ఆ నో᳚ భ॒ద్రాః క్రత॑వో యన్తు వి॒శ్వతోఽద॑బ్ధాసో॒ అప॑రీతాస ఉ॒ద్భిద॑: |
దే॒వా నో॒ యథా॒ సద॒మిద్ వృ॒ధే అస॒న్నప్రా᳚యువో రక్షి॒తారో᳚ ది॒వేది॑వే || ౦౧
దే॒వానాం᳚ భ॒ద్రా సు॑మ॒తిరృ॑జూయ॒తాం దే॒వానాం᳚ రా॒తిర॒భి నో॒ ని వ॑ర్తతామ్ |
దే॒వానాం᳚ స॒ఖ్యముప॑ సేదిమా వ॒యం దే॒వా న॒ ఆయు॒: ప్రతి॑రన్తు జీ॒వసే॑ || ౦౨
తాన్పూర్వ॑యా ని॒విదా᳚ హూమహే వ॒యం భగం᳚ మి॒త్రమది॑తిం॒ దక్ష॑మ॒స్రిధమ్᳚ |
అ॒ర్య॒మణం॒ వరు॑ణం॒ సోమ॑మ॒శ్వినా॒ సర॑స్వతీ నః సు॒భగా॒ మయ॑స్కరత్ || ౦౩
తన్నో॒ వాతో᳚ మయో॒భువా᳚తు భేష॒జం తన్మా॒తా పృ॑థి॒వీ తత్పి॒తా ద్యౌః |
తద్ గ్రావా᳚ణః సోమ॒సుతో᳚ మయో॒భువ॒స్తద॑శ్వినా శృణుతం ధిష్ణ్యా యు॒వమ్ || ౦౪
తమీశా᳚నం॒ జగ॑తస్త॒స్థుష॒స్పతిం᳚ ధియఞ్జి॒న్వమవ॑సే హూమహే వ॒యమ్ |
పూ॒షా నో॒ యథా॒ వేద॑సా॒మస॑ద్వృ॒ధే ర॑క్షి॒తా పా॒యురద॑బ్ధః స్వ॒స్తయే᳚ || ౦౫
స్వ॒స్తి న॒ ఇన్ద్రో᳚ వృ॒ద్ధశ్ర॑వాః స్వ॒స్తి న॑: పూ॒షా వి॒శ్వవే᳚దాః |
స్వ॒స్తి న॒స్తార్క్ష్యో॒ అరి॑ష్టనేమిః స్వ॒స్తి నో॒ బృహ॒స్పతి॑ర్దధాతు || ౦౬
పృష॑దశ్వా మ॒రుత॒: పృశ్ని॑మాతరః శుభ॒మ్యావా᳚నో వి॒దథే᳚షు॒ జగ్మ॑యః |
అ॒గ్ని॒జి॒హ్వా మన॑వ॒: సూర॑చక్షసో॒ విశ్వే᳚ నో దే॒వా అవ॒సా గ॑మన్ని॒హ || ౦౭
భ॒ద్రం కర్ణే᳚భిః శృణుయామ దేవా భ॒ద్రం ప॑శ్యేమా॒క్షభి॑ర్యజత్రాః |
స్థి॒రైరఙ్గై᳚స్తుష్టు॒వాంస॑స్త॒నూభి॒ర్వ్య॑శేమ దే॒వహి॑తం॒ యదాయు॑: || ౦౮
శ॒తమిన్ను శ॒రదో॒ అన్తి॑ దేవా॒ యత్రా᳚ నశ్చ॒క్రా జ॒రసం᳚ త॒నూనా᳚మ్ |
పు॒త్రాసో॒ యత్ర॑ పి॒తరో॒ భవ᳚న్తి॒ మా నో᳚ మ॒ధ్యా రీ᳚రిష॒తాయు॒ర్గన్తో᳚: || ౦౯
అది॑తి॒ర్ద్యౌరది॑తిర॒న్తరి॑క్ష॒మది॑తిర్మా॒తా స పి॒తా స పు॒త్రః |
విశ్వే᳚ దే॒వా అది॑తి॒: పఞ్చ॒ జనా॒ అది॑తిర్జా॒తమది॑తి॒ర్జని॑త్వమ్ || ౧౦
ఓం శాన్తి॒: శాన్తి॒: శాన్తి॑: ||
మరిన్ని వేదసూక్తములు చూడండి.