి ద్విసప్తతితమదశకం సమాప్తమ్ |