శ్రీమాన్ వేంకటనాథార్యః కవితార్కికకేసరీ |
వేదాంతాచార్యవర్యో మే సన్నిధత్తాం సదా హృది ||
గజేంద్రరక్షాత్వరితం భవంతం
గ్రాహైరివాహం విషయైర్వికృష్టః |
అపారవిజ్ఞానదయానుభావ-
-మాప్తం సతామష్టభుజం ప్రపద్యే || ౧ ||
త్వదేకశేషోఽహమనాత్మతంత్ర-
-స్త్వత్పాదలిప్సాం దిశతా త్వయైవ |
అసత్సమోఽప్యష్టభుజాస్పదేశ
సత్తామిదానీముపలంభితోఽస్మి || ౨ ||
స్వరూపరూపాస్త్రవిభూషణాద్యైః
పరత్వచింతాం త్వయి దుర్నివారామ్ |
భోగే మృదూపక్రమతామభీప్సన్
శీలాదిభిర్వారయసీవ పుంసామ్ || ౩ ||
శక్తిం శరణ్యాంతరశబ్దభాజాం
సారం చ సంతోల్య ఫలాంతరాణామ్ |
త్వద్దాస్యహేతోస్త్వయి నిర్విశంకం
న్యస్తాత్మనాం నాథ బిభర్షి భారమ్ || ౪ ||
అభీతిహేతోరనువర్తనీయం
నాథ త్వదన్యం న విభావయామి |
భయం కుతః స్యాత్ త్వయి సానుకంపే
రక్షా కుతః స్యాత్ త్వయి జాతరోషే || ౫ ||
త్వదేకతంత్రం కమలాసహాయ
స్వేనైవ మాం రక్షితుమర్హసి త్వమ్ |
త్వయి ప్రవృత్తే మమ కిం ప్రయాసై-
-స్త్వయ్యప్రవృత్తే మమ కిం ప్రయాసైః || ౬ ||
సమాధిభంగేష్వపి సంపతత్సు
శరణ్యభూతే త్వయి బద్ధకక్ష్యే |
అపత్రపే సోఢుమకించనోఽహం
దూరాధిరోహం పతనం చ నాథ || ౭ ||
ప్రాప్తాభిలాషం త్వదనుగ్రహాన్మాం
పద్మానిషేవ్యే తవ పాదపద్మే |
ఆదేహపాతాదపరాధదూర-
-మాత్మాంతకైంకర్యరసం విధేయాః || ౮ ||
ప్రపన్న జనపాథేయం ప్రపిత్సూనాం రసాయనమ్ |
శ్రేయసే జగతామేతచ్ఛ్రీమదష్టభుజాష్టకమ్ || ౯ ||
శరణాగతసంత్రాణత్వరాద్విగుణబాహునా |
హరిణా వేంకటేశీయా స్తుతిః స్వీక్రియతామియమ్ || ౧౦ ||
కవితార్కికసింహాయ కళ్యాణగుణశాలినే |
శ్రీమతే వేంకటేశాయ వేదాంతగురవే నమః ||
ఇతి శ్రీ వేదాంతదేశిక కృతం శ్రీ అష్టభుజాష్టకమ్ |